ದುಬಾರಿ ಆಗಲಿವೆ ಸ್ಮಾರ್ಟ್​​ಫೋನ್​​: ಕೃತಕ ಬುದ್ಧಿಮತ್ತೆ ಕಾರಣ!

ಇತ್ತೀಚಿನ ದಿನಗಳಲ್ಲಿ ಕೃತಕ ಬುದ್ಧಿಮತ್ತೆ ಅಥವಾ ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ ಎಂಬ ಪದವನ್ನು ಕೇಳದವರೇ ಇಲ್ಲ. ಮೊಬೈಲ್​ನಿಂದ ಹಿಡಿದು ದೊಡ್ಡ ದೊಡ್ಡ ಸೂಪರ್ ಕಂಪ್ಯೂಟರ್​ಗಳವರೆಗೆ ಎಐ ತಂತ್ರಜ್ಞಾನ ಇಡೀ ಜಗತ್ತನ್ನು ವೇಗವಾಗಿ ಬದಲಾಯಿಸುತ್ತಿದೆ. ಆದರೆ, ಈ ಅದ್ಭುತ ತಂತ್ರಜ್ಞಾನದ ಕ್ರಾಂತಿ ಗ್ರಾಹಕರಿಗೆ ಒಂದು ಅನಿರೀಕ್ಷಿತ ಮತ್ತು ಕಹಿ ಸುದ್ದಿಯನ್ನೂ ಹೊತ್ತು ತರುತ್ತಿದೆ. ಹೌದು, ತಂತ್ರಜ್ಞಾನ ಉದ್ಯಮದ ವಿಶ್ಲೇಷಕರ ಪ್ರಕಾರ, ಮುಂಬರುವ ದಿನಗಳಲ್ಲಿ ಸ್ಮಾರ್ಟ್​ಫೋನ್​ಗಳ ಬೆಲೆ ಗಣನೀಯವಾಗಿ ಹೆಚ್ಚಾಗಲು ಈ ಎಐ ಪ್ರಮುಖ ಕಾರಣವಾಗಲಿದೆ. ಯಾವ ಮೆಮೊರಿ ಚಿಪ್​ಗಳು ಸ್ಮಾರ್ಟ್​ಫೋನ್​ಗಳ ವೇಗ ಮತ್ತು ದಕ್ಷತೆಯನ್ನು ನಿರ್ಧರಿಸುತ್ತವೆಯೋ, ಅದೇ ಚಿಪ್​ಗಳ ಬೆಲೆ ಈಗ ಜಾಗತಿಕ ಮಾರುಕಟ್ಟೆಯಲ್ಲಿ ತೀವ್ರವಾಗಿ ಏರುತ್ತಿದೆ. ಈ ಬೆಲೆ ಏರಿಕೆಯ ಬಿಸಿ ನೇರವಾಗಿ ಗ್ರಾಹಕರ ಜೇಬಿಗೆ ತಟ್ಟುವ ಕಾಲ ದೂರವಿಲ್ಲ.

