ಯುದ್ಧದ ಕಿಡಿ: ಇಸ್ರೇಲ್ ವಾಯುಪ್ರದೇಶ ಬಂದ್; ಮುಂಬೈಗೆ ಮರಳಿದ ಏರ್ ಇಂಡಿಯಾ ವಿಮಾನ | Air India

ಫೆಬ್ರವರಿ 28ರಂದು ದೆಹಲಿಯಿಂದ ಟೆಲ್ ಅವಿವ್‌ಗೆ ಹೊರಟಿದ್ದ AI 139 ವಿಮಾನವು ಸೌದಿ ಅರೇಬಿಯಾದ ವಾಯುಪ್ರದೇಶದಲ್ಲಿದ್ದಾಗ ಯುದ್ಧದ ಸುದ್ದಿ ಲಭ್ಯವಾಗಿದೆ. ಕೂಡಲೇ ಪೈಲಟ್‌ಗಳಿಗೆ ಸೂಚನೆ ನೀಡಿದ ಏರ್ ಇಂಡಿಯಾ ಮ್ಯಾನೇಜ್‌ಮೆಂಟ್, ವಿಮಾನವನ್ನು ಮುಂಬೈಗೆ ವಾಪಸ್ ಕರೆಸಿಕೊಂಡಿದೆ. ಅದೇ ರೀತಿ ಚಿಕಾಗೋದಿಂದ ದೆಹಲಿಗೆ ಬರುತ್ತಿದ್ದ AI 126 ವಿಮಾನವು ಇರಾಕ್ ವಾಯುಪ್ರದೇಶ ಪ್ರವೇಶಿಸುವ ಕ್ಷಣ ಮೊದಲು ಮಾರ್ಗ ಬದಲಿಸಿ ಸಿರಿಯಾ ಮೂಲಕ ದೀರ್ಘ ಪ್ರಯಾಣ ಬೆಳೆಸಿದೆ.

ಪ್ರಯಾಣಿಕರ ಮತ್ತು ಸಿಬ್ಬಂದಿಯ ಸುರಕ್ಷತೆಯೇ ನಮಗೆ ಮುಖ್ಯ. ಇಸ್ರೇಲ್ ವಾಯುಪ್ರದೇಶ ಮುಚ್ಚಿರುವುದರಿಂದ ವಿಮಾನಗಳನ್ನು ವಾಪಸ್ ಕರೆಸಿಕೊಳ್ಳಲಾಗಿದೆ ಎಂದು ಏರ್ ಇಂಡಿಯಾ ವಕ್ತಾರರು ತಿಳಿಸಿದ್ದಾರೆ.

ಈ ಯುದ್ಧದಿಂದಾಗಿ ಭಾರತದಿಂದ ಯುರೋಪ್, ಬ್ರಿಟನ್ ಮತ್ತು ಉತ್ತರ ಅಮೆರಿಕಾಕ್ಕೆ ಹೋಗುವ ವಿಮಾನಗಳ ಮೇಲೆ ಭಾರಿ ಪರಿಣಾಮ ಬೀರಲಿದೆ.

ದೀರ್ಘ ಮಾರ್ಗ: ಇರಾನ್ ಮತ್ತು ಇರಾಕ್ ವಾಯುಪ್ರದೇಶಗಳು ಈಗ 'ನೋ-ಗೋ ವಲಯಗಳಾಗಿವೆ. ವಿಮಾನಗಳು ಸುತ್ತು ಬಳಸಿ ಹೋಗಬೇಕಿರುವುದರಿಂದ ಪ್ರಯಾಣದ ಅವಧಿ ಗಣನೀಯವಾಗಿ ಹೆಚ್ಚಾಗಲಿದೆ.

ಇಂಧನ ನಿಲುಗಡೆ: ಉತ್ತರ ಅಮೆರಿಕಾಕ್ಕೆ ಹೋಗುವ ಸುದೀರ್ಘ ವಿಮಾನಗಳು ಈಗ ವಿಯೆನ್ನಾ ಅಥವಾ ರೋಮ್‌ನಲ್ಲಿ ಇಂಧನ ತುಂಬಿಸಿಕೊಳ್ಳಲು ಇಳಿಯಬೇಕಾದ ಅನಿವಾರ್ಯತೆ ಎದುರಾಗಿದೆ.

ಇಂಡಿಗೋ ಮೇಲೆ ಪರಿಣಾಮ: ಭಾರತದ ಅತಿದೊಡ್ಡ ವಿಮಾನಯಾನ ಸಂಸ್ಥೆ ಇಂಡಿಗೋ ಕೂಡ ತನ್ನ ಸಿಐಎಸ್ (CIS) ದೇಶಗಳ ವಿಮಾನಗಳ ಮಾರ್ಗ ಬದಲಾವಣೆ ಕುರಿತು ಚಿಂತಿಸುತ್ತಿದೆ.

ಪಾಕಿಸ್ತಾನದ ವಾಯುಪ್ರದೇಶವನ್ನು ಶಾಶ್ವತವಾಗಿ ತಪ್ಪಿಸಲು ಏರ್ ಇಂಡಿಯಾ ಈಗ ವಾಯುವ್ಯ ಚೀನಾದ ಹೋಟಾನ್ ವೇಪಾಯಿಂಟ್ ಬಳಸಲು ಅನುಮತಿ ಕೋರಿದೆ. ಒಂದು ವೇಳೆ ಚೀನಾ ಇದಕ್ಕೆ ಒಪ್ಪಿಗೆ ನೀಡಿದರೆ, ಹಿಮಾಲಯದ ಪರ್ವತ ಶ್ರೇಣಿಗಳ ಮೇಲೆ ಹಾರುವ ಮೂಲಕ ಭಾರತೀಯ ವಿಮಾನಗಳು ಸುರಕ್ಷಿತವಾಗಿ ಯುರೋಪ್ ತಲುಪಬಹುದು. ಆದರೆ ಇನ್ನೂ ಈ ಬಗ್ಗೆ ಸ್ಪಷ್ಟತೆ ಸಿಕ್ಕಿಲ್ಲ.

ಟೆಲ್ ಅವಿವ್‌ನಲ್ಲಿ ಉಳಿದುಕೊಂಡಿರುವ ಏರ್ ಇಂಡಿಯಾದ ಪೈಲಟ್‌ಗಳು ಮತ್ತು ಕ್ಯಾಬಿನ್ ಸಿಬ್ಬಂದಿಯನ್ನು ಸುರಕ್ಷಿತವಾಗಿ ಭಾರತಕ್ಕೆ ಕರೆತರಲು ವಿಮಾನಯಾನ ಸಂಸ್ಥೆಯು ರಕ್ಷಣಾ ಸಚಿವಾಲಯದೊಂದಿಗೆ ಸಂಪರ್ಕದಲ್ಲಿದೆ. ಯುದ್ಧದ ತೀವ್ರತೆ ಹೆಚ್ಚುತ್ತಿರುವುದರಿಂದ ವಿಮಾನ ನಿಲ್ದಾಣಗಳ ಕಾರ್ಯಾಚರಣೆಯೂ ಅನಿಶ್ಚಿತವಾಗಿದೆ,(ಏಜೆನ್ಸೀಸ್).