ದೆಹಲಿ ಎಸ್‌ಐಆರ್​​: ಸಚಿವ ಜೈಶಂಕರ್, ಮಾಜಿ ಸೇನಾ ಮುಖ್ಯಸ್ಥ, ಸಿಬಿಐ ನಿರ್ದೇಶಕರಿಗೂ ನೋಟಿಸ್ ಜಾರಿ! | S Jaishankar

ಈ ಪಟ್ಟಿಯಲ್ಲಿ ದೆಹಲಿಯ ಮಾಜಿ ಉಪಪ್ರಧಾನಿ ಎಲ್​ ಕೆ ಅಡ್ವಾಣಿ, ಮಾಜಿ ಉಪಮುಖ್ಯಮಂತ್ರಿ ಮನೀಷ್ ಸಿಸೋಡಿಯಾ ಮತ್ತು ಅವರ ಕುಟುಂಬ, ಸಿಬಿಐ ನಿರ್ದೇಶಕ ಪ್ರವೀಣ್ ಸೂದ್ ಮತ್ತು ಅವರ ಕುಟುಂಬ, ಮಾಜಿ ಸೇನಾ ಮುಖ್ಯಸ್ಥ ಜನರಲ್ ಉಪೇಂದ್ರ ದ್ವಿವೇದಿ ಮತ್ತು ಅವರ ಪತ್ನಿ ಹಾಗೂ ಮಾಜಿ ಸುಪ್ರೀಂ ಕೋರ್ಟ್ ನ್ಯಾಯಮೂರ್ತಿ ರಂಜನಾ ದೇಸಾಯಿ ಮತ್ತು ಅವರ ಕುಟುಂಬದ ಸದಸ್ಯರು ಸೇರಿದ್ದಾರೆ.

ಹಲವು ಹಾಲಿ ಮತ್ತು ನಿವೃತ್ತ ಅಧಿಕಾರಶಾಹಿಗಳ ದಾಖಲೆಗಳನ್ನು ಹಿಂದಿನ ಪರಿಷ್ಕರಣೆಯ ಸಮಯದಲ್ಲಿ ಸಿದ್ಧಪಡಿಸಿದ ಮತದಾರರ ಪಟ್ಟಿಗೆ ಲಿಂಕ್ ಮಾಡಲು ಸಾಧ್ಯವಾಗದ ಕಾರಣ ಅಥವಾ ಅವರ ಹೆಸರು ಮತ್ತು ಕುಟುಂಬದ ವಿವರಗಳಲ್ಲಿನ ವ್ಯತ್ಯಾಸಗಳಿಂದಾಗಿ ಅವರಿಗೂ ನೋಟಿಸ್‌ಗಳನ್ನು ಜಾರಿಗೊಳಿಸಲಾಗಿದೆ.

ಈ ಬೆಳವಣಿಗೆಯ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ದೆಹಲಿಯ ಮುಖ್ಯ ಚುನಾವಣಾಧಿಕಾರಿಗಳು, ನೋಟಿಸ್ ಪಡೆದ ತಕ್ಷಣ ಮತದಾರರ ಹೆಸರನ್ನು ಪಟ್ಟಿಯಿಂದ ತೆಗೆದುಹಾಕಲಾಗುತ್ತದೆ ಎಂದರ್ಥವಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ. ECINETನಲ್ಲಿ ಮತದಾರರ ಡೇಟಾವನ್ನು ಸರಿಪಡಿಸಲು ಮೇಲ್ಕಂಡ ವರ್ಗದ ಜನರಿಗೆ ಸಿಸ್ಟಮ್-ಜನರೇಟೆಡ್ (ಸ್ವಯಂಚಾಲಿತ) ನೋಟಿಸ್‌ಗಳನ್ನು ನೀಡಲಾಗುತ್ತಿದೆ. ವಿಚಾರಣೆಗೆ ಅವಕಾಶ ನೀಡದೆ ಮತ್ತು ಸೂಕ್ತ, ಸ್ಪಷ್ಟ ಹಾಗೂ ಮೇಲ್ಮನವಿ ಸಲ್ಲಿಸಬಹುದಾದ ಆದೇಶವಿಲ್ಲದೆ ಯಾವುದೇ ಹೆಸರನ್ನು ತೆಗೆದುಹಾಕಲು ಸಾಧ್ಯವಿಲ್ಲ ಎಂದು ಅವರು ತಿಳಿಸಿದ್ದಾರೆ.

