ಪ್ಲೀಸ್​... ನನ್ನ ಮಗುವನ್ನು ಉಳಿಸಿಕೊಡಿ: ರೋಹಿತ್ ಶರ್ಮಾ ಕೈ ಹಿಡಿದು ಎಳೆದು ಮಹಿಳೆ ಕಣ್ಣೀರು! ಇಲ್ಲಿದೆ ನೋಡಿ ವಿಡಿಯೋ | Rohit Sharma

ನ್ಯೂಜಿಲೆಂಡ್ ವಿರುದ್ಧದ ಏಕದಿನ ಸರಣಿಯ ವೇಳೆ ಇಂದೋರ್‌ನಲ್ಲಿ ಈ ಘಟನೆ ನಡೆದಿದೆ ಎನ್ನಲಾಗಿದೆ. ಭಾರತೀಯ ಆಟಗಾರರು ಪಂದ್ಯ ಮುಗಿಸಿ ಹೋಟೆಲ್‌ಗೆ ಮರಳಿ ತಮ್ಮ ಕೊಠಡಿಗಳತ್ತ ತೆರಳುತ್ತಿದ್ದಾಗ, ಭದ್ರತಾ ಸಿಬ್ಬಂದಿಯ ಕಣ್ಣುತಪ್ಪಿಸಿ ಬಂದ ಮಹಿಳೆಯೊಬ್ಬರು ಏಕಾಏಕಿ ರೋಹಿತ್ ಶರ್ಮಾ ಅವರತ್ತ ನುಗ್ಗಿದ್ದಾರೆ. ಅಷ್ಟೇ ಅಲ್ಲದೆ, ರೋಹಿತ್ ಅವರ ಕೈಯನ್ನು ಬಲವಾಗಿ ಹಿಡಿದು ಎಳೆದ ಘಟನೆ ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್​ ಆಗಿದೆ.

ಗಲಿಬಿಲಗೊಂಡ ರೋಹಿತ್: ಅನಿರೀಕ್ಷಿತವಾಗಿ ನಡೆದ ಈ ಘಟನೆಯಿಂದ ರೋಹಿತ್ ಶರ್ಮಾ ಒಂದು ಕ್ಷಣ ದಬ್ಬಾಳಿಕೆಗೆ ಒಳಗಾದಂತೆ ಕಂಡರು ಮತ್ತು ತೀವ್ರವಾಗಿ ಗಲಿಬಿಲಗೊಂಡರು. ಆ ಮಹಿಳೆಯು "ದಯವಿಟ್ಟು ನನಗೆ ಸಹಾಯ ಮಾಡಿ, ನನ್ನ ಮಗಳನ್ನು ಬದುಕಿಸಿ" (Please Help Me) ಎಂದು ಕಿರುಚುತ್ತಾ ರೋಹಿತ್ ಅವರ ಕೈ ಹಿಡಿದು ಎಳೆದಿದ್ದಾಳೆ ಎಂದು ವರದಿಯಾಗಿದೆ. ರೋಹಿತ್ ಅವರ ಸುತ್ತಲೂ ಭದ್ರತಾ ಕವಚವಿದ್ದರೂ, ಮಹಿಳೆ ಅದನ್ನು ಮೀರಿ ನಾಯಕನ ಹತ್ತಿರ ತಲುಪಿದ್ದು ದೊಡ್ಡ ಭದ್ರತಾ ಲೋಪ ಎಂದು ಪರಿಗಣಿಸಲಾಗಿದೆ.

