ಶ್ರೀರಾಮ ಕೇವಲ ದೇವನಲ್ಲ, ರಾಷ್ಟ್ರೀಯ ಐಕ್ಯತೆಯ ಮಹೋನ್ನತ ಸಂಕೇತ: ಯುಪಿ ಸಿಎಂ ಯೋಗಿ ಆದಿತ್ಯನಾಥ್ | Yogi Adityanath

ಈ ಬಗ್ಗೆ ಲಖನೌದಲ್ಲಿ ನಡೆದ ಧಾರ್ಮಿಕ ಸಭೆಯನ್ನುದ್ದೇಶಿಸಿ ಮಾತನಾಡಿದ ಯುಪಿ ಸಿಎಂ, ಸಮಾಜಕ್ಕೆ ದೊಡ್ಡ ಪಿಡುಗಾಗಿ ಪರಿಣಮಿಸಿರುವ ಲವ್ ಜಿಹಾದ್, ಕಾನೂನುಬಾಹಿರ ಮತಾಂತರ ಹಾಗೂ ಲ್ಯಾಂಡ್ ಜಿಹಾದ್ ವಿರುದ್ಧ ಇಡೀ ಹಿಂದೂ ಸಮಾಜವು ಸದಾ ಜಾಗರೂಕರಾಗಿರಬೇಕು ಎಂದು ಕರೆ ನೀಡಿದ್ದಾರೆ.

ಜಗದ್ಗುರು ರಾಮಾನಂದಾಚಾರ್ಯ ಸ್ವಾಮಿ ರಾಮಭದ್ರಾಚಾರ್ಯ ಅವರ ನೇತೃತ್ವದಲ್ಲಿ ನಡೆದ ಒಂಬತ್ತು ದಿನಗಳ 'ಶ್ರೀರಾಮ ಕಥಾ ಮಹೋತ್ಸವದ ಸಮಾರೋಪ ಸಮಾರಂಭದಲ್ಲಿ ಸಿಎಂ ಯೋಗಿ ಆದಿತ್ಯನಾಥ್ ಈ ಕಠಿಣ ನಿಲುವು ವ್ಯಕ್ತಪಡಿಸಿದ್ದಾರೆ.

ಈ ಸಭೆಯನ್ನುದ್ದೇಶಿಸಿ ಮಾತನಾಡಿದ ಮುಖ್ಯಮಂತ್ರಿಗಳು, ಪ್ರಭು ಶ್ರೀರಾಮನು ಕೇವಲ ಒಬ್ಬ ದೇವನಲ್ಲ, ಆತ ಈ ದೇಶದ ರಾಷ್ಟ್ರೀಯ ಐಕ್ಯತೆಯ ಮಹೋನ್ನತ ಸಂಕೇತ. ಕೇವಲ ರಾಜಕೀಯ ಪ್ರೇರಿತ ಸ್ವಾರ್ಥ ಅಥವಾ ಪೂರ್ವಾಗ್ರಹ ಪೀಡಿತ ಕೆಲವೇ ಕೆಲವು ಜನರನ್ನು ಹೊರತುಪಡಿಸಿದರೆ, ಭಾರತದ ನಿಜವಾದ ಡಿಎನ್ಎ ಹೊಂದಿರುವ ಪ್ರತಿಯೊಬ್ಬ ನಾಗರಿಕನೂ ಶ್ರೀರಾಮನ ಆದರ್ಶಗಳನ್ನು ತನ್ನ ಜೀವನದ ಭಾಗವಾಗಿಸಿಕೊಂಡಿದ್ದಾನೆ ಎಂದು ಮಾರ್ಮಿಕವಾಗಿ ಹೇಳಿದ್ದಾರೆ.

