ಯುವಕರಿಬ್ಬರಿಗೆ ಅದ್ಧೂರಿಯಾಗಿ ಮದುವೆ ಮಾಡಿಸಿದ ಗ್ರಾಮಸ್ಥರು: ಕಾರಣ ಕೇಳಿದ್ರೆ ನಿಮ್ಮ ಹುಬ್ಬೇರೋದು ಖಚಿತ! Strange Custom

Strange Custom : ದೇಶದ ಕೆಲವು ಭಾಗಗಳಲ್ಲಿ ಮಳೆ ಕೈಕೊಟ್ಟಾಗ ವರುಣ ದೇವನನ್ನು ಪ್ರಸನ್ನಗೊಳಿಸಲು ಕತ್ತೆಗಳಿಗೆ ಮದುವೆ ಮಾಡಿಸುವುದು, ಕಪ್ಪೆಗಳಿಗೆ ಕಲ್ಯಾಣ ಮಹೋತ್ಸವ ಮಾಡುವುದನ್ನು ನೀವು ಕೇಳಿರುತ್ತೀರಿ. ಆದರೆ, ಇಲ್ಲೊಂದು ಹಳ್ಳಿಯ ಜನ ಮಳೆಗಾಗಿ ಇವೆಲ್ಲದಕ್ಕಿಂತ ಭಿನ್ನವಾದ, ಅತ್ಯಂತ ವಿಚಿತ್ರ ಹಾಗೂ ನವೀನ ಹಾದಿಯೊಂದನ್ನು ಹಿಡಿದಿದ್ದಾರೆ! ಸಕಾಲಕ್ಕೆ ಮಳೆಯಾಗಿ ಪ್ರಕೃತಿ ಕರುಣೆ ತೋರಲಿ ಎಂಬ ನಂಬಿಕೆಯಿಂದ ಇಬ್ಬರು ಯುವಕರಿಗೆ ಹಿಂದೂ ಸಂಪ್ರದಾಯದಂತೆ ಅದ್ಧೂರಿಯಾಗಿ ಮದುವೆ ಮಾಡಿಸಿರುವ ಅಪರೂಪದ ಘಟನೆಯೊಂದು ಈಗ ದೇಶಾದ್ಯಂತ ಭಾರಿ ಸಂಚಲನ ಮೂಡಿಸುತ್ತಿದೆ.

ಒಡಿಶಾ ರಾಜ್ಯದ ಜಾಜ್‌ಪುರ ಜಿಲ್ಲೆಯ ಕೊರೇಯಿ ಸಮಿತಿಯು ಗಮಾಮಿಯಾ ಗ್ರಾಮದಲ್ಲಿ ಈ ವಿಶಿಷ್ಟ ಮತ್ತು ವಿಚಿತ್ರ ಸಂಪ್ರದಾಯಕ್ಕೆ ಮುನ್ನುಡಿ ಬರೆದಿದೆ. ಸ್ಥಳೀಯ ಭಾಷೆಯಲ್ಲಿ 'ಅಂದಿರಾ ಬಿಬಹಾ' (ಪುರುಷರ ವಿವಾಹ) ಎಂದು ಕರೆಯಲಾಗುವ ಈ ಆಚರಣೆಯನ್ನು ಇಡೀ ಗ್ರಾಮಸ್ಥರು ಒಟ್ಟಾಗಿ ಅತ್ಯಂತ ಸಡಗರ-ಸಂಭ್ರಮದಿಂದ ಆಚರಿಸಿದ್ದಾರೆ. ಪ್ರಕೃತಿಯ ಮುನಿಸು ಕಡಿಮೆಯಾಗಿ ಸಕಾಲಕ್ಕೆ ಮಳೆ ಸುರಿಯಲಿ ಎಂಬ ದೃಢ ನಂಬಿಕೆ ಈ ಆಚರಣೆಯ ಹಿಂದಿದೆ.

