ವೃದ್ಧಾಶ್ರಮಕ್ಕೆ ತಳ್ಳುವ ಕಾಲದಲ್ಲಿ ತಾಯಿಯನ್ನು ಬೆನ್ನ ಮೇಲೆ ಹೊತ್ತ ಮಗ: ಇವನೇ ಆಧುನಿಕ ಶ್ರವಣ ಕುಮಾರ ಎಂದ ನೆಟ್ಟಿಗರು! Viral Video

ವೈರಲ್​: ಇಂದಿನ ಫಾಸ್ಟ್ ಫಾರ್ವರ್ಡ್ ಜಗತ್ತಿನಲ್ಲಿ ಮನುಷ್ಯ ತನ್ನ ಕೆಲಸ, ಹಣ, ಕೆರಿಯರ್ ಅಂತ ಓಡುತ್ತಿದ್ದಾನೆ. ಎಷ್ಟೋ ಬಾರಿ ತನ್ನ ಜೊತೆಗಿರುವ ಸಂಬಂಧಗಳನ್ನೇ ಮರೆತು ಬಿಡುತ್ತಾನೆ. ಹೆತ್ತವರನ್ನು ವೃದ್ಧಾಶ್ರಮಕ್ಕೆ ತಳ್ಳುವ ಈ ಕಾಲದಲ್ಲಿ, ಮಗನೊಬ್ಬ ತನ್ನ ತಾಯಿಯ ಮೇಲೆ ತೋರಿರುವ ಅಪಾರ ಪ್ರೀತಿಯ ವಿಡಿಯೋವೊಂದು ಈಗ ಸೋಶಿಯಲ್​ ಮೀಡಿಯಾನಲ್ಲಿ (Viral Video) ಲಕ್ಷಾಂತರ ಜನರ ಹೃದಯನ್ನು ಗೆದ್ದಿದೆ.

ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿರುವ ಈ ವಿಡಿಯೋನಲ್ಲಿ ಜನಜಂಗುಳಿಯಿಂದ ತುಂಬಿದ ರೈಲ್ವೆ ಪ್ಲಾಟ್‌ಫಾರ್ಮ್‌ನಲ್ಲಿ ಯುವಕನೊಬ್ಬ ತನ್ನ ವೃದ್ಧ ತಾಯಿಯನ್ನು ಬೆನ್ನಿನ ಮೇಲೆ ಹೊತ್ತುಕೊಂಡು ಓಡುತ್ತಿದ್ದಾನೆ.

ದೂರದಿಂದ ಈ ದೃಶ್ಯವನ್ನು ಗಮನಿಸಿದ ಮತ್ತೊಬ್ಬ ಯುವಕ ತನ್ನ ಮೊಬೈಲ್‌ನಲ್ಲಿ ಇದನ್ನು ಸೆರೆಹಿಡಿದು ಸೋಶಿಯಲ್ ಮೀಡಿಯಾದಲ್ಲಿ ಹಂಚಿಕೊಂಡಿದ್ದಾನೆ. ಈ ವಿಡಿಯೋ ಎಷ್ಟು ವೇಗವಾಗಿ ವೈರಲ್ ಆಗಿದೆ ಎಂದರೆ, ಕೇವಲ ಕೆಲವೇ ಗಂಟೆಗಳಲ್ಲಿ ಲಕ್ಷಾಂತರ ಜನ ಇದನ್ನು ನೋಡಿ ಭಾವುಕರಾಗಿದ್ದಾರೆ.

ನಮ್ಮ ಪುರಾಣಗಳಲ್ಲಿ ತಂದೆ-ತಾಯಿಯನ್ನು ಕಾವಡಿಯಲ್ಲಿ ಹೊತ್ತು ತೀರ್ಥಯಾತ್ರೆ ಮಾಡಿಸಿದ ಶ್ರವಣ ಕುಮಾರನ ಬಗ್ಗೆ ಓದಿದ್ದೇವೆ. ಈ ವಿಡಿಯೋ ನೋಡಿದ ಮೇಲೆ ಇವನೇ ಇಂದಿನ ಕಾಲದ ಆಧುನಿಕ ಶ್ರವಣ ಕುಮಾರ ಎಂದು ನೆಟ್ಟಿಗರು ಕೊಂಡಾಡುತ್ತಿದ್ದಾರೆ.

ವಿಡಿಯೋ ನೋಡಿದ ಪ್ರತಿಯೊಬ್ಬರೂ ಈ ಮಗನ ಸಂಸ್ಕಾರಕ್ಕೆ ತಲೆಬಾಗಿದ್ದಾರೆ. ಒಬ್ಬ ಬಳಕೆದಾರರು, ಪ್ರತಿಯೊಬ್ಬ ತಾಯಿಗೂ ಇಂತಹ ಮಗನೇ ಸಿಗಲಿ ಎಂದು ಹಾರೈಸಿದ್ದಾರೆ. ಇನ್ನೊಬ್ಬರು, ಇಂದಿನ ಕಾಲದಲ್ಲಿ ತಂದೆ-ತಾಯಿಯನ್ನು ಅಪ್ಪಿ ಮುದ್ದಾಡುವವರೇ ಕಡಿಮೆ, ಇನ್ನು ಬೆನ್ನ ಮೇಲೆ ಹೊತ್ತು ಸಾಗುವ ಈ ಮಗನಿಗೆ ನಮ್ಮದೊಂದು ಸಲಾಂ ಎಂದು ಬರೆದಿದ್ದಾರೆ, (ಏಜನ್ಸೀಸ್​).