ವದಂತಿಗಳಿಗೆ ಬ್ರೇಕ್.. ಟಿವಿಕೆ ಸೇರ್ಪಡೆಯಾದ ಉಚ್ಛಾಟಿತ ಶಾಸಕ ಕೆಎ ಸೆಂಗೋಟ್ಟೈಯನ್ | Sengottaiyan Joins TVK

ಪಕ್ಷದ ಏಕತೆಗೆ ಕರೆ ನೀಡಿದ್ದ ಕಾರಣ ಎಐಎಡಿಎಂಕೆಯಿಂದ ಉಚ್ಛಾಟನೆಗೊಂಡಿದ್ದ ಸೆಂಗೋಟ್ಟೈಯನ್, ಇಂದು ತಮ್ಮ ಅಪಾರ ಬೆಂಬಲಿಗರೊಂದಿಗೆ ಟಿವಿಕೆಗೆ ಜೈ ಅಂದಿದ್ದಾರೆ. ಟಿವಿಕೆ ಪಕ್ಷ ಸ್ಥಾಪನೆಯಾದ ಬಳಿಕ ಅತ್ಯಂತ ಮಹತ್ವದ ಪಕ್ಷ ಸೇರ್ಪಡೆಗಳಲ್ಲಿ ಇದು ಒಂದಾಗಿದೆ.

ಎಐಎಡಿಎಂಕೆ ಪಕ್ಷದಿಂದ ಈಗಾಗಲೇ ಹೊರಹಾಕಲ್ಪಟ್ಟ ನಾಯಕರೊಂದಿಗೆ ಸಂಪರ್ಕ ಸಾಧಿಸಿದ್ದು, ಪಕ್ಷದ ನಾಯಕರನ್ನು ಬಹಿರಂಗವಾಗಿ ಟೀಕಿಸಿದ ಕಾರಣಕ್ಕೆ, ಎಡಪ್ಪಾಡಿ ಕೆ ಪಳನಿಸ್ವಾಮಿ, ಕೆಎ ಸೆಂಗೊಟ್ಟೈಯನ್ ಅವರನ್ನು ಉಚ್ಚಾಟಿಸಿದ್ದರು. ಈ ಹಿಂದೆ ಉಚ್ಚಾಟಿತರಾಗಿದ್ದ ನಾಯಕರನ್ನು ಮರು ಸೇರ್ಪಡೆ ಮಾಡಿಕೊಳ್ಳುವಂತೆ ಸೆಂಗೊಟ್ಟೈಯನ್ ಒತ್ತಾಯಿಸಿದ್ದರು ಮತ್ತು ಪಕ್ಷ ಮುಂಬರುವ ಚುನಾವಣೆಯಲ್ಲಿ ಅಧಿಕಾರಕ್ಕೆ ಬರಬೇಕಾದರೆ ಒಗ್ಗಟ್ಟು ಮುಖ್ಯವಾಗಿತ್ತದೆ ಎಂದು ಹೇಳಿದ್ದರು.

ಕೆಎ ಸೆಂಗೊಟ್ಟೈಯನ್ ಅಭಿಪ್ರಾಯವನ್ನು ಪಳನಿಸ್ವಾಮಿಯನ್ನು ವಿರೋಧಿಸುತ್ತಿದ್ದ ಬಣಗಳು ಸ್ವಾಗತಿಸಿದ್ದವು. ಇದನ್ನೇ ಗಂಭೀರವಾಗಿ ಪರಿಗಣಿಸಿದ ಪಕ್ಷದ ನಾಯಕತ್ವ, ಅಶಿಸ್ತಿನ ವರ್ತನೆಯ ಕಾರಣ ನೀಡಿ ಸೆಂಗೊಟ್ಟೈಯನ್​ರನ್ನು ಉಚ್ಛಾಟಿಸಿತು.

ಉಚ್ಛಾಟನೆಯ ಬಳಿಕ ಸೆಂಗೊಟ್ಟೈಯನ್ ನಟ ವಿಜಯ್ ನೇತೃತ್ವದ ಟಿವಿಕೆ ತೆಕ್ಕಗೆ ಜಾರುವ ಮೂಲಕ ತಮ್ಮ ರಾಜಕೀಯ ಜೀವನದ ಮತ್ತೊಂದು ಇನ್ನಿಂಗ್ಸ್​ ಆರಂಭಿಸಿದ್ದು, ಈ ನಡೆ ಎಐಎಡಿಎಂಕೆಯನ್ನು ಹೊರತುಪಡಿಸಿ ಕೂಡ ನಾನು ರಾಜಕೀಯ ಮಾಡಬಲ್ಲೇ ಎಂಬ ಸಂದೇಶವನ್ನು ಕಳುಹಿಸಿದೆ.

