ಸಮಯವೇ ಉತ್ತರ ನೀಡಲಿದೆ!.. ಟಿವಿಕೆ ನಾಯಕನ ವಿವಾದಾತ್ಮಕ ಹೇಳಿಕೆಗೆ ರಜನಿಕಾಂತ್‌ ತಿರುಗೇಟು, ಶುರುವಾಯ್ತು ಪೋಸ್ಟರ್ ವಾರ್ | Rajinikanth

ಇತ್ತೀಚೆಗೆ ನಡೆದ ಸಾರ್ವಜನಿಕ ಸಭೆಯೊಂದರಲ್ಲಿ ಮಾತನಾಡಿದ್ದ ಆಧವ್ ಅರ್ಜುನ, ಸೂಪರ್‌ಸ್ಟಾರ್ ರಜನಿಕಾಂತ್ (Rajinikanth) ರಾಜಕೀಯ ನಿವೃತ್ತಿಯ ಹಿಂದೆ ಡಿಎಂಕೆಯ ಬೆದರಿಕೆ ಇತ್ತು ಎಂಬ ಆರೋಪವು ಈಗ ತಲೈವಾ ಮತ್ತು ದಳಪತಿ ಅಭಿಮಾನಿಗಳ ನಡುವಿನ ವಾಕ್ಸಮರಕ್ಕೆ ನಾಂದಿ ಹಾಡಿದೆ.

ರಜನಿಕಾಂತ್ ಅವರು ರಾಜಕೀಯಕ್ಕೆ ಪ್ರವೇಶಿಸಲು ಎಲ್ಲಾ ಸಿದ್ಧತೆ ಮಾಡಿಕೊಂಡಿದ್ದರು. ಆದರೆ ಆಡಳಿತಾರೂಢ ಡಿಎಂಕೆ ಪಕ್ಷವು ಅವರಿಗೆ ಬೆದರಿಕೆ ಹಾಕಿತು, ಆ ಭಯದಿಂದಲೇ ಅವರು ರಾಜಕೀಯದಿಂದ ಹಿಂದೆ ಸರಿದರು ಎಂದು ಆಧವ್​ ಗಂಭೀರ ಆರೋಪ ಮಾಡಿದ್ದರು. ಈ ಹೇಳಿಕೆಯು ಡಿಎಂಕೆ ಪಾಳಯದಲ್ಲಿ ಮಾತ್ರವಲ್ಲದೆ, ರಜನಿಕಾಂತ್ ಅವರ ಲಕ್ಷಾಂತರ ಅಭಿಮಾನಿಗಳ ಆಕ್ರೋಶಕ್ಕೆ ಕಾರಣವಾಯಿತು.

ಆಧವ್ ಅರ್ಜುನರ ಈ ಹೇಳಿಕೆಯನ್ನು ಖಂಡಿಸಿ ರಜನಿಕಾಂತ್ ಅಭಿಮಾನಿ ಸಂಘಗಳು ತಮಿಳುನಾಡಿನಾದ್ಯಂತ ಬೀದಿಗಿಳಿದಿವೆ. ಚೆನ್ನೈ, ಮಧುರೈ ಮತ್ತು ಕೊಯಮತ್ತೂರಿನಲ್ಲಿ ಆಧವ್ ಅರ್ಜುನ, ರಜನಿಕಾಂತ್ ಅವರ ಕ್ಷಮೆಯಾಚಿಸಬೇಕು ಎಂದು ಆಗ್ರಹಿಸಿ ಬೃಹತ್ ಪೋಸ್ಟರ್‌ಗಳನ್ನು ಹಾಕಲಾಗಿದೆ. ನಮ್ಮ ತಲೈವಾ ಯಾರ ಸಂಚಿಗೂ ಹೆದರುವವರಲ್ಲ, ನಿಮ್ಮ ರಾಜಕೀಯಕ್ಕೆ ಅವರನ್ನು ಎಳೆಯಬೇಡಿ ಎಂಬ ಸಂದೇಶಗಳು ಪೋಸ್ಟರ್‌ಗಳಲ್ಲಿ ಕಂಡುಬಂದಿವೆ.

