ಪಂಜಾಬ್‌ ಮತದಾರರ ಪಟ್ಟಿಯಿಂದ ಡಿಲೀಟ್, ದೆಹಲಿಯಲ್ಲಿ ಪ್ರತ್ಯಕ್ಷ!...ಆಪ್ ಆಕ್ಷೇಪಕ್ಕೆ ಬ್ರೇಕಪ್ ಆದ ಪ್ರೇಮಿ ಎಂದು ಚಡ್ಡಾ ತಿರುಗೇಟು! | Raghav Chadha

ಆಗಸ್ಟ್ 31 ರಂದು ದೆಹಲಿಯ ತಾತ್ಕಾಲಿಕ (ಕರಡು) ಮತದಾರರ ಪಟ್ಟಿ ಬಿಡುಗಡೆಯಾಗಿತ್ತು. ಆದರೆ ಸೆಪ್ಟೆಂಬರ್ 8 ರಂದು ರಾಜೇಂದರ್ ನಗರ್ ಕ್ಷೇತ್ರದ ಮತಗಟ್ಟೆ ಸಂಖ್ಯೆ 46 ರಲ್ಲಿ, ರಾಘವ್ ಚಡ್ಡಾ ಅವರ ಹೆಸರನ್ನು 747 ನೇ ಮತದಾರರಾಗಿ ಸೇರಿಸಲಾಯಿತು. ಇತ್ತೀಚೆಗಷ್ಟೇ (ಸೆಪ್ಟೆಂಬರ್ 3 ರಂದು) ಪಂಜಾಬ್‌ನ ಮತದಾರರ ಪಟ್ಟಿಯಿಂದ ತಮ್ಮ ಹೆಸರು ತೆಗೆದುಹಾಕಿದ್ದಕ್ಕೆ ರಾಜಕೀಯ ದ್ವೇಷ ಎಂದು ಕಿಡಿಕಾರಿದ್ದ ಚಡ್ಡಾ, ಈಗ ದಿಢೀರನೆ ದೆಹಲಿ ಪಟ್ಟಿಯಲ್ಲಿ ಕಾಣಿಸಿಕೊಂಡಿರುವುದು ರಾಜಕೀಯ ವಲಯದಲ್ಲಿ ಹಲವು ಅನುಮಾನ ಹಾಗೂ ಪ್ರಶ್ನೆಗಳನ್ನು ಹುಟ್ಟುಹಾಕಿದೆ.

ಸುದ್ದಿಗೋಷ್ಠಿ ನಡೆಸಿ ಮಾತನಾಡಿದ ದೆಹಲಿ ಆಪ್ ಅಧ್ಯಕ್ಷ ಸೌರಭ್ ಭಾರದ್ವಾಜ್, ಆಗಸ್ಟ್ 31 ರಂದು ಇಸಿಐ ಪ್ರಕಟಿಸಿದ ಬೂತ್ ಸಂಖ್ಯೆ 46 ರ ಕರಡು ಪಟ್ಟಿಯಲ್ಲಿ ಕೊನೆಯ ಕ್ರಮಸಂಖ್ಯೆ 746 ಇತ್ತು. ಮತದಾರರ ಪಟ್ಟಿಯನ್ನು ಫ್ರೀಜ್ ಮಾಡಿದ್ದಾಗ, ಕರಡು ಪಟ್ಟಿ ಪ್ರಕಟವಾದ ನಂತರ ರಾಘವ್ ಚಡ್ಡಾ ಹೆಸರು 747 ನೇ ಸಂಖ್ಯೆಯಲ್ಲಿ ಹೇಗೆ ಸೇರ್ಪಡೆಯಾಯಿತು..? ಇದು ನಿಯಮ ಉಲ್ಲಂಘನೆ ಎಂದು ಆರೋಪಿಸಿದ್ದಾರೆ. ಚಡ್ಡಾ ಅವರ ಮತ ಪಂಜಾಬ್‌ನಿಂದ ದಿಲ್ಲಿಗೆ ಹೇಗೆ ವರ್ಗಾವಣೆಯಾಯಿತು ಎಂಬುದನ್ನು ಚುನಾವಣಾ ಆಯೋಗ ಸ್ಪಷ್ಟಪಡಿಸಬೇಕು ಎಂದು ಅವರು ಒತ್ತಾಯಿಸಿದ್ದಾರೆ.

