400ಕ್ಕೂ ಹೆಚ್ಚು ಮಂಗಗಳಿಗೆ ಪಿಂಚಣಿ ಹಣದಲ್ಲಿ ಬಾಳೆಹಣ್ಣು ನೀಡುವ ವೃದ್ಧೆ; ಮಹತ್ವದ ಕಾರ್ಯಕ್ಕೆ ಪರಿಸರವಾದಿಗಳಿಂದ ವಿರೋಧ ಯಾಕೆ?

76 Year Old Woman Feeds Monkeys: ಇರುವುದರಲ್ಲೇ ಹಂಚಿ ತಿನ್ನಬೇಕು ಎನ್ನುವ ಮಾತಿಗೆ ತಮಿಳುನಾಡಿನ ಮಧುರೈ ನಿವಾಸಿಯಾದ 76 ವರ್ಷದ ಅಜ್ಜಿಯೊಬ್ಬರು ಸಾಕ್ಷಿಯಾಗಿದ್ದಾರೆ. ವಯಸ್ಸಾದ ಕಾಲದಲ್ಲಿ ಜೀವನ ನಿರ್ವಹಣೆಗೆಂದು ಬರುವ ಪಿಂಚಣಿ ಹಣವನ್ನು ಬಳಕೆ ಮಾಡಿಕೊಂಡು ತಮ್ಮ ಹಾಗೂ ತಿರುಪ್ಪರಂಕುಂದರಂ ಸುತ್ತಮುತ್ತಲಿನ ನೂರಾರು ಕೋತಿಗಳ ಹೊಟ್ಟೆ ತುಂಬಿಸುವ ಕೆಲಸವನ್ನು ಮಾಡುತ್ತಿದ್ದಾರೆ.

ಹೌದು, 76 ವರ್ಷದ ಮಾಲತಿ 2015ರಿಂದ ತಿರುಪ್ಪರಕುಂದ್ರಂ ಸುತ್ತಮುತ್ತ ವಾಸಿಸುವ ಮಂಗಗಳಿಗೆ ಆಹಾರ ನೀಡಲು ತಮ್ಮ ಪಿಂಚಣಿ ಹಣ ಬಳಕೆ ಮಾಡುತ್ತಿದ್ದಾರೆ ಎನ್ನುವ ಬಗ್ಗೆ ವಿಡಿಯೋ ಮಾಡಿ ಸೋಶಿಯಲ್​ ಮೀಡಿಯಾದಲ್ಲಿ ಪೋಸ್ಟ್​ ಮಾಡಲಾಗಿತ್ತು. ಈ ಬಗ್ಗೆ ಕೆಲವರು ಆಕ್ರೋಶ ವ್ಯಕ್ತಪಡಿಸಿದರೆ, ಇನ್ನೂ ಕೆಲವರು ಪ್ರಶಂಸಿಸಿದ್ದಾರೆ.

ಗಾಂಧಿಗ್ರಾಮ ವಿಶ್ವವಿದ್ಯಾಲಯದಲ್ಲಿ ದೈಹಿಕ ಶಿಕ್ಷಣ ನಿರ್ದೇಶಕಿಯಾಗಿ ಕೆಲಸ ಮಾಡಿದ ಮಾಲತಿಯವರು ಕೊಡೈಕನಾಲ್‌ನ ಅಂತರರಾಷ್ಟ್ರೀಯ ಶಾಲೆಯಲ್ಲಿ ಸಲ್ಲಿಸಿದ್ದರು. ಆ ನಂತರ ಅವರಿಗೆ ಪೊಲೀಸ್​ ಇಲಾಖೆಯಲ್ಲಿ ಪೋಸ್ಟ್​ ಸಿಕ್ಕಿತ್ತು. 33 ವರ್ಷಗಳ ಸುದೀರ್ಘ ಕೆಲಸವನ್ನು ಮಾಡಿದ ಅವರು 2010 ರಲ್ಲಿ ನಿವೃತ್ತರಾದರು.

