ಇಂಡೋ-ಪೆಸಿಫಿಕ್ ಹೆಸರಿನಿಂದ ಇಂಡೋ ಕೈಬಿಟ್ಟ ಅಮೆರಿಕ: ಕ್ವಾಡ್ ಒಕ್ಕೂಟದ ಅಂತ್ಯವೇ ಎಂದು ಶಶಿ ತರೂರ್ ಪ್ರಶ್ನೆ! Shashi Tharoor

ಇದು ಕ್ವಾಡ್ ಮೈತ್ರಿಕೂಟದ ಶವಪೆಟ್ಟಿಗೆಗೆ ಹೊಡೆದ ಮತ್ತೊಂದು ಮೊಳೆಯೇ ಎಂದು ಸಂಸದ ಶಶಿ ತರೂರ್ ಸಾಮಾಜಿಕ ಜಾಲತಾಣ ‘Xನಲ್ಲಿ ಬರೆಯುವ ಮೂಲಕ ತೀವ್ರ ಆತಂಕ ವ್ಯಕ್ತಪಡಿಸಿದ್ದಾರೆ.

ಅಮೆರಿಕ ರಕ್ಷಣಾ ಇಲಾಖೆಯ ಪ್ರಕಟಣೆಯ ಪ್ರಕಾರ, ಈ ನಿರ್ಧಾರವು ಕೇವಲ ತನ್ನ ಹಳೆಯ ಇತಿಹಾಸ ಮತ್ತು ಪರಂಪರೆಯನ್ನು ಮರುಸ್ಥಾಪಿಸುವ ಪ್ರಕ್ರಿಯೆಯಾಗಿದೆ. ಕಮಾಂಡ್‌ನ ಮೂಲಭೂತ ಉದ್ದೇಶವಾಗಲಿ ಅಥವಾ ಪ್ರಾದೇಶಿಕ ಮಿತ್ರರಾಷ್ಟ್ರಗಳೊಂದಿಗೆ ಮುಕ್ತ ಹಾಗೂ ಮುಕ್ತ ವಲಯವನ್ನು ಕಾಪಾಡಿಕೊಳ್ಳುವ ನಮ್ಮ ದೃಢವಾದ ಬದ್ಧತೆಯಾಗಲಿ ಇದರಿಂದ ಯಾವುದೇ ಬದಲಾವಣೆ ಆಗುವುದಿಲ್ಲ ಎಂದು ಅಮೆರಿಕ ಸ್ಪಷ್ಟಪಡಿಸಿದೆ.

1947ರ ಜನವರಿ 1 ರಂದು ಅಮೆರಿಕದ 33ನೇ ಅಧ್ಯಕ್ಷ ಹ್ಯಾರಿ ಎಸ್. ಟ್ರೂಮನ್ ಅವರಿಂದ ಸ್ಥಾಪಿಸಲ್ಪಟ್ಟ ಈ ಕಮಾಂಡ್ ಸತತ 70 ವರ್ಷಗಳಿಗೂ ಹೆಚ್ಚು ಕಾಲ ಪೆಸಿಫಿಕ್ ಕಮಾಂಡ್ ಎಂದೇ ಇತ್ತು. ಆದರೆ, 2018ರಲ್ಲಿ ಡೊನಾಲ್ಡ್ ಟ್ರಂಪ್ ಅವರು ತಮ್ಮ ಮೊದಲ ಅವಧಿಯ ಅಧ್ಯಕ್ಷತೆಯ ಅವಳಿಯಲ್ಲಿ ಹಿಂದೂ ಮಹಾಸಾಗರ ವಲಯದ ಆರ್ಥಿಕ ಮತ್ತು ಕಾರ್ಯತಂತ್ರದ ಪ್ರಾಮುಖ್ಯತೆಯನ್ನು ಜಗತ್ತಿಗೆ ಸಾರಲು ಹಾಗೂ ಭಾರತದ ಪಾತ್ರವನ್ನು ಹೆಚ್ಚಿಸಲು ಇದಕ್ಕೆ ‘ಇಂಡೋ-ಪೆಸಿಫಿಕ್ ಕಮಾಂಡ್’ ಎಂದು ಹೆಸರಿಟ್ಟಿದ್ದರು. ಆದರೆ, ಟ್ರಂಪ್ ಅವರ ಎರಡನೇ ಅವಧಿಯ ಆಡಳಿತದಲ್ಲೇ ಈಗ ಈ ಹೆಸರಿನಿಂದ ಇಂಡೋ ಪದವನ್ನು ಕೈಬಿಟ್ಟಿರುವುದು ಭಾರತಕ್ಕೆ ವಾಷಿಂಗ್ಟನ್ ನೀಡುತ್ತಿರುವ ಪ್ರತ್ಯೇಕ ಸಂದೇಶವೇ ಎಂಬ ಸಂಶಯ ಮೂಡಿಸಿದೆ.

