ವಿಪಕ್ಷಗಳ ನಿದ್ದೆಗೆಡಿಸಿದ ಮೋದಿ ಸರ್ಕಾರದ ಹೊಸ ಲೆಕ್ಕಾಚಾರ!...ಮುಂಗಾರು ಅಧಿವೇಶನದಲ್ಲಿ ಜಾರಿಯಾಗುತ್ತಾ ಒಂದು ದೇಶ, ಒಂದು ಚುನಾವಣೆ..? | Monsoon Session

ಈ ಬಾರಿ ಸರ್ಕಾರ ತನ್ನ ಉದ್ದೇಶವನ್ನು ಯಶಸ್ವಿಗೊಳಿಸಿಕೊಳ್ಳಲು ಶ್ರಮಿಸುತ್ತಿದ್ದು, ಮುಂಬರುವ ಅಧಿವೇಶನದಲ್ಲಿ ಸಂಖ್ಯಾಬಲದ ಬಗ್ಗೆ ಖಚಿತತೆ ಸಿಕ್ಕರೆ ಕೆಲವು ಮಹತ್ವಾಕಾಂಕ್ಷೆಯ ಮಸೂದೆಗಳನ್ನು ಪರಿಚಯಿಸುವ ಸಾಧ್ಯತೆ ಇದೆ ಎಂದು ಮೂಲಗಳು ತಿಳಿಸಿವೆ. ಪ್ರಮುಖ ಸಂವಿಧಾನ ತಿದ್ದುಪಡಿ ಮಸೂದೆಗಳಲ್ಲಿ ಒಂದಾದ ಒಂದು ದೇಶ, ಒಂದು ಚುನಾವಣೆ ಕೇಂದ್ರ ಸರ್ಕಾರದ ಬಹುದಿನಗಳ ನೆಚ್ಚಿನ ಹಾಗೂ ಮಹತ್ವಾಕಾಂಕ್ಷೆಯ ಯೋಜನೆಯಾಗಿದೆ.

ಕಳೆದ ವರ್ಷದ ಚಳಿಗಾಲದ ಅಧಿವೇಶನದಲ್ಲಿ ಲೋಕಸಭೆಯಲ್ಲಿ ಈ ಮಸೂದೆಯನ್ನು ಮಂಡಿಸಲಾಗಿತ್ತು. ಆದರೆ ವಿರೋಧ ಪಕ್ಷಗಳ ತೀವ್ರ ಪ್ರತಿಭಟನೆಯ ಕಾರಣದಿಂದಾಗಿ, ಇದನ್ನು ಜಂಟಿ ಸಂಸದೀಯ ಸಮಿತಿಗೆ (ಜೆಪಿಸಿ) ರವಾನಿಸಲಾಯಿತು. ಜೆಪಿಸಿಯ ಅವಧಿಯನ್ನು ಈಗ ಮುಂಗಾರು ಅಧಿವೇಶನದ ಕೊನೆಯ ವಾರದ ಮೊದಲ ದಿನ ಅಂದರೆ ಆಗಸ್ಟ್ 10 ರವರೆಗೆ ವಿಸ್ತರಿಸಲಾಗಿದೆ.

ಜೆಪಿಸಿಯು ಆಗಸ್ಟ್ 10 ರೊಳಗೆ ತನ್ನ ವರದಿಯನ್ನು ಸಲ್ಲಿಸಲು ಸಾಧ್ಯವಾದರೆ, ಸಮಿತಿಯ ಶಿಫಾರಸುಗಳ ಆಧಾರದ ಮೇಲೆ ಅಗತ್ಯ ತಿದ್ದುಪಡಿಗಳನ್ನು ಒಳಗೊಂಡಂತೆ ಪರಿಷ್ಕೃತ ಮಸೂದೆಯನ್ನು ತರಲು ಸರ್ಕಾರಕ್ಕೆ ಸಾಧ್ಯವೇ..? ಅಧಿವೇಶನದ ಕೊನೆಯ ನಾಲ್ಕು ದಿನಗಳಲ್ಲಿ ಸರ್ಕಾರ ಅದನ್ನು ಅಂಗೀಕರಿಸಲು ಸಾಧ್ಯವೇ..? ಎನ್ನುವುದು ಈಗ ಮೂಡಿರುವ ದೊಡ್ಡ ಪ್ರಶ್ನೆಯಾಗಿದೆ.

