ಶ್ರೇಯಸ್ ಅಯ್ಯರ್ ಶತಕದ ಅಬ್ಬರ! ಲಕ್ನೋ ಮಣಿಸಿ ಪ್ಲೇ-ಆಫ್ ರೇಸ್‌ನಲ್ಲಿ ಜೀವಂತವಾಗಿ ಉಳಿದ ಪಂಜಾಬ್ ಕಿಂಗ್ಸ್! LSGvsPBKS

ಬೃಹತ್ ಮೊತ್ತವನ್ನು ಬೆನ್ನಟ್ಟಿದ ಪಂಜಾಬ್ ಕಿಂಗ್ಸ್ ತಂಡಕ್ಕೆ ನಾಯಕ ಶ್ರೇಯಸ್ ಅಯ್ಯರ್ ಆಸರೆಯಾದರು. ಆರಂಭದಿಂದಲೇ ಲಕ್ನೋ ಬೌಲರ್‌ಗಳ ಮೇಲೆ ಸವಾರಿ ಮಾಡಿದ ಅಯ್ಯರ್, ಕೇವಲ 51 ಎಸೆತಗಳಲ್ಲಿ ಭೀಕರ 101 ರನ್ ಚಚ್ಚಿ ಅಜೇಯರಾಗುಳಿದರು. ಇವರಿಗೆ ಉತ್ತಮ ಸಾಥ್ ನೀಡಿದ ಆರಂಭಿಕ ಆಟಗಾರ ಪ್ರಭ್‌ಸಿಮ್ರನ್ ಸಿಂಗ್ ಕೇವಲ 39 ಎಸೆತಗಳಲ್ಲಿ 69 ರನ್ ಸಿಡಿಸಿ ಜಯದ ಹಾದಿಯನ್ನು ಸುಲಭಗೊಳಿಸಿದರು. ಈ ಜೋಡಿಯ ಅಬ್ಬರಕ್ಕೆ ಲಕ್ನೋದ ಬೌಲಿಂಗ್ ಲೈನ್‌ಅಪ್ ಸಂಪೂರ್ಣವಾಗಿ ಧೂಳೀಪಟವಾಯಿತು. ಪಂಜಾಬ್ ಪಡೆ ಕೇವಲ 3 ವಿಕೆಟ್ ಕಳೆದುಕೊಂಡು 18 ಓವರ್‌ಗಳಲ್ಲೇ ಗುರಿ ತಲುಪಿ ನೆಟ್ ರನ್ ರೇಟ್ ಅನ್ನೂ ಹೆಚ್ಚಿಸಿಕೊಂಡಿತು.

ಸತತ 6 ಪಂದ್ಯಗಳ ಸೋಲಿನಿಂದ ಕಂಗೆಟ್ಟಿದ್ದ ಪಂಜಾಬ್ ಕಿಂಗ್ಸ್ ಸೂಕ್ತ ಸಮಯದಲ್ಲಿ ಗೆಲುವಿನ ಲಯಕ್ಕೆ ಮರಳಿದೆ. ಈ ಭರ್ಜರಿ ಜಯದೊಂದಿಗೆ ಪಂಜಾಬ್ ಒಟ್ಟು 15 ಅಂಕಗಳೊಂದಿಗೆ ಅಂಕಪಟ್ಟಿಯಲ್ಲಿ 4ನೇ ಸ್ಥಾನಕ್ಕೆ ಜಿಗಿದಿದೆ. ಸದ್ಯ ಪಂಜಾಬ್ ತಂಡ ತನ್ನ ಕೆಲಸವನ್ನು ಯಶಸ್ವಿಯಾಗಿ ಮುಗಿಸಿದ್ದು, ರವಿವಾರ ನಡೆಯಲಿರುವ ಕೊನೆಯ ಲೀಗ್ ಪಂದ್ಯಗಳ ಫಲಿತಾಂಶದ ಮೇಲೆ ಕಣ್ಣಿಟ್ಟಿದೆ. ರಾಜಸ್ಥಾನ್ ರಾಯಲ್ಸ್ ಮತ್ತು ಕೋಲ್ಕತ್ತಾ ನೈಟ್ ರೈಡರ್ಸ್ (KKR) ತಂಡಗಳು ತಮ್ಮ ಪಂದ್ಯಗಳಲ್ಲಿ ಸೋಲಲಿ ಎಂದು ಪಂಜಾಬ್ ಪ್ರಾರ್ಥಿಸುತ್ತಿದೆ. ನೆಟ್ ರನ್ ರೇಟ್‌ನಲ್ಲಿ ಪಂಜಾಬ್ ಉತ್ತಮ ಸ್ಥಿತಿಯಲ್ಲಿರುವುದರಿಂದ, ಕೆಕೆಆರ್ ತಂಡ ಪ್ಲೇ-ಆಫ್ ತಲುಪಬೇಕಾದರೆ ಭಾನುವಾರ ಬೃಹತ್ ಅಂತರದ ಗೆಲುವು ದಾಖಲಿಸಬೇಕಾದ ಅನಿವಾರ್ಯತೆಯಿದೆ.

ಮತ್ತೊಂದೆಡೆ, ತವರು ಮೈದಾನದಲ್ಲೇ ಮುಖಭಂಗ ಅನುಭವಿಸಿದ ಲಕ್ನೋ ಸೂಪರ್ ಜೈಂಟ್ಸ್ ತಂಡದ ಐಪಿಎಲ್ 2026ರ ಸೀಸನ್ ಅತ್ಯಂತ ಕರಾಳವಾಗಿ ಅಂತ್ಯಗೊಂಡಿದೆ. ಮೊದಲು ಬ್ಯಾಟಿಂಗ್ ಮಾಡಿದ್ದ ಲಕ್ನೋ, ಜೋಶ್ ಇಂಗ್ಲಿಸ್ (72) ಮತ್ತು ಆಯುಷ್ ಬದೋನಿ (43) ಅವರ ಹೋರಾಟದಿಂದ 196 ರನ್ ಗಳಿಸಿತ್ತು. ಆದರೆ ಬೌಲಿಂಗ್ ವೈಫಲ್ಯದಿಂದಾಗಿ ಈ ಮೊತ್ತವನ್ನು ಡಿಫೆಂಡ್ ಮಾಡಿಕೊಳ್ಳಲು ಸಾಧ್ಯವಾಗಲಿಲ್ಲ. ಲಕ್ನೋ ತಂಡ ಈ ಸೀಸನ್‌ನಲ್ಲಿ ಆಡಿದ 14 ಪಂದ್ಯಗಳಲ್ಲಿ ಕೇವಲ 4 ಜಯ ಸಾಧಿಸಿ, ತನ್ನ ಐಪಿಎಲ್ ಇತಿಹಾಸದಲ್ಲೇ ಅತ್ಯಂತ ಕನಿಷ್ಠ ಪ್ರದರ್ಶನ ನೀಡಿ ಟೂರ್ನಿಯಿಂದ ಬೇಸರದಿಂದಲೇ ಹೊರನಡೆದಿದೆ,(ಏಜೆನ್ಸೀಸ್​).