ಸಾಮಾಜಿಕ ಜಾಲತಾಣಗಳು ಮತ್ತು ಕೃತಕ ಬುದ್ಧಿಮತ್ತೆಯ (ಎಐ) ಆನ್ಲೈನ್ ಆಪತ್ತುಗಳಿಂದ ಮಕ್ಕಳನ್ನು ಕಾಪಾಡಲು ಆಸ್ಟ್ರೇಲಿಯಾ ನೇತೃತ್ವದಲ್ಲಿ ಜಾಗತಿಕ ಮಟ್ಟದ ಬೃಹತ್ ಒಕ್ಕೂಟ ರಚನೆಗೆ ಸಿದ್ಧತೆ ನಡೆದಿದೆ. ಮೆಟಾ, ಗೂಗಲ್ ಹಾಗೂ ಟಿಕ್ಟಾಕ್ನಂತಹ ಜಾಗತಿಕ ಟೆಕ್ ದೈತ್ಯ ಸಂಸ್ಥೆಗಳನ್ನು ಮಕ್ಕಳ ಭದ್ರತೆಯ ವಿಷಯದಲ್ಲಿ ಹೊಣೆಗಾರರನ್ನಾಗಿ ಮಾಡುವುದು ಈ ವಿನೂತನ ಉಪಕ್ರಮದ ಮುಖ್ಯ ಉದ್ದೇಶ. ಕೆನಡಾ, ಬ್ರಿಟನ್, ಸ್ವೀಡನ್ ಸೇರಿದಂತೆ ಹಲವು ಪ್ರಮುಖ ರಾಷ್ಟ್ರಗಳು ಈ ಮೈತ್ರಿಗೆ ಕೈಜೋಡಿಸುತ್ತಿದ್ದು, ಜಾಗತಿಕ ಆನ್ಲೈನ್ ಸುರಕ್ಷತೆಗೆ ಕನಿಷ್ಠ ಸಾರ್ವತ್ರಿಕ ಮಾನದಂಡಗಳನ್ನು ರೂಪಿಸಲು ಈ ಜಾಗತಿಕ ಒಕ್ಕೂಟ ಮುಂದಾಗಿದೆ.
ಇಂದಿನ ಡಿಜಿಟಲ್ ಯುಗದಲ್ಲಿ ಮಕ್ಕಳು ಚಿಕ್ಕ ವಯಸ್ಸಿನಲ್ಲೇ ಇಂಟರ್ನೆಟ್, ಸಾಮಾಜಿಕ ಜಾಲತಾಣಗಳು ಮತ್ತು ಎಐ ಚಾಟ್ಬಾಟ್ಗಳ ವ್ಯಾಪಕ ಜಾಲಕ್ಕೆ ತೆರೆದುಕೊಳ್ಳುತ್ತಿದ್ದಾರೆ. ಶಿಕ್ಷಣ ಮತ್ತು ಶಿಕ್ಷಣೇತರ ಕಲಿಕೆಗೆ ತಂತ್ರಜ್ಞಾನ ನೆರವಾಗುತ್ತಿದ್ದರೂ, ಅದರ ಹಿಂದೆ ಅಡಗಿರುವ ಸೈಬರ್ ಬೆದರಿಕೆ, ಅಪ್ರಾಪ್ತರ ಮೇಲಿನ ದೌರ್ಜನ್ಯ, ಅಶ್ಲೀಲ ವಿಷಯಗಳ ಹರಡುವಿಕೆ ಮತ್ತು ಡೀಪ್ಫೇಕ್ ತಂತ್ರಜ್ಞಾನದ ದುರ್ಬಳಕೆ ತೀವ್ರ ಆತಂಕಕ್ಕೆ ಕಾರಣವಾಗಿದೆ. ಈ ಗಂಭೀರ ಸವಾಲನ್ನು ಯಾವುದೇ ಒಂದು ದೇಶ ಒಂಟಿಯಾಗಿ ಎದುರಿಸುವುದು ಸಾಧ್ಯವಿಲ್ಲ ಎಂಬುದನ್ನು ಮನಗಂಡಿರುವ ಆಸ್ಟ್ರೇಲಿಯಾ, ಪ್ರಪಂಚದ ನಾನಾ ರಾಷ್ಟ್ರಗಳನ್ನು ಒಂದೇ ವೇದಿಕೆಯಡಿ ತರಲು ಮಹತ್ವದ ಹೆಜ್ಜೆ ಇಟ್ಟಿದೆ. ತಂತ್ರಜ್ಞಾನ ಸಂಸ್ಥೆಗಳಿಗೆ ಕೇವಲ ಲಾಭವಷ್ಟೇ ಮುಖ್ಯವಾಗದೆ, ಬಳಕೆದಾರರ ಅದರಲ್ಲೂ ವಿಶೇಷವಾಗಿ ಮಕ್ಕಳ ಡಿಜಿಟಲ್ ಸುರಕ್ಷತೆಯ ಹೊಣೆಗಾರಿಕೆಯನ್ನು ನಿಗದಿಪಡಿಸುವುದು ಈ ಜಾಗತಿಕ ಮೈತ್ರಿಕೂಟದ ಮೂಲ ಉದ್ದೇಶವಾಗಿದೆ.
