ಇರಾನ್​ನ ಪ್ರಮುಖ ನಾಯಕರ ಸರಣಿ ಹತ್ಯೆ; ಮೊದಲು ಮತ್ತು ನಂತರ ಎಂಬ ಫೋಟೋ ಹಂಚಿಕೊಂಡ ಇಸ್ರೇಲ್ ಪ್ರಧಾನಿ ನೆತನ್ಯಾಹು | PM Netanyahu

ಟೆಲ್​ ಅವೀವ್: ಇರಾನ್​ನ ಪ್ರಮುಖ ಸೈನ್ಯಾಧಿಕಾರಿಗಳ ಸರಣಿ ಹತ್ಯೆಯನ್ನು ಸೂಚಿಸುವ ಮೊದಲು ಮತ್ತು ನಂತರ ಎಂಬ ಫೋಟೋವನ್ನು ಮೀಮ್​ ಮೂಲಕ ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು(PM Benjamin Netanyahu) ಸೋಮವಾರ(ಏ. 06) ಹಂಚಿಕೊಂಡಿದ್ದಾರೆ.

ಯಹೂದಿ ಪರಂಪರೆಯಲ್ಲಿ ಪ್ಯಾಸೋವರ್ ಹಬ್ಬಕ್ಕೆ ಮುಂಚೆ ಎಕ್ಸ್​ನಲ್ಲಿ ಮೀಮ್ಸ್ ಮೂಲಕ ಫೋಟೋ ಶೇರ್ ಮಾಡಿ, ಪಾಸೋವರ್ ಶುಚಿಗೊಳಿಸುವಿಕೆಯನ್ನು ಮುಂದುವರಿಸುವುದು-ಇರಾನಿನ ಶತ್ರುವನ್ನು ಪುಡಿಮಾಡುವುದು ಎಂದು ಹಿಬ್ರೂ ಭಾಷೆಯಲ್ಲಿ ಕ್ಯಾಪ್ಷನ್ ನೀಡಿದ್ದಾರೆ.

ಮೊದಲ ಚಿತ್ರದಲ್ಲಿ ಇರಾನ್‌ನ ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ ಕಾರ್ಪ್ಸ್ (IRGC) ನ ಹೈ-ಲೆವಲ್ ನಾಯಕರು ಗ್ರೀನ್ ಮಿಲಿಟರಿ ಯುನಿಫಾರ್ಮ್‌ನಲ್ಲಿ ಒಂದು ಸಭೆಯಲ್ಲಿ ಹಾಜರಾಗಿ ನಿಂತಿದ್ದು, ಹಿಂದೆ ಬ್ಯಾನರ್​ನಲ್ಲಿ ಇರಾನ್ ಸುಪ್ರೀಂ ಲೀಡರ್ ಆಯತೊಲ್ಲಾ ಖಾಮೆನಿ ಅವರ ದೊಡ್ಡ ಚಿತ್ರ, ಇರಾನ್ ಧ್ವಜ ಕಾಣುತ್ತವೆ.

ಎರಡನೇ ನಂತರ ಎಂಬ ಚಿತ್ರದಲ್ಲಿ ಅದೇ ಸ್ಥಳದಲ್ಲಿ ಯಾವುದೇ ಐಆರ್​ಜಿಸಿ ನಾಯಕರಿಲ್ಲ, ಹಿಂದೆ ಬ್ಯಾನರ್​ನಲ್ಲಿ ಅಯತೊಲ್ಲಾ ಅಲಿ ಖಮೇನಿ ಚಿತ್ರವಿಲ್ಲ, ಸ್ಥಳವೆಲ್ಲಾ ಖಾಲಿಯಾಗಿದೆ. ಇದು ಇಸ್ರೇಲ್-ಅಮೆರಿಕ ದಾಳಿಯಲ್ಲಿ ಅವರೆಲ್ಲಾ ಕೊಲ್ಲಲ್ಪಟ್ಟರು ಎಂಬುದನ್ನು ಸೂಚಿಸುವಂತಿದೆ.

ಇನ್ನು ಇರಾನ್ ಜೊತೆ ಯಾವುದೇ ಕದನ ವಿರಾಮ ಮಾಡಿಕೊಳ್ಳದಂತೆ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮೇಲೆ ಬೆಂಜಮಿನ್ ನೆತನ್ಯಾಹು ಒತ್ತಡ ಹೇರಿದ್ದಾರೆ ಎನ್ನಲಾಗಿದೆ. ಸಂಘರ್ಷದ ಈ ಹಂತದಲ್ಲಿ ಕಾರ್ಯತಂತ್ರದ ಅಪಾಯಗಳ ಬಗ್ಗೆ ಎಚ್ಚರಿಸಿದ್ದು, ಅಕಾಲಿಕ ಕದನ ವಿರಾಮವು ಇರಾನ್​ಗೆ ಧೈರ್ಯ ತುಂಬಬಹುದು. ನಡೆಯುತ್ತಿರುವ ಮಿಲಿಟರಿ ಒತ್ತಡವನ್ನು ದುರ್ಬಲಗೊಳಿಸಬಹುದು ಎಂದು ಹೇಳಿದ್ದಾರೆ ಎಂದು ಆಕ್ಸಿಯಾಸ್‌ನ ವರದಿ ಮಾಡಿದೆ (ಏಜೆನ್ಸೀಸ್).