ಭಾರತಕ್ಕೆ ಕೊಹಿನೂರ್​ ಹಿಂದಿರುಗಿಸಿ: ಬ್ರಿಟಿನ್​ ದೊರೆಗೆ ನ್ಯೂಯಾರ್ಕ್​ ಮೇಯರ್​ ಮನವಿ; ಮತ್ತೆ ಮುನ್ನಲೆಗೆ ಬಂದ ಶಾಪಗ್ರಸ್ಥ ವಜ್ರ! Zohran Mamdani on Kohinoor

ವಾಷಿಂಗ್ಟನ್​: ಅಮೆರಿಕ ಪ್ರವಾಸದಲ್ಲಿರುವ ಬ್ರಿಟನ್​ ದೊರೆ ಚಾರ್ಲ್ಸ್​ಗೆ ನ್ಯೂಯಾರ್ಕ್​ ಸಿಟಿ ಮೇಯರ್​ ಜೋಹ್ರಾನ್ ಮಮ್ದಾನಿ (Zohran Mamdani on Kohinoor), ನಿಮ್ಮಲ್ಲಿರುವ ಕೊಹಿನೂರ್​ ವಜ್ರವನ್ನು ಭಾರತಕ್ಕೆ ಹಿಂದಿರುಗಿಸಿ ಎಂದು ಹೇಳಿದ್ದಾರೆ.

ಸೆಪ್ಟೆಂಬರ್ 11, 2001 ರ ದಾಳಿಯಲ್ಲಿ ಸಾವನ್ನಪ್ಪಿದ ಜನರ ಶೋಕ ಸಮಾರಂಭದಲ್ಲಿ ಮಾತನಾಡಿದ ಮಮ್ದಾನಿ, ನಾನು ರಾಜನೊಂದಿಗೆ ಪ್ರತ್ಯೇಕವಾಗಿ ಮಾತನಾಡಲು ಅವಕಾಶ ದೊರೆತರೆ ಕೊಹಿನೂರ್​ನ್ನು ಭಾರತಕ್ಕೆ ಮರಳಿಸಲು ಪ್ರೋತ್ಸಾಹಿಸುತ್ತೆನೆಂದು ಹೇಳಿದರು.

ವಿಶ್ವ ಪ್ರಸಿದ್ಧಿಗಳಿಸಿರುವ ಈ ಕೊಹಿನೂರ್​ ವಜ್ರವು, ಭಾರತದ ಆಂಧ್ರಪ್ರದೇಶದ ಗುಂಟೂರು ಜಿಲ್ಲೆಯ ಕೊಲ್ಲೂರು ಗಣಿಗಳಲ್ಲಿ  13ನೇ ಶತಮಾನದಲ್ಲಿ ದೊರೆಯಿತು ಎಂದು ಹೇಳಲಾಗುತ್ತದೆ. 

14ನೇ ಶತಮಾನದಲ್ಲಿ ಈ ವಜ್ರ ಕಾಕತೀಯ ರಾಜವಂಶದ ಬಳಿಯಿತ್ತು. ಅವರು ಇದನ್ನು ಭದ್ರಕಾಳಿ ದೇವಿಯ ಕಣ್ಣಿನಲ್ಲಿ ಇರಿಸಿದ್ದರು. ನಂತರ ಇದನ್ನು ಅಲ್ಲಾವುದ್ದೀನ್​ ಖಿಲ್ಜಿ ವಶಕ್ಕೆ ತೆಗೆದುಕೊಂಡನು. ನಂತರ ಭಾರತದಲ್ಲಿ ಆಳ್ವಿಕೆ ನಡೆಸುತ್ತಿದ್ದ, ಮೊಘಲರ ಕೈ ಸೇರಿದ ಈ ವಜ್ರವನ್ನು . ಶಹಜಹಾನ್ ತನ್ನ ಮಯೂರ ಸಿಂಹಾಸನದಲ್ಲಿ ಕೊಹಿನೂರ್​ನ್ನು ಅಂಟಿಸಿದ್ದನು.