ಜೈಶಂಕರ್ ಮತ್ತು ಅವರ ಪತ್ನಿಯನ್ನು ಹಿಂದಿನ ಎಸ್​​ಐಆರ್​​ನೊಂದಿಗೆ ಮ್ಯಾಪ್ ಆಗದ ವರ್ಗದಲ್ಲಿ ಇರಿಸಲಾಗಿದೆ. ಇದರರ್ಥ ಅವರ ಪ್ರಸ್ತುತ ದಾಖಲೆಗಳನ್ನು 2002 ರ ಹಿಂದಿನ ಪರಿಷ್ಕರಣೆಯ ಸಮಯದಲ್ಲಿ ಸಿದ್ಧಪಡಿಸಿದ ಮತದಾರರ ಪಟ್ಟಿಗೆ ಲಿಂಕ್ ಮಾಡಲು ಸಾಧ್ಯವಾಗಿಲ್ಲ. ಈ ದಂಪತಿಗಳು ನವದೆಹಲಿ ವಿಧಾನಸಭಾ ಕ್ಷೇತ್ರದ ಸುಂದರ್ ಬಾಗ್ ಮತದಾರರ ಭಾಗದಲ್ಲಿ ಮತದಾರರಾಗಿ ನೋಂದಾಯಿಸಿಕೊಂಡಿದ್ದಾರೆ.

ಸಿಬಿಐ ನಿರ್ದೇಶಕ ಪ್ರವೀಣ್ ಸೂದ್, ಅವರ ಪತ್ನಿ ವನಿತಾ ಸೂದ್ ಮತ್ತು ತಾಯಿ ಕಮಲೇಶ್ ಸೂದ್ ಅವರನ್ನು ಇದೇ ವರ್ಗದಲ್ಲಿ ಇರಿಸಲಾಗಿದೆ. ಮಾಜಿ ಸೇನಾ ಮುಖ್ಯಸ್ಥ ಜನರಲ್ ಉಪೇಂದ್ರ ದ್ವಿವೇದಿ ಮತ್ತು ಅವರ ಪತ್ನಿ ಸುನಿತಾ ದ್ವಿವೇದಿ ಅವರ ದಾಖಲೆಗಳನ್ನು ಹಿಂದಿನ ಪಟ್ಟಿಗೆ ಲಿಂಕ್ ಮಾಡಲು ಸಾಧ್ಯವಾಗದ ಕಾರಣ ಅವರಿಗೂ ನೋಟಿಸ್ ಜಾರಿಯಾಗಿದೆ. ಅವರು ನವದೆಹಲಿ ವಿಧಾನಸಭಾ ಕ್ಷೇತ್ರದ ಮತದಾರರಾಗಿ ನೋಂದಾಯಿಸಿಕೊಂಡಿದ್ದಾರೆ.

ಮಾಜಿ ಸುಪ್ರೀಂ ಕೋರ್ಟ್ ನ್ಯಾಯಮೂರ್ತಿ ರಂಜನಾ ದೇಸಾಯಿ, ಅವರ ಪತಿ ಪ್ರಕಾಶ್ ದೇಸಾಯಿ, ಅವರ ಮಗ ಹಾಗೂ ವಕೀಲ ಮೈಕ್ ದೇಸಾಯಿ ಮತ್ತು ಸೊಸೆ ಸಾಕ್ಷಿ ದೇಸಾಯಿ ಅವರನ್ನು ಹಿಂದಿನ ಎಸ್​​ಐಆರ್​​ನೊಂದಿಗೆ ಮ್ಯಾಪ್ ಆಗದ ವರ್ಗದಲ್ಲಿ ಸೇರಿಸಲಾಗಿದೆ. ಸಿಪಿಎಂ ಸಂಸದ ಜಾನ್ ಬ್ರಿಟ್ಟಾಸ್ ಅವರ ಪತ್ನಿ ಶೀಬಾ ಬ್ರಿಟ್ಟಾಸ್ ಮತ್ತು ಮಗ ಆನಂದ್ ಬ್ರಿಟ್ಟಾಸ್ ಅವರಿಗೂ ಚುನಾವಣಾ ಆಯೋಗ ನೋಟಿಸ್ ಜಾರಿ ಮಾಡಿದೆ. ಆದರೆ, ಅವರ ದಾಖಲೆಗಳನ್ನು ಬೇರೆ ಬೇರೆ ಕಾರಣಗಳಿಗಾಗಿ ಗುರುತಿಸಲಾಗಿದೆ.

