ಮೆಟಾ ನೀಡಿದ್ದ 8 ಕೋಟಿ ರೂ.ಗಿಂತಲೂ ದೊಡ್ಡ ಜಾಬ್​ ಆಫರ್ ತಿರಸ್ಕರಿಸಿದ ರಿಷಭ್ ಅಗರ್ವಾಲ್ ಈಗ ಏನು ಮಾಡ್ತಿದ್ದಾರೆ ಗೊತ್ತಾ? Rishabh Agarwal

Rishabh Agarwal : ಕೃತಕ ಬುದ್ಧಿಮತ್ತೆ ಕ್ಷೇತ್ರದಲ್ಲಿ ವಿಶ್ವದ ಅತ್ಯುತ್ತಮ ಪ್ರತಿಭೆಗಳನ್ನು ತನ್ನತ್ತ ಸೆಳೆಯಲು ಮೆಟಾ ಸಂಸ್ಥೆಯ ಸಿಇಒ ಮಾರ್ಕ್ ಜುಕರ್‌ಬರ್ಗ್ ಅವರು ಕೋಟ್ಯಂತರ ರೂಪಾಯಿಗಳ ಬಂಪರ್ ಸಂಬಳದ ಆಫರ್ ನೀಡುತ್ತಿರುವುದು ಜಗತ್ತಿಗೇ ತಿಳಿದಿದೆ. ಇಂತಹದ್ದೇ ಒಂದು ಮಲ್ಟಿ-ಕೋರ್ ಪ್ಯಾಕೇಜ್ ಆಫರ್ ಅನ್ನು ಐಐಟಿ ಬಾಂಬೆಯ ಹಳೆಯ ವಿದ್ಯಾರ್ಥಿ ಹಾಗೂ ಭಾರತೀಯ ಎಐ ಸಂಶೋಧಕ ರಿಷಭ್ ಅಗರ್ವಾಲ್ ಪಡೆದುಕೊಂಡಿದ್ದರು, ಆದರೆ ಆ ಬೃಹತ್ ಮೊತ್ತದ ಆಫರ್ ಮತ್ತು ಐಷಾರಾಮಿ ಉದ್ಯೋಗವನ್ನು ನಯವಾಗಿಯೇ ತಿರಸ್ಕರಿಸಿದ ಅಗರ್ವಾಲ್, ಆಮಿಷಗಳಿಗೆ ಒಳಗಾಗದೆ ಭಾರತದಲ್ಲೇ ತಮ್ಮದೇ ಆದ ಸ್ವಂತ ಎಐ ಸ್ಟಾರ್ಟ್‌ಅಪ್ (AI Startup) ಅನ್ನು ನಿರ್ಮಿಸಲು ಮುಂದಾಗುವ ಮೂಲಕ ಎಲ್ಲರ ಗಮನ ಸೆಳೆದಿದ್ದಾರೆ.

ಇತ್ತೀಚೆಗೆ ಸಾಮಾಜಿಕ ಜಾಲತಾಣ ಎಕ್ಸ್​ (ಟ್ವಿಟರ್) ನಲ್ಲಿ ಬಳಕೆದಾರರೊಬ್ಬರು ಈ ಸ್ವಾರಸ್ಯಕರ ಕಥೆಯನ್ನು ಹಂಚಿಕೊಂಡಿದ್ದು, ಜೆಇಇ (JEE) ಪರೀಕ್ಷೆಯಲ್ಲಿ ಅಖಿಲ ಭಾರತ ಮಟ್ಟದಲ್ಲಿ 33ನೇ ರ‍್ಯಾಂಕ್ ಪಡೆದು ಐಐಟಿ ಬಾಂಬೆಯಲ್ಲಿ ಕಂಪ್ಯೂಟರ್ ಸೈನ್ಸ್ ವ್ಯಾಸಂಗ ಮಾಡಿದ್ದ ರಿಷಭ್ ಅಗರ್ವಾಲ್, ಮೆಟಾ ಸಂಸ್ಥೆಯಲ್ಲಿ ಕೇವಲ ಕೆಲವು ತಿಂಗಳು ಕೆಲಸ ಮಾಡಿದ ನಂತರ ಸುಮಾರು 1 ಮಿಲಿಯನ್ ಡಾಲರ್ (8.5 ಕೋಟಿ ರೂ.ಗೂ ಹೆಚ್ಚು) ಮೌಲ್ಯದ ಉದ್ಯೋಗವನ್ನು ತೊರೆದಿದ್ದಾರೆ ಎಂದು ಪೋಸ್ಟ್ ಮಾಡಿದ್ದರು. ಆದರೆ, ವೈರಲ್ ಆಗಿದ್ದ ಈ ಪೋಸ್ಟ್‌ಗೆ ಸ್ವತಃ ರಿಷಭ್ ಅಗರ್ವಾಲ್ ಅವರೇ ಪ್ರತಿಕ್ರಿಯಿಸುವ ಮೂಲಕ ಶಾಕಿಂಗ್ ನಿಜಾಂಶವೊಂದನ್ನು ಬಹಿರಂಗಪಡಿಸಿದ್ದಾರೆ. ತಾವು ಮಾತನಾಡುತ್ತಿರುವ 1 ಮಿಲಿಯನ್ ಡಾಲರ್ ಪ್ಯಾಕೇಜ್‌ಗಿಂತಲೂ ಮೆಟಾ ತಮಗೆ ನೀಡಿದ್ದ ಆಫರ್ ಮೊತ್ತ ತುಂಬಾ ಹೆಚ್ಚಾಗಿತ್ತು ಎಂದು ಅಗರ್ವಾಲ್​ ಸ್ಪಷ್ಟಪಡಿಸಿದ್ದು, ಇದನ್ನು ಗಮನಿಸಿದರೆ ಮಾರ್ಕ್ ಜುಕರ್‌ಬರ್ಗ್ ಅವರ ಕಂಪನಿ ರಿಷಭ್ ಅವರಿಗೆ ನೀಡಿದ್ದ ಆಫರ್ ಊಹೆಗೂ ನಿಲುಕದ್ದು ಎಂಬುದು ಸ್ಪಷ್ಟವಾಗುತ್ತದೆ.