ಸಾಮಾನ್ಯ ಅಪ್ಲಿಕೇಶನ್​ಗಳಿಗಿಂತ ಎಐ ತಂತ್ರಜ್ಞಾನದ ಆಧಾರದ ಮೇಲೆ ಕೆಲಸ ಮಾಡುವ ಸಾಫ್ಟ್ ವೇರ್​ಗಳಿಗೆ ಹೆಚ್ಚಿನ ಪ್ರಮಾಣದ ಮೆಮೊರಿ ಅಗತ್ಯವಿರುತ್ತದೆ. ಇಮೇಜ್ ಜನರೇಷನ್ (ಚಿತ್ರಗಳನ್ನು ಸೃಷ್ಟಿಸುವುದು), ರಿಯಲ್-ಟೈಮ್ ಟ್ರಾನ್ಸ್

ಲೇಷನ್ (ಲೈವ್ ಭಾಷಾಂತರ), ಎಐ ಅಸಿಸ್ಟೆಂಟ್ ಮತ್ತು ಆನ್-ಡಿವೈಸ್ ಮಷಿನ್ ಲರ್ನಿಂಗ್​ನಂತಹ ಸುಧಾರಿತ ಪ್ರಕ್ರಿಯೆಗಳು ಸರಾಗವಾಗಿ ನಡೆಯಬೇಕೆಂದರೆ ಪೊ›ಸೆಸರ್ ಜತೆಗೆ ಬಲಿಷ್ಠವಾದ ಮೆಮೊರಿ ಬ್ಯಾಕಪ್ ಇರಬೇಕು. ಈ ಬೇಡಿಕೆ ಕೇವಲ ಮೊಬೈಲ್ ಫೋನ್​ಗಳಿಗೆ ಸೀಮಿತವಾಗಿಲ್ಲ. ದೊಡ್ಡ ದೊಡ್ಡ ಟೆಕ್ ಕಂಪನಿಗಳ ಎಐ ಸರ್ವರ್​ಗಳು, ಕ್ಲೌಡ್ ಕಂಪ್ಯೂಟಿಂಗ್ ಪ್ಲಾಟ್​ಫಾಮರ್್​ಗಳು, ಪರ್ಸನಲ್ ಕಂಪ್ಯೂಟರ್​ಗಳು ಮತ್ತು ಉದ್ಯಮಗಳ ಮೂಲಸೌಕರ್ಯಗಳು ಕೂಡ ಇದೇ ರೀತಿಯ ಹೈ-ಪರ್ಫಾರ್ಮನ್ಸ್ ಮೆಮೊರಿ ರಿಸೋರ್ಸ್​ಗಳಿಗಾಗಿ ಮುಗಿಬೀಳುತ್ತಿವೆ. ಇಡೀ ಜಗತ್ತಿನ ಪ್ರಮುಖ ತಂತ್ರಜ್ಞಾನ ಸಂಸ್ಥೆಗಳು ತಮ್ಮ ಎಐ ಸಾಮರ್ಥ್ಯವನ್ನು ವಿಸ್ತರಿಸಲು ಸ್ಪರ್ಧಿಸುತ್ತಿರುವುದರಿಂದ, ಬೇಡಿಕೆಗೆ ತಕ್ಕಂತೆ ಪೂರೈಕೆ ಮಾಡಲು ಮೆಮೊರಿ ಚಿಪ್ ತಯಾರಕ ಕಂಪನಿಗಳಿಗೆ ಸಾಧ್ಯವಾಗುತ್ತಿಲ್ಲ. ಮಾರುಕಟ್ಟೆಯಲ್ಲಿ ಸೃಷ್ಟಿಯಾಗಿರುವ ಈ ಪೂರೈಕೆ ಮತ್ತು ಬೇಡಿಕೆಯ ನಡುವಿನ ಅಸಮತೋಲನವು ಜಾಗತಿಕವಾಗಿ ಚಿಪ್​ಗಳ ಬೆಲೆ ಏರಿಕೆಗೆ ಕಾರಣವಾಗಿದೆ.

