ಮಾ. 28ರಂದು ಚಿನ್ನಸ್ವಾಮಿಯಲ್ಲಿ RCB vs SRH ಪಂದ್ಯ; ಪೊಲೀಸರಿಂದ ಕಟ್ಟುನಿಟ್ಟಿನ ಕ್ರಮ; ಬೆಂಗಳೂರು ಕಮಿಷನರ್ ಹೇಳಿದ್ದೇನು?

ಬೆಂಗಳೂರು: 2025ರ ಐಪಿಎಲ್​ ಆವತ್ತಿಯಲ್ಲಿ ಆರ್​ಸಿಬಿ ವಿಜಯೋತ್ಸದ ವೇಳೆ ಕಾಲ್ತುಳಿತ ನಡೆದು ಮಕ್ಕಳು ಸೇರಿ 11 ಮಂದಿ ಮೃತಪಟ್ಟ ದುರ್ಘಟನೆ ಮರುಕಳಿಸದಂತೆ ಮಾ. 28ರಂದು ಆರಂಭವಾಗಲಿರುವ ಆರ್​ಸಿಬಿ-ಎಸ್​ಆರ್​ಹೆಚ್ ಪಂದ್ಯದ ವೇಳೆ ಪೊಲೀಸ್ ಇಲಾಖೆ ಕಟ್ಟುನಿಟ್ಟಿನ ಕ್ರಮಗಳನ್ನು ಕೈಗೊಂಡಿದೆ ಎಂದು ನಗರ ಪೊಲೀಸ್ ಕಮಿಷನರ್ ​ಸೀಮಂತ್​ ಕುಮಾರ್​ ಸಿಂಗ್ ಹೇಳಿದ್ದಾರೆ.

ಈ ಕುರಿತು ಪೊಲೀಸ್​ ಆಯುಕ್ತ ವಂಶಿ ಕೃಷ್ಣ ಅವರ ಜಂಟಿ ಸುದ್ದಿಗೋಷ್ಠಿ ನಡೆಸಿ ಮಾತನಾಡಿರುವ ಅವರು, ಮಾ.​ 28 ಮತ್ತು ಏ. 0​5ರಂದು ಬೆಂಗಳೂರಿನ ಚಿನ್ನಸ್ವಾಮಿ ಸ್ಟೇಡಿಯಂನಲ್ಲಿ ನಡೆಯಲಿರುವ ಕ್ರಿಕೆಟ್​ ಪಂದ್ಯಾವಳಿಗೆ ಭದ್ರತಾ ಕ್ರಮಗಳನ್ನು ಕೈಗೊಳ್ಳಲಾಗಿದೆ. ಶೂನ್ಯ ಸಹಿಷ್ಣುತೆಯನ್ನು ವಹಿಸುತ್ತಿದ್ದು, ಪಂದ್ಯಾವಳಿ ದಿನ ಟಿಕೆಟ್​ ಇದ್ದರೆ ಮಾತ್ರ ಕ್ರೀಡಾಂಗಣದೊಳಗೆ ಪ್ರವೇಶಿಸಲು ಅನುಮತಿ ನೀಡಲಾಗುತ್ತದೆ. ಪಂದ್ಯ ಆರಂಭವಾಗುವ 4 ಗಂಟೆ ಮೊದಲೇ ಎಲ್ಲಾ ಗೇಟ್​ಗಳನ್ನು ತೆರೆಯಲಾಗುತ್ತದೆ ಎಂದು ತಿಳಿಸಿದ್ದಾರೆ.

ಪಂದ್ಯದ ದಿನ ಕ್ರೀಡಾಭಿಮಾನಿಗಳು ಹೆಚ್ಚಾಗಿ ಸಾರ್ವಜನಿಕ ಸಾರಿಗೆಯನ್ನು ಬಳಸುವುದು ಉತ್ತಮ. ಸಂಚಾರ ಸುಗಮಗೊಳಿಸುವ ನಿಟ್ಟಿನಲ್ಲಿ ಟಿಕೆಟ್ ಇಲ್ಲದೇ ಕ್ರೀಡಾಂಗಣದ ಕಡೆ ಯಾರೂ ಬರೋದು ಬೇಡ. ದಟ್ಟಣೆ ನಿಯಂತ್ರಣಕ್ಕಾಗಿ​ ಮೂರು ನಿಮಿಷಕ್ಕೊಂದು ಮೆಟ್ರೋ ಸೇವೆ ನೀಡಲು ಪೊಲೀಸ್​ ಇಲಾಖೆ ಬಿಎಂಆರ್​ಸಿಎಲ್​​​ಗೆ ಮನವಿ ಮಾಡಿಕೊಂಡಿದೆ ಎಂದಿದ್ದಾರೆ.

ತುರ್ತು ಪರಿಸ್ಥಿತಿಯಲ್ಲಿ ವೈದ್ಯಕೀಯ ಸೇವೆಗಾಗಿ ಆಂಬ್ಯುಲೆನ್ಸ್ ಮತ್ತು ವೈದ್ಯರ ತಂಡಗಳನ್ನು ನಿಯೋಜಿಸಲಾಗಿದೆ. ಪಂದ್ಯದ ದಿನ ಕ್ರೀಡಾಂಗಣದ ಸುತ್ತಲೂ ಪೊಲೀಸರ ಕಣ್ಗಾವಲು ಇರಲಿದೆ. ಯಾವುದೇ ಅಹಿತಕರ ಘಟನೆ ನಡೆಯದಂತೆ ಕಾನೂನು ಸುವ್ಯವಸ್ಥೆ ಕಾಯ್ದುಕೊಳ್ಳಲಾಗುತ್ತದೆ ಎಂದು ಸೀಮಂತ್​ ಕುಮಾರ್​ ಸಿಂಗ್ ಸ್ಪಷ್ಟಪಡಿಸಿದ್ದಾರೆ.

ಬಿಎಂಆರ್​ಸಿಎಲ್ ಜೊತೆ ಕೆಎಸ್​ಸಿಎ ಮತ್ತು ಆರ್​ಸಿಬಿ ಫ್ರಾಂಚೈಸಿ ​ಒಪ್ಪಂದ ಮಾಡಿಕೊಂಡಿದ್ದು, ಆರ್​ಸಿಬಿ ಪಂದ್ಯ​ ವೀಕ್ಷಿಸಲು ಟಿಕೆಟ್​ ಪಡೆದುಕೊಂಡ ಅಭಿಮಾನಿಗಳು ಆ ದಿನ ಬೆಂಗಳೂರಿನ ಎಲ್ಲ ಮೆಟ್ರೋ ಮಾರ್ಗಗಳಲ್ಲಿ ಫ್ರೀಯಾಗಿ ಸಂಚರಿಸಬಹುದು ಎಂದು ತಿಳಿಸಿದ್ದಾರೆ. ಈ ಬಗ್ಗೆ ಕಮಿಷನರ್ ಸಹ ಸ್ಪಷ್ಟಪಡಿಸಿದ್ದಾರೆ.

ಮಾ.​ 28ರಂದು ನಡೆಯುವ ಪಂದ್ಯದ ಟಿಕೆಟ್​ ಅನ್ನು ಇಂದಿನಿಂದ ಕಾಯ್ದಿರಿಸಬಹುದಾಗಿದ್ದು, ಅಧಿಕೃತ ವೆಬ್​ಸೈಟ್(https://shop.royalchallengers.com/ticket) ಟಿಕೆಟ್ ಅನ್ನು ಖರೀದಿಸಬಹುದು.