ಷೇರು ಮಾರುಕಟ್ಟೆಯಲ್ಲಿ 'ಬಜೆಟ್' ನಡುಕ: ಹೂಡಿಕೆದಾರರ 3 ದಿನಗಳ ಸಂಭ್ರಮಕ್ಕೆ ಬ್ರೇಕ್, ಸೆನ್ಸೆಕ್ಸ್ 297 ಅಂಕ ಕುಸಿತ! | Share Market

ಹೌದು, ಹೂಡಿಕೆದಾರರು ಮುನ್ನೆಚ್ಚರಿಕೆ ಕ್ರಮವಾಗಿ ಲಾಭವನ್ನು ನಗದೀಕರಿಸಿಕೊಳ್ಳಲು (Profit Booking) ಮುಂದಾದ ಕಾರಣ, ಸೆನ್ಸೆಕ್ಸ್ ಮತ್ತು ನಿಫ್ಟಿ ಕೆಂಪು ಬಣ್ಣದೊಂದಿಗೆ ವಹಿವಾಟು ಮುಗಿಸಿವೆ.

ಇನ್ನು ಶುಕ್ರವಾರದ ವಹಿವಾಟಿನ ಅಂತ್ಯಕ್ಕೆ ಮಾರುಕಟ್ಟೆಯ ಸ್ಥಿತಿಗತಿ ಹೀಗಿತ್ತು. ಬಿಎಸ್‌ಇ ಸೆನ್ಸೆಕ್ಸ್ (Sensex) 297 ಅಂಕಗಳಷ್ಟು ಕುಸಿತ ಕಂಡು 83,120 ಮಟ್ಟದಲ್ಲಿ ಸ್ಥಿರವಾಯಿತು. ನಿಫ್ಟಿ (Nifty) 90 ಅಂಕಗಳಿಗಿಂತ ಹೆಚ್ಚು ಕುಸಿದು 25,350 ರ ಮಟ್ಟಕ್ಕಿಂತ ಕೆಳಕ್ಕೆ ಜಾರಿದೆ.

ಮಾರುಕಟ್ಟೆಯ ಈ ದಿಢೀರ್ ಕುಸಿತದಿಂದಾಗಿ ಹೂಡಿಕೆದಾರರ ಲಕ್ಷಾಂತರ ಕೋಟಿ ರೂಪಾಯಿ ಸಂಪತ್ತು ಕರಗಿ ಹೋಗಿದೆ. ಬಜೆಟ್‌ನಲ್ಲಿ ಬರಲಿರುವ ಹೊಸ ತೆರಿಗೆ ನಿಯಮಗಳು ಮತ್ತು ಆರ್ಥಿಕ ಸುಧಾರಣೆಗಳ ಬಗ್ಗೆ ಹೂಡಿಕೆದಾರರಲ್ಲಿ ಮನೆಮಾಡಿರುವ ಆತಂಕವೇ ಈ ಕುಸಿತಕ್ಕೆ ಪ್ರಮುಖ ಕಾರಣ ಎಂದು ವಿಶ್ಲೇಷಿಸಲಾಗಿದೆ.

ಬಜೆಟ್ ಪೂರ್ವ ಆತಂಕ: ಫೆಬ್ರವರಿ 1 ರಂದು ಮಂಡನೆಯಾಗಲಿರುವ ಕೇಂದ್ರ ಬಜೆಟ್‌ನಲ್ಲಿ ಬಂಡವಾಳ ಲಾಭದ ತೆರಿಗೆ (Capital Gains Tax) ನಿಯಮಗಳಲ್ಲಿ ಬದಲಾವಣೆಯಾಗಬಹುದು ಎಂಬ ವದಂತಿಗಳು ಹೂಡಿಕೆದಾರರನ್ನು ಕಾಡುತ್ತಿವೆ.

ಜಾಗತಿಕ ಪ್ರಭಾವ: ಅಮೆರಿಕದ ಫೆಡರಲ್ ರಿಸರ್ವ್‌ನ ಕಠಿಣ ನಿಲುವು ಮತ್ತು ಕ್ಯೂಬಾ ವಿಚಾರದಲ್ಲಿ ಟ್ರಂಪ್ ಘೋಷಿಸಿದ ರಾಷ್ಟ್ರೀಯ ತುರ್ತು ಪರಿಸ್ಥಿತಿಯಿಂದಾಗಿ ಜಾಗತಿಕ ಮಾರುಕಟ್ಟೆಗಳಲ್ಲಿ ಅಸ್ಥಿರತೆ ಉಂಟಾಗಿದೆ.

ಐಟಿ ಮತ್ತು ಬ್ಯಾಂಕಿಂಗ್ ನಷ್ಟ: ಇಂದು ವಿಶೇಷವಾಗಿ ಐಟಿ (IT) ಮತ್ತು ಖಾಸಗಿ ಬ್ಯಾಂಕಿಂಗ್ ವಲಯದ ಷೇರುಗಳು ಭಾರಿ ಮಾರಾಟದ ಒತ್ತಡಕ್ಕೆ ಒಳಗಾದವು. ರಿಲಯನ್ಸ್ ಇಂಡಸ್ಟ್ರೀಸ್ ಮತ್ತು ಎಚ್‌ಡಿಎಫ್‌ಸಿ ಬ್ಯಾಂಕ್‌ನಂತಹ ದೊಡ್ಡ ಕಂಪನಿಗಳ ಷೇರುಗಳು ಕುಸಿತ ಕಂಡಿವೆ.

ಟಾಪ್ ಲೂಸರ್ಸ್: ಎಚ್‌ಸಿಎಲ್ ಟೆಕ್, ಇನ್ಫೋಸಿಸ್, ಆಕ್ಸಿಸ್ ಬ್ಯಾಂಕ್ ಮತ್ತು ವಿಪ್ರೋ ಕಂಪನಿಗಳು ನಷ್ಟ ಅನುಭವಿಸಿದವು.

ಟಾಪ್ ಗೇನರ್ಸ್: ಕುಸಿತದ ನಡುವೆಯೂ ಕೆಲವು ಫಾರ್ಮಾ ಮತ್ತು ಎಫ್‌ಎಂಸಿಜಿ (FMCG) ಕಂಪನಿಗಳು ಅಲ್ಪ ಮಟ್ಟದ ಚೇತರಿಕೆ ಕಂಡಿವೆ.

"ಬಜೆಟ್ ದಿನದವರೆಗೆ ಮಾರುಕಟ್ಟೆಯಲ್ಲಿ ಇಂತಹ ಏರಿಳಿತಗಳು ಸಾಮಾನ್ಯ. ಹೂಡಿಕೆದಾರರು ಈಗ ಹೊಸ ಹೂಡಿಕೆ ಮಾಡುವ ಬದಲು 'ವೇಟ್ ಅಂಡ್ ವಾಚ್' (ಕಾದು ನೋಡುವ) ತಂತ್ರವನ್ನು ಅನುಸರಿಸುತ್ತಿದ್ದಾರೆ. ಬಜೆಟ್ ಘೋಷಣೆಗಳ ನಂತರವೇ ಮಾರುಕಟ್ಟೆಯ ಮುಂದಿನ ದಿಕ್ಕು ನಿರ್ಧಾರವಾಗಲಿದೆ," ಎಂದು ಷೇರು ಮಾರುಕಟ್ಟೆ ತಜ್ಞರು ತಿಳಿಸಿದ್ದಾರೆ,(ಏಜೆನ್ಸೀಸ್​).