ಜೆಪಿಸಿಯು ವಿವಿಧ ರಾಜ್ಯಗಳಲ್ಲಿ ಪ್ರವಾಸ ಮಾಡುತ್ತಿದ್ದು, ಎಲ್ಲಾ ಪಾಲುದಾರರು ಮತ್ತು ನಾಗರಿಕ ಸಮಾಜದಿಂದ ಅಭಿಪ್ರಾಯಗಳನ್ನು ಸಂಗ್ರಹಿಸುತ್ತಿದೆ. ಜೆಪಿಸಿ ಅಧ್ಯಕ್ಷ ಪಿ.ಪಿ. ಚೌಧರಿ ಅವರು ಇತ್ತೀಚೆಗೆ ಗೋವಾಗೆ ಸಂಸದೀಯ ಸಮಿತಿ ಭೇಟಿ ನೀಡಿದ್ದಾಗ, 2029 ರ ಲೋಕಸಭಾ ಚುನಾವಣೆಯೊಂದಿಗೆ ದೇಶಾದ್ಯಂತ ಏಕಕಾಲದಲ್ಲಿ ಚುನಾವಣೆಗಳನ್ನು ನಡೆಸಬಹುದು ಎಂದು ಹೇಳಿದರು. 2029 ರಲ್ಲಿ ಮುಂದಿನ ಲೋಕಸಭೆಯ ರಚನೆಯ ನಂತರ, ಮೊದಲ ಸಭೆಯಲ್ಲಿಯೇ ರಾಷ್ಟ್ರಪತಿಯವರು ನಿಗದಿತ ದಿನಾಂಕಕ್ಕಾಗಿ ಅಧಿಸೂಚನೆಯನ್ನು ಹೊರಡಿಸಲಿದ್ದಾರೆ. ಅದರ ನಂತರ, ಚುನಾವಣೆಗೆ ಹೋಗುವ ಯಾವುದೇ ರಾಜ್ಯ ವಿಧಾನಸಭೆಯ ಅವಧಿಯು 2034 ರ ಲೋಕಸಭಾ ಚುನಾವಣೆಯೊಂದಿಗೆ ಮುಕ್ತಾಯಗೊಳ್ಳುತ್ತದೆ.

ಉದಾಹರಣೆಗೆ, 2031 ರಲ್ಲಿ ರಾಜ್ಯವೊಂದರಲ್ಲಿ ವಿಧಾನಸಭಾ ಚುನಾವಣೆ ನಡೆದರೆ, ಆ ವಿಧಾನಸಭೆಯ ಅವಧಿಯು 2034 ರವರೆಗೆ ಮಾತ್ರ ಅಂದರೆ ಕೇವಲ ಮೂರು ವರ್ಷಗಳು ಇರುತ್ತದೆ. ಅಂದರೆ 2034 ದೇಶಾದ್ಯಂತ ಲೋಕಸಭೆ ಮತ್ತು ವಿಧಾನಸಭಾ ಚುನಾವಣೆಗಳನ್ನು ಏಕಕಾಲದಲ್ಲಿ ನಡೆಸಬಹುದಾದ ವರ್ಷವಾಗಿರುತ್ತದೆ.

ಒಂದು ದೇಶ, ಒಂದು ಚುನಾವಣೆ ಸಂವಿಧಾನ ತಿದ್ದುಪಡಿ ಮಸೂದೆಯಾಗಿರುವುದರಿಂದ, ಇದಕ್ಕೆ ಸಂಸತ್ತಿನಲ್ಲಿ ವಿಶೇಷ ಬಹುಮತದ ಅಗತ್ಯವಿದೆ. ಅಂದರೆ ಎರಡೂ ಸದನಗಳಲ್ಲಿ ಹಾಜರಿರುವ ಮತ್ತು ಮತ ಚಲಾಯಿಸುವ ಸದಸ್ಯರ ಮೂರನೇ ಎರಡರಷ್ಟು (2/3) ಬಹುಮತ ಬೇಕಾಗುತ್ತದೆ. ಪ್ರಸ್ತುತ ಸದನದಲ್ಲಿ ಎನ್‌ಡಿಎ ಬಹುಮತವನ್ನು ಹೊಂದಿದ್ದರೂ, ಸುಮಾರು 360 ಸ್ಥಾನಗಳ ಆ ಮ್ಯಾಜಿಕ್ ಮೂರನೇ ಎರಡರಷ್ಟು ಸಂಖ್ಯೆಯನ್ನು ಹೊಂದಿಲ್ಲ.

