ಅಯೋಧ್ಯೆ ಕಾಣಿಕೆ ಲೂಟಿ ಪ್ರಕರಣ: ಆರೋಪಿಗಳಿಂದ ದಿನಕ್ಕೆ 6ರಿಂದ 8 ಲಕ್ಷ ಹಣ ಕಳ್ಳತನ! ಶಾಕಿಂಗ್ ಸಂಗತಿಗಳು ಬೆಳಕಿಗೆ

ಅಯೋಧ್ಯೆ: ರಾಮಮಂದಿರ ಕಾಣಿಕೆ ಲೂಟಿ ಪ್ರಕರಣದ ದೇಶವ್ಯಾಪಿ ಭಾರಿ ಸಂಚಲನ ಸೃಷ್ಟಿಸಿದ್ದು. ರಾಮನ ದೇಣಿಗೆ ಹಣವನ್ನೂ ಬಿಡದ ಆರೋಪಿಗಳ ಮನೆಗಳನ್ನು ಬುಲ್ಡೋಜರ್​ಗಳಿಂದ ನೆಲಸಮ ಮಾಡಬೇಕು ಎಂಬ ಆಗ್ರಹಗಳು ಕೇಳಿಬಂದಿವೆ. ಮತ್ತೊಂದೆಡೆ, ಪ್ರಕರಣಕ್ಕೆ ಹೊಸ ತಿರುವುಗಳು ಸಿಕ್ಕಿದ್ದು, ನಂಬಿಕೆ ದ್ರೋಹಿಗಳು ಪ್ರತಿದಿನ 6ರಿಂದ 8 ಲಕ್ಷ ರೂ. ಕದಿಯುತ್ತಿದ್ದರು ಎನ್ನಲಾಗಿದೆ.  

ಮಂದಿರದ ದೇಣಿಗೆ ಹುಂಡಿ ಕಳ್ಳತನದ ಕುರಿತು ತನಿಖೆ ನಡೆಸುತ್ತಿರುವ ವಿಶೇಷ ತನಿಖಾ ತಂಡಕ್ಕೆ (ಎಸ್​ಐಟಿ) ಆರೋಪಿಗಳ ಒಟ್ಟು ಆಸ್ತಿ, ಆದಾಯ ಮತ್ತು ಬ್ಯಾಂಕ್ ಖಾತೆಗಳು ಸಿಕ್ಕಿವೆ. ಇದನ್ನು ಸೂಕ್ಷ್ಮವಾಗಿ ಪರಿಶೀಲನೆ ನಡೆಸಿರುವ ಅಧಿಕಾರಿಗಳಿಗೆ, ಈಗಾಗಲೇ ಶಾಕಿಂಗ್ ಸಂಗತಿಗಳು ಗೊತ್ತಾಗಿವೆ. 

ವರದಿಗಳ ಪ್ರಕಾರ, ಮಂದಿರದ ಕಾಣಿಕೆ ಕಳ್ಳತನದ ಹಗರಣ ಬಯಲಾಗುವ ಮೊದಲು, ರಾಮಮಂದಿರ ಟ್ರಸ್ಟ್‌ನ ಎಸ್​ಬಿಐ ಮತ್ತು ಪಿಎನ್​ಬಿ ಬ್ಯಾಂಕ್ ಖಾತೆಗಳಿಗೆ ಪ್ರತಿದಿನ ಅಂದಾಜು 16 ಲಕ್ಷದಿಂದ 18 ಲಕ್ಷ ರೂಪಾಯಿ ದೇಣಿಗೆ ಹಣ ಜಮೆಯಾಗುತ್ತಿತ್ತು. ಆದರೆ, ಕಳ್ಳತನದ ಜಾಲ ಬಯಲಾದ ಬೆನ್ನಲ್ಲೇ ಈ ಮೊತ್ತ ದಿಢೀರನೆ ದಿನಕ್ಕೆ 24ರಿಂದ 26 ಲಕ್ಷ ರೂಪಾಯಿಗೆ ಏರಿಕೆಯಾಗಿದೆ! ಇದು ಅನುಮಾನಗಳೇ ನಿಜ ಎನ್ನುವಂತೆ ಮಾಡಿದೆ. 

