ಅಭೇದ್ಯ ಕೋಟೆ ಪುತಿನ್​ ಭದ್ರತೆ

ರಷ್ಯಾ ಅಧ್ಯಕ್ಷ ವ್ಲಾದಿಮಿರ್​ ಪುತಿನ್​ ಎರಡು ದಿನಗಳ ಭಾರತ ಭೇಟಿಗಾಗಿ (ಡಿಸೆಂಬರ್​ 4 ಮತ್ತು 5) ರಾಜಧಾನಿ ನವದೆಹಲಿ ಸಜ್ಜಾಗಿದೆ. 2022ರ ನಂತರ ಪುತಿನ್​ ಅವರ ಮೊದಲ ಭಾರತ ಯಾತ್ರೆ ಇದಾಗಿದೆ. ಪ್ರಧಾನಮಂತ್ರಿ ನರೇಂದ್ರ ಮೋದಿಯವರೊಂದಿಗೆ 23ನೇ ದ್ವಿಪಯ ಸಭೆಯನ್ನು ಪುತಿನ್​ ನಡೆಸಲಿದ್ದಾರೆ. ವಿಶ್ವದ ಶಕ್ತಿಶಾಲಿ ರಾಷ್ಟ್ರಗಳ ಪೈಕಿ ಒಂದಾಗಿರುವ ರಷ್ಯಾದ ಅಧ್ಯಕ್ಷರಿಗೆ ಭದ್ರತಾ ವ್ಯವಸ್ಥೆಯೂ ವಿಭಿನ್ನವಾಗಿದ್ದು, ಅಭೇದ್ಯ ಕೋಟೆಯಂತಿದೆ.

ಈ ಕುರಿತಾದ ವಿವರ ಇಲ್ಲಿದೆ.

ವ್ಲಾದಿಮಿರ್​ ಪುತಿನ್​ ರಕ್ಷಣೆಯ ಹೊಣೆ ಪ್ರೆಸಿಡೆನ್ಶಿಯಲ್​ ಸೆಕ್ಯುರಿಟಿ ಸರ್ವೀಸ್​ನದ್ದು. ಎಸ್​ಬಿಪಿ ಏಜೆನ್ಸಿ ಇದನ್ನು ನಿರ್ವಹಿಸುತ್ತದೆ. ಪುತಿನ್​ ಪ್ರವಾಸ ಕೈಗೊಳ್ಳುವ ದೇಶದ ಅಪರಾಧ ದರ, ಭಯೋತ್ಪಾದನೆಯ ಸ್ಥಿತಿ, ಪ್ರತಿಭಟನೆಗಳು ಮತ್ತು ಧಾರ್ಮಿಕ ವಾತಾವರಣದ ಬಗ್ಗೆ ಎಸ್​ಬಿಪಿ ಅಧ್ಯಯನ ನಡೆಸುತ್ತದೆ. ಈ ಅಧ್ಯಯನದ ಅವಧಿಯಲ್ಲಿ ಅಪಾಯಕಾರಿ ಅಥವಾ ಅನುಮಾನಕಾರಿ ಅಂಶಗಳು ಕಂಡುಬಂದರೆ ಅಧ್ಯಕ್ಷರ ಕಚೇರಿಗೆ ಮಾಹಿತಿ ನೀಡಲಾಗುತ್ತದೆ. ಪುತಿನ್​ ಪ್ರವಾಸದ ಕನಿಷ್ಠ ಒಂದು ತಿಂಗಳು ಮುನ್ನವೇ ಸೆಕ್ಯುರಿಟಿ ತಂಡವನ್ನು ಕಳಿಸಲಾಗುತ್ತದೆ. ಪುತಿನ್​ ತಂಗುವ ಹೋಟೆಲ್​, ಸಂಚರಿಸುವ ಮಾರ್ಗದ ಬಗ್ಗೆ ಈ ತಂಡ ಪರಿಶೀಲನೆ ನಡೆಸುತ್ತದೆ. ಪುತಿನ್​ ಹೋಟೆಲ್​ ಕೋಣೆಗೆ ತಲುಪುವ ಮೊದಲೇ ಅಲ್ಲಿನ ಸಾಬೂನು, ಶ್ಯಾಂಪೂ, ಹ್ಯಾಂಡ್​ವಾಶ್​, ಟೂತ್​ಪೆಸ್ಟ್​ ಸೇರಿದಂತೆ ದಿನಬಳಕೆಯ ವಸ್ತುಗಳನ್ನು ತೆಗೆದು, ರಷ್ಯಾದಿಂದ ತರಲಾದ ವಸ್ತುಗಳನ್ನು ಪುತಿನ್​ ಬಳಕೆಗೆ ಜೋಡಿಸಲಾಗುತ್ತದೆ.

