ಹಣದುಬ್ಬರದ ಭೀತಿ ಮೀರಿ ಚಿನ್ನದ ಮೇಲೆಯೇ ಕಣ್ಣು: ಬಡ್ಡಿ ದರಕ್ಕಿಂತ ಸುರಕ್ಷಿತ ಹೂಡಿಕೆಗೆ ಹೆಚ್ಚಿದ ಒಲವು

ನ್ಯೂಯಾರ್ಕ್: ಮಧ್ಯಪ್ರಾಚ್ಯದಲ್ಲಿ ಉದ್ವಿಗ್ನತೆ ದ್ವಿಗುಣಗೊಂಡಿದ್ದು, ಜಾಗತಿಕವಾಗಿ ಮತ್ತೆ ಹಣದುಬ್ಬರದ (Inflation) ಅಭದ್ರತೆ ಕಾಡಲಾರಂಭಿಸಿದೆ. ಕಚ್ಚಾ ತೈಲ ಬೆಲೆ ಏರಿಕೆಯಾಗುತ್ತಿರುವ ಹಿನ್ನೆಲೆಯಲ್ಲಿ ಬಡ್ಡಿ ದರಗಳು ಹೆಚ್ಚಾಗಬಹುದು ಎಂಬ ಭೀತಿಯಿಂದ ಚಿನ್ನದ ದರದ ಮೇಲ್ಮುಖ ಸಂಚಾರಕ್ಕೆ ಸದ್ಯಕ್ಕೆ ತಡೆಯುಂಟಾಗಿದೆ.

ಮುಂದಿನ ದಿನಗಳಲ್ಲಿ ಜಾಗತಿಕ ಆರ್ಥಿಕತೆಯ ಅಸ್ಥಿರತೆಯೇ ಚಿನ್ನದ ಬೆಲೆ ಏರಿಕೆಗೆ ದಾರಿಯಾಗಲಿದೆ ಎಂದು ಜಾಗತಿಕ ಮಾರುಕಟ್ಟೆ ವಿಶ್ಲೇಷಕರು ಅಭಿಪ್ರಾಯಪಟ್ಟಿದ್ದಾರೆ. ಸಿಆರ್‌ಯು (CRU) ಸಂಸ್ಥೆಯ ಪ್ರಮುಖ ರತ್ನ ಮತ್ತು ಲೋಹಗಳ ವಿಶ್ಲೇಷಕ ಕಿರಿಲ್ ಕಿರಿಲೆಂಕೊ ಅವರು 'ಕಿಟ್ಕೋ ನ್ಯೂಸ್'ಗೆ ನೀಡಿರುವ ಸಂದರ್ಶನದಲ್ಲಿ, ಪ್ರಸ್ತುತ ಚಿನ್ನದ ಮಾರುಕಟ್ಟೆಯಲ್ಲಿ ನಡೆಯುತ್ತಿರುವ ಮಹತ್ವದ ಬೆಳವಣಿಗೆಗಳನ್ನು ವಿವರವಾಗಿ ಹಂಚಿಕೊಂಡಿದ್ದಾರೆ.

ಮಧ್ಯಪ್ರಾಚ್ಯ ಸಂಘರ್ಷದಿಂದಾಗಿ ಕಚ್ಚಾ ತೈಲದ ಬೆಲೆ ಏರಿಕೆ ಕಾಣುತ್ತಿದೆ. ಈ ಹೆಚ್ಚಳವು ಹಣದುಬ್ಬರವನ್ನು ಕ್ರಮೇಣವಾಗಿ ಹೆಚ್ಚಿಸುತ್ತದೆ. ಇದನ್ನು ನಿಯಂತ್ರಿಸಲು ಬ್ಯಾಂಕುಗಳು ಬಡ್ಡಿ ದರಗಳನ್ನು ಕಡಿತಗೊಳಿಸದೆ, ದರ ಹೆಚ್ಚಳದ ಮುನ್ಸೂಚನೆ ನೀಡುತ್ತಿವೆ. ಬಡ್ಡಿ ದರಗಳು ಹೆಚ್ಚಾಗುವ ನಿರೀಕ್ಷೆಯಿದ್ದಾಗ, ಹೂಡಿಕೆದಾರರು ತಕ್ಷಣಕ್ಕೆ ಚಿನ್ನಕ್ಕಿಂತ ನಗದು ಹಣ ಅಥವಾ ಸರ್ಕಾರಿ ಬಾಂಡ್‌ಗಳಲ್ಲಿ ಹೂಡಿಕೆ ಮಾಡಲು ಬಯಸುತ್ತಾರೆ. ಹೀಗಾಗಿ ಚಿನ್ನದ ಬೆಲೆ ಪ್ರಸ್ತುತ 4,000 ಡಾಲರ್​ ಮಟ್ಟದ ಆಸುಪಾಸಿನಲ್ಲೇ ವಹಿವಾಟು ನಡೆಸುತ್ತಿದೆ.