ಈ ಆಕ್ಷೇಪಣೆಗಳಿಗೆ ಸ್ಪಷ್ಟನೆ ನೀಡಿರುವ ದೆಹಲಿ ಮುಖ್ಯ ಚುನಾವಣಾಧಿಕಾರಿ (CEO) ಕಚೇರಿಯ ಅಧಿಕಾರಿಗಳು, ಇದು ಯಾವುದೇ ಅಕ್ರಮವಲ್ಲ, ಸಾಮಾನ್ಯ ಪರಿಷ್ಕರಣಾ ಪ್ರಕ್ರಿಯೆ ಎಂದಿದ್ದಾರೆ. ಆಕ್ಷೇಪಣೆ ಮತ್ತು ಹಕ್ಕು ಸಲ್ಲಿಕೆಯ ಅವಧಿಯಲ್ಲಿ ಫಾರ್ಮ್ 6 (ಹೊಸ ಮತದಾರರ ನೋಂದಣಿ) ಮೂಲಕ ಬಂದ ಅರ್ಜಿಗಳನ್ನು ಪರಿಶೀಲಿಸಿ ಅನುಮೋದಿಸಲಾಗಿದೆ. ದೆಹಲಿಯಾದ್ಯಂತ ಅನುಮೋದನೆಗೊಂಡ 700 ಫಾರ್ಮ್‌ಗಳಲ್ಲಿ ರಾಘವ್ ಚಡ್ಡಾ ಅವರ ಅರ್ಜಿಯೂ ಒಂದಾಗಿದೆ ಎಂದು ತಿಳಿಸಿದ್ದಾರೆ. ಅಂತಿಮ ಮತದಾರರ ಪಟ್ಟಿ ನವೆಂಬರ್ 4 ರಂದು ಪ್ರಕಟವಾಗಲಿದೆ.

ಆಪ್ ಆರೋಪಗಳಿಗೆ ಕಟುವಾಗಿ ತಿರುಗೇಟು ನೀಡಿರುವ ರಾಘವ್ ಚಡ್ಡಾ, ನಾನು ಚುನಾವಣಾ ಆಯೋಗದ ಎಲ್ಲಾ ನಿಯಮಗಳು ಮತ್ತು ಪ್ರಕ್ರಿಯೆಗಳನ್ನು ಕಟ್ಟುನಿಟ್ಟಾಗಿ ಪಾಲಿಸಿದ್ದೇನೆ. ಕೇಜ್ರಿವಾಲ್ ಮತ್ತು ಆಪ್‌ಗೆ ಹಗಲು-ರಾತ್ರಿ ನನ್ನ ನೆನಪೇ ಕಾಡುತ್ತಿದೆ. ತಮ್ಮನ್ನು ತೊರೆದು ಹೋದ ಮಾಜಿ ಪ್ರೇಮಿಯಂತೆ ಆಪ್ ನಾಯಕರು ವರ್ತಿಸುತ್ತಿದ್ದಾರೆ ಎಂದು ಲೇವಡಿ ಮಾಡಿದ್ದಾರೆ.

2022 ರ ರಾಜ್ಯಸಭಾ ಚುನಾವಣೆಯ ವೇಳೆಯೂ ಚಡ್ಡಾ ರಾಜೇಂದರ್ ನಗರ್ ಕ್ಷೇತ್ರದ ಮತದಾರರಾಗಿದ್ದರು. ನಂತರ ಪಂಜಾಬ್‌ನಿಂದ ರಾಜ್ಯಸಭೆಗೆ ಆಯ್ಕೆಯಾದ ಮೇಲೆ, 2024 ರ ಲೋಕಸಭಾ ಚುನಾವಣೆಯಲ್ಲಿ ಮೊಹಾಲಿಯಲ್ಲಿ ಮತ ಚಲಾಯಿಸಿದ್ದರು. ಈ ವರ್ಷದ ಆರಂಭದಲ್ಲಿ ಆಪ್ ತೊರೆದು ಬಿಜೆಪಿಗೆ ಸೇರ್ಪಡೆಗೊಂಡಿದ್ದ ಚಡ್ಡಾ ಅವರ ಇತ್ತೀಚಿನ ಮತದಾರರ ಪಟ್ಟಿ ಬೆಳವಣಿಗೆ ದೆಹಲಿ ರಾಜಕಾರಣದಲ್ಲಿ ಹೊಸ ಸಂಚಲನ ಮೂಡಿಸಿದೆ(ಏಜೆನ್ಸೀಸ್​).