ಜಾಗತಿಕ ಒಕ್ಕೂಟದ ಅಗತ್ಯ
ಇಂಟರ್ನೆಟ್ ಮತ್ತು ಡಿಜಿಟಲ್ ಮಾಧ್ಯಮಗಳು ಭೌಗೋಳಿಕ ಗಡಿಗಳನ್ನು ಮೀರಿ ಬೆಳೆದಿವೆ. ಎಲ್ಲೋ ಒಂದೆಡೆ ಕುಳಿತು ಸೃಷ್ಟಿಸುವ ಹಾನಿಕಾರಕ ಡಿಜಿಟಲ್ ವಿಷಯಗಳು ಜಗತ್ತಿನ ಯಾವುದೇ ಮೂಲೆಯಲ್ಲಿರುವ ಮಗುವಿನ ಮೇಲೆಯೂ ಕೆಟ್ಟ ಪರಿಣಾಮ ಬೀರಬಲ್ಲವು. ಈ ವಿಷಯದಲ್ಲಿ ವಿವಿಧ ದೇಶಗಳು ತಮ್ಮ ತಮ್ಮ ವ್ಯಾಪ್ತಿಯಲ್ಲಿ ಜಾರಿಗೆ ತಂದಿರುವ ಸ್ಥಳೀಯ ಕಾನೂನುಗಳನ್ನು ಸುಲಭವಾಗಿ ಉಲ್ಲಂಘಿಸುವಲ್ಲಿ ಟೆಕ್ ಕಂಪನಿಗಳು ಯಶಸ್ವಿಯಾಗುತ್ತಿವೆ. ಈ ಹಿನ್ನೆಲೆಯಲ್ಲಿ ಜಾಗತಿಕ ಮಟ್ಟದಲ್ಲಿ ಎಲ್ಲ ದೇಶಗಳು ಒಟ್ಟಾಗಿ ಒಂದೇ ರೀತಿಯ ಕನಿಷ್ಠ ಸುರಕ್ಷತಾ ಮಾನದಂಡಗಳನ್ನು ರೂಪಿಸಿದರೆ ಮಾತ್ರ ತಂತ್ರಜ್ಞಾನ ಸಂಸ್ಥೆಗಳನ್ನು ಪರಿಣಾಮಕಾರಿಯಾಗಿ ನಿಯಂತ್ರಿಸಲು ಸಾಧ್ಯ.
