ಸಣ್ಣ ಉಳಿತಾಯ ಯೋಜನೆಗಳ ಗ್ರಾಹಕರಿಗೆ ನಿರಾಸೆ: ಪಿಪಿಎಫ್, ಸುಕನ್ಯಾ ಸಮೃದ್ಧಿ ಬಡ್ಡಿದರ ಯಥಾಸ್ಥಿತಿ; ಸತತ 9ನೇ ತ್ರೈಮಾಸಿಕದಲ್ಲೂ ಬದಲಾವಣೆ ಇಲ್ಲ ಎಂದ ಕೇಂದ್ರ! Small Savings Schemes Interest Rates

ಈ ಕುರಿತು ಮಂಗಳವಾರ ಅಧಿಕೃತ ಪ್ರಕಟಣೆ ಹೊರಡಿಸಿರುವ ಹಣಕಾಸು ಸಚಿವಾಲಯ, 2026-27ರ ಹಣಕಾಸು ವರ್ಷದ ಎರಡನೇ ತ್ರೈಮಾಸಿಕದ ಬಡ್ಡಿದರಗಳು ಹಿಂದಿನ ಅವಧಿಯಲ್ಲಿದ್ದಷ್ಟೇ ಮುಂದುವರಿಯಲಿವೆ ಎಂದು ಸ್ಪಷ್ಟಪಡಿಸಿದೆ. 2026 ಜುಲೈ 1ರಿಂದ ಜಾರಿಗೆ ಬರುವ ಈ ಹೊಸ ಆದೇಶದಿಂದಾಗಿ ಹೂಡಿಕೆದಾರರು ಸೆಪ್ಟೆಂಬರ್ 30ರ ವರೆಗೂ ಹಳೆಯ ಬಡ್ಡಿದರವನ್ನೇ ಪಡೆಯಲಿದ್ದಾರೆ.

ಕೇಂದ್ರ ಸರ್ಕಾರದ ಹೊಸ ಆದೇಶದ ಪ್ರಕಾರ, ಮಧ್ಯಮ ವರ್ಗ ಹಾಗೂ ಹಿರಿಯ ನಾಗರಿಕರ ನೆಚ್ಚಿನ ಉಳಿತಾಯ ಯೋಜನೆಗಳ ಸದ್ಯದ ಬಡ್ಡಿದರಗಳ ಪಟ್ಟಿ ಇಲ್ಲಿದೆ:

ಸುಕನ್ಯಾ ಸಮೃದ್ಧಿ ಯೋಜನೆ (SSY): ಶೇ 8.2

ಹಿರಿಯ ನಾಗರಿಕರ ಉಳಿತಾಯ ಯೋಜನೆ (SCSS): ಶೇ 8.2

ರಾಷ್ಟ್ರೀಯ ಉಳಿತಾಯ ಪತ್ರ (NSC): ಶೇ 7.7

ಕಿಸಾನ್ ವಿಕಾಸ್ ಪತ್ರ (KVP): ಶೇ 7.5 (115 ತಿಂಗಳಿಗೆ ಮುಕ್ತಾಯ)

ಅಂಚೆ ಕಚೇರಿ ಮಾಸಿಕ ಆದಾಯ ಯೋಜನೆ (POMIS): ಶೇ 7.4

ಸಾರ್ವಜನಿಕ ಭವಿಷ್ಯ ನಿಧಿ (PPF): ಶೇ 7.1

ಇವುಗಳ ಜೊತೆಗೆ ಅಂಚೆ ಕಚೇರಿಯ ವಿವಿಧ ಅವಧಿಯ ಠೇವಣಿಗಳ ಮೇಲಿನ ಬಡ್ಡಿದರಗಳು ಸಹ ಯಾವುದೇ ಬದಲಾವಣೆ ಇಲ್ಲದೆ ಶೇ 6.9 ರಿಂದ ಶೇ 7.5 ರಷ್ಟೇ ಮುಂದುವರಿಯಲಿವೆ.

ಸಾಮಾನ್ಯವಾಗಿ ಕೇಂದ್ರ ಸರ್ಕಾರವು ಪ್ರತಿ ಮೂರು ತಿಂಗಳಿಗೊಮ್ಮೆ ಸರ್ಕಾರಿ ಬಾಂಡ್‌ಗಳ (G-Sec) ಆದಾಯದ ಆಧಾರದ ಮೇಲೆ ಸಣ್ಣ ಉಳಿತಾಯ ಯೋಜನೆಗಳ ಬಡ್ಡಿದರಗಳನ್ನು ಪರಿಶೀಲಿಸುತ್ತದೆ. ಆದರೆ, 2023-24ರ ನಾಲ್ಕನೇ ತ್ರೈಮಾಸಿಕದ ಬಳಿಕ ಸರ್ಕಾರ ಇವುಗಳ ದರದಲ್ಲಿ ಯಾವುದೇ ಪ್ರಮುಖ ಬದಲಾವಣೆ ಮಾಡಿಲ್ಲ. 2024ರ ಆರಂಭದಲ್ಲಿ ಸುಕನ್ಯಾ ಸಮೃದ್ಧಿ ಮತ್ತು 3 ವರ್ಷದ ಅವಧಿ ಠೇವಣಿಗಳ ಬಡ್ಡಿದರವನ್ನು ಅತ್ಯಲ್ಪ ಪ್ರಮಾಣದಲ್ಲಿ ಏರಿಕೆ ಮಾಡಲಾಗಿತ್ತು. ಅದಾದ ಬಳಿಕ ಕಳೆದ ಒಂಬತ್ತು ತ್ರೈಮಾಸಿಕಗಳಿಂದ ಬಡ್ಡಿದರಗಳು ಒಂದೇ ಸಮನಾಗಿ ಸ್ಥಿರವಾಗಿವೆ.

ಷೇರು ಮಾರುಕಟ್ಟೆಯ ಏರಿಳಿತಗಳಿಗೆ ಹೆದರಿ, ಸುರಕ್ಷಿತ ಹಾಗೂ ಗ್ಯಾರಂಟಿ ಆದಾಯ ಬಯಸುವ ದೇಶದ ಕೋಟ್ಯಂತರ ಹೂಡಿಕೆದಾರರಿಗೆ ಅಂಚೆ ಕಚೇರಿ ಮತ್ತು ಬ್ಯಾಂಕುಗಳ ಈ ಸಣ್ಣ ಉಳಿತಾಯ ಯೋಜನೆಗಳೇ ಇಂದಿಗೂ ಮೊದಲ ಆದ್ಯತೆಯಾಗಿವೆ. ಪ್ರಸ್ತುತ ಬಡ್ಡಿದರ ಹೆಚ್ಚಳದ ನಿರೀಕ್ಷೆಯಲ್ಲಿದ್ದ ಸಾರ್ವಜನಿಕರಿಗೆ ಈ ಬಾರಿ ಸರ್ಕಾರದ ನಿರ್ಧಾರ ಕೊಂಚ ನಿರಾಸೆ ಮೂಡಿಸಿದೆ,(ಏಜೆನ್ಸೀಸ್).