ಪರ್ಫೆಕ್ಟ್ ಜೊತೆಗಾರನಿಗಾಗಿ ಹುಡುಕಾಟ ಬಿಡಿ: ಡೇಟಿಂಗ್ ಜಗತ್ತಿನಲ್ಲಿ ಈಗ 6-7 ಡೇಟಿಂಗ್ ಟ್ರೆಂಡ್ ಹವಾ..! 6-7 Dating

ಸಾಮಾನ್ಯವಾಗಿ ನಾವು ಡೇಟಿಂಗ್ ಆಪ್‌ಗಳಲ್ಲಿ ಅಥವಾ ಜೀವನದಲ್ಲಿ ಒಬ್ಬ ವ್ಯಕ್ತಿಯನ್ನು ಭೇಟಿಯಾದಾಗ ಅವರ ರೂಪ, ಗುಣ, ಹಣ ಮತ್ತು ವ್ಯಕ್ತಿತ್ವಕ್ಕೆ 1 ರಿಂದ 10 ರವರೆಗೆ ಅಂಕ ನೀಡುತ್ತೇವೆ. ನಾವು ಸದಾ ಪರ್ಫೆಕ್ಟ್ 10 ಗಾಗಿ ಹುಡುಕಾಟ ನಡೆಸುತ್ತೇವೆ. ಆದರೆ 6-7 ಡೇಟಿಂಗ್ ಪ್ರಕಾರ, ನೀವು ಯಾರನ್ನಾದರೂ ಮೊದಲ ನೋಟದಲ್ಲೇ 6 ಅಥವಾ 7 ಅಂಕ ನೀಡುವಷ್ಟು ಇಷ್ಟಪಟ್ಟರೆ, ಅವರೊಂದಿಗೆ ಸಂಬಂಧ ಮುಂದುವರಿಸುವುದು ಉತ್ತಮ ಎಂಬುದು ಈ ಟ್ರೆಂಡ್‌ನ ಸಾರಾಂಶವಾಗಿದೆ.

ಸಿನಿಮಾಗಳು ಮತ್ತು ಕಾದಂಬರಿಗಳು ನಮ್ಮ ತಲೆಯಲ್ಲಿ ಪರ್ಫೆಕ್ಟ್ ರೋಮ್ಯಾನ್ಸ್ ಬಗ್ಗೆ ತಪ್ಪು ಕಲ್ಪನೆಗಳನ್ನು ತುಂಬಿವೆ. ಇದರಿಂದಾಗಿ ನೈಜ ಜೀವನದ ಸಣ್ಣಪುಟ್ಟ ಕೊರತೆಗಳಿರುವ ಮನುಷ್ಯರು ನಮಗೆ ಇಷ್ಟವಾಗುತ್ತಿಲ್ಲ. ಆದರೆ, 6-7 ರೇಟಿಂಗ್ ಪಡೆಯುವ ವ್ಯಕ್ತಿಗಳು ಹೆಚ್ಚು ವಾಸ್ತವಿಕವಾಗಿರುತ್ತಾರೆ. ಇಲ್ಲಿ ಅನಿವಾರ್ಯವಾಗಿ ಒಪ್ಪಿಕೊಳ್ಳುವುದು ಮುಖ್ಯವಲ್ಲ, ಬದಲಿಗೆ ಭಾವನಾತ್ಮಕ ಸ್ಥಿರತೆ ಮತ್ತು ಬೆಂಬಲ ನೀಡುವ ವ್ಯಕ್ತಿಯನ್ನು ಆಯ್ಕೆ ಮಾಡಿಕೊಳ್ಳುವುದು ಮುಖ್ಯ ಉದ್ದೇಶವಾಗಿದೆ.

ಒತ್ತಡ ಮುಕ್ತ ಸಂಬಂಧ: 10/10 ಜೊತೆಗಾರನೊಂದಿಗೆ ಇರಲು ನಾವು ಸದಾ ಪರಿಪೂರ್ಣವಾಗಿರಬೇಕು ಎಂಬ ಒತ್ತಡವಿರುತ್ತದೆ. ಆದರೆ 6-7 ಡೇಟಿಂಗ್‌ನಲ್ಲಿ ಆರಾಮವಾಗಿರಬಹುದು.

ಭಾವನಾತ್ಮಕ ಬೆಂಬಲ: ಸೌಂದರ್ಯಕ್ಕಿಂತ ಹೆಚ್ಚಾಗಿ ಮನಸ್ಸಿನ ಶಾಂತಿ ಮತ್ತು ಭಾವನಾತ್ಮಕ ಸ್ಥಿರತೆಗೆ ಇಲ್ಲಿ ಬೆಲೆ ಹೆಚ್ಚು.

ದೀರ್ಘಕಾಲದ ಸಂಬಂಧ: ಫ್ಯಾಂಟಸಿ ಪ್ರೀತಿ ಬೇಗನೆ ಮಾಸಬಹುದು, ಆದರೆ ವಾಸ್ತವದ ಅರಿವಿರುವ ಸಂಬಂಧಗಳು ಹೆಚ್ಚು ಕಾಲ ಬಾಳಿಕೆ ಬರುತ್ತವೆ.

ಡೇಟಿಂಗ್ ತಜ್ಞರ ಪ್ರಕಾರ, ಅತಿಯಾದ ನಿರೀಕ್ಷೆಗಳು ಮನುಷ್ಯನನ್ನು ಏಕಾಂಗಿಯನ್ನಾಗಿ ಮಾಡುತ್ತಿವೆ. ಹೀಗಾಗಿ, ಸ್ವಲ್ಪ ಮಟ್ಟದ ರಾಜಿ ಮತ್ತು ಹೆಚ್ಚಿನ ಮಟ್ಟದ ಅನ್ಯೋನ್ಯತೆ ಇರುವ 6-7 ರೇಟಿಂಗ್‌ನ ವ್ಯಕ್ತಿಗಳೇ ಇಂದಿನ ಒತ್ತಡದ ಬದುಕಿಗೆ ಸೂಕ್ತ ಜೊತೆಗಾರರು,(ಏಜೆನ್ಸೀಸ್).