ಪ್ರಧಾನಿಯೇ ನುಸುಳುಕೋರ ಎಂಬ ಹೇಳಿಕೆ; ಸಾಂವಿಧಾನಿಕ ಹುದ್ದೆ ಹೊಂದಲು ಸಿಎಂ ಮಮತಾ ಬ್ಯಾನರ್ಜಿ ಅರ್ಹರಲ್ಲ: ಬಿಜೆಪಿ ವಾಗ್ದಾಳಿ | BJP

ಕೋಲ್ಕತ್ತಾ: ಪಶ್ಚಿಮ ಬಂಗಾಳ ವಿಧಾನಸಭೆ ಚುನಾವಣೆ ಹಿನ್ನೆಲೆ ಬಿಜೆಪಿ ಮತ್ತು ಆಡಳಿತರೂಢ ತೃಣಮೂಲ ಕಾಂಗ್ರೆಸ್ ನಡುವೆ ಮಾತಿನ ಸಮರ ಶುರುವಾಗಿದ್ದು, ದೇಶದ ಪ್ರಧಾನಿಯೇ ನುಸುಳುಕೋರ ಎಂಬ ಹೇಳಿಕೆಯನ್ನು ಟೀಕಿಸಿರುವ ಬಿಜೆಪಿ(BJP), ಸಿಎಂ ಮಮತಾ ಬ್ಯಾನರ್ಜಿ ಸಾಂವಿಧಾನಿಕ ಹುದ್ದೆಯನ್ನು ಹೊಂದಲು ಅರ್ಹರಲ್ಲ ಎಂದು ವಾಗ್ದಾಳಿ ನಡೆಸಿದೆ.

ಈ ಕುರಿತು ಮಾತನಾಡಿರುವ ಬಿಜೆಪಿ ನಾಯಕ ಶಿಶಿರ್ ಬಜೋರಿಯಾ, ದೇಶದ ಪ್ರಧಾನಿಯನ್ನು ನುಸುಳುಕೋರ ಎಂದು ಕರೆಯುವ ಯಾರಿಗಾದರೂ ಸಾಂವಿಧಾನಿಕ ಹುದ್ದೆಯನ್ನು ಅಲಂಕರಿಸುವ ಹಕ್ಕಿಲ್ಲ. ಸಿಎಂ ಬ್ಯಾನರ್ಜಿಯವರ ಮಾತು ಚುನಾವಣೆಯಲ್ಲಿ ಸೋಲುವ ತೀವ್ರ ಭಯವನ್ನು ತೋರಿಸುತ್ತಿದೆ ಎಂದು ಕಿಡಿಕಾರಿದ್ದಾರೆ.

ಕೋಲ್ಕತ್ತಾದಲ್ಲಿ ಇಂದು(ಮಾ. 20) ನಡೆದ ಈದ್ ಕಾರ್ಯಕ್ರಮದಲ್ಲಿ ಭಾಗವಹಿಸಿ ಮಾತನಾಡಿದ ಸಿಎಂ ಮಮತಾ ಬ್ಯಾನರ್ಜಿ, ಮೋದಿಯವರ ನೀತಿಗಳನ್ನು ಅಲ್ಪಸಂಖ್ಯಾತ ವಿರೋಧಿ ಎಂದು ಬಣ್ಣಿಸಿದ ಅವರು, ಪಶ್ಚಿಮ ಬಂಗಾಳದಲ್ಲಿ ನಡೆಯುತ್ತಿರುವ ಎಸ್​ಐಆರ್ ಪ್ರಕ್ರಿಯೆಯೂ ಸಮುದಾಯಗಳನ್ನು ಗುರಿಯಾಗಿಸಿಕೊಂಡಿದೆ ಎಂದು ಆರೋಪಿಸಿದ್ದರು.

ಮೋದಿ ಜಿ ನಮ್ಮ ಹಕ್ಕುಗಳನ್ನು ಕಸಿದುಕೊಳ್ಳಲು ನಾವು ಬಿಡುವುದಿಲ್ಲ. ನೀವು ಸೌದಿ ಅರೇಬಿಯಾಕ್ಕೆ ಹೋಗಿ ಕೈಕುಲುಕಿದರೆ ನಮಗೆ ಯಾವುದೇ ಸಮಸ್ಯೆ ಇಲ್ಲ. ನೀವು ದುಬೈಗೆ ಹೋದಾಗ ಅವರನ್ನು ಅಪ್ಪಿಕೊಳ್ಳುತ್ತೀರಿ. ಆದರೆ ಭಾರತದಲ್ಲಿ ನೀವು ಮರೆತುಬಿಡುತ್ತೀರಿ ಮತ್ತು ಹೆಸರುಗಳನ್ನು ಅಳಿಸುತ್ತೀರಿ. ನೀವು ಮುಸ್ಲಿಮರನ್ನು ಒಳನುಸುಳುವವರು ಎಂದು ಕರೆಯುತ್ತೀರಿ. ಆದರೆ ನೀವೇ ಅತಿದೊಡ್ಡ ಒಳನುಸುಳುಕೋರ ಎಂದು ವಾಗ್ದಾಳಿ ನಡೆಸಿದ್ದರು.

ಏಪ್ರಿಲ್ 23 ಮತ್ತು 29 ರಂದು ಎರಡು ಹಂತಗಳಲ್ಲಿ ಬಂಗಾಳ ಚುನಾವಣೆ ನಡೆಯಲಿದ್ದು, ಮೇ 4 ರಂದು ಫಲಿತಾಂಶ ಪ್ರಕಟವಾಗಲಿದೆ. ಸತತ ನಾಲ್ಕನೇ ಬಾರಿಗೆ ಅಧಿಕಾರ ಹಿಡಿಯುವ ಹಂಬಲದಲ್ಲಿರುವ ಮಮತಾ ಬ್ಯಾನರ್ಜಿ ಮತ್ತು ಬಂಗಾಳದಲ್ಲಿ ಅಧಿಕಾರ ಸ್ಥಾಪಿಸಲು ಹವಣಿಸುತ್ತಿರುವ ಬಿಜೆಪಿಯ ನಡುವೆ ಈ ಬಾರಿ ಹೈ-ವೋಲ್ಟೇಜ್ ಸಮರ ಏರ್ಪಡುವುದಂತು ಸ್ಪಷ್ಟವಾಗಿದೆ (ಏಜೆನ್ಸೀಸ್).