ರಾಮಜನ್ಮಭೂಮಿ ಹೋರಾಟವು ಕೇವಲ ಒಂದು ಮಂದಿರದ ಹೋರಾಟವಾಗಿರಲಿಲ್ಲ. ಅದು ಭಾರತದ ಸಾಂಸ್ಕೃತಿಕ ಪರಂಪರೆಯನ್ನು ರಕ್ಷಿಸುವ ಮಹಾನ್ ಅಭಿಯಾನವಾಗಿತ್ತು. 2019 ರಲ್ಲಿ ಸುಪ್ರೀಂ ಕೋರ್ಟ್‌ನ ಸಾಂವಿಧಾನಿಕ ಪೀಠವು ಸರ್ವಾನುಮತದಿಂದ ರಾಮಲಲ್ಲಾ ಜನ್ಮಸ್ಥಳವನ್ನು ಮಾನ್ಯ ಮಾಡಿತು. ಈ ಕಾನೂನು ಹೋರಾಟದಲ್ಲಿ ಸ್ವಾಮಿ ರಾಮಭದ್ರಾಚಾರ್ಯರು ನೀಡಿದ ಸಾಕ್ಷ್ಯಗಳು ಮತ್ತು ಅವರ ಪಾತ್ರ ಐತಿಹಾಸಿಕವಾದದ್ದು ಎಂದು ಯೋಗಿ ಶ್ಲಾಘಿಸಿದ್ದಾರೆ. ರಾಮಾಯಣದ ಉದಾಹರಣೆ ನೀಡಿದ ಅವರು, ಅಂದಿನ ಕಾಲದಲ್ಲೂ ಜ್ಞಾನ ಮತ್ತು ಸಂಶೋಧನಾ ಕೇಂದ್ರಗಳನ್ನು ನಾಶಮಾಡಲು ಯತ್ನಿಸಿದ ತಾಟಕಿಯಂತಹ ರಾಕ್ಷಸರನ್ನು ಸಂಹರಿಸಿ ಶ್ರೀರಾಮನು ಧರ್ಮ ರಕ್ಷಣೆ ಮಾಡಿದ್ದನ್ನು ನೆನಪಿಸಿದ್ದಾರೆ.

‘ಲವ್ ಜಿಹಾದ್’ ಕುರಿತು ಕಳವಳ ವ್ಯಕ್ತಪಡಿಸಿದ ಸಿಎಂ ಯೋಗಿ, ಇದು ಕೇವಲ ವೈಯಕ್ತಿಕ ವಿಷಯವಲ್ಲ, ಭಾರತದ ಧಾರ್ಮಿಕ ಜನಸಂಖ್ಯಾ ಚಿತ್ರಣವನ್ನು ಬದಲಾಯಿಸಲು ವ್ಯವಸ್ಥಿತವಾಗಿ ನಡೆಯುತ್ತಿರುವ ಪಿತೂರಿಯಾಗಿದೆ. ದೇಶದ ಹೈಕೋರ್ಟ್ ಕೂಡ 2009 ಮತ್ತು 2011 ರಲ್ಲೇ ಈ ಬಗ್ಗೆ ಗಂಭೀರ ಕಳವಳ ವ್ಯಕ್ತಪಡಿಸಿತ್ತು. ಇದನ್ನು ತಡೆಯಲು ಉತ್ತರ ಪ್ರದೇಶ ಸರ್ಕಾರವು 2020 ರಲ್ಲೇ ಕಾನೂನುಬಾಹಿರ ಧಾರ್ಮಿಕ ಮತಾಂತರ ನಿಷೇಧ ಕಾಯ್ದೆಯನ್ನು ಜಾರಿಗೆ ತಂದಿದೆ. ಆದರೆ, ಕೇವಲ ಕಾಯ್ದೆಯಿಂದ ಮಾತ್ರ ಇದು ಸಾಧ್ಯವಿಲ್ಲ, ಸಾರ್ವಜನಿಕರಲ್ಲಿ ಈ ಬಗ್ಗೆ ಹೆಚ್ಚಿನ ಜಾಗೃತಿ ಮೂಡಬೇಕಿದೆ ಎಂದು ತಿಳಿಸಿದ್ದಾರೆ.

ಪ್ರತಿ ಯುಗದಲ್ಲೂ ನಕಾರಾತ್ಮಕ ಶಕ್ತಿಗಳು ತಲೆ ಎತ್ತುತ್ತವೆ. ಆದರೆ ಸಮಾಜವು ಒಗ್ಗಟ್ಟಿನಿಂದ ಅವುಗಳನ್ನು ಎದುರಿಸಬೇಕು. ಈ ಪವಿತ್ರ ಭಾರತ ಭೂಮಿಯು ಆಕ್ರಮಣಕಾರರಿಗಾಗಲಿ, ಅಥವಾ ಈ ದೇಶದ ಮೌಲ್ಯಗಳು ಮತ್ತು ಸಂಪ್ರದಾಯಗಳ ಮೇಲೆ ನಂಬಿಕೆ, ನಿಷ್ಠೆ ಇಲ್ಲದವರಿಗಾಗಲಿ ಆಶ್ರಯ ತಾಣವಾಗಲು ಖಂಡಿತ ಸಾಧ್ಯವಿಲ್ಲ ಎಂದು ಯೋಗಿ ಆದಿತ್ಯನಾಥ್ ಅತ್ಯಂತ ಖಡಕ್ ಶಬ್ದಗಳಲ್ಲಿ ಎಚ್ಚರಿಕೆ ನೀಡಿದ್ದಾರೆ,(ಏಜೆನ್ಸೀಸ್​).