ರಷ್ಯಾ ಅಧ್ಯಕ್ಷ ವ್ಲಾದಿಮಿರ್​ ಪುತಿನ್​ ಭೇಟಿ ಹಿನ್ನೆಲೆಯಲ್ಲಿ ದೆಹಲಿಯಲ್ಲಿ ಐದು ಹಂತಗಳ ಬಿಗಿ ಭದ್ರತೆ ಕೈಗೊಳ್ಳಲಾಗಿದೆ. ರಷ್ಯಾದ ಅಧ್ಯಯ ಭದ್ರತಾ ಸೇವೆಯಲ್ಲಿ ಉನ್ನತ ಮಟ್ಟದ ತರಬೇತಿ ಪಡೆದ ನುರಿತ ಸಿಬ್ಬಂದಿ, ಭಾರತೀಯ ರಾಷ್ಟ್ರೀಯ ಭದ್ರತಾ ದಳದ (ಎನ್​ಎಸ್​ಜಿ) ಕಮಾಂಡೊಗಳು, ಸ್ನೆಪರ್​, ಡ್ರೋನ್​, ಜಾಮರ್​ಗಳು ಮತ್ತು ಕೃತಕ ಬುದ್ಧಿಮತ್ತೆ (ಎಐ) ಆಧಾರಿತ ಪರಿಶೀಲನಾ ವ್ಯವಸ್ಥೆ ಸೇರಿದಂತೆ ಐದು ಹಂತಗಳ ಭದ್ರತೆ ಕೈಗೊಳ್ಳಲಾಗಿದೆ. ರಷ್ಯಾದ 50ಕ್ಕೂ ಹೆಚ್ಚು ಭದ್ರತಾ ಸಿಬ್ಬಂದಿ ಈಗಾಗಲೇ ದೆಹಲಿಗೆ ಆಗಮಿಸಿ, ಪರಿಶೀಲನೆ ನಡೆಸಿದ್ದಾರೆ. ಈ ಭದ್ರತಾ ಅಧಿಕಾರಿಗಳೊಂದಿಗೆ ದೆಹಲಿ ಪೊಲೀಸ್​ ಮತ್ತು ಎನ್​ಎಸ್​ಜಿ ಸಿಬ್ಬಂದಿ, ಪುತಿನ್​ ಸಾಗುವ ದಾರಿಯ ನೈರ್ಮಲ್ಯದ ಬಗ್ಗೆಯೂ ನಿಗಾ ಇಡಲಿದ್ದಾರೆ. ಪುತಿನ್​ ಭದ್ರತೆಗಾಗಿ ಸ್ಥಾಪಿಸಲಾಗಿರುವ ನಿಯಂತ್ರಣ ಕೊಠಡಿ (ಕಂಟ್ರೋಲ್​ ರೂಮ್​) ಮತ್ತು ವಿಶೇಷ ಡ್ರೋನ್​ಗಳು ಕ್ಷಣಕ್ಷಣದ ಚಲನವಲನಗಳನ್ನು ಗಮನಿಸಲಿವೆ. ಸ್ನೆಪರ್​ಗಳು ಅಧ್ಯಕ್ಷರ ಚಲನವಲನದ ಮಾರ್ಗದ ಮೇಲೆ ನಿಗಾ ವಹಿಸಲಿದ್ದಾರೆ. ಜಾಮರ್​ ಮತ್ತು ಎಐ ಆಧಾರಿತ ತಂತ್ರಜ್ಞಾನದ ಅಳವಡಿಕೆ, ಮುಖ ಗುರುತು ಪತ್ತೆ ಕ್ಯಾಮರಾ ಸೇರಿದಂತೆ ಪುತಿನ್​ ಭದ್ರತೆಗೆ ಅತ್ಯಾಧುನಿಕ ತಂತ್ರಜ್ಞಾನವನ್ನು ಬಳಸಿಕೊಳ್ಳಲಾಗಿದೆ. ರಷ್ಯಾದ ಭದ್ರತಾ ಸಿಬ್ಬಂದಿಯೇ ಪುತಿನ್​ ಅವರ ಭದ್ರತೆ ಕೈಗೊಳ್ಳಲಿದ್ದಾರೆ. ಪ್ರಧಾನಿ ನರೇಂದ್ರ ಮೋದಿ ಮತ್ತು ಪುತಿನ್​ ಭೇಟಿಯ ವೇಳೆ ಭಾರತದ ಎನ್​ಎಸ್​ಜಿ ಕಮಾಂಡೊಗಳು ರಷ್ಯಾದ ಭದ್ರತಾ ಅಧಿಕಾರಿ ಗಳೊಂದಿಗೆ ಸೇರಿಕೊಳ್ಳ ಲಿದ್ದಾರೆ.