' 2010 ರಲ್ಲಿ, ನಾನು ನನ್ನ ಕೆಲಸದಿಂದ ನಿವೃತ್ತಿ ಹೊಂದಿದೆ. ನನಗೆ ಪ್ರತಿ ತಿಂಗಳು ಉತ್ತಮ ಪಿಂಚಣಿ ಸಿಗುತ್ತದೆ , ಅದು ನನಗೆ ತುಂಬಾ ದೊಡ್ಡ ಮೊತ್ತ. ನನ್ನ ಖರ್ಚಿನ ಹೊರತಾಗಿ, ಸಮಾಜದಿಂದ ನಿರ್ಲಕ್ಷಿಸಲ್ಪಟ್ಟ ಮಂಗಗಳಿಗೆ ಆಹಾರ ಉಣಿಸುತ್ತೇನೆ. ಅವು ಕಾಡುಗಳು ಮತ್ತು ಗಿರಿಧಾಮಗಳಲ್ಲಿ ವಾಸಿಸುತ್ತಿವೆ ಮತ್ತು ಆಹಾರಕ್ಕಾಗಿ ಶ್ರಮಿಸುತ್ತಿವೆ. ಆದ್ದರಿಂದ, 13 ವರ್ಷಗಳಿಂದ, ನಾನು ಅವುಗಳಿಗೆ ಆಹಾರವನ್ನು ನೀಡುತ್ತಿದ್ದೇನೆ. ನಾನು ಪ್ರತಿದಿನ ಬರುತ್ತಿದ್ದೆ, ಆದರೆ ಈಗ ನನಗೆ ಸುಮಾರು 76 ವರ್ಷ. ಆದ್ದರಿಂದ, ನನಗೆ ನಡೆಯಲು ಕಷ್ಟವಾಗುತ್ತದೆ. ಹಾಗಾಗಿ, ನಾನು ಪ್ರತಿ ಶನಿವಾರ ತಿರುಪ್ಪರಕುಂದ್ರಮ್‌ಗೆ ಬಂದು 5-6 ಸ್ಥಳಗಳನ್ನು ಆಯ್ಕೆ ಮಾಡಿ, ಹಣ್ಣನ್ನು ನೀಡುತ್ತೇನೆ. ಈ ಎಲ್ಲಾ ಸ್ಥಳಗಳಲ್ಲಿ, ಸುಮಾರು 350-400 ಮಂಗಗಳಿವೆ. ನಾನು ಅವುಗಳನ್ನು ಕರೆದಾಗ, ಅವು ಬರುತ್ತವೆ' ಎಂದರು.

ಪ್ರಾಣಿಗಳು ತಮ್ಮ ಆಹಾರವನ್ನು ಹುಡುಕಿಕೊಳ್ಳುತ್ತವೆ. ಇಂತವರಿಂದ ಪ್ರಕೃತಿಯಲ್ಲಿ ಸಮತೋಲನ ಕಡಿಮೆಯಾಗುತ್ತಿದೆ. ಪ್ರಾಣಿಗಳು ತಮಗಿರುವ ಆಹಾರ ಹುಡುಕುವ ಕೌಶಲ್ಯವನ್ನು ಕಳೆದುಕೊಳ್ಳುತ್ತವೆ ಎಂದು ಕೆಲವರು ಆತಂಕ ವ್ಯಕ್ತಪಡಿಸಿದ್ದಾರೆ.

ಮಂಗಗಳಿಗೆ ಆಹಾರ ನೀಡುವುದು ಸೂಕ್ತವಲ್ಲ. ಏಕೆಂದರೆ ಅವು ತಮ್ಮ ನೈಸರ್ಗಿಕ ನಡವಳಿಕೆಯನ್ನು ಬದಲಾಯಿಸಿಕೊಳ್ಳುತ್ತವೆ. ಅವುಗಳ ಆರೋಗ್ಯಕ್ಕೆ ಹಾನಿ ಮಾಡುತ್ತದೆ. ಕಾಡು ಆಹಾರಕ್ಕಿಂತ ಮಾನವ ಆಹಾರವನ್ನು ಪಡೆಯುವುದು ಸುಲಭ. ಆದರೆ, ಅದು ಅವುಗಳ ಆರೋಗ್ಯದ ಮೇಲೆ ಪರಿಣಾಮ ಬೀರುತ್ತದೆ. ನೈಸರ್ಗಿಕ ಆಹಾರ ಹುಡುಕುವ ಮಾದರಿಗಳು ಬದಲಾಗುತ್ತವೆ ಎಂದು ಹೇಳಿದ್ದಾರೆ,(ಏಜೆನ್ಸೀಸ್).