ಮಾಂಸ ತಿನ್ನಿಸಿದ ಸೇಡು; ಗೆಳೆಯನನ್ನೇ ಬಲಿಪಡೆದ ಕಿರಾತಕ: ವಾರಣಾಸಿಯಲ್ಲಿ ಬೆಚ್ಚಿಬೀಳಿಸುವ ಹತ್ಯಾಕಾಂಡ! | Varanasi Murder

ಪೊಲೀಸರ ವಿಚಾರಣೆ ವೇಳೆ ಆರೋಪಿ ವೀರೇಂದ್ರ ಯಾದವ್(24) ಬೆಚ್ಚಿಬೀಳಿಸುವ ಸತ್ಯ ಒಪ್ಪಿಕೊಂಡಿದ್ದಾನೆ. ಈ ಹಿಂದೆ ಬೆಂಗಳೂರಿನ ಕಂಪನಿಯೊಂದರಲ್ಲಿ ಈ ಇಬ್ಬರೂ ಒಟ್ಟಿಗೆ ಕೆಲಸ ಮಾಡುತ್ತಿದ್ದರು. ಕಳೆದ ಸೆಪ್ಟೆಂಬರ್‌ನಲ್ಲಿ ಅಫ್ತಾಬ್ ಆಲಂ ತನಗೆ ತಿಳಿಯದಂತೆ ಗೋಮಾಂಸ ತಿನ್ನಿಸಿದ್ದರು ಮತ್ತು ಆ ವಿಷಯವನ್ನು ಎಲ್ಲರ ಮುಂದೆ ಹೇಳಿ ತನ್ನನ್ನು ಹಾಸ್ಯ ಮಾಡಿದ್ದರು ಎಂದು ಆರೋಪಿ ವೀರೇಂದ್ರ ಆರೋಪಿಸಿದ್ದಾನೆ. ಈ ಅವಮಾನದಿಂದ ನೊಂದಿದ್ದ ಆತ, ಅಫ್ತಾಬ್‌ನನ್ನು ಕೊಲ್ಲಲು ಸಂಚು ರೂಪಿಸಿದ್ದನು.

ಜನವರಿ 7 ರಂದು ಅಫ್ತಾಬ್ ಬಿಹಾರದಿಂದ ಚೆನ್ನೈಗೆ ಕೆಲಸಕ್ಕೆ ಹೋಗಲು ಹೊರಟಿದ್ದರು. ಇದನ್ನೇ ಸಂಚಿಗೆ ಬಳಸಿಕೊಂಡ ವೀರೇಂದ್ರ, ಅಫ್ತಾಬ್‌ನನ್ನು ವಾರಣಾಸಿಗೆ ಬರುವಂತೆ ಒತ್ತಾಯಿಸಿದನು. ವಾರಣಾಸಿ ರೈಲ್ವೆ ನಿಲ್ದಾಣಕ್ಕೆ ಬಂದ ಅಫ್ತಾಬ್‌ನನ್ನು ಮನೆಗೆ ಕರೆದೊಯ್ಯುವ ನೆಪದಲ್ಲಿ ನಿರ್ಜನ ಪ್ರದೇಶಕ್ಕೆ ಕರೆದೊಯ್ದು, ಮತ್ತೊಬ್ಬ ಸಹಚರನ ಸಹಾಯದೊಂದಿಗೆ ಹಗ್ಗದಿಂದ ಕುತ್ತಿಗೆ ಬಿಗಿದು ಕ್ರೂರವಾಗಿ ಹತ್ಯೆ ಮಾಡಲಾಗಿದೆ. ನಂತರ ಶವವನ್ನು ಮಹಗಾಂವ್ ಮಡೈ ಗ್ರಾಮದ ಕೆರೆಯ ಬಳಿಯ ಹೊಲದಲ್ಲಿ ಎಸೆದು ಪರಾರಿಯಾಗಿದ್ದರು.

ಆದರೆ, ಮೃತನ ತಂದೆ ಈ "ಮಾಂಸದ ಕಥೆ"ಯನ್ನು ತಳ್ಳಿಹಾಕಿದ್ದಾರೆ. "ನನ್ನ ಮಗನನ್ನು ಹಣಕ್ಕಾಗಿ ಕೊಲೆ ಮಾಡಲಾಗಿದೆ. ಅವನ ಬ್ಯಾಂಕ್ ಖಾತೆಯಿಂದ 40,000 ರೂಪಾಯಿಗಳನ್ನು ವೀರೇಂದ್ರನ ಖಾತೆಗೆ ವರ್ಗಾಯಿಸಿಕೊಳ್ಳಲಾಗಿದೆ. ಕೊಲೆಗಾರ ಶಿಕ್ಷೆಯಿಂದ ತಪ್ಪಿಸಿಕೊಳ್ಳಲು ಧರ್ಮ ಮತ್ತು ಮಾಂಸದ ಸುಳ್ಳು ಕಥೆ ಕಟ್ಟುತ್ತಿದ್ದಾನೆ" ಎಂದು ಅಫ್ತಾಬ್ ತಂದೆ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಜನವರಿ 8 ರಂದು ಪತ್ತೆಯಾದ ಅಪರಿಚಿತ ಶವದ ಬ್ಯಾಗ್‌ನಲ್ಲಿದ್ದ ಐಡಿ ಕಾರ್ಡ್ ಮೂಲಕ ತನಿಖೆ ಆರಂಭಿಸಿದ ಪೊಲೀಸರಿಗೆ ಯುಪಿಐ (UPI) ವಹಿವಾಟುಗಳು ದೊಡ್ಡ ಸುಳಿವು ನೀಡಿದವು. ಅಫ್ತಾಬ್ ಸಾವನ್ನಪ್ಪಿದ ದಿನವೇ ಅವರ ಖಾತೆಯಿಂದ ಹಣ ವರ್ಗಾವಣೆಯಾಗಿತ್ತು. ತಲೆಮರೆಸಿಕೊಂಡಿದ್ದ ವೀರೇಂದ್ರನನ್ನು ಜನವರಿ 26 ರಂದು ಬಂಧಿಸಲಾಗಿದ್ದು, ಸದ್ಯ ಜೈಲು ಪಾಲಾಗಿದ್ದಾನೆ. ತಲೆಮರೆಸಿಕೊಂಡಿರುವ ಮತ್ತೊಬ್ಬ ಆರೋಪಿಗಾಗಿ ಪೊಲೀಸರು ಬಲೆ ಬೀಸಿದ್ದಾರೆ,(ಏಜೆನ್ಸೀಸ್).