ಪುತಿನ್​ ಆರೋಗ್ಯದ ಬಗ್ಗೆ ವಿಶೇಷ ನಿಗಾ ಇರಿಸಲಾಗುತ್ತದೆ. ವಿದೇಶ ಪ್ರವಾಸ ಕೈಗೊಂಡ ಸಂದರ್ಭಗಳಲ್ಲಿ ಅವರ ಖಾಸಗಿ ಕ್ಷಣಗಳ ಸಂದರ್ಭದಲ್ಲೂ ಭದ್ರತಾ ಸಿಬ್ಬಂದಿ ಇರುತ್ತಾರೆ. ಪುತಿನ್​ ಮಲ ಹಾಗೂ ಮೂತ್ರವನ್ನು ಒಂದು ಸೀಲ್ಡ್​ ಬ್ಯಾಗ್​ನಲ್ಲಿ ಸಂಗ್ರಹಿಸಿ, ಇದನ್ನು ಪೂಪ್​-ಭ್ರೀಫ್​ಕೇಸ್​ ಮುಖಾಂತರ ವಾಪಸ್​ ರಷ್ಯಾಗೆ ಕಳುಹಿಸಲಾಗುತ್ತದೆ. ಪುತಿನ್​ ಆರೋಗ್ಯದಲ್ಲಿ ಏನಾದರೂ ಏರುಪೇರಾಗಿದೆಯೇ ಅಥವಾ ಫುಡ್​ ಪಾಯಿಜನಿಂಗ್​ ಆಗಿದೆಯೇ ಎಂಬುದರ ಬಗ್ಗೆ ತಜ್ಞರು ಪರೀೆಕ್ಷೆ ನಡೆಸುವ ಮೂಲಕ, ಸಂಭಾವ್ಯ ಅಪಾಯಗಳನ್ನು ತಪ್ಪಿಸಲಾಗುತ್ತದೆ ಎಂದು ಫ್ರೇಂಚ್​​​ನ ವಾರಪತ್ರಿಕೆ "ಪ್ಯಾರಿಸ್​ ಮ್ಯಾಚ್​'ನಲ್ಲಿ ಪ್ರಕಟವಾದ ವರದಿಯಲ್ಲಿ ವಿವರಿಸಲಾಗಿದೆ. ಪುತಿನ್​ ಮಲ, ಮೂತ್ರದ ಮುಖೇನ ಯಾವುದೇ ದೇಶ ಅವರ ವೈದ್ಯಕಿಯ ಸ್ಥಿತಿ ಮತ್ತು ವೈದ್ಯಕಿಯ ವಿವರ ತಿಳಿಯಬಾರದು ಎಂಬ ಕಾರಣಕ್ಕೆ ಈ ರೀತಿ ಮಾಡಲಾಗುತ್ತದೆ ಎಂಬ ಇನ್ನೊಂದು ಆಯಾಮದ ಬಗ್ಗೆ ಬ್ರಿಟಿಷ್​ ಪತ್ರಿಕೆ "ದ ಇಂಡಿಪೆಂಡೆಂಟ್​' 2022ರಲ್ಲಿ ಪ್ರಕಟಿಸಿದ ವರದಿಯಲ್ಲಿ ಮಾಹಿತಿ ನೀಡಿದೆ. ಮಲದ ಸ್ಯಾಂಪಲ್​ ಪರೀಕ್ಷೆಯ ಮುಖಾಂತರ ವ್ಯಕ್ತಿಯ ಕಾಯಿಲೆಗಳು, ಇದಕ್ಕಾಗಿ ಆ ವ್ಯಕ್ತಿ ಯಾವ ಔಷಧಗಳನ್ನು ತೆಗೆದುಕೊಳ್ಳುತ್ತಾರೆ ಎಂಬ ಮಾಹಿತಿಗಳನ್ನು ಪತ್ತೆ ಹಚ್ಚಬಹುದಾಗಿದೆ. 2025ರ ಆಗಸ್ಟ್​ನಲ್ಲಿ ಅಮೆರಿಕ ಅಧ್ಯಕ್ಷ ಡೊನಾಲ್ಡ್​ ಟ್ರಂಪ್​ ಭೇಟಿಗೆ ಪುತಿನ್​ ಅಲಾಸ್ಕಾಗೆ ಬಂದಿದ್ದಾಗ, ಅವರ ಭದ್ರತಾ ಸಿಬ್ಬಂದಿ ಪೂಪ್​-ಭ್ರೀಫ್​ಕೇಸ್​​ ತಂದಿದ್ದರು ಎಂದು ಅಮೆರಿಕನ್​ ಮಾಧ್ಯಮಗಳು ವರದಿ ಮಾಡಿದ್ದವು.

