ತಾಳಿ ಕಟ್ಟುವ ವೇಳೆ ಎಲ್‌ಇಡಿ ಪರದೆಯಲ್ಲಿ RCB ಬ್ಯಾಟಿಂಗ್: ಮದುವೆ ಸಂಭ್ರಮಕ್ಕೆ ಕ್ರಿಕೆಟ್ ಮೆರುಗು!

ನಾಗಮಂಗಲದ ಎಂಆರ್‌ಪಿ (MRP) ಕಲ್ಯಾಣ ಮಂಟಪದಲ್ಲಿ ಲಾವಣ್ಯ ಮತ್ತು ಪುನೀತ್ ಕುಮಾರ್ ಅವರ ವಿವಾಹ ನಿಶ್ಚಿತಾರ್ಥ ಹಾಗೂ ಆರತಕ್ಷತೆ ಕಾರ್ಯಕ್ರಮ ಹಮ್ಮಿಕೊಳ್ಳಲಾಗಿತ್ತು. ಇದೇ ವೇಳೆ ಬೆಂಗಳೂರಿನ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಆರ್‌ಸಿಬಿ ಮತ್ತು ಸಿಎಸ್‌ಕೆ ನಡುವೆ ಹೈವೋಲ್ಟೇಜ್ ಪಂದ್ಯ ನಡೆಯುತ್ತಿತ್ತು. ಮದುವೆಗೆ ಬಂದ ಅತಿಥಿಗಳು ಮಂತ್ರಗಳನ್ನು ಕೇಳುವುದಕ್ಕಿಂತ ಹೆಚ್ಚಾಗಿ ಮೊಬೈಲ್‌ನಲ್ಲಿ ಸ್ಕೋರ್ ಚೆಕ್ ಮಾಡುವುದರಲ್ಲೇ ಬ್ಯುಸಿಯಾಗಿದ್ದರು. ಇದನ್ನು ಗಮನಿಸಿದ ಮದುವೆಯ ಆಯೋಜಕರು, ವೇದಿಕೆಯ ಮೇಲೆ ಅಳವಡಿಸಲಾಗಿದ್ದ ಬೃಹತ್ ಎಲ್‌ಇಡಿ (LED) ಪರದೆಯ ಮೇಲೆ ಲೈವ್ ಪಂದ್ಯವನ್ನು ಬಿತ್ತರಿಸಲು ನಿರ್ಧರಿಸಿದರು.

ಯಾವಾಗ ಬೃಹತ್ ಪರದೆಯ ಮೇಲೆ ವಿರಾಟ್ ಕೊಹ್ಲಿ ಮತ್ತು ತಂಡದ ಬ್ಯಾಟಿಂಗ್ ಅಬ್ಬರ ಶುರುವಾಯಿತೋ, ಅತಿಥಿಗಳೆಲ್ಲರೂ ತಮ್ಮ ಕುರ್ಚಿ ಬಿಟ್ಟು ಕದಲಿಲ್ಲ. ಮದುವೆಗೆ ಬಂದವರು ವಧು-ವರರನ್ನು ಹಾರೈಸುವುದನ್ನು ಮರೆತು, ಪರದೆಯ ಮೇಲೆ ಆರ್‌ಸಿಬಿ ಸಿಡಿಸುತ್ತಿದ್ದ ಪ್ರತಿ ಬೌಂಡರಿ ಮತ್ತು ಸಿಕ್ಸರ್‌ಗೆ ಚೀರಾಡುತ್ತಾ ಸಂಭ್ರಮಿಸಿದರು. ಒಂದು ಹಂತದಲ್ಲಿ ಮದುವೆಯ ವಿಧಿವಿಧಾನಗಳಿಗಿಂತ ಕ್ರಿಕೆಟ್ ಪಂದ್ಯವೇ ಅಲ್ಲಿ ಪ್ರಮುಖವಾಯಿತು.

ಈ ಸಂಭ್ರಮ ಕೇವಲ ಅತಿಥಿಗಳಿಗೆ ಮಾತ್ರ ಸೀಮಿತವಾಗಿರಲಿಲ್ಲ. ಸ್ವತಃ ವಧು ಲಾವಣ್ಯ ಮತ್ತು ವರ ಪುನೀತ್ ಕುಮಾರ್ ಕೂಡ ಆರ್‌ಸಿಬಿ ತಂಡದ ಕಟ್ಟಾ ಅಭಿಮಾನಿಗಳು. ಹಾಗಾಗಿ ಅವರು ಕೂಡ ವೇದಿಕೆಯ ಮೇಲೆಯೇ ಕುಳಿತು ಸ್ವಲ್ಪ ಹೊತ್ತು ಪಂದ್ಯವನ್ನು ವೀಕ್ಷಿಸಿ ಖುಷಿಪಟ್ಟರು. "ನನಗೆ ಮ್ಯಾಚ್ ನೋಡಲು ಸ್ಟೇಡಿಯಂಗೆ ಹೋಗಲಾಗಲಿಲ್ಲ ಎಂಬ ಬೇಸರವಿತ್ತು, ಆದರೆ ಮದುವೆ ಮಂಟಪದಲ್ಲೇ ಇಷ್ಟು ದೊಡ್ಡ ಪರದೆಯ ಮೇಲೆ ಪಂದ್ಯ ನೋಡಿದ್ದು ಮರೆಯಲಾಗದ ಅನುಭವ" ಎಂದು ಅತಿಥಿಯೊಬ್ಬರು ಸಂತಸ ಹಂಚಿಕೊಂಡಿದ್ದಾರೆ.

ಚಿನ್ನಸ್ವಾಮಿ ಸ್ಟೇಡಿಯಂನಲ್ಲಿ ಆರ್‌ಸಿಬಿ ಮೊದಲು ಬ್ಯಾಟಿಂಗ್ ಮಾಡಿ 20 ಓವರ್‌ಗಳಲ್ಲಿ 3 ವಿಕೆಟ್ ನಷ್ಟಕ್ಕೆ 250 ರನ್‌ಗಳ ಬೃಹತ್ ಮೊತ್ತ ಪೇರಿಸಿತ್ತು. ಆರ್‌ಸಿಬಿಯ ಈ ಅಬ್ಬರದ ಬ್ಯಾಟಿಂಗ್‌ಗೆ ನಾಗಮಂಗಲದ ಮದುವೆ ಹಾಲ್‌ನಲ್ಲಿ ಶಿಳ್ಳೆ, ಚಪ್ಪಾಳೆಗಳ ಸುರಿಮಳೆಯೇ ಆಯಿತು. ಪಂದ್ಯದ ಮೊದಲ ಇನ್ನಿಂಗ್ಸ್ ಮುಗಿದ ಬಳಿಕವೇ ಮದುವೆಯ ಕಾರ್ಯಕ್ರಮಗಳು ಮತ್ತೆ ಮುಂದುವರಿದವು,(ಏಜೆನ್ಸೀಸ್​).