ಶೀಬಾ ಅವರು ಸ್ವಯಂ ಹೆಸರು ವ್ಯತ್ಯಾಸಕ್ಕಾಗಿ ನೋಟಿಸ್ ಪಡೆದಿದ್ದರೆ, ಆನಂದ್ ಅವರ ದಾಖಲೆಯನ್ನು ಪೋಷಕರ ಹೆಸರು ವ್ಯತ್ಯಾಸಕ್ಕಾಗಿ ಗುರುತಿಸಲಾಗಿದೆ. ಆನಂದ್ ಅವರ ದಾಖಲೆಯಲ್ಲಿನ ವ್ಯತ್ಯಾಸವು ಅವರ ತಾಯಿಯ ವಿವರಗಳಲ್ಲಿ ಕಂಡುಬಂದ ವ್ಯತ್ಯಾಸಕ್ಕೆ ಸಂಬಂಧಿಸಿರಬಹುದು. ಇಬ್ಬರೂ ನವದೆಹಲಿ ವಿಧಾನಸಭಾ ಕ್ಷೇತ್ರದ ಮತದಾರರಾಗಿ ನೋಂದಾಯಿಸಿಕೊಂಡಿದ್ದಾರೆ.

ಹಲವು ಹಾಲಿ ಮತ್ತು ನಿವೃತ್ತ ಐಎಎಸ್ ಅಧಿಕಾರಿಗಳ ದಾಖಲೆಗಳನ್ನು ಹಿಂದಿನ ಪಟ್ಟಿಗೆ ಲಿಂಕ್ ಮಾಡಲು ಸಾಧ್ಯವಾಗದ ಕಾರಣ ಅಥವಾ ವಿವರಗಳಲ್ಲಿ ವ್ಯತ್ಯಾಸಗಳು ಕಂಡುಬಂದ ಕಾರಣ ಅವರಿಗೂ ನೋಟಿಸ್ ನೀಡಲಾಗಿದೆ. ವಿದೇಶಾಂಗ ಕಾರ್ಯದರ್ಶಿ ವಿಕ್ರಮ್ ಮಿಸ್ರಿ, ಸೆಕ್ಯುರಿಟೀಸ್ ಅಂಡ್ ಎಕ್ಸ್ಚೇಂಜ್ ಬೋರ್ಡ್ ಆಫ್ ಇಂಡಿಯಾ ಅಧ್ಯಕ್ಷ ತುಹಿನ್ ಕಾಂತ್ ಪಾಂಡೆ, ಪ್ರಧಾನಮಂತ್ರಿಯವರ ಮುಖ್ಯ ವೈಜ್ಞಾನಿಕ ಸಲಹೆಗಾರ ಅಜಯ್ ಕುಮಾರ್ ಸೂದ್ ಮತ್ತು ಆರೋಗ್ಯ ಕಾರ್ಯದರ್ಶಿ ಪುಣ್ಯ ಸಲಿಲಾ ಶ್ರೀವಾಸ್ತವ ಅವರ ದಾಖಲೆಗಳನ್ನು ಹಿಂದಿನ ಪಟ್ಟಿಗೆ ಮ್ಯಾಪ್ ಮಾಡಲು ಸಾಧ್ಯವಾಗಿಲ್ಲ.