ಆಸ್ಟ್ರೇಲಿಯಾದ ಸಂವಹನ ಸಚಿವೆ ಅನಿಕಾ ವೆಲ್ಸ್ ಈ ಮಹತ್ವದ ಪ್ರಸ್ತಾಪವನ್ನು ಜಗತ್ತಿನ ಮುಂದಿಟ್ಟಿದ್ದಾರೆ. ವಿಶ್ವದ ಪ್ರಮುಖ ದೈತ್ಯ ಟೆಕ್ ಕಂಪನಿಗಳಾದ ಮೆಟಾ (ಫೇಸ್ಬುಕ್, ಇನ್ಸ್ಟಾಗ್ರಾಂನ ಒಡೆತನ ಹೊಂದಿರುವ ಸಂಸ್ಥೆ), ಗೂಗಲ್ ಮತ್ತು ಟಿಕ್ಟಾಕ್ನಂತಹ ಸಂಸ್ಥೆಗಳು ತಮ್ಮ ವೇದಿಕೆಗಳಲ್ಲಿ ಮಕ್ಕಳ ಸುರಕ್ಷತೆಗೆ ಸಂಪೂರ್ಣ ಜವಾಬ್ದಾರಿ ವಹಿಸಿಕೊಳ್ಳುವಂತೆ ಒತ್ತಡ ಹೇರುವುದು ಈ ಒಕ್ಕೂಟದ ಪ್ರಮುಖ ಗುರಿಯಾಗಿದೆ. ಟಿಕ್ಟಾಕ್ ಭಾರತದಲ್ಲಿ ನಿಷೇಧಗೊಂಡಿದ್ದರೂ ಬೇರೆ ಹಲವು ದೇಶಗಳಲ್ಲಿ ಸಕ್ರಿಯವಾಗಿದೆ.
ಕೈಜೋಡಿಸುತ್ತಿರುವ ರಾಷ್ಟ್ರಗಳು
ಆಸ್ಟ್ರೇಲಿಯಾ ಮುನ್ನಡೆಸುತ್ತಿರುವ ಈ ಆನ್ಲೈನ್ ಸುರಕ್ಷತಾ ಅಭಿಯಾನಕ್ಕೆ ಜಗತ್ತಿನಾದ್ಯಂತ ಅಭಿವೃದ್ಧಿಶೀಲ ಹಾಗೂ ಅಭಿವೃದ್ಧಿ ಹೊಂದಿದ ರಾಷ್ಟ್ರಗಳಿಂದ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದೆ. ಈಗಾಗಲೇ ಈ ಕೆಳಗಿನ ಪ್ರಮುಖ ರಾಷ್ಟ್ರಗಳೊಂದಿಗೆ ಉನ್ನತ ಮಟ್ಟದ ರಾಜತಾಂತ್ರಿಕ ಚರ್ಚೆಗಳು ಪೂರ್ಣಗೊಂಡಿವೆ.
ಮಲೇಷ್ಯಾ: ಆಗ್ನೇಯ ಏಷ್ಯಾದಲ್ಲಿ ಮಕ್ಕಳ ಆನ್ಲೈನ್ ಸುರಕ್ಷತೆಗೆ ಸಂಬಂಧಿಸಿದಂತೆ ಕಟ್ಟುನಿಟ್ಟಿನ ನಿಯಮಗಳನ್ನು ಜಾರಿಗೆ ತರಲು ಶ್ರಮಿಸುತ್ತಿರುವ ರಾಷ್ಟ್ರ.
ಫಿಲಿಪೈನ್ಸ್: ಸೈಬರ್ ಅಪರಾಧಗಳು ಮತ್ತು ಅಪ್ರಾಪ್ತರ ಮೇಲಿನ ಆನ್ಲೈನ್ ಶೋಷಣೆ ತಡೆಯಲು ಜಾಗತಿಕ ಸಹಕಾರವನ್ನು ಬಯಸುತ್ತಿರುವ ದೇಶ.
ನ್ಯೂಜಿಲೆಂಡ್: ನೆರೆರಾಷ್ಟ್ರ ಆಸ್ಟ್ರೇಲಿಯಾದ ತಂತ್ರಜ್ಞಾನ ನಿಯಂತ್ರಣ ನೀತಿಗಳಿಗೆ ಸಂಪೂರ್ಣ ಬೆಂಬಲ ಸೂಚಿಸಿರುವ ಮಿತ್ರರಾಷ್ಟ್ರ.
ಕೆನಡಾ: ಡಿಜಿಟಲ್ ಹಕ್ಕುಗಳು ಮತ್ತು ಮಕ್ಕಳ ಮಾನಸಿಕ ಆರೋಗ್ಯ ರಕ್ಷಣೆಗೆ ಆದ್ಯತೆ ನೀಡುತ್ತಿರುವ ದೇಶ.