ಪುತಿನ್​ ಬಾಡಿಗಾರ್ಡ್​ಗಳಾಗಲು ಕಠಿಣ ನಿಯಮಗಳಿವೆ. ಬಹುತೇಕ ಅಂಗರಕ್ಷಕರು ರಷ್ಯಾದ ಪ್ರಮುಖ ಭದ್ರತಾ ಏಜೆನ್ಸಿ ಫೆಡರಲ್​ ಸೆಕ್ಯೂರಿಟಿ ಸರ್ವಿಸ್​ (ಎಫ್​ಎಸ್​​ಬಿ)ನಿಂದ ಪದವಿ ಪಡೆದವರಾಗಿರುತ್ತಾರೆ. ನೇಮಕಾತಿಯ ಮುಂಚೆ ಹಲವು ಸುತ್ತಿನ ಸಂದರ್ಶನ ಮತ್ತು ಪಾಲಿಗ್ರಾಫ್​ ಟೆಸ್ಟ್​ನ್ನೂ ನಡೆಸಲಾಗುತ್ತದೆ.

ಪುತಿನ್​ ಯಾವುದೇ ದೇಶಕ್ಕೆ ಭೇಟಿ ನೀಡುವ ಹಲವು ದಿನಗಳ ಮುನ್ನವೇ ರಷ್ಯಾದಿಂದ ಶೌಚಗೃಹ, ಟೆಲಿೋನ್​ ಬೂತ್​ ಆಗಮಿಸುತ್ತದೆ. ಪುತಿನ್​ ಸ್ಮಾರ್ಟ್​ಫೋನ್​ ಬಳಸುವುದಿಲ್ಲ. ಸುರತ ಕಮ್ಯುನಿಕೇಶನ್​ ಸಂಪರ್ಕದ ಮೂಲಕ ಮಾತನಾಡುತ್ತಾರೆ. ಹೀಗಾಗಿ, ಅಧ್ಯಕ್ಷರು ತಂಗುವ ಕೋಣೆಯಲ್ಲಿ ಟೆಲಿಫೋನ್​​ ಬೂತ್​ನ್ನು ತಾತ್ಕಾಲಿಕವಾಗಿ ಇನ್​ಸ್ಟಾಲ್​ ಮಾಡಲಾಗುತ್ತದೆ. ಪುತಿನ್​ ಹೋಟೆಲ್​ ಕೋಣೆಯ ಬಾತ್​ರೂಮ್​ ಕೂಡ ಬಳಸುವುದಿಲ್ಲ. ಇದಕ್ಕಾಗಿ ರಷ್ಯಾದಿಂದಲೇ ಸಂಚಾರಿ ಬಾತ್​ರೂಮ್​ನ್ನು ತಂದು ಹೋಟೆಲ್​ ಕೊಣೆಯಲ್ಲಿ ಅಳವಡಿಸಲಾಗುತ್ತದೆ.

