Sanju Samson ಪತ್ನಿಯ ನಿಗೂಢ ಪೋಸ್ಟ್ ವೈರಲ್! ಕಿವೀಸ್​ ಸರಣಿ ಬೆನ್ನಲ್ಲೇ ಚಾರುಲತಾ ಬರೆದ ಆ ಸಾಲುಗಳ ಅರ್ಥವೇನು?

ಸರಣಿಯ ನಂತರ ಚಾರುಲತಾ ಅವರು ತಮ್ಮ ಇನ್‌ಸ್ಟಾಗ್ರಾಮ್ ಸ್ಟೋರಿಯಲ್ಲಿ ಅತ್ಯಂತ ಭಾವನಾತ್ಮಕ ಮತ್ತು ನಿಗೂಢವಾದ (Cryptic) ಸಾಲುಗಳನ್ನು ಹಂಚಿಕೊಂಡಿದ್ದಾರೆ. ಅದರಲ್ಲಿ ಅವರು ಹೀಗೆ ಬರೆದಿದ್ದಾರೆ. "ಎಲ್ಲವೂ ಮುಗಿದ ಮೇಲೆ, ಉತ್ತರಗಳು ಮರೆಯಾದಾಗ, ಕೇವಲ ತಲೆಬಾಗಿಸಿ ಜೀವನದ ಹರಿವಿಗೆ ಬಿಟ್ಟುಬಿಡಿ. ಏಕೆಂದರೆ ಕೆಲವು ಸಮಯಗಳನ್ನು ನಾವು ಒಪ್ಪಿಕೊಳ್ಳಬೇಕೇ ಹೊರತು, ವಿವರಿಸಲು ಸಾಧ್ಯವಿಲ್ಲ." ಈ ಸಾಲುಗಳು ಈಗ ಸಂಜು ಸ್ಯಾಮ್ಸನ್ ಅಭಿಮಾನಿಗಳ ಗಮನ ಸೆಳೆದಿದ್ದು, ಸಂಜು ಎದುರಿಸುತ್ತಿರುವ ಕಠಿಣ ಸಂದರ್ಭಕ್ಕೆ ಇದು ಸಾಕ್ಷಿಯಾಗಿದೆ ಎಂದು ವಿಶ್ಲೇಷಿಸಲಾಗುತ್ತಿದೆ.

ಇತ್ತೀಚಿನ ದಿನಗಳಲ್ಲಿ ಸಂಜು ಸ್ಯಾಮ್ಸನ್ ಅವರಿಗೆ ಸಾಕಷ್ಟು ಅವಕಾಶಗಳು ಸಿಕ್ಕಿದ್ದರೂ, ಅದನ್ನು ದೊಡ್ಡ ಮೊತ್ತವಾಗಿ ಪರಿವರ್ತಿಸುವಲ್ಲಿ ಅವರು ವಿಫಲರಾಗುತ್ತಿದ್ದಾರೆ. ಕಿವಿ ಪಡೆಯ ವಿರುದ್ಧದ ಪಂದ್ಯಗಳಲ್ಲಿ ಸಂಜು ಅವರಿಂದ ನಿರೀಕ್ಷಿತ ಪ್ರದರ್ಶನ ಬಂದಿಲ್ಲ. ಇದು ಸಾಮಾಜಿಕ ಜಾಲತಾಣಗಳಲ್ಲಿ ತೀವ್ರ ಟೀಕೆಗೆ ಗುರಿಯಾಗಿದೆ. ಅಲ್ಲದೆ, ವಿಕೆಟ್ ಕೀಪಿಂಗ್ ಮತ್ತು ಬ್ಯಾಟಿಂಗ್ ಎರಡರಲ್ಲೂ ಸ್ಥಿರತೆ ಕಾಪಾಡಿಕೊಳ್ಳದ ಕಾರಣ, ಟೀಮ್ ಮ್ಯಾನೇಜ್‌ಮೆಂಟ್ ಅವರನ್ನು ಮುಂದಿನ ಸರಣಿಗಳಿಗೆ ಪರಿಗಣಿಸುತ್ತದೆಯೇ ಎಂಬ ಆತಂಕ ಸೃಷ್ಟಿಯಾಗಿದೆ.

ಅಭಿಮಾನಿಗಳ ಆಕ್ರೋಶ: ಮತ್ತೊಂದೆಡೆ ಸಂಜು ಅವರ ಕಟ್ಟಾ ಅಭಿಮಾನಿಗಳು, ಅವರಿಗೆ ಸರಿಯಾದ ಕ್ರಮಾಂಕದಲ್ಲಿ ಬ್ಯಾಟಿಂಗ್ ಮಾಡಲು ಅವಕಾಶ ನೀಡುತ್ತಿಲ್ಲ ಎಂದು ಮ್ಯಾನೇಜ್‌ಮೆಂಟ್ ವಿರುದ್ಧ ಆಕ್ರೋಶ ವ್ಯಕ್ತಪಡಿಸುತ್ತಲೇ ಇದ್ದಾರೆ.

ಚಾರುಲತಾ ರಮೇಶ್ ಅವರು ಸಂಜು ಅವರಿಗೆ ಅನ್ಯಾಯವಾದಾಗಲೆಲ್ಲಾ ಸಾಮಾಜಿಕ ಜಾಲತಾಣಗಳ ಮೂಲಕ ಸಣ್ಣದಾಗಿ ಪ್ರತಿರೋಧ ತೋರುತ್ತಲೇ ಬಂದಿದ್ದಾರೆ. ಈ ಬಾರಿಯ ಪೋಸ್ಟ್ ಕೇವಲ ವೈಫಲ್ಯದ ಬಗ್ಗೆಯೋ ಅಥವಾ ತಂಡದಲ್ಲಿ ಅವರಿಗೆ ಸಿಗುತ್ತಿರುವ ಸ್ಥಾನದ ಬಗ್ಗೆಯೋ ಎಂಬುದು ಸ್ಪಷ್ಟವಾಗಿಲ್ಲ. "ಕೆಲವು ವಿಷಯಗಳನ್ನು ಒಪ್ಪಿಕೊಳ್ಳಬೇಕು" ಎಂಬ ಅವರ ಮಾತುಗಳು ಸಂಜು ಸದ್ಯದ ಪರಿಸ್ಥಿತಿಗೆ ಹೊಂದಿಕೊಳ್ಳುತ್ತಿವೆ.

ರಿಷಬ್ ಪಂತ್ ಅವರ ಪುನರಾಗಮನ ಮತ್ತು ಕೆ.ಎಲ್. ರಾಹುಲ್ ಅವರಂತಹ ಹಿರಿಯ ಆಟಗಾರರ ನಡುವೆ ಸಂಜು ಸ್ಯಾಮ್ಸನ್ ತಂಡದಲ್ಲಿ ಸ್ಥಾನ ಉಳಿಸಿಕೊಳ್ಳುವುದು ಸವಾಲಿನ ಕೆಲಸವಾಗಿದೆ. ಚಾರುಲತಾ ಅವರ ಈ ಪೋಸ್ಟ್ "ಶಾಂತಿ ಮತ್ತು ತಾಳ್ಮೆ"ಯ ಸಂಕೇತವಾಗಿದ್ದರೂ, ಅಭಿಮಾನಿಗಳು ಮಾತ್ರ ಇದನ್ನು ಬಿಸಿಸಿಐ ವಿರುದ್ಧದ ಆಕ್ರೋಶ ಎಂದೇ ಬಿಂಬಿಸುತ್ತಿದ್ದಾರೆ,(ಏಜೆನ್ಸೀಸ್​).