ಚೀನಾ-ಪಾಕ್‌ಗೆ ಶಾಕ್: ಅಮೆರಿಕ ರಿಲೀಸ್​ ಮಾಡಿದ ಇಂಡಿಯಾ ಮ್ಯಾಪ್​ನಲ್ಲಿ ಭಾರತೀಯರಿಗೆ ಖುಷಿ ಸುದ್ದಿ..! America

ಪ್ರಧಾನಿ ನರೇಂದ್ರ ಮೋದಿ ಮತ್ತು ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ನಡುವಿನ ಮಾತುಕತೆಯ ನಂತರ, ಭಾರತದಿಂದ ಅಮೆರಿಕಕ್ಕೆ ರಫ್ತಾಗುವ ಸರಕುಗಳ ಮೇಲಿನ ಸುಂಕವನ್ನು ಶೇ. 50ರಿಂದ ಶೇ. 18ಕ್ಕೆ ಇಳಿಸಲು ನಿರ್ಧರಿಸಲಾಗಿದೆ. ಈ ಒಪ್ಪಂದದ ವಿವರಗಳನ್ನು ಹಂಚಿಕೊಳ್ಳುವಾಗ ಅಮೆರಿಕ ಸರ್ಕಾರದ ಅಧಿಕೃತ ಹ್ಯಾಂಡಲ್ ಹಂಚಿಕೊಂಡ ಗ್ರಾಫಿಕ್‌ನಲ್ಲಿ ಭಾರತದ ಸಂಪೂರ್ಣ ನಕ್ಷೆಯನ್ನು ಬಳಸಲಾಗಿದೆ. ಇದು ಕೇವಲ ತಾಂತ್ರಿಕ ತಪ್ಪಲ್ಲ, ಬದಲಿಗೆ ಭಾರತದ ಪ್ರಾದೇಶಿಕ ಸಮಗ್ರತೆಗೆ ಅಮೆರಿಕ ನೀಡಿದ ಮೌನ ಸಮ್ಮತಿ ಎಂದು ಭೂರಾಜಕೀಯ ತಜ್ಞರು ವಿಶ್ಲೇಷಿಸುತ್ತಿದ್ದಾರೆ.

ಈ ಹಿಂದಿನ ಅಮೆರಿಕದ ಆಡಳಿತಗಳು ಭಾರತದ ನಕ್ಷೆಯನ್ನು ತೋರಿಸುವಾಗ PoK ಭಾಗವನ್ನು ವಿವಾದಿತ ಎಂದು ಗುರುತಿಸುತ್ತಿದ್ದವು. ಆದರೆ 2026ರ ಈ ನಕ್ಷೆಯಲ್ಲಿ ಅಂತಹ ಯಾವುದೇ ಗುರುತುಗಳಿಲ್ಲದೆ, ಇಡೀ ಜಮ್ಮು-ಕಾಶ್ಮೀರ ಮತ್ತು ಲಡಾಖ್ ಅನ್ನು ಭಾರತದ ಭಾಗವಾಗಿ ತೋರಿಸಿರುವುದು ಪಾಕಿಸ್ತಾನಕ್ಕೆ ದೊಡ್ಡ ಹೊಡೆತ ನೀಡಿದೆ. ಅತ್ತ ಅಕ್ಷಯ್ ಚಿನ್ ವಿಚಾರದಲ್ಲಿ ಚೀನಾಕ್ಕೂ ಅಮೆರಿಕ ಖಡಕ್ ಸಂದೇಶ ರವಾನಿಸಿದೆ.

ಸುಂಕ ಕಡಿತ: ಭಾರತೀಯ ರಫ್ತುಗಳ ಮೇಲೆ ಈ ಹಿಂದೆ ವಿಧಿಸಲಾಗಿದ್ದ ಶೇ. 50ರಷ್ಟು ದಂಡನಾತ್ಮಕ ಸುಂಕವನ್ನು ಶೇ. 18ಕ್ಕೆ ಇಳಿಸಲಾಗಿದೆ.

ಶೂನ್ಯ ಸುಂಕ: ಕೃಷಿ ಉತ್ಪನ್ನಗಳು, ಕಾಫಿ ಮತ್ತು ಸಾಂಬಾರ ಪದಾರ್ಥಗಳಿಗೆ ವಿಶೇಷ ರಿಯಾಯಿತಿ ಸಿಗಲಿದೆ.

ಇಂಧನ ಡೀಲ್: ಬದಲಾಗಿ ಭಾರತವು ಅಮೆರಿಕದಿಂದ 500 ಬಿಲಿಯನ್ ಡಾಲರ್ ಮೌಲ್ಯದ ಇಂಧನ ಮತ್ತು ತಂತ್ರಜ್ಞಾನವನ್ನು ಖರೀದಿಸಲು ಒಪ್ಪಿದೆ.

ಈ ನಕ್ಷೆಯು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ಭಾರತೀಯ ನೆಟ್ಟಿಗರು ಅಮೆರಿಕ ಕೊನೆಗೂ ಸತ್ಯವನ್ನು ಒಪ್ಪಿಕೊಂಡಿದೆ ಎಂದು ಸಂಭ್ರಮಿಸುತ್ತಿದ್ದಾರೆ,(ಏಜೆನ್ಸೀಸ್).