ಪರ್ಷಿಯನ್ ಭಾಷೆಯಲ್ಲಿ 'ಕೊಹಿನೂರ್' ಎಂದರೆ "ಬೆಳಕಿನ ಪರ್ವತ" ಎಂದಾಗಿದ್ದು, 1739ರಲ್ಲಿ ಪರ್ಷಿಯನ್ ದೊರೆ ನಾದಿರ್ ಶಾ ಭಾರತದ ಮೇಲೆ ದಾಳಿ ಮಾಡಿದಾಗ, ಮೊಘಲರ ಬಳಿಯಿದ್ದ ಈ ವಜ್ರದ ಪ್ರಖರತೆಯನ್ನು ನೋಡಿ ಆಶ್ಚರ್ಯಚಕಿತನಾಗಿ ಕೊಹ್-ಇ-ನೂರ್! ಎಂದು ಉದ್ಗರಿಸಿದನು. ಅಂದಿನಿಂದ ಇದಕ್ಕೆ ಈ ಹೆಸರು ಬಂದಿತು ಎಂದು ನಂಬಲಾಗಿದೆ. ನಂತರ 1813 ರಲ್ಲಿ ಅಪ್ಘಾನ್​ರಿಂದ ಪಂಜಾಬ್​ನ ಸಿಖ್​ ದೊರೆ ರಂಜಿತ್​ ಸಿಂಗ್​ ಈ ವಜ್ರವನ್ನು ಪಡೆದುಕೊಂಡನು. 1849 ರಲ್ಲಿ ಬ್ರಿಟಿಷರು ಪಂಜಾಬ್​ನ್ನು ವಶ ಪಡಿಸಿಕೊಂಡಾಗ ಈ ಕೊಹಿನೂರ್​ನ್ನು ಜಪ್ತಿ ಮಾಡಿಕೊಂಡರು.

1850ರಲ್ಲಿ ಈ ವಜ್ರವನ್ನು ಇಂಗ್ಲೆಂಡ್‌ನ ರಾಣಿ ವಿಕ್ಟೋರಿಯಾ ಅವರಿಗೆ ಅರ್ಪಿಸಲಾಯಿತು. ಆರಂಭದಲ್ಲಿ 186 ಕ್ಯಾರೆಟ್​ ಇದ್ದ ಈ ವಜ್ರವನ್ನು ಬ್ರಿಟಿಷರು ರಾಣಿಯ ಮೆರಗನ್ನು ಹೆಚ್ಚಿಸುವ ಸಲುವಾಗಿ ಕಟಿಂಗ್​ ಮಾಡಿ 122 ಕ್ಯಾರೆಟ್​ (ಸುಮಾರು 212 ಗ್ರಾಂ) ಗೆ ಇಳಿಸಿದರು. ಪ್ರಸ್ತುತ, ಇದು ಲಂಡನ್ ಟವರ್‌ನಲ್ಲಿರುವ ಬ್ರಿಟಿಷ್ ರಾಜಮನೆತನದ ಕಿರೀಟಾಭರಣಗಳ (Crown Jewels) ಭಾಗವಾಗಿದೆ. ಇದನ್ನು ಸಾಮಾನ್ಯವಾಗಿ ಬ್ರಿಟಿಷ್ ರಾಣಿಯ ಕಿರೀಟದಲ್ಲಿ ಅಳವಡಿಸಲಾಗುತ್ತದೆ.

ಶಾಪಗ್ರಸ್ತ ವಜ್ರ: ಪುರಾಣಗಳ ಪ್ರಕಾರ, ಈ ವಜ್ರವನ್ನು ಧರಿಸಿದ ಪುರುಷ ರಾಜರು ತಮ್ಮ ಅಧಿಕಾರ ಅಥವಾ ಜೀವನವನ್ನು ಕಳೆದುಕೊಳ್ಳುತ್ತಾರೆ ಎಂಬ ನಂಬಿಕೆ ಇದೆ. ಈ ಶಾಪವು ಮಹಿಳೆಯರಿಗೆ ಅಥವಾ ದೇವತೆಗಳಿಗೆ ಅನ್ವಯಿಸುವುದಿಲ್ಲ ಎನ್ನಲಾಗುತ್ತದೆ. ಇದೇ ಕಾರಣಕ್ಕೆ ಇದನ್ನು ಬ್ರಿಟಿಷ್ ರಾಜಮನೆತನದ ಮಹಿಳೆಯರು (ರಾಣಿಯರು) ಮಾತ್ರ ಧರಿಸುತ್ತಾರೆ ಎನ್ನಲಾಗುತ್ತೆ,(ಏಜನ್ಸೀಸ್​).