ಟ್ರಾಫಿಕ್‌ನಲ್ಲಿ ಕಾರು ನಿಲ್ಲಿಸಿ ರಸ್ತೆಯಲ್ಲೇ ಮೂತ್ರ ವಿಸರ್ಜನೆ! ವೈರಲ್ ವಿಡಿಯೋ ನೋಡಿ ನೆಟ್ಟಿಗರಿಂದ ತರಾಟೆ | Urinating on road

ಫರಿದಾಬಾದ್/ಗುರುಗ್ರಾಮ್: ರಸ್ತೆಯಲ್ಲಿ ಸಂಚರಿಸುವಾಗ ನಾಗರಿಕ ಪ್ರಜ್ಞೆ ಇರಬೇಕು ಎಂಬುದು ಕನಿಷ್ಠ ಜ್ಞಾನ. ಆದರೆ, ಐಷಾರಾಮಿ ಎಸ್‌ಯುವಿ ಕಾರಿನಲ್ಲಿ ಓಡಾಡುವ ವ್ಯಕ್ತಿಯೊಬ್ಬ ಟ್ರಾಫಿಕ್ ಸಿಗ್ನಲ್ ಮಧ್ಯೆಯೇ ಕಾರು ನಿಲ್ಲಿಸಿ, ರಸ್ತೆಯಲ್ಲೇ ಮೂತ್ರ ವಿಸರ್ಜನೆ (Urinating on road) ಮಾಡಿರುವ ಅಸಹ್ಯಕರ ಘಟನೆ ಈಗ ಸಾಮಾಜಿಕ ಮಾಧ್ಯಮಗಳಲ್ಲಿ ವೈರಲ್​ ಆಗುತ್ತಿದೆ.

ದೆಹಲಿಯಿಂದ ಫರಿದಾಬಾದ್‌ಗೆ ಸಂಪರ್ಕಿಸುವ ಹಳೆಯ ಫರಿದಾಬಾದ್ ಬಳಿ ಈ ಘಟನೆ ನಡೆದಿದೆ. ಕಪ್ಪು ಬಣ್ಣದ ಸ್ಕಾರ್ಪಿಯೋ ಎಸ್‌ಯುವಿಯಲ್ಲಿ ಬಂದ ವ್ಯಕ್ತಿಯೊಬ್ಬ, ಸಿಗ್ನಲ್ ಕೆಂಪು ಬಣ್ಣಕ್ಕೆ ತಿರುಗಿದಾಗ ಕಾರಿನಿಂದ ಕೆಳಗಿಳಿದಿದ್ದಾನೆ. ಸುತ್ತಲೂ ನೂರಾರು ವಾಹನಗಳು ಸಂಚರಿಸುತ್ತಿದ್ದರೂ, ಪಾದಚಾರಿಗಳು ಹಾಗೂ ಮಹಿಳೆಯರು ಓಡಾಡುತ್ತಿದ್ದರೂ ಕಿಂಚಿತ್ತೂ ನಾಚಿಕೆ ಇಲ್ಲದೆ ರಸ್ತೆಯ ಮೇಲೆಯೇ ಮೂತ್ರ ವಿಸರ್ಜನೆ ಮಾಡಿದ್ದಾನೆ.

ಈ ವಿಡಿಯೋ ಎಕ್ಸ್ (ಟ್ವಿಟರ್​) ನಲ್ಲಿ ವೈರಲ್ ಆಗುತ್ತಿದ್ದಂತೆ, ಜನರು ದೆಹಲಿ ಮತ್ತು ಗುರುಗ್ರಾಮ್ ಪೊಲೀಸರನ್ನು ಟ್ಯಾಗ್ ಮಾಡಿ ಈತನ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳುವಂತೆ ಒತ್ತಾಯಿಸಿದ್ದಾರೆ. ಕಾರಿನ ನಂಬರ್ ಪ್ಲೇಟ್ ಫರಿದಾಬಾದ್ ನೋಂದಣಿಯದ್ದಾಗಿದ್ದು, ಪೊಲೀಸರು ತನಿಖೆ ಆರಂಭಿಸಿದ್ದಾರೆ. ಫರಿದಾಬಾದ್ ಪೊಲೀಸ್ ವಕ್ತಾರ ಯಶ್ಪಾಲ್ ಸಿಂಗ್, ವಾಹನದ ವಿವರಗಳ ಆಧಾರದ ಮೇಲೆ ವ್ಯಕ್ತಿಯನ್ನು ಗುರುತಿಸುವ ಪ್ರಕ್ರಿಯೆ ನಡೆಯುತ್ತಿದೆ. ಶೀಘ್ರದಲ್ಲೇ ಆತನನ್ನು ಠಾಣೆಗೆ ಕರೆಸಿ ಕಾನೂನು ಕ್ರಮ ಕೈಗೊಳ್ಳಲಾಗುವುದು ಎಂದಿದ್ದಾರೆ.

ಈ ವಿಡಿಯೋ ಕಂಡು ಜನರು ಎರಡು ಗುಂಪುಗಳಾಗಿ ಚರ್ಚಿಸುತ್ತಿದ್ದಾರೆ. ಬಹುತೇಕರು ಇದು ರಾಷ್ಟ್ರೀಯ ಅವಮಾನ, ಇಂತಹವರಿಗೆ ಭಾರೀ ದಂಡ ಹಾಕಬೇಕು ಎಂದು ಆಕ್ರೋಶ ಹೊರಹಾಕಿದ್ದಾರೆ. ಲಕ್ಷಾಂತರ ರೂಪಾಯಿ ಕಾರನ್ನು ಖರೀದಿಸಿದ್ದರೆನಂತೆ ಸಂಸ್ಕಾರವನ್ನು ಕೊಂಡು ಕೊಳ್ಳಲು ಆಗಲ್ಲ ಎಂದು ಕಮೆಂಟ್​ನಲ್ಲಿ ಜರಿದಿದ್ದಾರೆ.

ಇನ್ನೊಂದೆಡೆ, ಕೆಲವರು ಈತನ ಪರವಾಗಿಯೂ ಮಾತನಾಡಿದ್ದು, ಭಾರತದ ರಸ್ತೆಗಳಲ್ಲಿ ಶೌಚಾಲಯಗಳ ಕೊರತೆಯಿದೆ. ಟ್ರಾಫಿಕ್ ಜಾಮ್‌ನಲ್ಲಿ ಸಿಲುಕಿದಾಗ ಅನಿವಾರ್ಯವಾಗಿ ಹೀಗೆ ಮಾಡಿರಬಹುದು. ಎಂದು ಕೆಲವರು ಹೇಳಿದರೆ,ಬಹುಶಃ ಈ ವ್ಯಕ್ತಿಗೆ ಯಾವುದಾದರೂ ಆರೋಗ್ಯ ಸಮಸ್ಯೆ ಇರಬಹುದು ಎಂಬ ಅಭಿಪ್ರಾಯವೂ ವ್ಯಕ್ತವಾಗಿದೆ,(ಏಜನ್ಸೀಸ್​).