ರೋಹಿತ್ ಶರ್ಮಾ ಅವರ ಕೈ ಹಿಡಿದು ಎಳೆದ ಘಟನೆಯ ಬಗ್ಗೆ ಸ್ಪಷ್ಟನೆ ನೀಡಿರುವ ಸರಿತಾ ಶರ್ಮಾ ಎಂಬ ಮಹಿಳೆ, ತನ್ನ ಕೃತ್ಯಕ್ಕೆ ಕ್ಷಮೆಯಾಚಿಸುವುದರ ಜೊತೆಗೆ ಮಗಳ ಜೀವ ಉಳಿಸಲು ಕಣ್ಣೀರಿಟ್ಟಿದ್ದಾರೆ. ಸರಿತಾ ಅವರ ಪುತ್ರಿ ಅನಿಕಾ ಎಂಬ ಬಾಲಕಿ ಗಂಭೀರ ಕಾಯಿಲೆಯಿಂದ ಬಳಲುತ್ತಿದ್ದು, ಆಕೆಯ ಪ್ರಾಣ ಉಳಿಸಲು ಅಮೆರಿಕದಿಂದ ಆಮದು ಮಾಡಿಕೊಳ್ಳಬೇಕಾದ ವಿಶೇಷ ಇಂಜೆಕ್ಷನ್ ಅಗತ್ಯವಿದೆ. ಇದರ ಬೆಲೆ ಬರೋಬ್ಬರಿ 9 ಕೋಟಿ ರೂಪಾಯಿ. "ನಾವು ಈಗಾಗಲೇ ವಿವಿಧ ಮೂಲಗಳಿಂದ 4.1 ಕೋಟಿ ರೂ. ಸಂಗ್ರಹಿಸಿದ್ದೇವೆ, ಆದರೆ ಮಗಳನ್ನು ಉಳಿಸಲು ಸಮಯ ಮಿಂಚಿ ಹೋಗುತ್ತಿದೆ" ಎಂದು ಆಕೆ ವಿವರಿಸಿದ್ದಾರೆ.

ಯಾವುದೇ ಸೆಲ್ಫಿಗಾಗಿ ನಾನು ಹೋಟೆಲ್‌ಗೆ ಹೋಗಿರಲಿಲ್ಲ ಎಂದು ಸ್ಪಷ್ಟಪಡಿಸಿರುವ ಸರಿತಾ, "ರೋಹಿತ್ ಮತ್ತು ವಿರಾಟ್ ಕೊಹ್ಲಿ ಅವರು ಮಕ್ಕಳಿಗೆ ಸಹಾಯ ಮಾಡುತ್ತಿರುತ್ತಾರೆ ಎಂದು ಕೇಳಿದ್ದೇನೆ. ಪಂದ್ಯದ ವೇಳೆ ಅವರನ್ನು ಭೇಟಿಯಾಗಲು ಪ್ರಯತ್ನಿಸಿದೆವು, ಆದರೆ ಸಾಧ್ಯವಾಗಲಿಲ್ಲ. ಹತಾಶ ಸ್ಥಿತಿಯಲ್ಲಿ ರೋಹಿತ್ ಅವರನ್ನು ಕಂಡಾಗ ಭಾವೋದ್ವೇಗಕ್ಕೆ ಒಳಗಾಗಿ ಅವರ ಕೈ ಹಿಡಿದೆ" ಎಂದು ಹೇಳಿದ್ದಾರೆ.

ತಮ್ಮ ನಡವಳಿಕೆಯಿಂದ ಆಟಗಾರರಿಗೆ ಮತ್ತು ಭದ್ರತಾ ಅಧಿಕಾರಿಗಳಿಗೆ ಆದ ತೊಂದರೆಗೆ ಅವರು ಕ್ಷಮೆ ಕೇಳಿದ್ದಾರೆ. "ರೋಹಿತ್ ಸರ್ ಮತ್ತು ವಿರಾಟ್ ಸರ್, ದಯವಿಟ್ಟು ನನ್ನ ಸಂದೇಶ ತಲುಪಿದರೆ ನನ್ನ ಮಗಳ ಜೀವ ಉಳಿಸಲು ಸಹಾಯ ಮಾಡಿ" ಎಂದು ಆಕೆ ಕಳಕಳಿಯಿಂದ ವಿನಂತಿಸಿದ್ದಾರೆ,(ಏಜೆನ್ಸೀಸ್).