ಷೇರು ಮಾರುಕಟ್ಟೆ ಭಾರೀ ಕುಸಿತ: ಸೆನ್ಸೆಕ್ಸ್ 1,312 ಪಾಯಿಂಟ್ಸ್ ಧರಾಶಾಹಿ! ಪತನಕ್ಕೆ ಕಾರಣಗಳೇನು? | Sensex Crash

ಷೇರು ಮಾರುಕಟ್ಟೆಯ ಇಂದಿನ ಈ 'ಬ್ಲ್ಯಾಕ್ ಮಂಡೇ'ಗೆ ಪ್ರಮುಖವಾಗಿ ಮೂರು ಕಾರಣಗಳನ್ನು ವಿಶ್ಲೇಷಕರು ಗುರುತಿಸಿದ್ದಾರೆ.

ಟ್ರಂಪ್ ನಿರ್ಧಾರ ಮತ್ತು ತೈಲ ಬೆಲೆ ಏರಿಕೆ: ಇರಾನ್ ನೀಡಿದ್ದ ಶಾಂತಿ ಪ್ರಸ್ತಾವನೆಯನ್ನು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ತಿರಸ್ಕರಿಸಿದ್ದಾರೆ ಎಂಬ ವರದಿಗಳು ಹೊರಬರುತ್ತಿದ್ದಂತೆ ಪಶ್ಚಿಮ ಏಷ್ಯಾದಲ್ಲಿ ಯುದ್ಧದ ಭೀತಿ ಹೆಚ್ಚಾಯಿತು. ಇದರಿಂದಾಗಿ ಬ್ರೆಂಟ್ ಕಚ್ಚಾ ತೈಲದ ಬೆಲೆ ಪ್ರತಿ ಬ್ಯಾರೆಲ್‌ಗೆ 105 ಡಾಲರ್ ಮಟ್ಟಕ್ಕೆ ಏರಿಕೆಯಾಗಿದ್ದು, ಭಾರತದಂತಹ ಆಮದು ಅವಲಂಬಿತ ದೇಶದ ಮೇಲೆ ನಕಾರಾತ್ಮಕ ಪರಿಣಾಮ ಬೀರಿದೆ.

ಪ್ರಧಾನಿ ಮೋದಿ ಅವರ ಕರೆ: ಇಂಧನ ಬಳಕೆಯನ್ನು ಕಡಿಮೆ ಮಾಡಿ, ಅನಗತ್ಯ ವಿದೇಶಿ ಪ್ರವಾಸಗಳನ್ನು ತಪ್ಪಿಸಿ ಎಂಬ ಪ್ರಧಾನಿ ನರೇಂದ್ರ ಮೋದಿ ಅವರ ಇತ್ತೀಚಿನ ಹೇಳಿಕೆಯು ಹೂಡಿಕೆದಾರರಲ್ಲಿ ಆತಂಕ ಮೂಡಿಸಿದೆ. ಇದು ಮುಂಬರುವ ಆರ್ಥಿಕ ವರ್ಷದಲ್ಲಿ (FY27) ಬೇಡಿಕೆಯ ಮೇಲೆ ಹೊಡೆತ ನೀಡಬಹುದು ಎಂಬ ಭಯದಿಂದ ಗ್ರಾಹಕ ಬಳಕೆಯ ವಸ್ತುಗಳ (Consumption sectors) ಷೇರುಗಳು ಭಾರೀ ಕುಸಿತ ಕಂಡವು.

ಹೆಚ್ಚಿದ ವೊಲಟಾಲಿಟಿ: ಮಾರುಕಟ್ಟೆಯ ಏರಿಳಿತದ ಸೂಚ್ಯಂಕವಾದ 'ಇಂಡಿಯಾ ವಿಐಎಕ್ಸ್' (India VIX) ಶೇ. 10 ರಷ್ಟು ಏರಿಕೆಯಾಗಿ 18.51 ಕ್ಕೆ ತಲುಪಿದ್ದು, ವ್ಯಾಪಾರಿಗಳಲ್ಲಿನ ಆತಂಕವನ್ನು ಪ್ರತಿಬಿಂಬಿಸುತ್ತಿದೆ.

ಇಂದಿನ ಮಾರಾಟದ ಅಬ್ಬರಕ್ಕೆ ಬ್ಯಾಂಕಿಂಗ್ ಮತ್ತು ಗ್ರಾಹಕ ಬಳಕೆಯ ಷೇರುಗಳು ತತ್ತರಿಸಿ ಹೋಗಿವೆ. ಎಸ್‌ಬಿಐ (SBI) ಶೇ. 4 ಕ್ಕಿಂತ ಹೆಚ್ಚು ಕುಸಿತ ಕಂಡರೆ, ಹೆಚ್‌ಡಿಎಫ್‌ಸಿ ಬ್ಯಾಂಕ್, ಬಜಾಜ್ ಫೈನಾನ್ಸ್ ಮತ್ತು ಕೋಟಕ್ ಮಹೀಂದ್ರಾ ಬ್ಯಾಂಕ್ ಷೇರುಗಳು ನಷ್ಟ ಅನುಭವಿಸಿದವು.

