ರೈಲು ಪ್ರಯಾಣಿಕರೇ ಗಮನಿಸಿ: ಸಣ್ಣ ತಪ್ಪು ಮಾಡಿದ್ರೂ ಜೇಬಿಗೆ ಕತ್ತರಿ ಬೀಳೋದು ಗ್ಯಾರಂಟಿ; ರೈಲ್ವೆಯ ಹೊಸ ರೂಲ್ಸ್ ಏನು ಗೊತ್ತಾ? Indian Railways

ಈ ಹೊಸ ನಿಯಮಗಳ ಮುಖ್ಯ ಉದ್ದೇಶ ರೈಲು ಪ್ರಯಾಣವನ್ನು ಮತ್ತಷ್ಟು ಸುರಕ್ಷಿತವಾಗಿಸುವುದು, ಸ್ವಚ್ಛತೆ ಕಾಪಾಡುವುದು ಮತ್ತು ರೈಲ್ವೆ ಆವರಣದಲ್ಲಿ ಶಿಸ್ತು ಮೂಡಿಸುವುದಾಗಿದೆ. ಈ ಕಾಯ್ದೆಯಡಿ ರೈಲಿನಲ್ಲಿ ಧೂಮಪಾನ, ಅನಧಿಕೃತ ವ್ಯಾಪಾರ ಮತ್ತು ಭಿಕ್ಷಾಟನೆ ಸೇರಿದಂತೆ ಹಲವಾರು ಉಲ್ಲಂಘನೆಗಳಿಗೆ ರೈಲ್ವೆ ಇಲಾಖೆ ಈಗ ಭಾರಿ ಪ್ರಮಾಣದ ದಂಡ ಮತ್ತು ಕಠಿಣ ಕ್ರಮಗಳನ್ನು ಘೋಷಿಸಿದೆ.

ಪರಿಷ್ಕೃತ ನಿಯಮಗಳ ಪ್ರಕಾರ, ರೈಲುಗಳಲ್ಲಿ ಅಥವಾ ರೈಲ್ವೆ ಆವರಣದಲ್ಲಿ ಧೂಮಪಾನ ಮಾಡುವುದು ಕಂಡುಬಂದರೆ ಅಂತಹ ವ್ಯಕ್ತಿಗಳಿಗೆ ಸ್ಥಳದಲ್ಲೇ 2,000 ದಂಡ ವಿಧಿಸಬಹುದಾಗಿದೆ. ದಂಡದ ಜೊತೆಗೆ, ನಿಯಮ ಉಲ್ಲಂಘಿಸಿದ ಅಪರಾಧಿಯನ್ನು ತಕ್ಷಣವೇ ರೈಲಿನಿಂದ ಕೆಳಗೆ ಇಳಿಸಿ ಅವರ ಟಿಕೆಟ್​ ಮತ್ತು ಪಾಸ್​ನ್ನು ಅಧಿಕಾರಿಗಳು ಮುಟ್ಟುಗೋಲು ಹಾಕಿಕೊಳ್ಳಲಿದ್ದಾರೆ.

ಅಪರಾಧ ಸಾಬೀತಾದ ನಂತರ, ನ್ಯಾಯಾಲಯವು 5,000 ರೂ.ಗಳವರೆಗೆ ದಂಡ ವಿಧಿಸಬಹುದು, ವಿಶೇಷ ಕಾರಣಗಳನ್ನು ದಾಖಲಿಸದ ಹೊರತು ಕನಿಷ್ಠ 2,000 ರೂ.ಗಳ ದಂಡ ವಿಧಿಸಬಹುದು.