ಭಾರತದ ಅತ್ಯಂತ ಪ್ರತಿಭಾವಂತ ಎಐ ಸಂಶೋಧಕರಲ್ಲಿ ಒಬ್ಬರಾದ ರಿಷಭ್ ಅಗರ್ವಾಲ್, ಐಐಟಿ ಬಾಂಬೆಯಿಂದ ಬಿಟೆಕ್ ಪದವಿ ಪಡೆದಿದ್ದಾರೆ. ನಂತರ ಕೆನಡಾದ ಪ್ರಸಿದ್ಧ 'ಮಿಲಾ' (MILA) ಎಐ ಸಂಶೋಧನಾ ಸಂಸ್ಥೆಯಲ್ಲಿ ಪ್ರಖ್ಯಾತ ಸಂಶೋಧಕರ ಮಾರ್ಗದರ್ಶನದಲ್ಲಿ ಕೃತಕ ಬುದ್ಧಿಮತ್ತೆ ವಿಷಯದಲ್ಲಿ ಪಿಎಚ್‌ಡಿ ಪೂರ್ಣಗೊಳಿಸಿದ ಇವರು, ಮೆಕ್ಗಿಲ್ ವಿಶ್ವವಿದ್ಯಾಲಯದಲ್ಲಿ ಅಡ್ಜಂಕ್ಟ್ ಪ್ರೊಫೆಸರ್ ಆಗಿಯೂ ಸೇವೆ ಸಲ್ಲಿಸಿದ್ದಾರೆ. ಗೂಗಲ್ ಬ್ರೈನ್, ಗೂಗಲ್ ಡೀಪ್‌ಮೈಂಡ್, ವೇಮೋ ಮತ್ತು ಮೆಟಾ ಸೂಪರ್‌ಇಂಟೆಲಿಜೆನ್ಸ್ ಲ್ಯಾಬ್ಸ್‌ನಂತಹ ಜಾಗತಿಕ ತಂತ್ರಜ್ಞಾನ ದೈತ್ಯ ಸಂಸ್ಥೆಗಳಲ್ಲಿ ಕೆಲಸ ಮಾಡಿರುವ ಇವರು, ಗೂಗಲ್‌ನ ಪ್ರತಿಷ್ಠಿತ 'ಗೆಮ್ಮಾ' ಮತ್ತು 'ಜೆಮಿನಿ' ಎಐ ಮಾಡೆಲ್‌ಗಳ ವಿನ್ಯಾಸದಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು. ಇವರ ಸಂಶೋಧನೆಗಾಗಿ ಪ್ರತಿಷ್ಠಿತ 'NeurIPS ಅತ್ಯುತ್ತಮ ಪ್ರಬಂಧ ಪ್ರಶಸ್ತಿ' ಕೂಡ ಲಭಿಸಿದೆ.