ವಿಶೇಷವಾಗಿ 'ನಿಫ್ಟಿ ಕನ್ಸ್ಯೂಮರ್ ಡ್ಯೂರಬಲ್ಸ್' ಸೂಚ್ಯಂಕವು ಶೇ. 3.7 ರಷ್ಟು ಕುಸಿದು ದಿನದ ಕೆಟ್ಟ ಪ್ರದರ್ಶನ ನೀಡಿತು. ಟೈಟಾನ್ ಕಂಪನಿಯ ಷೇರುಗಳು ಶೇ. 7 ರಷ್ಟು ಕ್ರಾಶ್ ಆದವು. ಇನ್ನು ತೈಲ ಬೆಲೆ ಏರಿಕೆಯ ಭೀತಿಯಿಂದ ರಿಲಯನ್ಸ್ ಇಂಡಸ್ಟ್ರೀಸ್ ಶೇ. 3.5 ರಷ್ಟು ಇಳಿಕೆಯಾಗಿ ಮಾರುಕಟ್ಟೆಯನ್ನು ಕೆಳಕ್ಕೆ ಎಳೆಯಿತು. ರಿಯಲ್ ಎಸ್ಟೇಟ್ ಮತ್ತು ಮೀಡಿಯಾ ವಲಯದ ಷೇರುಗಳು ಸಹ ಶೇ. 2 ರಿಂದ 3 ರಷ್ಟು ಕುಸಿತ ಕಂಡಿವೆ.

ಮಾರುಕಟ್ಟೆಯ ಈ ಭೀಕರ ಕುಸಿತದ ನಡುವೆಯೂ ಫಾರ್ಮಾ (ಔಷಧ) ಮತ್ತು ಐಟಿ ವಲಯದ ಕೆಲವು ಷೇರುಗಳು ಸ್ಥಿತಿಸ್ಥಾಪಕತ್ವ ತೋರಿದವು. ಸನ್ ಫಾರ್ಮಾ ಶೇ. 1.3 ರಷ್ಟು ಏರಿಕೆಯಾಗಿ ಸೆನ್ಸೆಕ್ಸ್‌ನಲ್ಲಿ ಟಾಪ್ ಗೇನರ್ ಎನಿಸಿಕೊಂಡಿತು. ಟಿಸಿಎಸ್‌ನಂತಹ ದೊಡ್ಡ ಐಟಿ ಕಂಪನಿಗಳು ಹೆಚ್ಚಿನ ಕುಸಿತ ತಡೆದವು.

ಜಿಯೋಜಿತ್ ಇನ್ವೆಸ್ಟ್‌ಮೆಂಟ್ಸ್‌ನ ಸಂಶೋಧನಾ ಮುಖ್ಯಸ್ಥ ವಿನೋದ್ ನಾಯರ್ ಪ್ರಕಾರ, "ಕೊಲ್ಲಿ ರಾಷ್ಟ್ರಗಳ ಉದ್ವಿಗ್ನತೆ ಮತ್ತು ಕಚ್ಚಾ ತೈಲ ಬೆಲೆ ಏರಿಕೆಯು ರೂಪಾಯಿ ಮೌಲ್ಯ ಹಾಗೂ ಚಾಲ್ತಿ ಖಾತೆ ಕೊರತೆಯ ಮೇಲೆ ಒತ್ತಡ ಹೇರಲಿದೆ. ಇದು ಹೂಡಿಕೆದಾರರನ್ನು ಜಾಗರೂಕರನ್ನಾಗಿ ಮಾಡಿದೆ." ತಾಂತ್ರಿಕ ವಿಶ್ಲೇಷಕರ ಪ್ರಕಾರ, ನಿಫ್ಟಿ 23,700 ಮಟ್ಟಕ್ಕಿಂತ ಕೆಳಗೆ ಹೋದರೆ ಕುಸಿತ ಇನ್ನೂ ತೀವ್ರವಾಗುವ ಸಾಧ್ಯತೆಯಿದೆ.

ಒಟ್ಟಾರೆಯಾಗಿ, ಜಾಗತಿಕ ರಾಜಕೀಯ ಬೆಳವಣಿಗೆಗಳು ಮತ್ತು ತೈಲ ಬೆಲೆ ಏರಿಕೆಯು ಭಾರತೀಯ ಷೇರು ಮಾರುಕಟ್ಟೆಯ ಗತಿಯನ್ನು ನಿರ್ಧರಿಸುತ್ತಿದ್ದು, ಹೂಡಿಕೆದಾರರು ಸದ್ಯಕ್ಕೆ 'ವೇಯ್ಟ್ ಅಂಡ್ ವಾಚ್' ತಂತ್ರ ಅನುಸರಿಸುತ್ತಿದ್ದಾರೆ,(ಏಜೆನ್ಸೀಸ್​).