ರಾಹುಲ್ ಗಾಂಧಿ ಒಬ್ಬ 'ಸಿಖ್ ವಿರೋಧಿ': ರವನೀತ್ ಸಿಂಗ್ ವಿವಾದದ ಬೆನ್ನಲ್ಲೇ ಪ್ರಧಾನಿ ಮೋದಿ ವಾಗ್ದಾಳಿ | Narendra Modi

ನವದೆಹಲಿ: ಲೋಕಸಭೆಯ ವಿರೋಧ ಪಕ್ಷದ ನಾಯಕ ರಾಹುಲ್ ಗಾಂಧಿ ಬುಧವಾರ (ಫೆ.4) ಸಂಸತ್ತಿನ ಹೊರಗೆ ಬಿಜೆಪಿ ಸಂಸದ ರವನೀತ್ ಸಿಂಗ್ ಬಿಟ್ಟು ಅವರನ್ನು "ದೇಶದ್ರೋಹಿ" ಎಂದು ಕರೆಯುವ ಮೂಲಕ ತಮ್ಮ ಸಿಖ್ ವಿರೋಧಿ ಮನಸ್ಥಿತಿಯನ್ನು ಪ್ರದರ್ಶಿಸಿದ್ದಾರೆ ಎಂದು ಪ್ರಧಾನಿ ನರೇಂದ್ರ ಮೋದಿ (Narendra Modi) ಹೇಳಿದರು.

ನಿನ್ನೆ, ಕಾಂಗ್ರೆಸ್‌ನ ಯುವರಾಜ ಒಬ್ಬ ಸಂಸದನನ್ನು 'ದೇಶದ್ರೋಹಿ' ಎಂದು ಕರೆದರು. ಇದು ಅವರ ದುರಹಂಕಾರ ಯಾವ ಹಂತದಲ್ಲಿದೆ ಎಂದು ತಿಳಿಸುತ್ತದೆ. ಎಷ್ಟೋ ಜನರು ಕಾಂಗ್ರೆಸ್ ಪಕ್ಷವನ್ನು ತೊರೆದಿದ್ದಾರೆ, ಎಷ್ಟೋ ನಾಯಕರು ಬೇರೆ ಪಕ್ಷಗಳನ್ನು ಸೇರಿದ್ದಾರೆ. ಆದರೆ ಅವರನ್ನು ಇಲ್ಲಿಯವರೆಗೆ ದೇಶದ್ರೋಹಿಗಳು ಎಂದು ಕರೆದಿಲ್ಲ. ಆದರೆ ರವನೀತ್ ಸಿಂಗ್, ಸಿಖ್ ಆಗಿದ್ದರಿಂದ ಅವರನ್ನು ದೇಶದ್ರೋಹಿ ಎಂದು ಕರೆದರು ಎಂದು ಮೋದಿ ರಾಜ್ಯಸಭೆಯಲ್ಲಿ ರಾಷ್ಟ್ರಪತಿಗಳ ಭಾಷಣಕ್ಕೆ ವಂದನಾ ನಿರ್ಣಯಕ್ಕೆ ನೀಡಿದ ಉತ್ತರದಲ್ಲಿ ಹೇಳಿದರು.

ರಾಹುಲ್​ ಗಾಂಧಿ ಅವರ ಈ ಹೇಳಿಕೆ ಸಮಸ್ಥ ಸಿಖ್​ ಸಮುದಾಯಕ್ಕೆ ಮಾಡಿದ ಅಪಮಾನವಾಗಿದೆ. ಸಿಖ್ ಸಮುದಾಯದ ಮೇಲೆ ಕಾಂಗ್ರೆಸ್‌ ಪಕ್ಷ ಆಳವಾದ ದ್ವೇಷವನ್ನು ಹೊಂದಿರುವುದು ಜಗಜ್ಜಾಹಿರವಾಗಿದೆ ಎಂದರು.

ಅವರಿಗೆ ತಮ್ಮ ತಪ್ಪಿನ ಬಗ್ಗೆ ಪಶ್ಚಾತಾಪವಿದ್ದರೆ ಅವರು ಸದನದಲ್ಲಿ ಕ್ಷಮೆಯಾಚಿಸಬಹುದಿತ್ತು, ಆದರೆ ಸಿಖ್ಖರ ಮೇಲಿನ ದ್ವೇಷದಿಂದಾಗಿ ಅವರು ಹಾಗೆ ಮಾಡಲಿಲ್ಲ. ರವನೀತ್ ಸಿಂಗ್ ರಾಷ್ಟ್ರಕ್ಕಾಗಿ ತ್ಯಾಗ ಮಾಡಿದ ಕುಟುಂಬದ ಹಿನ್ನಲೆ ಉಳ್ಳವರು, ಅವರು ತಮ್ಮ ರಾಜಕೀಯ ದೃಷ್ಟಿಕೋನಗಳನ್ನು ಬದಲಾಯಿಸಿದ ಕಾರಣ, 'ಗದ್ದಾರ್' (ದೇಶದ್ರೋಹಿ) ಎಂದು ರಾಹುಲ್​ ಕರೆದಿದ್ದಾರೆ ಎಂದು ನರೇಂದ್ರ ಮೋದಿ ಹೇಳಿದ್ದಾರೆ. ಯಾರಾದರೂ ನನ್ನ ನಾಗರಿಕರನ್ನು ದೇಶದ್ರೋಹಿ ಎಂದು ಕರೆದರೆ, ರಾಷ್ಟ್ರವು ಇದನ್ನು ಹೇಗೆ ಸಹಿಸಿಕೊಳ್ಳುತ್ತದೆ? ಅವರು ಸಿಖ್ ಎಂಬ ಕಾರಣಕ್ಕಾಗಿ, ಅವರು ದೇಶದ್ರೋಹಿಯೇ? ಎಂದು ಮೋದಿ ಪ್ರಶ್ನಿಸಿದ್ದಾರೆ.