ಈ ಪಟ್ಟಿಯಲ್ಲಿ ಮೀನುಗಾರಿಕೆ ಕಾರ್ಯದರ್ಶಿ ಅಭಿಲಾಷ್ ಲಿಖಿ, ಅವರ ಪತ್ನಿ ಹಾಗೂ ಮಾಜಿ ಯೋಧರ ಕಲ್ಯಾಣ ಕಾರ್ಯದರ್ಶಿ ಸುಕೃತಿ ಲಿಖಿ, ರಸಗೊಬ್ಬರ ಕಾರ್ಯದರ್ಶಿ ರಜತ್ ಕುಮಾರ್ ಮಿಶ್ರಾ ಮತ್ತು ಭೂ ಸಂಪನ್ಮೂಲ ಕಾರ್ಯದರ್ಶಿ ನರೇಂದ್ರ ಭೂಷಣ್ ಸೇರಿದ್ದಾರೆ. ಇತರ ಅಧಿಕಾರಿಗಳ ಹೆಸರು ಅಥವಾ ಕುಟುಂಬದ ವಿವರಗಳಲ್ಲಿನ ವ್ಯತ್ಯಾಸಗಳಿಗಾಗಿ ನೋಟಿಸ್ ನೀಡಲಾಗಿದೆ. ಅವರಲ್ಲಿ ವೆಚ್ಚ ಕಾರ್ಯದರ್ಶಿ ವುಮ್ಲುನ್‌ಮಂಗ್ ವುಲ್ನಮ್ ಸೇರಿದ್ದಾರೆ, ಹಾಗೂ ಕಂಟ್ರೋಲರ್ ಮತ್ತು ಆಡಿಟರ್ ಜನರಲ್ ಕೆ ಸಂಜಯ್ ಮೂರ್ತಿ ಅವರು ಪೋಷಕರ ಹೆಸರು ವ್ಯತ್ಯಾಸಕ್ಕಾಗಿ ನೋಟಿಸ್ ಪಡೆದಿದ್ದಾರೆ.

ಪ್ರಸ್ತುತ ಮತದಾರರ ಪಟ್ಟಿಯಲ್ಲಿರುವ ವಿವರಗಳನ್ನು ಹಿಂದಿನ ಪರಿಷ್ಕರಣೆಯ ಅನುರೂಪ ನಮೂದಿಗೆ ಲಿಂಕ್ ಮಾಡಲು ಸಾಧ್ಯವಾಗದಿದ್ದಾಗ ಮತದಾರನನ್ನು Unmapped With Last SIR ಎಂದು ವರ್ಗೀಕರಿಸಲಾಗುತ್ತದೆ. ದಾಖಲೆಗಳನ್ನು ಲಿಂಕ್ ಮಾಡಲು ಸಾಧ್ಯವಾಗದ ಅಥವಾ ವಿವರಗಳಲ್ಲಿ ವ್ಯತ್ಯಾಸಗಳಿರುವ ಮತದಾರರಿಗೆ ಸಂಬಂಧಪಟ್ಟ ಚುನಾವಣಾ ನೋಂದಣಿ ಅಧಿಕಾರಿಗೆ ಉತ್ತರ ಹಾಗೂ ಬೆಂಬಲಿತ ದಾಖಲೆಗಳನ್ನು ಸಲ್ಲಿಸಲು ಕೋರಲಾಗುತ್ತದೆ.

ನೋಟಿಸ್ ಪಡೆದ ತಕ್ಷಣವೇ ಮತದಾರನು ಅನರ್ಹನೆಂದು ಘೋಷಿಸಲ್ಪಟ್ಟಿದ್ದಾನೆ ಅಥವಾ ಅವರ ಹೆಸರನ್ನು ತೆಗೆದುಹಾಕಲಾಗುತ್ತದೆ ಎಂದರ್ಥವಲ್ಲ ಎಂದು ಚುನಾವಣಾ ಆಯೋಗ ಹೇಳಿದೆ. ಚುನಾವಣಾ ನೋಂದಣಿ ಅಧಿಕಾರಿಯು ಆದೇಶ ಹೊರಡಿಸುವ ಮೊದಲು ಪ್ರತಿಯೊಬ್ಬ ಮತದಾರರು ಸಲ್ಲಿಸಿದ ಉತ್ತರ ಮತ್ತು ದಾಖಲೆಗಳನ್ನು ಪರಿಶೀಲಿಸುತ್ತಾರೆ. ಈ ನೋಟಿಸ್‌ಗಳನ್ನು ಅಕ್ಟೋಬರ್ 29 ರೊಳಗೆ ವಿಲೇವಾರಿ ಮಾಡಲು ವೇಳಾಪಟ್ಟಿ ನಿಗದಿಪಡಿಸಲಾಗಿದ್ದು, ಅಂತಿಮ ಮತದಾರರ ಪಟ್ಟಿಯನ್ನು ನವೆಂಬರ್ 4 ರಂದು ಪ್ರಕಟಿಸಲಾಗುತ್ತದೆ(ಏಜೆನ್ಸೀಸ್​).