ಸೆಂಗೊಟ್ಟೈಯನ್ ಟಿವಿಕೆ ಸೇರ್ಪಡೆಯಿಂದ ಮುಂಬರುವ ಚುನಾವಣೆಗಳಿಗೆ ಮುಂಚಿತವಾಗಿ ತಮಿಳುನಾಡು ರಾಜಕೀಯ ರಂಗುಪಡೆದುಕೊಂಡಿದ್ದು, ಸುಧೀರ್ಘ 50 ವರ್ಷಗಳ ಕಾಲ ರಾಜಕೀಯದಲಲ್ಲಿರುವ ಹಿರಿಯ ನಾಯಕನ ಬೆಂಬಲಿಗೆ ಶಾಸಕರುಗಳು ಮತ್ತು ಎರಡನೇ ಹಂತದ ನಾಯಕರುಗಳು ಯಾವ ನಿರ್ಧಾರ ತೆಗೆದುಕೊಳ್ಳಲಿದ್ದಾರೆ ಎನ್ನುವುದನ್ನು ಸ್ವಲ್ಪ ದಿನ ಕಾಯ್ದು ನೋಡಬೇಕಾಗುತ್ತದೆ.

ಅನುಭವಿ ಶಾಸಕರಾಗಿದ್ದ ಸೆಂಗೊಟ್ಟೈಯನ್, ತಳಮಟ್ಟದಿಂದ ಪಕ್ಷ ಸಂಘಟನೆಯಲ್ಲಿ ತೊಡಗಿಸಿಕೊಂಡಿರುವುದರಿಂದ ರಾಜ್ಯಾದ್ಯಂತ ಅವರದ್ದೇ ಹಿಡಿತ ಇರುತ್ತದೆ, ಈಗ ಅಂತಹ ದೊಡ್ಡ ನಾಯಕ ಟಿವಿಕೆ ಸೇರಿರುವುದು ಮುಂಬರುವ ಚುನಾವಣೆಯಲ್ಲಿ ವಿಜಯ್​ ಪಕ್ಷಕ್ಕೆ ದೊಡ್ಡ ಶಕ್ತಿ ನೀಡುವುದರಲ್ಲಿ ಅನುಮಾನವಿಲ್ಲ.

1977 ರಲ್ಲಿ ಮೊದಲ ಬಾರಿಗೆ ಶಾಸಕರಾಗಿ ಆಯ್ಕೆಯಾದ ಸೆಂಗೊಟ್ಟೈಯನ್, ಇಲ್ಲಿಯವರೆಗೂ ಒಂಬತ್ತು ಚುನಾವಣೆಯಗಳಲ್ಲಿ ಗೆಲುವು ಸಾಧಿಸಿದ್ದು, ಪಶ್ಚಿಮ ತಮಿಳುನಾಡು ಭಾಗದಲ್ಲಿ ತಮ್ಮದೇ ಆದ ವೈಯಕ್ತಿಕ ವರ್ಚಸ್ಸು ಹೊಂದಿದ್ದಾರೆ. ಈ ಹಿಂದೆ ಎಐಎಡಿಎಂಕೆ ವಿಭಜನೆಯಾದ ಸಂದರ್ಭದಲ್ಲಿ ಮಾಜಿ ಸಿಎಂ ಜಯಲಲಿತಾರನ್ನು ಬೆಂಬಲಿಸಿದ್ದರು ಮತ್ತು ಅವರ ಪ್ರಚಾರದ ವೇಳಾಪಟ್ಟಿಯನ್ನು ಸೆಂಗೊಟ್ಟೈಯನ್ ಅವರೇ ನಿಭಾಯಿಸುತ್ತಿದ್ದರು ಎನ್ನಲಾಗಿದೆ.

ಒಂಬತ್ತು ಬಾರಿ ಶಾಸಕರಾಗಿದ್ದ ಸೆಂಗೊಟ್ಟೈಯನ್, ಬುಧವಾರ ತಮಿಳುನಾಡು ವಿಧಾನಸಭೆಯ ಸ್ಪೀಕರ್ ಎಂ ಅಪ್ಪಾವು ಅವರನ್ನು ಭೇಟಿಯಾಗಿ ರಾಜೀನಾಮೆ ಪತ್ರವನ್ನು ಸಲ್ಲಿಸಿದ್ದರು. ರಾಜೀನಾಮೆ ಬಳಿಕ ಮುಂದಿನ ನಡೆಯ ಬಗ್ಗೆ ಮೌನವಾಗಿದ್ದು, ಇತ್ತ ಆಡಳಿತಾರೂಢ ಡಿಎಂಕೆ ಬದಲಿಗೆ ಟಿವಿಕೆಯನ್ನು ತಮ್ಮ ಭವಿಷ್ಯದ ಆಯ್ಕೆಯನ್ನಾಗಿಸಿದ್ದಾರೆ(ಏಜೆನ್ಸೀಸ್​).