ಟಿವಿಕೆ ಪಕ್ಷದ ನಾಯಕನಿಗೆ ಶಾಕ್​! ದಳಪತಿ ವಿಜಯ್​ ಕೋರಿದ್ದ ಅನುಮತಿ ತಿರಸ್ಕರಿಸಿದ ತಮಿಳುನಾಡು ಖಾಕಿ

ಚೆನ್ನೈ: ತಮಿಳಗಾ ವೆಟ್ರಿ ಕಳಗಂ (ಟಿವಿಕೆ) ಪಕ್ಷದ ಮೂಲಕ ರಾಜಕೀಯ ಅಖಾಡಕ್ಕಿಳಿದಿರುವ ದಳಪತಿ ವಿಜಯ್ ಅವರಿಗೆ ತಮಿಳುನಾಡಿನ ಪೊಲೀಸರು ಶಾಕ್ ನೀಡಿದ್ದಾರೆ. ಕರೂರ್ ಕಾಲ್ತುಳಿತ ದುರಂತ ಬಳಿಕ ಪ್ರಚಾರ ರ್ಯಾಲಿ ಮುಂದುವರಿಸಲು ಕೋರಿದ್ದ ಅನುಮತಿಯನ್ನು ಖಾಕಿ ಪಡೆ ತಿರಸ್ಕರಿಸಿದೆ.

ಇದೇ ಡಿಸೆಂಬರ್ 4ರಂದು ಸೇಲಂನಲ್ಲಿ ನಡೆಯಲಿರುವ ಕಾರ್ಯಕ್ರಮಕ್ಕೆ ವಿಜಯ್​ ಮನವಿ ಅರ್ಜಿಯನ್ನು ಸಲ್ಲಿಸಿದ್ದರು. ಈ ಪತ್ರವನ್ನು ನೋಡಿದ ತಮಿಳುನಾಡು ಪೊಲೀಸರು, ಅನುಮತಿ ನೀಡುವ ಬದಲಿಗೆ ತಿರಸ್ಕರಿಸಿದ್ದಾರೆ.

ಟಿವಿಕೆ ನಾಯಕ ವಿಜಯ್ ಭವಿಷ್ಯದಲ್ಲಿ ಸಾರ್ವಜನಿಕ ಸಭೆಗಳಿಗೆ ಅನುಮತಿ ಕೋರಿದರೆ, ಕಾರ್ಯಕ್ರಮದ ದಿನಾಂಕಕ್ಕಿಂತ ಕನಿಷ್ಠ ನಾಲ್ಕು ವಾರಗಳ ಮುಂಚಿತವಾಗಿ ಅನುಮತಿಗಾಗಿ ಅರ್ಜಿ ಸಲ್ಲಿಸಬೇಕು ಎಂದು ಪೊಲೀಸರು ಸಲಹೆ ನೀಡಿದ್ದಾರೆ. ಈ ಮಧ್ಯೆ, ಪಕ್ಷವು ತಮ್ಮ ಪ್ರಚಾರವನ್ನು ಪರ್ಯಾಯ ದಿನಾಂಕಗಳಲ್ಲಿ ನಡೆಸಲು ಶೀಘ್ರದಲ್ಲೇ ಅನುಮತಿಗಾಗಿ ಅರ್ಜಿ ಸಲ್ಲಿಸುವುದಾಗಿ ತಿಳಿಸಿದೆ. ಸೇಲಂ ನಂತರ ಈರೋಡ್, ಕೃಷ್ಣಗಿರಿ ಮತ್ತು ಧರ್ಮಪುರಿ ಜಿಲ್ಲೆಗಳಲ್ಲಿ ಪಕ್ಷದ ನಾಯಕ ವಿಜಯ್ ಅವರ ಪ್ರಚಾರವನ್ನು ನಡೆಸಲು ಪಕ್ಷದ ಮೂಲಗಳು ಪ್ಲಾನ್​ಗಳನ್ನು ಹಾಕಿಕೊಂಡಿದೆ ಎಂದು ವರದಿಯಾಗಿದೆ,(ಏಜೆನ್ಸೀಸ್).