ಸಾಮಾನ್ಯವಾಗಿ ವಿವಾದಗಳಿಂದ ದೂರವೇ ಇರುವ ರಜನಿಕಾಂತ್, ಈ ಬಾರಿ ಸುಮ್ಮನೆ ಕುಳಿತುಕೊಂಡಿಲ್ಲ. ತಮಿಳಿನಲ್ಲಿ ಅಧಿಕೃತ ಹೇಳಿಕೆ ಬಿಡುಗಡೆ ಮಾಡಿದ ಅವರು, ತಮ್ಮ ಬೆಂಬಲಕ್ಕೆ ನಿಂತ ರಾಜಕೀಯ ನಾಯಕರು, ಚಿತ್ರರಂಗದ ಗಣ್ಯರು ಮತ್ತು ಮಾಧ್ಯಮಗಳಿಗೆ ಧನ್ಯವಾದ ಅರ್ಪಿಸಿದರು. ಈ ಇಡೀ ಪ್ರಸಂಗವನ್ನು ಒಂದು ಕ್ಷಣಿಕ ವಿವಾದ ಎಂದು ಕರೆದಿದ್ದಾರೆ. ಆದರೆ ಅವರ ಕೊನೆಯ ಸಾಲುಗಳು ಮಾತ್ರ ವಿರೋಧಿಗಳಿಗೆ ಯಾವ ಸಂದೇಶ ನೀಡುಬೇಕೋ ಅದನ್ನು ನೀಡಿವೆ( ಸಮಯ ಮಾತನಾಡದಿರಬಹುದು, ಆದರೆ ಅದು ಯಾವಾಗಲೂ ಕೊನೆಯಲ್ಲಿ ಉತ್ತರವನ್ನು ನೀಡುತ್ತದೆ).

ಟಿವಿಕೆ ಪಕ್ಷದ ನಾಯಕ ಆಧವ್ ಅರ್ಜುನ ಇತ್ತೀಚೆಗೆ ನನ್ನ ಬಗ್ಗೆ ಸತ್ಯಕ್ಕೆ ದೂರವಾದ ಹೇಳಿಕೆ ನೀಡಿದ್ದಾರೆ. ಅರ್ಜುನ ಅವರ ಮಾನಹಾನಕಾರಿ ಹೇಳಿಕೆಗಳನ್ನು ಖಂಡಿಸಿದ ತಮಿಳುನಾಡು ವಿರೋಧ ಪಕ್ಷದ ನಾಯಕ ಎಡಪ್ಪಾಡಿ ಕೆ. ಪಳನಿಸ್ವಾಮಿ, ಬಿಜೆಪಿ ಅಧ್ಯಕ್ಷ ನೈನಾರ್ ನಾಗೇಂದ್ರನ್, ಕೇಂದ್ರ ಸಚಿವ ಎಲ್. ಮುರುಗನ್, ರಾಜ್ಯ ಸಚಿವ ರಘುಪತಿ, ತೋಲ್. ತಿರುಮಾವಲವನ್, ಎಸ್‌ಪಿ ವೇಲುಮಣಿ, ನನ್ನ ಸ್ನೇಹಿತ ಅಣ್ಣಾಮಲೈ, ಅರ್ಜುನಮೂರ್ತಿ, ಅನ್ಬುಮಣಿ ರಾಮದಾಸ್, ಜಿಕೆ ವಾಸನ್, ಜಾನ್ ಪಾಂಡಿಯನ್, ಪುಗಝೆಂಡಿ ಮತ್ತು ಇತರ ಅನೇಕ ರಾಜಕೀಯ ನಾಯಕರುಗಳಿಗೆ ನನ್ನ ಹೃತ್ಪೂರ್ವಕ ಧನ್ಯವಾದಗಳನ್ನು ಅರ್ಪಿಸುತ್ತೇನೆ.