ಪ್ರಸ್ತುತ ಹೂಡಿಕೆದಾರರು ಕೇವಲ ಹಣದುಬ್ಬರ ಎಷ್ಟು ಹೆಚ್ಚಾಗಬಹುದು? ಎಂದು ಚಿಂತಿಸುತ್ತಿದ್ದಾರೆ. ಆದರೆ, ಒಂದು ವೇಳೆ ಅಮೆರಿಕ-ಇರಾನ್​ ಯುದ್ಧ ಅಥವಾ ಅಸ್ಥಿರತೆ ಮತ್ತಷ್ಟು ವಿಸ್ತರಿಸಿದರೆ, ಹೂಡಿಕೆದಾರರ ಯೋಚನೆ ಸಂಪೂರ್ಣವಾಗಿ ಬದಲಾಗಲಿದೆ ಎಂದು ಕಿರಿಲೆಂಕೊ ಅಭಿಪ್ರಾಯಿಸಿದ್ದಾರೆ.

ಯುದ್ಧ ಮುಂದುವರಿದರೆ, ಹೂಡಿಕೆದಾರರು ಹಣದುಬ್ಬರದ ಬಗ್ಗೆ ಯೋಚಿಸುವುದನ್ನು ಬಿಟ್ಟು ಜಾಗತಿಕ ಆರ್ಥಿಕತೆ, ರಾಜಕೀಯ ಸ್ಥಿರತೆ ಮತ್ತು ಸುರಕ್ಷತೆಯ ಬಗ್ಗೆ ಚಿಂತಿಸಲು ಪ್ರಾರಂಭಿಸುತ್ತಾರೆ. ಅಂತಹ ಪರಿಸ್ಥಿತಿಯಲ್ಲಿ ಬಡ್ಡಿ ದರಗಳ ಚಿಂತೆಯನ್ನು ಬದಿಗಿಟ್ಟು, ಸುರಕ್ಷಿತ ಹೂಡಿಕೆಯಾಗಿ ಪ್ರತಿಯೊಬ್ಬರು ಚಿನ್ನದ ಮೊರೆ ಹೋಗುತ್ತಾರೆ ಎಂದು ಹೇಳಿದ್ದಾರೆ.

ಇತ್ತೀಚಿನ ದಿನಗಳಲ್ಲಿ ಚಿನ್ನದ ಬೆಲೆ ನಿರೀಕ್ಷಿತ ಮಟ್ಟದಲ್ಲಿ ಏರಿಕೆಯಾಗದಿರುವ ಬಗ್ಗೆ ಪ್ರತಿಕ್ರಿಯಿಸಿದ ಅವರು, "ಕಳೆದ ವರ್ಷ ಚಿನ್ನವು ಭಾರಿ ಪ್ರಮಾಣದಲ್ಲಿ ಬೆಲೆ ಏರಿಕೆ ಕಂಡಿತ್ತು. ಮಾರುಕಟ್ಟೆಯಲ್ಲಿ ಬಿಕ್ಕಟ್ಟು ಎದುರಾದಾಗ, ಹೂಡಿಕೆದಾರರು ನಗದು ಹಣವನ್ನು ಸಂಗ್ರಹಿಸಲು ತಮ್ಮಲ್ಲಿದ್ದ ಚಿನ್ನವನ್ನು ಮಾರಿ ಹಣ ಮಾಡಿಕೊಂಡರು. ಅಂದರೆ, ಕಷ್ಟದ ಸಮಯದಲ್ಲಿ ಚಿನ್ನವು ಇನ್ಶೂರೆನ್ಸ್​ ರೀತಿ ಕೆಲಸ ಮಾಡಿದೆ" ಎಂದರು.

ಜಾಗತಿಕ ರಾಜಕೀಯ ಮತ್ತು ಆರ್ಥಿಕ ಅಸ್ಥಿರತೆಯು ತಕ್ಷಣಕ್ಕೆ ಕುಸಿಯುವ ಲಕ್ಷಣಗಳಿಲ್ಲ. ಹೀಗಾಗಿ ವಿವಿಧ ದೇಶಗಳ ಕೇಂದ್ರ ಬ್ಯಾಂಕುಗಳು ಮತ್ತು ವೈಯಕ್ತಿಕ ಹೂಡಿಕೆದಾರರು ಭವಿಷ್ಯದ ಆಘಾತಗಳಿಂದ ಪಾರಾಗಲು ಚಿನ್ನದ ಮೇಲಿನ ಹೂಡಿಕೆಯನ್ನು ಹೆಚ್ಚಿಸುತ್ತಲೇ ಇರಲಿದ್ದಾರೆ. ಇದು ದೀರ್ಘಾವಧಿಯಲ್ಲಿ ಚಿನ್ನದ ಮಾರುಕಟ್ಟೆಗೆ ಬಲವಾದ ಬೆಂಬಲವಾಗಿ ನೀಡಲಿದೆ ಎಂದು ವರದಿ ತಿಳಿಸಿದೆ,(ಏಜೆನ್ಸೀಸ್).