ಬಂಗಾಳದಲ್ಲಿ ಸೋನಾರ್ ಬಾಂಗ್ಲಾ ಕನಸಿಗೆ ಮುನ್ನುಡಿ: ಬಿಜೆಪಿ ಕಾರ್ಯಕರ್ತರ ಬಲಿದಾನಕ್ಕೆ ಸಂದ ಜಯ; ಅಮಿತ್ ಷಾ | Amit Shah

ಈ ಬಗ್ಗೆ ಎಕ್ಸ್​ನಲ್ಲಿ ಪೋಸ್ಟ್​ ಮಾಡಿರುವ ಅಮಿತ್ ಷಾ, ಬಂಗಾಳದಲ್ಲಿ ಬಿಜೆಪಿಯ ಈ ಚಾರಿತ್ರಿಕ ವಿಜಯವು ನಮ್ಮ ಅಸಂಖ್ಯಾತ ಕಾರ್ಯಕರ್ತರ ತ್ಯಾಗ, ಸಂಘರ್ಷ ಮತ್ತು ಬಲಿದಾನದ ಫಲವಾಗಿದೆ. ಹಿಂಸಾಚಾರವನ್ನು ಎದುರಿಸಿಯೂ ಕೇಸರಿ ಧ್ವಜವನ್ನು ಬಿಡದ ಆ ಧೈರ್ಯವಂತ ಕುಟುಂಬಗಳ ತಾಳ್ಮೆಗೆ ಸಂದ ಜಯವಿದು ಎಂದು ಭಾವುಕರಾಗಿ ನುಡಿದಿದ್ದಾರೆ.

ಮಮತಾ ಬ್ಯಾನರ್ಜಿ ನೇತೃತ್ವದ ಟಿಎಂಸಿ ಸರ್ಕಾರದ ವಿರುದ್ಧ ವಾಗ್ದಾಳಿ ನಡೆಸಿದ ಅಮಿತ್ ಷಾ, ಈ ಬೃಹತ್ ಜನಾದೇಶವು ಭಯ, ತುಷ್ಟೀಕರಣ ಮತ್ತು ಒಳನುಸುಳುವಿಕೆದಾರರ ರಕ್ಷಕರ ವಿರುದ್ಧ ಬಂಗಾಳದ ಜನತೆ ನೀಡಿದ ಪ್ರಬಲ ಪ್ರತಿಕ್ರಿಯೆಯಾಗಿದೆ. ಟಿಎಂಸಿಯ ಭಯದ ರಾಜಕಾರಣಕ್ಕೆ ಜನತೆ ತಕ್ಕ ಪಾಠ ಕಲಿಸಿದ್ದಾರೆ. ಇದು ಪ್ರಧಾನಿ ನರೇಂದ್ರ ಮೋದಿ ಮೇಲಿರುವ ಭರವಸೆಯ ವಿಜಯ ಎಂದು ಹೇಳಿದ್ದಾರೆ.

ಒಳನುಸುಳುವಿಕೆದಾರರನ್ನು ರಕ್ಷಿಸುವ ಮತ್ತು ಓಲೈಕೆ ರಾಜಕಾರಣ ಮಾಡುವ ಪಕ್ಷಗಳಿಗೆ ಈ ಸೋಲು ಎಂದಿಗೂ ಮರೆಯಲಾಗದ ಪಾಠವಾಗಲಿದೆ ಎಂದು ಗೃಹ ಸಚಿವರು ಎಚ್ಚರಿಸಿದ್ದಾರೆ.

ಬಂಗಾಳದ ಕಳೆದುಹೋದ ವೈಭವವನ್ನು ಮರುಸ್ಥಾಪಿಸುವ ಭರವಸೆ ನೀಡಿದ ಗೃಹ ಸಚಿವರು, ಮಹಾಪುರುಷರಾದ ಚೈತನ್ಯ ಮಹಾಪ್ರಭು, ಸ್ವಾಮಿ ವಿವೇಕಾನಂದ, ರವೀಂದ್ರನಾಥ ಟ್ಯಾಗೋರ್, ನೇತಾಜಿ ಸುಭಾಷ್ ಚಂದ್ರ ಬೋಸ್ ಮತ್ತು ಡಾ. ಶ್ಯಾಮ ಪ್ರಸಾದ್ ಮುಖರ್ಜಿ ಅವರ ಪವಿತ್ರ ಭೂಮಿಯಲ್ಲಿ ಸೋನಾರ್ ಬಾಂಗ್ಲಾ ನಿರ್ಮಿಸಲು ಬಿಜೆಪಿ ಹಗಲಿರುಳು ಶ್ರಮಿಸಲಿದೆ ಎಂದು ವಾಗ್ದಾನ ಮಾಡಿದ್ದಾರೆ.

ಗಂಗೋತ್ರಿಯಿಂದ ಗಂಗೆಯ ಸಂಗಮದವರೆಗೆ ಇಂದು ಬಿಜೆಪಿಯ ಕೇಸರಿ ಧ್ವಜ ಹೆಮ್ಮೆಯಿಂದ ಹಾರಾಡುತ್ತಿದೆ. ಬಂಗಾಳದ ಜನತೆ ಇಟ್ಟಿರುವ ನಂಬಿಕೆಯನ್ನು ನರೇಂದ್ರ ಮೋದಿ ಅವರ ನಾಯಕತ್ವದಲ್ಲಿ ಬಿಜೆಪಿ ಖಂಡಿತವಾಗಿಯೂ ಈಡೇರಿಸಲಿದೆ ಎಂದು ಅಮಿತ್​ ಷಾ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ,(ಏಜೆನ್ಸೀಸ್​).