ಲೋಕಸಭೆಯ ಪ್ರಸ್ತುತ ಬಲ 540. 2024 ರ ಡಿಸೆಂಬರ್‌ನಲ್ಲಿ ಮಸೂದೆಯನ್ನು ಜೆಪಿಸಿಗೆ ಕಳುಹಿಸಿದಾಗ, ಪರವಾಗಿ 269 ಮತಗಳು ಮತ್ತು ವಿರುದ್ಧವಾಗಿ 198 ಮತಗಳು ಬಿದ್ದಿದ್ದವು. ಅಂತೆಯೇ, ಮಹಿಳಾ ಮೀಸಲಾತಿ ಮತ್ತು ಡಿಲಿಮಿಟೇಶನ್ (ಗಡಿ ನಿರ್ಣಯ) ಕುರಿತ ಸಂವಿಧಾನ ತಿದ್ದುಪಡಿ ಮಸೂದೆಗಳ ಮೇಲೆ, ಸರ್ಕಾರದ ಪರವಾಗಿ 298 ಮತಗಳು ಮತ್ತು ವಿರುದ್ಧವಾಗಿ 230 ಮತಗಳು ಬಿದ್ದಿದ್ದವು.

ಆದರೆ ಕಳೆದ ಅಧಿವೇಶನಕ್ಕೆ ಹೋಲಿಸಿದರೆ ಸರ್ಕಾರದ ಸ್ಥಿತಿ ಸುಧಾರಿಸಿದೆ. 20 ತೃಣಮೂಲ ಕಾಂಗ್ರೆಸ್ ಸಂಸದರು ಮತ್ತು ಆರು ಶಿವಸೇನೆ (ಯುಬಿಟಿ) ಸಂಸದರು ಆಡಳಿತ ಪಕ್ಷದ ಕಡೆಗೆ ವಾಲಿದ್ದಾರೆ. ಬುಧವಾರ ಸಂಸದೆ ಸುಪ್ರಿಯಾ ಸುಳೆ ಸುಳಿವು ನೀಡಿದಂತೆ, 8 ಎನ್‌ಸಿಪಿ (ಎಸ್‌ಪಿ) ಸಂಸದರಿಂದ ಬೆಂಬಲವನ್ನು ನಿರೀಕ್ಷಿಸಲಾಗಿದೆ. ಆದರೆ ಡಿಎಂಕೆಯ 22 ಸಂಸದರು ಈ ವಿಷಯವಾಗಿ ಇನ್ನೂ ನಿರ್ಧಾರ ತೆಗೆದುಕೊಳ್ಳಬೇಕಿದ್ದು, ಮತದಾನ ಪ್ರಕ್ರಿಯೆಯಿಂದ ದೂರ ಉಳಿಯಲು ಕೆಲವು ಇತರ ವಿರೋಧ ಪಕ್ಷದ ಸಂಸದರನ್ನು ಒಪ್ಪಿಸಬೇಕಾಗಿದೆ.

ಮಸೂದೆ ಅಂಗೀಕಾರವಾದರೂ ಅನುಷ್ಠಾನಕ್ಕೆ ಸುದೀರ್ಘ ಹಾದಿಯಿದೆ. ಈ ಸಂವಿಧಾನ ತಿದ್ದುಪಡಿಯನ್ನು ಕನಿಷ್ಠ ಶೇಕಡಾ 50 ರಷ್ಟು ರಾಜ್ಯ ವಿಧಾನಸಭೆಗಳು ಸಹ ಅಂಗೀಕರಿಸಬೇಕಾಗುತ್ತದೆ. ಹೆಚ್ಚಿನ ರಾಜ್ಯಗಳಲ್ಲಿ ಬಿಜೆಪಿ ಮತ್ತು ಅದರ ಮಿತ್ರಪಕ್ಷಗಳ ಆಡಳಿತ ಇರುವುದರಿಂದ, ಈ ಅಡೆತಡೆಯನ್ನು ದಾಟುವುದು ಸರ್ಕಾರಕ್ಕೆ ಕಷ್ಟವಾಗುವುದಿಲ್ಲ (ಏಜೆನ್ಸೀಸ್).