ಸಂಚಾರ್ ಸಾಥಿ ಆ್ಯಪ್ ಕಡ್ಡಾಯ; ಕೇಂದ್ರ ಸರ್ಕಾರದ ಆದೇಶ ಪ್ರಶ್ನಿಸಲು ಮುಂದಾದ ಆ್ಯಪಲ್ ಕಂಪನಿ | Apple company

ನವದೆಹಲಿ: ಭಾರತದಲ್ಲಿ ಮಾರಾಟವಾಗುವ ಎಲ್ಲಾ ಸ್ಮಾರ್ಟ್​ ಫೋನ್​ಗಳಲ್ಲಿ ಸಂಚಾರ್ ಸಾಥಿ ಆ್ಯಪ್​ ಅನ್ನು ಮೊದಲೇ ಅಳವಡಿಸುವಂತೆ ಕೇಂದ್ರ ದೂರಸಂಪರ್ಕ ಇಲಾಖೆಯ ಆದೇಶವನ್ನು ಪ್ರಮುಖ ಮೊಬೈಲ್ ತಯಾರಿಕಾ ಕಂಪನಿಗಳಲ್ಲಿ ಒಂದಾದ ಆ್ಯಪಲ್ ಕಂಪನಿ(Apple company) ಪ್ರಶ್ನಿಸಿಲು ಮುಂದಾಗಿದೆ ಎಂದು ಮಂಗಳವಾರ(ಡಿ. 02) ವರದಿಯಾಗಿದೆ.

ಕಳೆದ ವಾರ ಹೊರಡಿಸಲಾದ ಕೇಂದ್ರ ಸರ್ಕಾರದ ಆದೇಶದ ಪ್ರಕಾರ, ಹ್ಯಾಂಡ್‌ಸೆಟ್ ತಯಾರಕರು 90 ದಿನಗಳ ಒಳಗೆ ಅಪ್ಲಿಕೇಶನ್ ಅನ್ನು ಎಂಬೆಡ್ ಮಾಡಬೇಕು. ಮತ್ತು ಈಗಾಗಲೇ ಸಾಗಣೆಯಲ್ಲಿರುವ ಅಥವಾ ದಾಸ್ತಾನುಗಳಲ್ಲಿರುವ ಘಟಕಗಳಲ್ಲಿಯೂ ಸಹ ಅದು ಇರುವುದನ್ನು ಖಚಿತಪಡಿಸಿಕೊಳ್ಳಬೇಕು ಎಂದು ಹೇಳಿದೆ.

ಆದಾಗ್ಯೂ ರಾಯಿಟರ್ಸ್​ ವರದಿ ಪ್ರಕಾರ, ಬಳಕೆದಾರರ ಗೌಪ್ಯತೆ, ಪ್ಲಾಟ್‌ಫಾರ್ಮ್ ಸಮಗ್ರತೆ ಹಾಗೂ ಪೂರ್ವ-ಸ್ಥಾಪಿತ ಸಾಫ್ಟ್‌ವೇರ್ ಮೇಲಿನ ನಿಯಂತ್ರಣಕ್ಕೆ ಸಂಬಂಧಿಸಿದಂತೆ ತನ್ನ ದೀರ್ಘಕಾಲದ ವಿಧಾನಕ್ಕೆ ಕೇಂದ್ರ ಸರ್ಕಾರದ ಆದೇಶ ವಿರುದ್ಧವಾಗಿದೆ ಎಂಬ ಕಾರಣಕ್ಕೆ ಆಪಲ್ ಅದನ್ನು ವಿರೋಧಿಸುತ್ತಿದೆ ಎನ್ನಲಾಗಿದೆ. 

ಭಾರತೀಯ ಅಧಿಕಾರಿಗಳೊಂದಿಗೆ ತನ್ನ ವಿರೋಧವನ್ನು ಔಪಚಾರಿಕವಾಗಿ ದಾಖಲಿಸುವುದಾಗಿ ಕಂಪನಿ ಸೂಚಿಸಿದೆ ಎನ್ನಲಾಗಿದೆ. ಯಾವುದೇ ಸರ್ಕಾರಿ ಅಪ್ಲಿಕೇಶನ್‌ನ ಕಡ್ಡಾಯ ಪೂರ್ವ-ಲೋಡಿಂಗ್ ಜಾಗತಿಕ ಮಾರುಕಟ್ಟೆಗಳಲ್ಲಿ ಅದು ನಿರ್ವಹಿಸುವ ಏಕರೂಪದ ಭದ್ರತಾ ವಾಸ್ತುಶಿಲ್ಪವನ್ನು ರಾಜಿ ಮಾಡುತ್ತದೆ ಎಂದು ವಾದಿಸಿದೆ. 

ಇನ್ನೂ ಆ್ಯಪ್ ಕಡ್ಡಾಯ ವಿವಾದವಾಗುತ್ತಿದ್ದಂತೆ ಕೇಂದ್ರ ದೂರಸಂಪರ್ಕ ಸಚಿವ ಜ್ಯೋತಿರಾದಿತ್ಯ ಸಿಂಧಿಯಾ ಮಾತನಾಡಿದ್ದು, ಸಂಚಾರ್ ಸಾಥಿ ಅಪ್ಲಿಕೇಶನ್ ಬಳಸುವುದು ಖಡ್ಡಾಯವಲ್ಲ, ಯಾರಿಗಾದರು ಆ್ಯಪ್​ ಬೇಡವಾದರೆ ಡಿಲೀಟ್​ ಮಾಡಬಹುದು. ಸೈಬರ್ ವಂಚನೆಯನ್ನು ನಿಗ್ರಹಿಸಲು ವಿನ್ಯಾಸಗೊಳಿಸಲಾಗಿರುವ ಈ ಅಪ್ಲಿಕೇಶನನ್ನು ಎಲ್ಲರಿಗೂ ಪರಿಚಯಿಸುವುದು ನಮ್ಮ ಕರ್ತವ್ಯ, ನಿರ್ದೇಶನದ ಹಿಂದಿನ ಉದ್ದೇಶ. ಅದನ್ನು ಇಟ್ಟುಕೊಳ್ಳಬೇಕೋ, ಬೇಡವೋ ಎನ್ನುವುದು ಬಳಕೆದಾರರು ನಿರ್ಧಾರ ಮಾಡುತ್ತಾರೆ ಎಂದು ಸ್ಪಷ್ಟಪಡಿಸಿದ್ದಾರೆ.

2025 ಜನವರಿಯಲ್ಲಿ ಬಿಡುಗಡೆಯಾದ ಸಂಚಾರ್ ಸಾಥಿ ಅಪ್ಲಿಕೇಶನ್, ಕಳ್ಳತನವಾಗಿರುವ ಫೋನ್ ಬಂದ್​ ಮಾಡುವುದು, ಬಳಕೆದಾರರ ಹೆಸರಿನಲ್ಲಿರುವ ಮೊಬೈಲ್ ಸಂಪರ್ಕಗಳನ್ನು ಪರಿಶೀಲಿಸುವುದು ಮತ್ತು ಶಂಕಿತ ವಂಚನೆಯನ್ನು ರಿಪೋರ್ಟ್ ಮಾಡುವಂತಹ ವಿವಿಧ ಇದು ಸೌಲಭ್ಯಗಳನ್ನು ನೀಡುತ್ತದೆ. ಇದು ಸಾರ್ವಜನಿಕ ಹಿತಾಸಕ್ತಿಯ ಸಾಧನವೆಂದು ಕೇಂದ್ರ ಸರ್ಕಾರ ಭಾವಿಸಿದೆ (ಏಜೆನ್ಸೀಸ್).