ರಾಮನ ಆರಾಧಕರು ಆರ್ಯರು, ಶಿವನ ಆರಾಧಕರು ದ್ರಾವಿಡರು ಬಡವರು, ದಕ್ಷಿಣ ಮತ್ತು ಉತ್ತರ ಭಾರತದವರ ಧಾರ್ಮಿಕ ಆಚರಣೆ ಬಗ್ಗೆ ತೆಲಂಗಾಣ ಸಿಎಂ ರೇವಂತ್ ರೆಡ್ಡಿ ಅವರು ಕೊಟ್ಟ ಹೇಳಿಕೆಯು ಸದ್ಯ ರಾಜಕೀಯ ಹಗ್ಗ-ಜಗ್ಗಾಟಕ್ಕೆ ಕಾರಣವಾಗಿದೆ. ಬಿಜೆಪಿ ನಾಯಕರು, ಸಿಎಂ ರೇವಂತ್ ರೆಡ್ಡಿ ಅವರ ಹೇಳಿಕೆ ಸಮಾಜವನ್ನು ವಿಭಜಿಸುವ ಯತ್ನ ಎಂದು ಕೆಂಡಕಾರಿದ್ದಾರೆ.
ರೇವಂತ್ ರೆಡ್ಡಿ ಹೇಳಿದ್ದೇನು?
'ಪ್ರಧಾನಿ ಮೊದಿ ಅವರು ಪ್ರತಿ ವಿಚಾರಕ್ಕೂ ಜೈ ಶ್ರೀರಾಮ್ ಜೈ ಶ್ರೀರಾಮ್ ಅನ್ನೋದು ಯಾಕೆ?. ಪ್ರಧಾನಿ ಮೋದಿ ಮತ್ತು ಬಿಜೆಪಿ ನಾಯಕರು ಯಾಕೆ ಹರ ಹರ ಮಹಾದೇವ ಎಂದು ಜಪಿಸೋದಿಲ್ಲ. ಯಾವಾಗ್ಲಾದರೂ ಹರಹರ ಮಹಾದೇವ ಎಂದಿದ್ದಾರಾ?, ಅವರು ಜೈ ಶ್ರೀರಾಮ್ ಎಂತಲೇ ಹೇಳುತ್ತಾರೆ.
'ನಾವು ದ್ರಾವಿಡರು, ಅವರು ಆರ್ಯರು. ನಾವು ಶಿವನ ಭಕ್ತರು, ಅವರು ರಾಮನ ಭಕ್ತರು ಅಷ್ಟೆ,. ಶಿವನನ್ನು ಬಡವರ ದೇವರು ಎನ್ನುತ್ತಾರೆ. ರಾಮನನ್ನು ಶ್ರೀಮಂತರ ದೇವರು ಎನ್ನುತ್ತಾರೆ, ಆದರೆ, ಇಬ್ಬರು ದೇವರನ್ನು ಜನರು ಪೂಜೆ ಮಾಡುತ್ತಾರೆ. ಉತ್ತರ ಮತ್ತು ದಕ್ಷಿಣ ಭಾಗದ ಭಾರತೀಯರ ಸಂಸ್ಕೃತಿ ಪಾಲನೆಯಲ್ಲಿ ಸಾಕಷ್ಟು ಬದಲಾವಣೆಗಳು ಇವೆ' ಎಂದು ಮಾತನಾಡಿದ್ದಾರೆ.
ಸಾಕ್ಷಿ ಹಂಚಿಕೊಂಡ ಬಿಜೆಪಿ
ಬಿಜೆಪಿ ನಾಯಕರು ಶಿವನನ್ನು ಆರಾಧಿಸೋದಿಲ್ಲ, ಶಿವನ ಹೆಸರನ್ನು ಬಳಕೆ ಮಾಡೋದಿಲ್ಲ ಎಂದು ರೇವಂತ್ ರೆಡ್ಡಿ ಅವರು ಹೇಳಿದ ವಿಚಾರವಾಗಿ ಕೇಂದ್ರ ಸಚಿವ ಬಂಡಿ ಸಂಜಯ್ ಕುಮಾರ್ ಸುಳ್ಳು ಎಂದಿದ್ದಾರೆ. ಜೊತೆಗೆ ಪ್ರಧಾನಿ ಮೋದಿ ಅವರು ಕಾಶಿ ವಿಶ್ವನಾಥ ದೇವಾಲಯಕ್ಕೆ ಭೇಟಿ ನೀಡಿ ಅಲ್ಲಿ ಅವರು ಹರ ಹರ ಮಹಾದೇವ ಎಂದಿರುವ ವಿಡಿಯೋವನ್ನು ಹಂಚಿಕೊಂಡಿದ್ದಾರೆ.