ಅಚಲ ಬೆಂಬಲಕ್ಕಾಗಿ ಅಮೀರ್, ಜಿ. ಧನಂಜಯನ್ ಮತ್ತು ಚಿತ್ರರಂಗದ ನನ್ನ ಸ್ನೇಹಿತರು, ನಕ್ಕೀರನ್ ಗೋಪಾಲ್, ರಂಗರಾಜ್ ಪಾಂಡೆ ಮತ್ತು ಮಾಧ್ಯಮ ಸದಸ್ಯರು ಮತ್ತು ಎಲ್ಲಕ್ಕಿಂತ ಹೆಚ್ಚಾಗಿ, ನನಗೆ ದೇವರಂತೆ ಇರುವ ನನ್ನ ಅಭಿಮಾನಿಗಳಿಗೆ ನಾನು ಧನ್ಯವಾದಗಳನ್ನು ಅರ್ಪಿಸುತ್ತೇನೆ ಎಂದು ರಜನಿಕಾಂತ್​ ಬರೆದುಕೊಂಡಿದ್ದಾರೆ.

ಮುಂದಿನ ತಿಂಗಳು ನಡೆಯಲಿರುವ ಚುನಾವಣೆಗೆ ಟಿವಿಕೆ ಸಜ್ಜಾಗುತ್ತಿರುವ ಈ ಸಂದರ್ಭದಲ್ಲಿ, ಅವರ ಪಕ್ಷದ ನಾಯಕನೊಬ್ಬ ರಜನಿಕಾಂತ್​ರಂತಹ ಪ್ರಭಾವಿ ವ್ಯಕ್ತಿ ಬಗ್ಗೆ ಮಾತನಾಡಿದ್ದು ಪಕ್ಷಕ್ಕೆ ಹಿನ್ನಡೆಯಾಗಬಹುದು ಎಂಬ ಆತಂಕ ವ್ಯಕ್ತವಾಗಿದೆ. ರಜನಿಕಾಂತ್ ಅಭಿಮಾನಿ ಬಳಗವು ಚುನಾವಣೆಯಲ್ಲಿ ದೊಡ್ಡ ಮಟ್ಟದ ಪ್ರಭಾವ ಬೀರಬಲ್ಲ ಶಕ್ತಿ ಹೊಂದಿದ್ದು, ಹೀಗಿರುವಾಗ, ಅನಗತ್ಯವಾಗಿ ಅವರನ್ನು ಎದುರು ಹಾಕಿಕೊಳ್ಳುವುದು ವಿಜಯ್ ಮತ್ತು ಅವರ ಪಕ್ಷದ ರಾಜಕೀಯ ಹಾದಿಯನ್ನು ಕಠಿಣಗೊಳಿಸಬಹುದು ಎಂಬ ಅಭಿಪ್ರಾಯಗಳು ಅಲ್ಲಲ್ಲಿ ವ್ಯಕ್ತವಾಗುತ್ತಿವೆ.

ಈ ವಿವಾದವು ತಮಿಳುನಾಡಿನಲ್ಲಿ ಸಿನಿಮಾ ಮತ್ತು ರಾಜಕೀಯದ ನಡುವಿನ ಸಂಬಂಧ ಎಷ್ಟು ಸೂಕ್ಷ್ಮವಾಗಿದೆ ಎಂಬುದನ್ನು ಮತ್ತೊಮ್ಮೆ ಸಾಬೀತುಪಡಿಸಿದ್ದು, ರಜನಿಕಾಂತ್​ರ ಸಮಯದ ಉತ್ತರದ ಸಾಲುಗಳು ಭವಿಷ್ಯದಲ್ಲಿ ಯಾವ ತಿರುವು ಪಡೆಯಲಿವೆ ಎಂಬುದನ್ನು ಕಾದು ನೋಡಬೇಕಿದೆ(ಏಜೆನ್ಸೀಸ್​).