ಹೊಸ ನಿಯಮಗಳನ್ವಯ ರೈಲುಗಳು ಮತ್ತು ರೈಲ್ವೆ ಆವರಣಗಳಲ್ಲಿ ಅನಧಿಕೃತ ಹಾಕಿಂಗ್​ ಮತ್ತು ಭಿಕ್ಷಾಟನೆಯನ್ನು ಸಹ ಗುರಿಯಾಗಿರಿಸಿಕೊಂಡಿದ್ದು, ಅಂತಹ ಚಟುವಟಿಕೆಗಳು ಕಂಡುಬಂದಲ್ಲಿ ತಕ್ಷಣವೇ 2000 ರೂ ದಂಡ ವಿಧಿಸಲಾಗುತ್ತದೆ ಎಂದು ಇಲಾಖೆ ಎಚ್ಚರಿಸಿದೆ.

ಒಂದುವೇಳೆ ಅಪರಾಧಿ ದಂಡವನ್ನು ಪಾವತಿಸಲು ನಿರಾಕರಿಸಿದರೆ, ವಿಷಯವನ್ನು ನ್ಯಾಯಾಲಯಕ್ಕೆ ಕೊಂಡೊಯ್ಯಬಹುದು, ಅಲ್ಲಿ ಮೂರು ತಿಂಗಳವರೆಗೆ ಜೈಲು ಶಿಕ್ಷೆ ಮತ್ತು 5000 ಗಳವರೆಗೆ ದಂಡವನ್ನು ವಿಧಿಸಲಾಗುವುದು ಎಂದು ಹೇಳಿದ್ದಾರೆ.

ಯಾವುದೇ ವ್ಯಕ್ತಿ ನಿಯಮವನ್ನು ಮೀರಿ ನಾಲ್ಕನೇ ಅಥವಾ ಅದಕ್ಕಿಂತ ಹೆಚ್ಚು ಬಾರಿ ಅನಧಿಕೃತ ಹಾಕಿಂಗ್‌ನಲ್ಲಿ ತಪ್ಪಿತಸ್ಥನೆಂದು ಕಂಡುಬಂದರೆ, ಅಂತಹವರಿಗೆ ಒಂದು ವರ್ಷದವರೆಗೆ ಜೈಲು ಶಿಕ್ಷೆ ಮತ್ತು 5,000 ಗಳವರೆಗೆ ಭಾರಿ ದಂಡ ವಿಧಿಸಲು ಹೊಸ ಕಾಯ್ದೆಯಲ್ಲಿ ಅವಕಾಶ ಕಲ್ಪಿಸಲಾಗಿದೆ.

ಪರಿಷ್ಕೃತ ದಂಡಗಳು ಜನ್ ವಿಶ್ವಾಸ್ ಕಾಯ್ದೆ, 2026 ರ ಭಾಗವಾಗಿದ್ದು, ಇದು ರೈಲ್ವೆ ನಿಯಮಗಳ ಅನುಸರಣೆಯನ್ನು ಸುಧಾರಿಸುವ ಮತ್ತು ಜಾರಿಗೊಳಿಸುವಿಕೆಯನ್ನು ಹೆಚ್ಚು ಪರಿಣಾಮಕಾರಿಯಾಗಿ ಮಾಡುವ ಗುರಿಯನ್ನು ಹೊಂದಿದೆ.

ರೈಲ್ವೆ ಇಲಾಖೆಯ ಪ್ರಕಾರ, ನಿಯಮ ಉಲ್ಲಂಘನೆಗಳನ್ನು ನಿರುತ್ಸಾಹಗೊಳಿಸಲು, ಪ್ರಯಾಣಿಕರ ಸುರಕ್ಷತೆಯನ್ನು ಸುಧಾರಿಸಲು ಮತ್ತು ರೈಲುಗಳು ಮತ್ತು ರೈಲು ನಿಲ್ದಾಣಗಳಲ್ಲಿ ಕ್ರಮವನ್ನು ಕಾಪಾಡಿಕೊಳ್ಳಲು ಸಹಾಯ ಮಾಡಲು ಬಲವಾದ ದಂಡಗಳನ್ನು ನಿರೀಕ್ಷಿಸಲಾಗಿದೆ (ಏಜೆನ್ಸೀಸ್​).