ವಿಮಾನದಿಂದ ಇಳಿದ ಬಳಿಕ ಪುತಿನ್​ ಅತ್ಯಾಧುನಿಕ ಆರಸ್​ ಸಿನೆಟ್​ ಕಾರ್​ನಲ್ಲಿ ಪ್ರಯಾಣಿಸುತ್ತಾರೆ. 2018ರಿಂದ ಅವರು ಆರಸ್​ ಸಿನೆಟ್​ ಕಾರ್​ ಉಪಯೋಗಿಸುತ್ತಿದ್ದಾರೆ. ರಷ್ಯಾದ ಆರಸ್​ ಮೋಟಾರ್ಸ್​ ಸೆಂಟ್ರಲ್​ ಸೈಂಟಿಫಿಕ್​ ರಿಸರ್ಚ್​ ಆಟೋಮೊಬೈಲ್​ ಆ್ಯಂಡ್​ ಆಟೋಮೇಟಿವ್​ ಇಂಜಿನ್​ ಇನ್​ಸ್ಟಿಟ್ಯೂಟ್​ ಜತೆಗೂಡಿ ಈ ಕಾರನ್ನು ವಿನ್ಯಾಸಗೊಳಿಸಿದೆ. ಈ ಕಾರಿನ ಸುರೆಯ ಫೀಚರ್​ಗಳನ್ನು ಬಹುತೇಕ ರಹಸ್ಯವಾಗಿ ಇರಿಸಲಾಗುತ್ತದೆ. ಕಮಾಂಡ್​ ಸಿಸ್ಟಮ್​ನ್ನು ಒಳಗೊಂಡಿದ್ದು, ಕಾರಿನಲ್ಲೇ ಕುಳಿತು ಪುತಿನ್​ ಆದೇಶ ನೀಡಬಹುದಾಗಿದೆ. ತುರ್ತು ನಿರ್ಗಮನಕ್ಕೆ ಅವಕಾಶ ಕಲ್ಪಿಸಲಾಗಿದೆ. ಈ ಕಾರ್​ ರಸ್ತೆಯಲ್ಲಿ ಗಂಟೆಗೆ ಗರಿಷ್ಠ 249 ಕಿ.ಮೀ. ವೇಗದಲ್ಲಿ ಚಲಿಸಬಲ್ಲದು. ನಾಲ್ಕೂ ಟೈರ್​ಗಳು ಪಂಕ್ಚರ್​ಗೊಂಡರೂ, ಪ್ರಯಾಣ ನಿರಾಂತಕವಾಗಿ ಮುಂದುವರಿಸುವ ತಂತ್ರಜ್ಞಾನ ಸೌಲಭ್ಯ ಹೊಂದಿದೆ. ಕಾರಿನಲ್ಲಿ ಪೊಲ್ಡೇಬಲ್​ ಟೇಬಲ್​ ಮತ್ತು ಮಿನಿ ರೆಫ್ರಿಜರೇಟರ್​ನ್ನು ಅಳವಡಿಸಲಾಗಿದೆ. 2025ರ ಆಗಸ್ಟ್​ನಲ್ಲಿ ಎಸ್​ಸಿಒ ಶೃಂಗಸಭೆಗಾಗಿ ಪ್ರಧಾನಿ ನರೇಂದ್ರ ಮೋದಿ ಚೀನಾಗೆ ತೆರಳಿದ್ದಾಗ ಪುತಿನ್​ ಜತೆ ಇದೇ ಕಾರಿನಲ್ಲಿ ಪ್ರಯಾಣಿಸಿದ್ದರು. ಉತ್ತರ ಕೊರಿಯಾದ ಅಧ್ಯಕ್ಷ ಕಿಮ್​ ಜೊಂಗ್​ ಉನ್​ಗೆ ಕಳೆದ ವರ್ಷ ಪುತಿನ್​ ಇದೇ ಕಾರ್​ನ್ನು ಉಡುಗೊರೆಯಾಗಿ ನೀಡಿದ್ದಾರೆ.

