ಕಿಡ್ನಿ, ಲಿವರ್​, ಕಣ್ಣು... ಪುತ್ರನ ಸಾವಿನಲ್ಲೂ 5 ಜೀವಗಳಿಗೆ ಬದುಕು ಕೊಟ್ಟು ಸಾರ್ಥಕತೆ ಮೆರೆದ ಪಾಲಕರು

ತಿರುವನಂತಪುರಂ: ರಸ್ತೆ ಅಪಘಾತದಲ್ಲಿ ದುರ್ಮರಣ ಹೊಂದಿದ ಏಳು ವರ್ಷದ ಬಾಲಕನ ಹೆತ್ತವರು ಪುತ್ರನ ಸಾವಿನಲ್ಲೂ ಸಾರ್ಥಕತೆ ಮರೆದ ಘಟನೆ ನಿಜಕ್ಕೂ ಎಂಥವರ ಮನಕಲಕುವಂತಿದೆ.

ಮೃತ ಬಾಲಕನನ್ನು ಯಶ್ ವಾನ್ (7) ಎಂದು ಗುರುತಿಸಲಾಗಿದ್ದು, ರಸ್ತೆಯಲ್ಲಿ ಸೈಕಲ್​ನಲ್ಲಿ ಹೋಗುವಾಗ ಆಂಬುಲೆನ್ಸ್​ ಡಿಕ್ಕಿ ಹೊಡೆದಿದೆ. ಈ ವೇಳೆ, ಗಂಭೀರವಾಗಿ ಗಾಯಗೊಂಡ ಪರಿಣಾಮ ಯಶ್​ನನ್ನು ತಿರುವನಂತಪುರಂನ ಖಾಸಗಿ ಆಸ್ಪತ್ರೆಗೆ ದಾಖಲಿಸಿ, ಹೆಚ್ಚಿನ ಚಿಕಿತ್ಸೆ ಕೊಡಿಸಲಾಯಿತು. ಆದರೆ, ಮಿದುಳು ನಿಷ್ಕ್ರಿಯಗೊಂಡ ಕಾರಣ, ಚಿಕಿತ್ಸೆ ಫಲಿಸದೆ ಬಾಲಕ ಉಸಿರು ಚೆಲ್ಲಿದ್ದಾನೆ ಎಂದು ವೈದ್ಯರು ದೃಢಪಡಿಸಿದ್ದಾರೆ.

ಪುತ್ರನ ಸಾವಿನಲ್ಲೂ ಸಾರ್ಥಕತೆ ಮೆರೆದ ಪೋಷಕರು, ಯಶ್​ ದೇಹದ ಬಹುಮುಖ್ಯ ಅಂಗಾಂಗಗಳಾದ ಎರಡು ಮೂತ್ರಪಿಂಡ, ಯಕೃತ್ತು, ಹೃದಯ ಕವಾಟ ಮತ್ತು ಕಣ್ಣಿನ ಕಾರ್ನಿಯಾವನ್ನು ದಾನ ಮಾಡಲಾಗಿದೆ. ತನ್ನ ಉಸಿರು ನಿಂತರೂ ಇನ್ನೂ ಐದು ಜೀವಕ್ಕೆ ಹೊಸ ಜೀವನ ಕೊಟ್ಟ ಯಶ್​ಗೆ ಸ್ಥಳೀಯರು, ಕುಟುಂಬಸ್ಥರು, ಆಸ್ಪತ್ರೆ ಸಿಬ್ಬಂದಿ ಮತ್ತು ನೆಟ್ಟಿಗರು ಸಲಾಂ ಎನ್ನುವ ಮೂಲಕ ಕಂಬನಿ ಮಿಡಿದಿದ್ದಾರೆ.

ಬಾಲಕನ ಲಿವರ್​ ತಿರುವನಂತಪುರದ ಕಿಮ್ಸ್​ ಆಸ್ಪತ್ರೆಗೆ, ಒಂದು ಮೂತ್ರಪಿಂಡ ತಿರುವನಂತಪುರಂ ವೈದ್ಯಕೀಯ ಕಾಲೇಜಿಗೆ ಮತ್ತು ಇನ್ನೊಂದು ಕೋಝಿಕ್ಕೋಡ್‌ನ ಇಕ್ರಾ ಆಸ್ಪತ್ರೆಗೆ ನೀಡಲಾಗಿದೆ. ಕಾರ್ನಿಯಾಗಳನ್ನು ಪ್ರಾದೇಶಿಕ ನೇತ್ರಶಾಸ್ತ್ರ ಸಂಸ್ಥೆ ಆಸ್ಪತ್ರೆಗೆ ಮತ್ತು ಹೃದಯ ಕವಾಟವನ್ನು ಶ್ರೀ ಚಿತ್ರ ಹಾಸ್ಪಿಟಲ್​ಗೆ ದಾನ ಮಾಡಲಾಗಿದೆ. ಕೊಟ್ಟಾಯಂನ ವಿಜಯಪುರಂನ ನಾಲ್ಕು ವರ್ಷದ ಬಾಲಕಿಗೆ ತಿರುವನಂತಪುರಂ ವೈದ್ಯಕೀಯ ಕಾಲೇಜಿನಲ್ಲಿ ಮೂತ್ರಪಿಂಡ ಕಸಿ ಮಾಡಲಾಗುವುದು. ಕಣ್ಣೂರಿನ 17 ವರ್ಷದ ಬಾಲಕಿಗೆ ಕೋಝಿಕ್ಕೋಡ್‌ನ ಇಕ್ರಾ ಆಸ್ಪತ್ರೆಯಲ್ಲಿ ಮತ್ತೊಂದು ಮೂತ್ರಪಿಂಡ ಕಸಿಯಾಗಲಿದೆ,(ಏಜೆನ್ಸೀಸ್).