ಕೆಲವೇ ವರ್ಷಗಳ ಹಿಂದೆ ಸ್ಮಾರ್ಟ್ ಫೋನ್​ಗಳಲ್ಲಿ 4ಜಿಬಿ ಅಥವಾ 6ಜಿಬಿ ರ್ಯಾಮ್ ಇದ್ದರೆ ಅದು ದೈನಂದಿನ ಬಳಕೆಗೆ ಅತ್ಯುತ್ತಮ ಎಂದು ಪರಿಗಣಿಸಲಾಗುತ್ತಿತ್ತು. ಆದರೆ ಈಗ ಪರಿಸ್ಥಿತಿ ಸಂಪೂರ್ಣ ಬದಲಾಗಿದೆ. ಮಾರುಕಟ್ಟೆಗೆ ಬರುತ್ತಿರುವ ಹೊಸ ಎಐ ಚಾಲಿತ ಪ್ರೀಮಿಯಂ ಮತ್ತು ಮಧ್ಯಮ ಕ್ರಮಾಂಕದ ಫೋನ್​ಗಳಲ್ಲಿ 12ಜಿಬಿ, 16ಜಿಬಿ ಅಥವಾ ಅದಕ್ಕಿಂತ ಹೆಚ್ಚಿನ ಸಾಮರ್ಥ್ಯದ ರ್ಯಾಮ್ ಕಾನ್ಪಿಗರೇಶನ್​ಗಳನ್ನು ಅಳವಡಿಸುವುದು ಅನಿವಾರ್ಯವಾಗಿದೆ. ಸ್ಮಾರ್ಟ್ ಫೋನ್ ಬ್ರಾ್ಯಂಡ್​ಗಳು ತಮ್ಮ ಫೋನ್​ಗಳಲ್ಲಿ ನೇರವಾಗಿಯೇ ಸುಧಾರಿತ ಫೋಟೋಗ್ರಫಿ ಟೂಲ್ಸ್ ಹಾಗೂ ಇಂಟೆಲಿಜೆಂಟ್ ಅಸಿಸ್ಟೆಂಟ್​ಗಳನ್ನು ನೀಡುತ್ತಿವೆ. ಈ ಎಲ್ಲ ಪ್ರಕ್ರಿಯೆಗಳು ಫೋನ್ ಹ್ಯಾಂಗ್ ಆಗದಂತೆ ಕೆಲಸ ಮಾಡಬೇಕೆಂದರೆ ಹಾರ್ಡ್​ವೇರ್ ಸಾಮರ್ಥ್ಯ ಹೆಚ್ಚಿರಬೇಕು. ಹೀಗಾಗಿ, ಮೊಬೈಲ್ ಕಂಪನಿಗಳು ಭವಿಷ್ಯದ ಫೋನ್​ಗಳ ತಯಾರಿಕೆಗಾಗಿ ಮೆಮೊರಿ ಘಟಕಗಳ ಮೇಲೆ ಹೆಚ್ಚಿನ ಹಣವನ್ನು ಹೂಡಿಕೆ ಮಾಡಬೇಕಾಗಿ ಬಂದಿದೆ.

ಮಾರುಕಟ್ಟೆ ವಿಶ್ಲೇಷಕರ ಅಂದಾಜಿನ ಪ್ರಕಾರ, ಎಐ ಆಧಾರಿತ ಮೆಮೊರಿ ಚಿಪ್​ಗಳಿಗಿರುವ ಈ ಭಾರಿ ಬೇಡಿಕೆ ಕೆಲವು ವರ್ಷಗಳ ಕಾಲ ಹೀಗೆಯೇ ಮುಂದುವರಿಯಲಿದೆ. ಪ್ರಮುಖ ಸೆಮಿಕಂಡಕ್ಟರ್ ತಯಾರಕ ಸಂಸ್ಥೆಗಳು ಉತ್ಪಾದನಾ ಸಾಮರ್ಥ್ಯವನ್ನು ಹೆಚ್ಚಿಸಲು ಕೋಟ್ಯಂತರ ರೂ. ಹೂಡಿಕೆ ಮಾಡುತ್ತಿವೆಯಾದರೂ, ಬೇಡಿಕೆಗೆ ತಕ್ಕಂತೆ ಉತ್ಪಾದನೆ ಸುಧಾರಿಸಲು ಸಾಕಷ್ಟು ಸಮಯ ಬೇಕಾಗುತ್ತದೆ. ಎಐ ತಂತ್ರಜ್ಞಾನವು ಡಿಜಿಟಲ್ ಜಗತ್ತಿನ ಆರ್ಥಿಕತೆ ಮತ್ತು ಹಾರ್ಡ್​ವೇರ್ ಮಾರುಕಟ್ಟೆಯ ಚಿತ್ರಣವನ್ನೇ ಬದಲಾಯಿಸುತ್ತಿದೆ. ಸ್ಮಾರ್ಟ್ ಗ್ಯಾಜೆಟ್​ಗಳು ನಮಗೆ ಅತ್ಯುತ್ತಮ ಅನುಭವ ಮತ್ತು ಹೊಸ ವೈಶಿಷ್ಟ್ಯಗಳನ್ನು ನೀಡುತ್ತಿರುವುದು ನಿಜವಾದರೂ, ಈ ಬುದ್ಧಿವಂತ ತಂತ್ರಜ್ಞಾನವನ್ನು ನಮ್ಮ ಕೈಗೆಟುಕುವಂತೆ ಮಾಡಲು ಗ್ರಾಹಕರು ಇನ್ಮುಂದೆ ಹೆಚ್ಚಿನ ಬೆಲೆ ತೆರಲು ಸಿದ್ಧರಾಗಬೇಕಿದೆ. ಭವಿಷ್ಯದ ಫೋನ್​ಗಳಲ್ಲಿ ರ್ಯಾಮ್ ಕೇವಲ ಒಂದು ಭಾಗವಾಗಿ ಉಳಿಯದೆ, ಅತ್ಯಂತ ಪ್ರಮುಖ ಮತ್ತು ದುಬಾರಿ ಘಟಕವಾಗಿ ಹೊರಹೊಮ್ಮಲಿದೆ.

