ಮಗಳ ಬೆಂಬಲಕ್ಕೆ ನಿಂತ ಸಂಜಯ್ ಬಾಂಗರ್: ನನ್ನ ಅಪ್ಪನೇ ವೆಚ್ಚ ಭರಿಸುತ್ತಿದ್ದಾರೆ: ಅನಾಯಾ ಲಿಂಗ ಬದಲಾವಣೆ ಶಸ್ತ್ರಚಿಕಿತ್ಸೆಗೆ ತಂದೆಯೇ ಆಸರೆ | Anaya Bangar

ಇಸ್ಟಾಗ್ರಾಮ್​ನಲ್ಲಿ ತಮ್ಮ ಭಾವನೆಗಳನ್ನು ಹಂಚಿಕೊಂಡಿರುವ ಅನಾಯಾ, ನಾನು ಕಳೆದ ಐದು ವರ್ಷಗಳಿಂದ ಈ ಕ್ಷಣಕ್ಕಾಗಿ ಕಾಯುತ್ತಿದ್ದೆ. ನಾನು ಹುಟ್ಟಿದ ಲಿಂಗದೊಂದಿಗೆ ನನಗೂ ಕೂಡ ಯಾವುದೇ ಹೊಂದಾಣಿಕೆ ಇರಲಿಲ್ಲ. ಈಗ ನಾನು ಯಾರೋ ಅದೇ ಆಗಿ ಬದಲಾಗುತ್ತಿದ್ದೇನೆ. ನನ್ನ ತಂದೆ ಈ ನಿರ್ಧಾರಕ್ಕೆ ಸಂಪೂರ್ಣ ಬೆಂಬಲ ನೀಡುತ್ತಿದ್ದಾರೆ ಮತ್ತು ಶಸ್ತ್ರಚಿಕಿತ್ಸೆಯ ಎಲ್ಲ ವೆಚ್ಚವನ್ನು ಅವರೇ ನೀಡುತ್ತಿದ್ದಾರೆ ಎಂದು ಹೇಳಿದ್ದಾರೆ.

ಅನಾಯಾ ಈ ಹಿಂದೆ ಹದಿಹರೆಯದವರಿದ್ದಾಗ 'ಆರ್ಯನ್' ಹೆಸರಿನಲ್ಲಿ ಕ್ರಿಕೆಟ್ ಆಡುತ್ತಿದ್ದರು. ಆದರೆ, ತಮ್ಮ ಹಾರ್ಮೋನ್ ಬದಲಾವಣೆ ಮತ್ತು ಲಿಂಗ ಗುರುತಿನ ಗೊಂದಲದ ಕಾರಣದಿಂದಾಗಿ ಕ್ರಿಕೆಟ್ ತೊರೆದು ತಮ್ಮ ನೈಜ ವ್ಯಕ್ತಿತ್ವವನ್ನು ಕಂಡುಕೊಳ್ಳಲು ನಿರ್ಧರಿಸಿದ್ದರು. ಇತ್ತೀಚೆಗಷ್ಟೇ ಅವರು ತಾವು ಹಾರ್ಮೋನ್ ರಿಪ್ಲೇಸ್‌ಮೆಂಟ್ ಥೆರಪಿಯಲ್ಲಿದ್ದು (HRT), ಸಂಪೂರ್ಣವಾಗಿ ಮಹಿಳೆಯಾಗಿ ಬದಲಾಗುತ್ತಿರುವುದಾಗಿ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದರು.

ಒಬ್ಬ ಪ್ರಸಿದ್ಧ ಕ್ರಿಕೆಟಿಗರಾಗಿ ಸಂಜಯ್ ಬಾಂಗರ್ ಅವರು ತಮ್ಮ ಮಗಳ ನಿರ್ಧಾರವನ್ನು ಗೌರವಿಸಿ, ಆಕೆಗೆ ಆರ್ಥಿಕವಾಗಿ ಮತ್ತು ಮಾನಸಿಕವಾಗಿ ಬೆಂಬಲ ನೀಡುತ್ತಿರುವುದು ಸಾರ್ವಜನಿಕವಾಗಿ ಶ್ಲಾಘನೆಗೆ ಪಾತ್ರವಾಗಿದೆ. ಮಕ್ಕಳ ಸಂತೋಷ ಮತ್ತು ಅವರ ನೈಜ ವ್ಯಕ್ತಿತ್ವದ ಹುಡುಕಾಟಕ್ಕೆ ತಂದೆ ನೀಡುತ್ತಿರುವ ಈ ಬೆಂಬಲ ಇತರ ಪೋಷಕರಿಗೆ ಮಾದರಿ ಎಂದು ನೆಟ್ಟಿಗರು ಕಮೆಂಟ್ ಮಾಡುತ್ತಿದ್ದಾರೆ.

ಒಬ್ಬ ವ್ಯಕ್ತಿಯು ಹುಟ್ಟಿದ ಲಿಂಗವು ಅವರ ಮಾನಸಿಕ ಗುರುತಿಗೆ ಹೊಂದಿಕೆಯಾಗದಿದ್ದಾಗ, ಶಸ್ತ್ರಚಿಕಿತ್ಸೆಯ ಮೂಲಕ ದೇಹದ ಭಾಗಗಳನ್ನು ಅವರ ಮಾನಸಿಕ ಲಿಂಗಕ್ಕೆ ಅನುಗುಣವಾಗಿ ಬದಲಾಯಿಸಿಕೊಳ್ಳುವ ಪ್ರಕ್ರಿಯೆ ಇದಾಗಿದೆ. ಥೈಲ್ಯಾಂಡ್ ಈ ರೀತಿಯ ಶಸ್ತ್ರಚಿಕಿತ್ಸೆಗಳಿಗೆ ವಿಶ್ವದಲ್ಲೇ ಅತ್ಯಂತ ಸುಧಾರಿತ ವೈದ್ಯಕೀಯ ಕೇಂದ್ರಗಳನ್ನು ಹೊಂದಿದೆ,(ಏಜೆನ್ಸೀಸ್).