ರಿಷಭ್ ಅಗರ್ವಾಲ್ ಅವರು ಏಪ್ರಿಲ್ 2025 ರಲ್ಲಿ ಮೆಟಾ ಸೂಪರ್‌ಇಂಟೆಲಿಜೆನ್ಸ್ ಲ್ಯಾಬ್ಸ್‌ನ 'ರೀನ್‌ಫೋರ್ಸ್‌ಮೆಂಟ್ ಲರ್ನಿಂಗ್ ಅಂಡ್ ರೀಸನಿಂಗ್' ವಿಭಾಗಕ್ಕೆ ಸೇರಿದ್ದರು. ಆದರೆ, ಅದ್ಭುತ ಪ್ರತಿಭೆಗಳು ಮತ್ತು ಅತ್ಯಾಧುನಿಕ ಕಂಪ್ಯೂಟಿಂಗ್ ಸೌಲಭ್ಯಗಳಿದ್ದ ಆ ಸಂಸ್ಥೆಯನ್ನು ಕೇವಲ ಐದೇ ತಿಂಗಳಲ್ಲಿ ತೊರೆಯುವ ಕಠಿಣ ನಿರ್ಧಾರ ಕೈಗೊಂಡರು. ಈ ಬಗ್ಗೆ ಎಕ್ಸ್​ ಖಾತೆಯಲ್ಲಿ ಬರೆದುಕೊಂಡಿದ್ದ ಅವರು, "ಗೂಗಲ್ ಬ್ರೈನ್, ಡೀಪ್‌ಮೈಂಡ್ ಮತ್ತು ಮೆಟಾದಲ್ಲಿ ಸುಮಾರು 7.5 ವರ್ಷಗಳ ಸುದೀರ್ಘ ಪ್ರಯಾಣದ ನಂತರ, ನನ್ನ ಜೀವನದಲ್ಲಿ ವಿಭಿನ್ನವಾದ ರಿಸ್ಕ್ ತೆಗೆದುಕೊಳ್ಳಬೇಕೆಂಬ ಬಲವಾದ ಹಂಬಲ ಮೂಡಿದೆ ಎಂದು ತಿಳಿಸಿದ್ದರು. ಅಲ್ಲದೆ, ಮೆಟಾ ಸಿಇಒ ಮಾರ್ಕ್ ಜುಕರ್‌ಬರ್ಗ್ ಅವರದ್ದೇ ಆದ ವೇಗವಾಗಿ ಬದಲಾಗುತ್ತಿರುವ ಈ ಜಗತ್ತಿನಲ್ಲಿ, ನೀವು ತೆಗೆದುಕೊಳ್ಳಬಹುದಾದ ಅತ್ಯಂತ ದೊಡ್ಡ ರಿಸ್ಕ್ ಎಂದರೆ ಯಾವುದೇ ರಿಸ್ಕ್ ತೆಗೆದುಕೊಳ್ಳದಿರುವುದು ಎಂಬ ಪ್ರಸಿದ್ಧ ಹೇಳಿಕೆಯನ್ನು ಉಲ್ಲೇಖಿಸಿ ತಮ್ಮ ರಾಜೀನಾಮೆಯನ್ನು ಘೋಷಿಸಿದ್ದರು.

ಜಗತ್ತಿನ ಅತಿ ದೊಡ್ಡ ಟೆಕ್ ಕಂಪನಿಯ ಐಷಾರಾಮಿ ಜೀವನವನ್ನು ತೊರೆದ ರಿಷಭ್ ಅಗರ್ವಾಲ್, ಈಗ 'ಪಿರಿಯಾಡಿಕ್ ಲ್ಯಾಬ್ಸ್' ಎಂಬ ಹೊಸ ಎಐ ಸ್ಟಾರ್ಟ್‌ಅಪ್ ಅನ್ನು ಸ್ಥಾಪಕ ಸದಸ್ಯರಾಗಿ ಸೇರಿಕೊಂಡಿದ್ದಾರೆ. ಈ ಸ್ಟಾರ್ಟ್‌ಅಪ್ ಪ್ರಸ್ತುತ 'ಎಐ ಸೈಂಟಿಸ್ಟ್' ಅನ್ನು ಸೃಷ್ಟಿಸುವ ನಿಟ್ಟಿನಲ್ಲಿ ಕೆಲಸ ಮಾಡುತ್ತಿದ್ದು, ಇದು ನೈಜ ವೈಜ್ಞಾನಿಕ ಪ್ರಯೋಗಗಳಿಗೆ ಅಗತ್ಯವಿರುವ ಸಿದ್ಧಾಂತಗಳು ಮತ್ತು ಹೈಪೋಥಿಸಿಸ್‌ಗಳನ್ನು ಸಿದ್ಧಪಡಿಸಲಿದೆ. ಇದು ಹೊಸ ರಾಸಾಯನಿಕಗಳು, ಔಷಧಗಳು ಮತ್ತು ಭೌತಶಾಸ್ತ್ರದ ಕ್ಷೇತ್ರಗಳಲ್ಲಿನ ಸಂಶೋಧನೆಯನ್ನು ಮತ್ತಷ್ಟು ವೇಗಗೊಳಿಸಲಿದೆ. ವೈಜ್ಞಾನಿಕ ಸಂಶೋಧನಾ ಕ್ಷೇತ್ರದಲ್ಲಿ ಕ್ರಾಂತಿಕಾರಿ ಬದಲಾವಣೆ ತರಲಿರುವ ಈ ಸ್ಟಾರ್ಟ್‌ಅಪ್, ಈಗಾಗಲೇ ಜಾಗತಿಕ ಟೆಕ್ ದೈತ್ಯ ಸಂಸ್ಥೆಯಾದ ಎನ್ವಿಡಿಯಾ ಮತ್ತು ಜೆಫ್ ಬೆಜೋಸ್ ಅವರಂತಹ ಪ್ರಮುಖರಿಂದ ಭಾರಿ ಹೂಡಿಕೆ ಹಾಗೂ ಬೆಂಬಲವನ್ನು ಪಡೆದುಕೊಂಡಿದೆ, (ಏಜೆನ್ಸೀಸ್​).