ಈ ಅಪೂರ್ವ ವಿವಾಹ ಮಹೋತ್ಸವಕ್ಕಾಗಿ ಗ್ರಾಮದ ಜತಿನ್ ಖಟುವಾ ಎಂಬ ಯುವಕನನ್ನು ವರನನ್ನಾಗಿ ಸಿಂಗರಿಸಲಾಗಿತ್ತು. ಮತ್ತೊಂದೆಡೆ, ಕೊಲಾಂಡಿ ನಾಯಕ್ ಎಂಬ ಮತ್ತೊಬ್ಬ ಯುವಕನಿಗೆ ವಧುವಿನಂತೆ ಸೀರೆ ಉಡಿಸಿ, ಆಭರಣಗಳನ್ನು ತೊಡಿಸಿ ನವವಧುವಿನಂತೆ ಅಲಂಕರಿಸಲಾಗಿತ್ತು. ಸ್ಥಳೀಯ ಪಂಚಾಯಿತಿ ಸದಸ್ಯರಾದ ಬಿಷ್ಣು ಚರಣ್ ರಥ್ ಅವರ ನೇತೃತ್ವ ಮತ್ತು ಮಾರ್ಗದರ್ಶನದಲ್ಲಿ ಗ್ರಾಮದ ಹಿರಿಯರೆಲ್ಲರೂ ಒಂದೆಡೆ ಸೇರಿ ಈ ವಿವಾಹ ಕಾರ್ಯವನ್ನು ಶಾಸ್ತ್ರೋಕ್ತವಾಗಿ ನೆರವೇರಿಸಲು ಸಕಲ ಸಿದ್ಧತೆ ಮಾಡಿಕೊಂಡಿದ್ದರು.

ಸಾಮಾನ್ಯ ಮದುವೆಯಂತೆಯೇ ವರ ಜತಿನ್‌ನನ್ನು ಅತ್ಯಂತ ಅದ್ಧೂರಿ ಮೆರವಣಿಗೆಯ ಮೂಲಕ ಮದುವೆ ಮಂಟಪಕ್ಕೆ ಕರೆತರಲಾಯಿತು. ಹೂವುಗಳಿಂದ ಅಲಂಕರಿಸಲ್ಪಟ್ಟ ಕಾರಿನಲ್ಲಿ ವರನನ್ನು ಕೂರಿಸಿ, ಡಿಜೆ ಸಂಗೀತದ ಅಬ್ಬರ ಹಾಗೂ ಗ್ರಾಮಸ್ಥರ ಸಮ್ಮೋಹಕ ನೃತ್ಯದೊಂದಿಗೆ ಗ್ರಾಮದ ಪ್ರಮುಖ ಬೀದಿಗಳಲ್ಲಿ ಅದ್ಧೂರಿ ಮೆರವಣಿಗೆ ಸಾಗಿತು. ಇಡೀ ಗ್ರಾಮವೇ ಮದುವೆಯ ಸಂಭ್ರಮದಲ್ಲಿ ಮುಳುಗಿ ತೇಲುತ್ತಿತ್ತು.

ಈ ಭವ್ಯ ಮೆರವಣಿಗೆಯು ಗ್ರಾಮದ ಪ್ರಸಿದ್ಧ ಸಿದ್ದೇಶ್ವರಿ ದೇವಸ್ಥಾನವನ್ನು ತಲುಪಿದಾಗ, ಅಲ್ಲಿ ಈಗಾಗಲೇ ವಧುವಿನ ವೇಷದಲ್ಲಿ ಸಜ್ಜಾಗಿದ್ದ ಕೊಲಾಂಡಿ ನಾಯಕ್ ವರನನ್ನು ಬರಮಾಡಿಕೊಂಡರು. ದೇವಸ್ಥಾನದ ಆವರಣದಲ್ಲಿ ಪುರೋಹಿತರ ವೇದಮಂತ್ರಗಳ ಪಠಣ, ಮಂಗಳವಾದ್ಯಗಳ ನಡುವೆ ಇಬ್ಬರು ಯುವಕರು ವಿವಾಹದ ಬಂಧನಕ್ಕೆ ಒಳಗಾದರು. ಮದುವೆಯ ನಂತರ ಇಡೀ ಗ್ರಾಮಸ್ಥರಿಗೆ ಸಾಂಪ್ರದಾಯಿಕ ಶೈಲಿಯ ಅದ್ದೂರಿ ಭೋಜನದ ವ್ಯವಸ್ಥೆ ಮಾಡಲಾಗಿತ್ತು. ಈ ಮೂಲಕ ವರುಣ ದೇವನಿಗಾಗಿ ನಡೆದ ಈ ವಿಚಿತ್ರ ಹಾಗೂ ವಿಭಿನ್ನ ಮದುವೆ ಮಹೋತ್ಸವವು ಅತ್ಯಂತ ಯಶಸ್ವಿಯಾಗಿ ಸಂಪನ್ನಗೊಂಡಿದ್ದು, ಪ್ರಸ್ತುತ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿದೆ, (ಏಜೆನ್ಸೀಸ್​).