ಇನ್ಶೂರೆನ್ಸ್ ಹಣ, ಪ್ರಿಯಕರನ ಜೊತೆ ಹೊಸ ಬದುಕು ಕಟ್ಟಿಕೊಳ್ಳುವ ಆಸೆ; ಪತಿಗೆ ನಿದ್ದೆ ಮಾತ್ರೆ ಕೊಟ್ಟು, ಹಾವಿನಿಂದ ಕಚ್ಚಿಸಿ ಕೊಂದ ಪತ್ನಿ ಅರೆಸ್ಟ್.. Meerut

ಈ ಪ್ರಕರಣವನ್ನು ಪೊಲೀಸರು 24 ಗಂಟೆಗಳ ಬೇಧಿಸಿದ್ದಾರೆ. ಸದ್ಯ ಕೊಲೆಯಾದ ಅತುಲ್​ನ ಪತ್ನಿ ಮತ್ತು ಇತರ ಮೂವರನ್ನು ಮೀರತ್​ ಪೊಲೀಸರು ಬಂಧಿಸಿದ್ದಾರೆ ಎನ್ನಲಾಗಿದೆ.

ದಾಮಿನಿ ಹಾಗೂ ಅತುಲ್ ಪನ್ವರ್​ಗೆ ಒಂದು ಮಗುವಿದೆ. ಕೃಷ್ಣ ಕಿಡ್ಸ್ ಸ್ಕೂಲ್ ಎಂಬ ಪ್ಲೇ-ಸ್ಕೂಲ್ ಅನ್ನು ಆಕೆ ನಡೆಸುತ್ತಿದ್ದಳು. ಇದೇ ವೇಳೆಗೆ ಶಾಲೆಯ ಡ್ರೈವರ್​ ಆದ ತುಷಾರ್ ಜೊತೆಗೆ ಪ್ರೇಮಾಂಕುರವಾಗುತ್ತದೆ. ಆತನೊಂದಿಗೆ ಹೊಸ ಬದುಕು ಕಟ್ಟಿಕೊಳ್ಳುವ ಸಲುವಾಗಿ ಹಾಗೂ ಪತಿಯ ಜೀವ ವಿಮೆ ಹಣಕ್ಕಾಗಿ ಇಬ್ಬರು ಕೊಲ್ಲಲು ಪ್ಲ್ಯಾನ್​ ಮಾಡುತ್ತಾರೆ.

ಪ್ಲ್ಯಾನ್​ ಪ್ರಕಾರ, ಪತಿ ಅತುಲ್​ ಪನ್ವರ್​ಗೆ ಹಾಲಿನಲ್ಲಿ ನಿದ್ರೆ ಮಾತ್ರೆ ಹಾಕಿ ಕುಡಿಯಲು ಕೊಟ್ಟಿದ್ದಾಳೆ. ಹೆಂಡತಿಯ ಕುತಂತ್ರ ಅರಿಯದ ಆತ ಅದನ್ನು ಕುಡಿದು ನಿದ್ರಾಲೋಕದಲ್ಲಿರುವಾಗ ತುಷಾರ್​ ವಿಷಪೂರಿತ ಹಾವನ್ನು ತಂದು ಕೊಟ್ಟಿದ್ದಾನೆ. ಅತುಲ್​ ಹಾಸಿಗೆ ಮೇಲೆ ಹಾವನ್ನು ಬಿಟ್ಟು ಕೊಂದಿದ್ದಾರೆ. ಅತುಲ್​ ಸಾವು ಸಹಜ ಎಂದು ಬಿಂಬಿಸಲು ಈ ಪ್ಲ್ಯಾನ್​ ಮಾಡಿದ್ದರು ಎನ್ನಲಾಗಿದೆ. ದಾಮಿನಿಯ ಪ್ರಿಯಕರ ತುಷಾರ್​ಗೆ ಹಾವನ್ನು ತರಲು ಸೋನು ಮತ್ತು ಉದಯ್ ಎಂಬ ಇಬ್ಬರು ಸಹಾಯ ಮಾಡಿದ್ದರು ಎಂದು ಪೊಲೀಸರು ಮಾಹಿತಿ ಹಂಚಿಕೊಂಡಿದ್ದಾರೆ.

ಪೊಲೀಸರು ಈ ಘಟನೆಯನ್ನು ಅನುಮಾನಾಸ್ಪದವೆಂದು ಪರಿಗಣಿಸಿ ತನಿಖೆ ಆರಂಭಿಸಿದರು. ತನಿಖೆಯ ಸಮಯದಲ್ಲಿ, ದಾಮಿನಿ ಮತ್ತು ತುಷಾರ್ ಅವರ ಮೊಬೈಲ್ ಫೋನ್‌ಗಳನ್ನು ಪರಿಶೀಲಿಸಲಾಯಿತು. ಈ ವೇಳೆ ಇಬ್ಬರು ದೀರ್ಘ ಕಾಲ ಮಾತನಾಡಿದ್ದರು. ತುಷಾರ್ ಅವರ ಮೊಬೈಲ್ ಫೋನ್‌ನಲ್ಲಿ ಹಾವುಗಳ ಛಾಯಾಚಿತ್ರಗಳು ಸಹ ಪೊಲೀಸರಿಗೆ ಸಿಕ್ಕಿವೆ. ಸುದೀರ್ಘ ವಿಚಾರಣೆ ನಡೆಸಿದ ಬಳಿಕ ಕೊಲೆ ಮಾಡಿದ್ದನ್ನು ಒಪ್ಪಿಕೊಂಡಿದ್ದಾರೆ ಎಂದು ಮೀರತ್ ಎಸ್‌ಎಸ್‌ಪಿ ಅವಿನಾಶ್ ಪಾಂಡೆ ಹೇಳಿದ್ದಾರೆ, (ಏಜೆನ್ಸೀಸ್).