ಈ ದಿಢೀರ್ ವ್ಯತ್ಯಾಸವನ್ನು ಸೂಕ್ಷ್ಮವಾಗಿ ಹಾಗೂ ಗಂಭೀರವಾಗಿ ಪರಿಗಣಿಸಿರುವ ಎಸ್​ಐಟಿ ಅಧಿಕಾರಿಗಳು, ಹಿಂದೆ ಪ್ರತಿದಿನ ಅಂದಾಜು 6 ಲಕ್ಷದಿಂದ 8 ಲಕ್ಷ ರೂ. ಕಾಣಿಕೆ ಹಣವನ್ನು ಬ್ಯಾಂಕ್‌ಗೆ ಕಟ್ಟದೆ ಮಧ್ಯದಲ್ಲೇ ಲೂಟಿ ಮಾಡಲಾಗುತ್ತಿತ್ತು ಎಂಬ ಬಲವಾಗಿ ಅನುಮಾನಿಸಿದ್ದಾರೆ. 

ಈ ದೊಡ್ಡ ಮಟ್ಟದ ಆರ್ಥಿಕ ಅಕ್ರಮದ ಹಿಂದೆ ಬ್ಯಾಂಕ್ ಸಿಬ್ಬಂದಿಯ ಕೈವಾಡವಿರುವ ಶಂಕೆ ದೊಡ್ಡದಾಗಿದೆ. ಹೀಗಾಗಿ, ಎಸ್​ಐಟಿ ಅಧಿಕಾರಿಗಳು ಕಾರ್ಯಾಚರಣೆಯನ್ನು ಇನ್ನಷ್ಟು ತೀವ್ರಗೊಳಿಸಿದ್ದಾರೆ. ಈಗಾಗಲೇ ಎಸ್​ಬಿಐ ಬ್ಯಾಂಕ್ ಮ್ಯಾನೇಜರ್​ ಸೇರಿ ಒಟ್ಟು 10 ಬ್ಯಾಂಕ್ ಉದ್ಯೋಗಿಗಳನ್ನು ಸುದೀರ್ಘ ವಿಚಾರಣೆಗೆ ಒಳಪಡಿಸಲಾಗಿದೆ. ಬ್ಯಾಂಕ್‌ನ ಪ್ರಮುಖ ದಾಖಲೆಗಳು ಮತ್ತು ವಹಿವಾಟಿನ ಇತಿಹಾಸವನ್ನು ಅಧಿಕಾರಿಗಳು ಜಪ್ತಿ ಮಾಡಿಕೊಂಡಿದ್ದು, ಪ್ರಕರಣಕ್ಕೆ ಬೇಕಿರುವ ಅಗತ್ಯ ದಾಖಲೆಗಳನ್ನು ಕೂಲಂಕಷವಾಗಿ ಪರಿಶೀಲಿಸುತ್ತಿದ್ದಾರೆ.

ಪ್ರಾಥಮಿಕ ತನಿಖೆಯ ಪ್ರಕಾರ, ಈ ಇಡೀ ಹಗರಣದ ಹಿಂದೆ ಇಬ್ಬರು ಅಥವಾ ಮೂವರು ಪ್ರಭಾವಿ ವ್ಯಕ್ತಿಗಳ ಕೈವಾಡವಿರುವ ಶಂಕೆ ಬಲವಾಗಿದೆ. ಲೂಟಿಯಾದ ಕೋಟಿಗಟ್ಟಲೇ ಹಣ ಯಾರ ಕೈ ಸೇರಿದೆ? ಈ ಜಾಲದಲ್ಲಿ ಇನ್ನು ಯಾರೆಲ್ಲ ಶಾಮೀಲಾಗಿದ್ದಾರೆ? ಎಂಬ ನಿಟ್ಟಿನಲ್ಲಿ ಎಸ್​ಐಟಿ ತನಿಖೆ ಚುರುಕುಗೊಳಿಸಿದೆ. ಮುಂಬರುವ ದಿನಗಳಲ್ಲಿ ಈ ಪ್ರಕರಣದಲ್ಲಿ ಇನ್ನೂ ಹಲವು ಕಾಣದ ದೊಡ್ಡ ತಲೆಗಳು ಬೆಳಕಿಗೆ ಬರುವ ಸಾಧ್ಯತೆಗಳಿವೆ. ಒಟ್ಟಾರೆ, ಅಯೋಧ್ಯೆ ರಾಮಮಂದಿರ ದೇಣಿಗೆ ಹಗರಣ ಪ್ರಕರಣದಲ್ಲಿ ದಿನಕ್ಕೊಂದು ಟ್ವಿಸ್ಟ್​ಗಳು ಸಿಗುತ್ತಲೇ ಇವೆ,(ಏಜೆನ್ಸೀಸ್).