ಅಮೆರಿಕದ ಪಶ್ಚಿಮ ಕರಾವಳಿಯಿಂದ ಹಿಡಿದು ಭಾರತದ ಪಶ್ಚಿಮ ಗಡಿಯವರೆಗೂ ವ್ಯಾಪಿಸಿರುವ ಈ ಕಮಾಂಡ್, ಭಾರತ ಮತ್ತು ಅಮೆರಿಕ ನಡುವಿನ ಮಿಲಿಟರಿ ಬಾಂಧವ್ಯಕ್ಕೆ ಪ್ರಮುಖ ಕೊಂಡಿಯಾಗಿತ್ತು. ಜಂಟಿ ಸೇನಾ ಕವಾಯತು, ಕರಾವಳಿ ಭದ್ರತೆಯ ಮಾಹಿತಿ ವಿನಿಮಯ ಸೇರಿದಂತೆ ಹಿಂದೂ ಮಹಾಸಾಗರದಲ್ಲಿ ಚೀನಾದ ದಬಾಳಿಕೆಯನ್ನು ತಡೆಯಲು ಭಾರತ, ಅಮೆರಿಕ, ಆಸ್ಟ್ರೇಲಿಯಾ ಮತ್ತು ಜಪಾನ್ ದೇಶಗಳು ಸೇರಿ ಕ್ವಾಡ್ ಒಕ್ಕೂಟವನ್ನು ಬಲಪಡಿಸಿದ್ದವು.

ಆದರೆ ಈಗ ಅಮೆರಿಕ ರಕ್ಷಣಾ ವಲಯದಲ್ಲಿ ಇಂಡೋ ಎಂಬ ಹೆಸರನ್ನೇ ತೆಗೆದುಹಾಕಿರುವುದರಿಂದ, ಅಮೆರಿಕವು ಏಷ್ಯಾ ಪೆಸಿಫಿಕ್ ಹಾಗೂ ಕ್ವಾಡ್ ಒಕ್ಕೂಟದ ವಿಷಯದಲ್ಲಿ ತನ್ನ ಕಾರ್ಯತಂತ್ರವನ್ನು ಬದಲಾಯಿಸುತ್ತಿದೆಯೇ ಎಂಬ ಚರ್ಚೆ ರಾಜತಾಂತ್ರಿಕ ವಲಯದಲ್ಲಿ ತೀವ್ರಗೊಂಡಿದೆ. ಇದೇ ಕಾರಣಕ್ಕೆ ಶಶಿ ತರೂರ್ ಸೇರಿದಂತೆ ಹಲವು ಭಾರತೀಯ ವಿದೇಶಾಂಗ ತಜ್ಞರು ಅಮೆರಿಕದ ಈ ನಡೆಯನ್ನು ತೀವ್ರವಾಗಿ ಟೀಕಿಸುತ್ತಿದ್ದಾರೆ,(ಏಜೆನ್ಸೀಸ್​).