ಷೇರುಪೇಟೆಲಿ ರಕ್ತಪಾತ: 1,097 ಪಾಯಿಂಟ್ಸ್ ಕುಸಿದ Sensex, 24,500ರ ಗಡಿ ಕೆಳಕ್ಕೆ ಜಾರಿದ ನಿಫ್ಟಿ!

ಇರಾನ್-ಅಮೆರಿಕ ಸಂಘರ್ಷ: ಇರಾನ್‌ನಲ್ಲಿ ನಡೆಯುತ್ತಿರುವ ಯುದ್ಧವು ಹತೋಟಿಗೆ ಬರುವ ಯಾವುದೇ ಲಕ್ಷಣಗಳು ಕಾಣಿಸುತ್ತಿಲ್ಲ. ಇದು ಇಡೀ ಗಲ್ಫ್ ಪ್ರದೇಶವನ್ನು ಆವರಿಸಿಕೊಂಡಿದ್ದು, ಜಾಗತಿಕ ತೈಲ ಪೂರೈಕೆಯ ಮೇಲೆ ತೀವ್ರ ಒತ್ತಡ ಹೇರಿದೆ.

ಅಮೆರಿಕ ಮಾರುಕಟ್ಟೆಯ ಪ್ರಭಾವ: ಅಮೆರಿಕದ ಪ್ರಮುಖ ಸೂಚ್ಯಂಕವಾದ 'ಡೌ ಜೋನ್ಸ್' (Dow Jones) ಏಕಾಏಕಿ 785 ಪಾಯಿಂಟ್ಸ್ (1.6%) ಕುಸಿತ ಕಂಡಿದ್ದು, ಇದರ ಬಿಸಿ ಏಷ್ಯಾದ ಮಾರುಕಟ್ಟೆಗಳಿಗೂ ತಟ್ಟಿದೆ. ಇರಾನ್ ಯುದ್ಧ ಆರಂಭವಾದಾಗಿನಿಂದ ಏಷ್ಯಾದ ಮಾರುಕಟ್ಟೆ ಸೂಚ್ಯಂಕ ಶೇ. 6.5 ರಷ್ಟು ಕುಸಿದಿದೆ.

ತೈಲ ಬೆಲೆ ಏರಿಕೆ: ಕಚ್ಚಾ ತೈಲದ ಬೆಲೆ ಗಗನಕ್ಕೇರುತ್ತಿದೆ. ಬ್ರೆಂಟ್ ಕ್ರೂಡ್ ಬೆಲೆ ಬ್ಯಾರಲ್ ಲವೊಂದಕ್ಕೆ $85 ದಾಟಿದ್ದರೆ, ಅಮೆರಿಕದ ಕಚ್ಚಾ ತೈಲ ಬೆಲೆ ಶೇ. 8.5 ರಷ್ಟು ಜಿಗಿದು $81.01 ತಲುಪಿದೆ. ಇದು 2020ರ ನಂತರದ ಅತಿ ದೊಡ್ಡ ಏರಿಕೆಯಾಗಿದೆ.

ಇಂದಿನ ವಹಿವಾಟಿನಲ್ಲಿ ಇಂಡಿಗೋ, ಐಸಿಐಸಿಐ ಬ್ಯಾಂಕ್ ಮತ್ತು ಎಲ್ ಅಂಡ್ ಟಿ (L&T) ಕಂಪನಿಗಳು ಅತಿ ಹೆಚ್ಚು ನಷ್ಟ ಅನುಭವಿಸಿದವು. ವಿಶೇಷವಾಗಿ ರಿಯಾಲ್ಟಿ ವಲಯವು (Nifty Realty) ಶೇ. 2 ರಷ್ಟು ಕುಸಿತ ಕಂಡು ಕಂಗೆಟ್ಟಿದೆ. ಆದರೆ, ಯುದ್ಧದ ಸನ್ನಿವೇಶದ ನಡುವೆಯೂ ರಕ್ಷಣಾ ವಲಯದ (Defence Sector) ಕಂಪನಿಗಳ ಷೇರುಗಳು ಭರ್ಜರಿ ಬೇಡಿಕೆ ಕಂಡಿವೆ. ಸಾರ್ವಜನಿಕ ಮತ್ತು ಖಾಸಗಿ ವಲಯದ ರಕ್ಷಣಾ ಕಂಪನಿಗಳ ಷೇರುಗಳು ರಾಷ್ಟ್ರೀಯ ಷೇರು ಮಾರುಕಟ್ಟೆಯಲ್ಲಿ (NSE) ಶೇ. 9 ರಷ್ಟು ಏರಿಕೆ ಕಾಣುವ ಮೂಲಕ ಅಚ್ಚರಿ ಮೂಡಿಸಿವೆ.

ಕಳೆದ ಎರಡು ದಿನಗಳಿಂದ ಮಾರುಕಟ್ಟೆ ಚೇತರಿಸಿಕೊಳ್ಳುವ ಮುನ್ಸೂಚನೆ ನೀಡಿತ್ತಾದರೂ, ಇಂದಿನ ಭಾರೀ ಕುಸಿತವು ಹೂಡಿಕೆದಾರರ ಕೋಟ್ಯಂತರ ರೂಪಾಯಿ ಸಂಪತ್ತನ್ನು ಧೂಳೀಪಟ ಮಾಡಿದೆ. ಜಾಗತಿಕ ಮಟ್ಟದಲ್ಲಿ ಯುದ್ಧದ ಪರಿಸ್ಥಿತಿ ತಿಳಿಯಾಗುವವರೆಗೆ ಮಾರುಕಟ್ಟೆಯಲ್ಲಿ ಇಂತಹ ಏರಿಳಿತಗಳು ಮುಂದುವರಿಯಲಿವೆ ಎಂದು ಮಾರುಕಟ್ಟೆ ತಜ್ಞರು ಎಚ್ಚರಿಸಿದ್ದಾರೆ,(ಏಜೆನ್ಸೀಸ್).