ದೆಹಲಿ ಸುದ್ದಿಗೋಷ್ಠಿಯಲ್ಲಿ ರಷ್ಯಾ ಸಚಿವನ 'ಗನ್' ವಾರ್ನಿಂಗ್! ಲಾವ್ರೊವ್ ಮಾತು ಕೇಳಿ ಪತ್ರಕರ್ತರು ದಂಗಾಗಿದ್ದೇಕೆ? Sergey Lavrov

ಮೊದಲ ಬಾರಿ ಫೋನ್ ಸೌಂಡ್ ಬಂದಾಗ ಶಾಂತವಾಗಿಯೇ ಪ್ರತಿಕ್ರಿಯಿಸಿದ ಲಾವ್ರೊವ್, ದಯವಿಟ್ಟು ನೀವು ಅಥವಾ ನಿಮ್ಮ ಫೋನ್ ಈ ಕೊಠಡಿಯಿಂದ ಹೊರಗೆ ಹೋಗಿ ಎಂದರು. ಆದರೆ ಕೆಲವೇ ಕ್ಷಣಗಳಲ್ಲಿ ಮತ್ತೆ ಅದೇ ರೀತಿ ಅಡಚಣೆ ಉಂಟಾದಾಗ ರೊಚ್ಚಿಗೆದ್ದ ರಷ್ಯಾ ವಿದೇಶಾಂಗ ಸಚಿವ, ನೀವು ಇಲ್ಲಿಂದ ಹೊರಹೋಗುತ್ತೀರಾ, ನಾನು ತಮಾಷೆ ಮಾಡುತ್ತಿಲ್ಲ. ನೀವೀಗ ನಿಮ್ಮ ಫೋನ್ ಅನ್ನು ಸರೆಂಡರ್ ಮಾಡದಿದ್ದರೆ, ಇಲ್ಲಿರೋ ಸೆಕ್ಯೂರಿಟಿ ಗನ್ ಹೊರಗೆ ತೆಗೆಯಬೇಕಾಗುತ್ತದೆ ಎಂದು ತಮ್ಮದೇ ಆದ ಕಟು ಹಾಸ್ಯ ಮಿಶ್ರಿತ ಧ್ವನಿಯಲ್ಲಿ ವಾರ್ನಿಂಗ್ ನೀಡಿದ್ದಾರೆ.

ಬ್ರಿಕ್ಸ್ ಶೃಂಗಸಭೆಯ ಭಾಗವಾಗಿ ದೆಹಲಿಯಲ್ಲಿದ್ದ ಸೆರ್ಗೆಯ್ ಲಾವ್ರೊವ್ ಅವರು ಗುರುವಾರದಂದು ಪ್ರಧಾನಿ ನರೇಂದ್ರ ಮೋದಿ ಅವರನ್ನು ಭೇಟಿಯಾಗಿ ಸುದೀರ್ಘ ಮಾತುಕತೆ ನಡೆಸಿದರು. 2025ರ ಡಿಸೆಂಬರ್‌ನಲ್ಲಿ ನಡೆದ 23ನೇ ಭಾರತ-ರಷ್ಯಾ ವಾರ್ಷಿಕ ಶೃಂಗಸಭೆಯ ನಂತರ ಉಭಯ ದೇಶಗಳ ನಡುವಿನ ವಿಶೇಷ ಮತ್ತು ಸವಲತ್ತು ಹೊಂದಿದ ಕಾರ್ಯತಂತ್ರದ ಪಾಲುದಾರಿಕೆ ಎಷ್ಟು ಪ್ರಗತಿ ಕಂಡಿದೆ ಎಂಬುದನ್ನು ಲಾವ್ರೊವ್ ಪ್ರಧಾನಿಗೆ ವಿವರಿಸಿದ್ದಾರೆ.

ಈ ಕುರಿತು ಎಕ್ಸ್​ನಲ್ಲಿ ಪೋಸ್ಟ್ ಹಂಚಿಕೊಂಡಿರುವ ಪ್ರಧಾನಿ ಮೋದಿ, ರಷ್ಯಾದೊಂದಿಗಿನ ಸಂಬಂಧದ ಪ್ರಗತಿಯನ್ನು ಶ್ಲಾಘಿಸಿದ್ದಾರೆ. ಇದೇ ವೇಳೆ ಯುಕ್ರೇನ್ ಬಿಕ್ಕಟ್ಟು ಮತ್ತು ಪಶ್ಚಿಮ ಏಷ್ಯಾದ ಯುದ್ಧದ ಪರಿಸ್ಥಿತಿಯ ಬಗ್ಗೆಯೂ ಇಬ್ಬರು ನಾಯಕರು ಚರ್ಚಿಸಿದ್ದು, ಯಾವುದೇ ಸಂಘರ್ಷಕ್ಕಾದರೂ ಶಾಂತಿಯುತ ಮಾತುಕತೆಯೇ ಏಕೈಕ ಪರಿಹಾರ ಎಂದು ಭಾರತ ತನ್ನ ಹಳೆಯ ನಿಲುವನ್ನು ಪುನರುಚ್ಚರಿಸಿದೆ.

ಇದಕ್ಕೂ ಮುನ್ನ ಬುಧವಾರದಂದು ಭಾರತದ ವಿದೇಶಾಂಗ ಸಚಿವ ಎಸ್. ಜೈಶಂಕರ್ ಅವರೊಂದಿಗೆ ಲಾವ್ರೊವ್ ದ್ವಿಪಕ್ಷೀಯ ಮಾತುಕತೆ ನಡೆಸಿದ್ದರು. ಜಾಗತಿಕ ಅಸ್ಥಿರತೆ ಮತ್ತು ಪಾಶ್ಚಿಮಾತ್ಯ ದೇಶಗಳ ಆರ್ಥಿಕ ನಿರ್ಬಂಧಗಳ ಒತ್ತಡದ ನಡುವೆಯೂ ಭಾರತ ಮತ್ತು ರಷ್ಯಾ ನಡುವಿನ ಇಂಧನ ವ್ಯಾಪಾರ, ರಕ್ಷಣೆ ಮತ್ತು ರಸಗೊಬ್ಬರ ಪೂರೈಕೆಯ ಪಾಲುದಾರಿಕೆ ಮತ್ತಷ್ಟು ಆಳವಾಗಿದೆ ಎಂದು ಜೈಶಂಕರ್ ತಿಳಿಸಿದ್ದಾರೆ. ವಿಶ್ವಸಂಸ್ಥೆ, ಜಿ20 ಮತ್ತು ಎಸ್‌ಸಿಒ (SCO) ವೇದಿಕೆಗಳಲ್ಲಿ ಭಾರತದ ಆದ್ಯತೆಗಳಿಗೆ ರಷ್ಯಾ ಸದಾ ಬೆಂಬಲ ನೀಡಲಿದೆ ಎಂದು ಲಾವ್ರೊವ್ ಭರವಸೆ ನೀಡಿದ್ದಾರೆ,(ಏಜೆನ್ಸೀಸ್​).