ಪುತಿನ್​ ಎಲ್ಲಿಗೇ ಹೋದರೂ ಅವರ ಜತೆ ಕನಿಷ್ಠ 100 ಜನರ ತಂಡವಿರುತ್ತದೆ. ವೈಯಕ್ತಿಕ ಅಂಗರಕ್ಷಕರು, ಎಸ್​ಬಿಪಿ, ಫೆಡರಲ್​ ಪ್ರೊಟೆಕ್ಟಿವ್​ ಸರ್ವಿಸ್​ (ಎಫ್​ಎಸ್​ಒ) ಸದಸ್ಯರು, ಶಿಷ್ಟಾಚಾರ ಅಧಿಕಾರಿಗಳು, ಅಧ್ಯಕ್ಷರ ಕಚೇರಿಯ ಆಡಳಿತಾತ್ಮಕ ಉನ್ನತ ಅಧಿಕಾರಿಗಳು ಮತ್ತು ಕೆಲ ಪತ್ರಕರ್ತರು ಈ ತಂಡದಲ್ಲಿರುತ್ತಾರೆ. ಪುತಿನ್​ ಜತೆ ವಿದೇಶ ಪ್ರವಾಸಕ್ಕೆ ನಿಯೋಜನೆಯಾಗುವ ಅಂಗರಕ್ಷರನ್ನು ಪ್ರವಾಸದ ಮುನ್ನ ಎರಡು ವಾರಗಳ ಕಾಲ ಕ್ವಾರಂಟೈನ್​ನಲ್ಲಿ ಇರಿಸಲಾಗುತ್ತದೆ.

ಪುತಿನ್​ ತಂಗುವ ಹೋಟೆಲ್​ನಲ್ಲಿ ಅಲ್ಲಿನ ಸಿಬ್ಬಂದಿಯ ಸೇವೆ ಪಡೆಯುವುದಿಲ್ಲ. ಪುತಿನ್​ ಸಹಾಯಕ ಸಿಬ್ಬಂದಿ, ಅಡುಗೆ ಸಿಬ್ಬಂದಿ ಮತ್ತು ಹೌಸ್​ ಕಿಪಿಂಗ್​ ಸಿಬ್ಬಂದಿ ರಷ್ಯಾದಿಂದಲೇ ಪುತಿನ್​ ಜತೆ ಆಗಮಿಸುತ್ತಾರೆ.

ಅಡುಗೆ ತಯಾರಿಸುವ ಮತ್ತು ಅದನ್ನು ಸರ್ವ್​ ಮಾಡುವ ಸಿಬ್ಬಂದಿಗೆ ಪ್ರತ್ಯೇಕ ಲಿಫ್ಟ್​ ಅಳವಡಿಸಲಾಗುತ್ತದೆ. ಈ

ಲಿಫ್ಟ್​ನ್ನು ಇತರ ಸಿಬ್ಬಂದಿ ಬಳಸುವಂತಿಲ್ಲ.

ಅಡುಗೆ ತಯಾರಿಸಲು ಬೇಕಾಗುವ ಸಾಮಗ್ರಿಗಳನ್ನು ಕೂಡ ಸಂಬಂಧಪಟ್ಟ ಸಿಬ್ಬಂದಿ ರಷ್ಯಾದಿಂದಲೇ ತರುತ್ತಾರೆ. ಈ ಸಾಮಗ್ರಿಗಳ ಗುಣಮಟ್ಟವನ್ನು ಮುಂಚೆಯೇ ಪರೀಸಲಾಗಿರುತ್ತದೆ.