ಸ್ಮಾರ್ಟ್​ಫೋನ್ ತಯಾರಿಕಾ ವೆಚ್ಚದಲ್ಲಿ ಮೆಮೊರಿ ಚಿಪ್​ಗಳ ಪಾಲು ದೊಡ್ಡದಾಗಿರುತ್ತದೆ. ರ್ಯಾಮ್ ಬೆಲೆ ಹೆಚ್ಚಾದಾಗ ಮೊಬೈಲ್ ಕಂಪನಿಗಳ ಮುಂದೆ ಎರಡು ಆಯ್ಕೆಗಳಿರುತ್ತವೆ- ಒಂದೋ ಆ ಹೆಚ್ಚುವರಿ ವೆಚ್ಚವನ್ನು ತಾವೇ ಭರಿಸಿ ಲಾಭದ ಪ್ರಮಾಣವನ್ನು ಕಡಿಮೆ ಮಾಡಿಕೊಳ್ಳುವುದು, ಇಲ್ಲವೇ ಆ ಹೊರೆಯನ್ನು ಗ್ರಾಹಕರ ಮೇಲೆ ಹಾಕುವುದು. ಉದ್ಯಮದ ತಜ್ಞರು ಹೇಳುವ ಪ್ರಕಾರ, ಆರಂಭದಲ್ಲಿ ಕೆಲವು ಕಂಪನಿಗಳು ಮಾರುಕಟ್ಟೆಯಲ್ಲಿ ಪೈಪೋಟಿ ಉಳಿಸಿಕೊಳ್ಳಲು ಬೆಲೆಯನ್ನು ಮೊದಲಿದ್ದ ಮಟ್ಟದಲ್ಲೇ ಇಡಬಹುದು. ಆದರೆ, ಚಿಪ್​ಗಳ ಬೆಲೆ ನಿರಂತರವಾಗಿ ಏರುತ್ತಲೇ ಹೋದರೆ, ಅಂತಿಮವಾಗಿ ಸ್ಮಾರ್ಟ್​ಫೋನ್​ಗಳು, ಟ್ಯಾಬ್ಲೆಟ್​ಗಳು ಮತ್ತು ಲ್ಯಾಪ್​ಟಾಪ್​ಗಳ ಚಿಲ್ಲರೆ ಮಾರಾಟದ ಬೆಲೆ ಏರಿಕೆಯಾಗುವುದು ಗ್ಯಾರಂಟಿ. ವಿಶೇಷವಾಗಿ ಯಾವ ಫೋನ್​ಗಳು ‘ಎಐ ಫೀಚರ್’ಗಳನ್ನೇ ಪ್ರಮುಖ ಆಕರ್ಷಣೆಯಾಗಿ ಇಟ್ಟುಕೊಂಡು ಮಾರುಕಟ್ಟೆಗೆ ಬರುತ್ತವೆಯೋ, ಅವುಗಳ ಬೆಲೆಯಲ್ಲಿ ದೊಡ್ಡ ಮಟ್ಟದ ಏರಿಕೆ ಕಂಡುಬರಬಹುದು.