ರಾಜ್ಯಸಭೆಯಲ್ಲಿ ಪ್ರಧಾನಿ ತಮ್ಮ ಭಾಷಣದ ಬಹುಪಾಲು ಸಮಯವನ್ನು ಕಾಂಗ್ರೆಸ್ ಮೇಲೆ ದಾಳಿ ಮಾಡುತ್ತಾ, ಕಾಂಗ್ರೆಸ್​ ಪಕ್ಷವು ರಾಷ್ಟ್ರಪತಿ ದ್ರೌಪದಿ ಮುರ್ಮು, ದಲಿತ ಸಮುದಾಯ ಮತ್ತು ಈಶಾನ್ಯ ದೇಶಗಳ ಜನರನ್ನು ಅವಮಾನಿಸಿದೆ ಎಂದು ಆರೋಪಿಸಿದರು.

ದೇಶದ ಜನರನ್ನು ಅಗೌರವಿಸುವುದು ಕಾಂಗ್ರೆಸ್ ಪಕ್ಷದ ನಡವಳಿಕೆ ಮತ್ತು ಸಂಸ್ಕೃತಿಯಲ್ಲಿ ಬೇರೂರಿದಂತೆ ತೋರುತ್ತದೆ. ಇತ್ತೀಚಿನ ದಿನಗಳಲ್ಲಿ, ಕಾಂಗ್ರೆಸ್ ರಾಷ್ಟ್ರಪತಿಗಳನ್ನು ಅವಮಾನಿಸಿದೆ. ಚುನಾವಣೆಯ ನಂತರ ನಮ್ಮ ರಾಷ್ಟ್ರಪತಿಗಳಿಗೆ ಬಳಸಿದ ಭಾಷೆ ನಾಚಿಕೆಗೇಡಿನ ಸಂಗತಿಯಾಗಿದೆ ಎಂದರು. ನಿನ್ನೆ ಲೋಕಸಭೆಯಲ್ಲಿಯೂ ಸಹ, ರಾಷ್ಟ್ರಪತಿಗಳ ಭಾಷಣದ ಕುರಿತು ಚರ್ಚೆ ನಡೆಯಲು ಸಾಧ್ಯವಾಗಲಿಲ್ಲ. ಇದು ರಾಷ್ಟ್ರಪತಿ ಹುದ್ದೆಗೆ ಮಾಡಿದ ಅವಮಾನವಾಗಿದೆ ಎಂದರು.

ಮಾಜಿ ಅಸ್ಸಾಮಿ ರಾಜಕಾರಣಿ ಭೂಪೇನ್ ಹಜಾರಿಕಾ ಅವರಿಗೆ ಸರ್ಕಾರ ಭಾರತ ರತ್ನ ನೀಡಿದ ನಂತರ ಕಾಂಗ್ರೆಸ್ ಅಸ್ಸಾಂನ ಜನರನ್ನು ಅವಮಾನಿಸಿದೆ ಎಂದು ಅವರು ಆರೋಪಿಸಿದರು. ಕಾಂಗ್ರೆಸ್ ಯಾವಾಗಲೂ ದಲಿತರು ಮತ್ತು ಆದಿವಾಸಿಗಳನ್ನು ಅವಮಾನಿಸುವ ಕೆಲಸವನ್ನೇ ಮಾಡುತ್ತಾ ಬಂದಿದೆ, ಆಂಧ್ರಪ್ರದೇಶದ ದಲಿತ ಕುಟುಂಬದ ಮಗನೊಬ್ಬ ಸದನದ ಅಧ್ಯಕ್ಷತೆ ವಹಿಸಿದ್ದರು ಅವರನ್ನೂ ಕಾಂಗ್ರೆಸ್​ ಪಕ್ಷ ಅವಮಾನಿಸಿದೆ ಎಂದು ಪ್ರಧಾನಿ ಮೋದಿ ಆರೋಪಿಸಿದ್ದಾರೆ,(ಏಜನ್ಸೀಸ್​).