ವಿಚ್ಛೇದನಕ್ಕೆ ಕಾರಣವಾಗಿತ್ತು ಗೊರಕೆ: ಕೌನ್ಸೆಲಿಂಗ್‌ನಿಂದ ಉಳಿಯಿತು ದಾಂಪತ್ಯ!

ಪತ್ನಿಗೆ ಗಂಡನ ಸ್ವಭಾವ, ಕುಟುಂಬ ಅಥವಾ ದಾಂಪತ್ಯ ಜೀವನದ ಬಗ್ಗೆ ಯಾವುದೇ ದೂರು ಇರಲಿಲ್ಲ. ಆದರೆ ಗಂಡನ ಜೋರಾದ ಗೊರಕೆಯಿಂದ ಪ್ರತಿದಿನ ರಾತ್ರಿ ನಿದ್ರೆ ಬಾರದ ಕಾರಣ ಮಾನಸಿಕವಾಗಿ ಕಂಗೆಟ್ಟು ವಿಚ್ಛೇದನವೇ ಪರಿಹಾರ ಎಂದು ಭಾವಿಸಿದ್ದರು ಎಂದು ಕೌನ್ಸೆಲರ್ ತಿಳಿಸಿದ್ದಾರೆ.

ಕುಟುಂಬ ಸಮಾಲೋಚನೆ ವೇಳೆ ಪತ್ನಿ, "ಗಂಡ ತುಂಬಾ ಒಳ್ಳೆಯ ವ್ಯಕ್ತಿ. ಅವರ ಕುಟುಂಬದ ವಿರುದ್ಧವೂ ಯಾವುದೇ ದೂರು ಇಲ್ಲ. ಆದರೆ ರಾತ್ರಿ ಅವರ ಗೊರಕೆಯಿಂದ ನನಗೆ ನಿದ್ರೆ ಬರುವುದಿಲ್ಲ. ಇಡೀ ರಾತ್ರಿ ಎಚ್ಚರದಿಂದ ಇರಲು ಸಾಧ್ಯವಿಲ್ಲ" ಎಂದು ತಿಳಿಸಿದ್ದರು ಎಂದು ರೀಟಾ ತುಲಿ ಹೇಳಿದ್ದಾರೆ.

ಇನ್ನೊಂದೆಡೆ, ತಾನು ಗೊರಕೆ ಹೊಡೆಯುವುದೇ ಇಲ್ಲ ಎಂದು ಗಂಡ ಹೇಳುತ್ತಿದ್ದರಿಂದ ಪ್ರತಿದಿನ ಬೆಳಗ್ಗೆ ಇಬ್ಬರ ನಡುವೆ ಜಗಳವಾಗುತ್ತಿತ್ತು ಎಂದು ಅವರು ತಿಳಿಸಿದ್ದಾರೆ.

ಈ ಪ್ರಕರಣದಲ್ಲಿ ಮಾನಸಿಕ ಅಥವಾ ದೈಹಿಕ ಕಿರುಕುಳಕ್ಕೆ ಸಂಬಂಧಿಸಿದ ಯಾವುದೇ ಆರೋಪಗಳು ಇರಲಿಲ್ಲ. ಪತ್ನಿ ತಮ್ಮ ಗಂಡ ಅಥವಾ ಅವರ ಕುಟುಂಬದ ವಿರುದ್ಧ ಯಾವುದೇ ದೂರು ನೀಡಿರಲಿಲ್ಲ ಎಂದು ಕೌನ್ಸೆಲರ್ ತಿಳಿಸಿದ್ದಾರೆ. ದಂಪತಿಯ ನಡುವಿನ ಏಕೈಕ ಸಮಸ್ಯೆ ಗೊರಕೆಯಿಂದ ಉಂಟಾಗುತ್ತಿದ್ದ ನಿದ್ರಾಹೀನತೆ ಮತ್ತು ಅದರ ಪರಿಣಾಮವಾಗಿ ನಡೆಯುತ್ತಿದ್ದ ಜಗಳಗಳಾಗಿದ್ದವು ಎಂದು ಅವರು ಹೇಳಿದ್ದಾರೆ.

ವಿಚ್ಛೇದನದ ಕಾನೂನು ಪ್ರಕ್ರಿಯೆ ಮುಂದುವರಿಸುವ ಬದಲು, ದಂಪತಿ ಮೂರು ತಿಂಗಳ ಕಾಲ ಪ್ರತ್ಯೇಕವಾಗಿ ವಾಸಿಸುವಂತೆ ಕೌನ್ಸೆಲರ್ ಸಲಹೆ ನೀಡಿದರು. ತಾತ್ಕಾಲಿಕ ಅಸಮಾಧಾನ ಮತ್ತು ನಿಜವಾದ ಹೊಂದಾಣಿಕೆ ಸಮಸ್ಯೆಗಳ ನಡುವಿನ ವ್ಯತ್ಯಾಸವನ್ನು ಅರಿತುಕೊಳ್ಳಲು ಈ ಪ್ರಯೋಗ ನೆರವಾಗಬಹುದು ಎಂದು ಅವರು ಅಭಿಪ್ರಾಯಪಟ್ಟರು.

ಮೂರು ತಿಂಗಳ ಬಳಿಕ ಮತ್ತೆ ಕೌನ್ಸೆಲಿಂಗ್‌ಗೆ ಹಾಜರಾದ ದಂಪತಿ, ಪ್ರತ್ಯೇಕವಾಗಿ ಇದ್ದ ಅವಧಿಯಲ್ಲಿ ಪರಸ್ಪರರನ್ನು ತುಂಬಾ ಮಿಸ್ ಮಾಡಿಕೊಂಡಿರುವುದಾಗಿ ತಿಳಿಸಿದ್ದಾರೆ. ದಾಂಪತ್ಯ ಜೀವನದ ಮೌಲ್ಯ ಗೊರಕೆಯಿಂದ ಉಂಟಾಗುವ ತೊಂದರೆಗಿಂತ ದೊಡ್ಡದು ಎಂಬ ಅರಿವಾದ ಹಿನ್ನೆಲೆಯಲ್ಲಿ ವಿಚ್ಛೇದನದ ನಿರ್ಧಾರ ಕೈಬಿಟ್ಟು ಮತ್ತೆ ಒಟ್ಟಾಗಿ ಬದುಕಲು ತೀರ್ಮಾನಿಸಿದ್ದಾರೆ ಎಂದು ಕೌನ್ಸೆಲರ್ ರೀಟಾ ತುಲಿ ತಿಳಿಸಿದ್ದಾರೆ,(ಏಜೆನ್ಸೀಸ್​).