ಸ್ವೀಡನ್: ಯುರೋಪ್ ಖಂಡದಲ್ಲಿ ಅತ್ಯಂತ ಕಟ್ಟುನಿಟ್ಟಿನ ಸಾಂಸ್ಕೃತಿಕ ಹಾಗೂ ಡಿಜಿಟಲ್ ಭದ್ರತಾ ಕಾಯ್ದೆಗಳನ್ನು ಹೊಂದಿರುವ ರಾಷ್ಟ್ರ.
ಬ್ರಿಟನ್ (ಯುಕೆ): ಆನ್ಲೈನ್ ಸೇಫ್ಟಿ ಆಕ್ಟ್ ಮೂಲಕ ಈಗಾಗಲೇ ಟೆಕ್ ಕಂಪನಿಗಳಿಗೆ ಕಠಿಣ ನಿಯಮ ವಿಧಿಸಿರುವ ಪ್ರಮುಖ ರಾಷ್ಟ್ರ. ಈ ಎಲ್ಲ ದೇಶಗಳು ಒಂದೇ ವೇದಿಕೆಯಲ್ಲಿ ನಿಂತು ಕನಿಷ್ಠ ಸಾರ್ವತ್ರಿಕ ನಿಯಮಗಳನ್ನು ರೂಪಿಸಿದಾಗ, ಟೆಕ್ ಕಂಪನಿಗಳು ಆ ನಿಯಮಗಳನ್ನು ಪಾಲಿಸುವುದು ಅನಿವಾರ್ಯವಾಗುತ್ತದೆ.
ಡಿಸೈನ್ ಹಂತದಲ್ಲೇ ಬೇಕು ಸುರಕ್ಷತೆ
ಟೆಕ್ ಕಂಪನಿಗಳು ತಮ್ಮ ಉತ್ಪನ್ನಗಳನ್ನು ರೂಪಿಸುವ ಹಂತದಲ್ಲೇ ಸುರಕ್ಷತಾ ಕ್ರಮಗಳ ಅಳವಡಿಕೆಯನ್ನು ಕಡ್ಡಾಯಗೊಳಿಸುವುದು ಈ ನೂತನ ಜಾಗತಿಕ ಪ್ರಸ್ತಾಪದ ಅತ್ಯಂತ ವಿಶಿಷ್ಟ ಅಂಶ. ಇದನ್ನು ತಾಂತ್ರಿಕ ಭಾಷೆಯಲ್ಲಿ ‘ಸೇಫ್ಟಿ ಬೈ ಡಿಸೈನ್’ ಎಂದು ಕರೆಯಲಾಗುತ್ತದೆ. ಸಾಮಾಜಿಕ ಜಾಲತಾಣಗಳು, ಎಐ ಚಾಟ್ಬಾಟ್ಗಳು, ಆನ್ಲೈನ್ ಗೇಮಿಂಗ್ ಆಪ್ಗಳು ಮತ್ತು ಇತರ ಎಲ್ಲ ತಂತ್ರಜ್ಞಾನ ವೇದಿಕೆಗಳು ತಮ್ಮ ಸಾಫ್ಟ್ವೇರ್ ವಿನ್ಯಾಸಗೊಳಿಸುವಾಗಲೇ ಮಕ್ಕಳ ಪೊ›ಫೈಲ್ಗಳಿಗೆ ಹೆಚ್ಚುವರಿ ಭದ್ರತಾ ಪದರಗಳನ್ನು (ಸೆಕ್ಯುರಿಟಿ ಲೇಯರ್ಸ್) ನೀಡಬೇಕಾಗುತ್ತದೆ. ಉದಾಹರಣೆಗೆ, ಅಪ್ರಾಪ್ತ ವಯಸ್ಕರ ಖಾತೆಗಳನ್ನು ಸ್ವಯಂಚಾಲಿತವಾಗಿ ಖಾಸಗಿ (ಪ್ರೖೆವೇಟ್) ಖಾತೆಗಳನ್ನಾಗಿ ಮಾಡುವುದು, ಹಾನಿಕಾರಕ ವಿಷಯಗಳು ಅವರ ಫೀಡ್ಗೆ ಬರದಂತೆ ಎಐ ಫಿಲ್ಟರ್ಗಳನ್ನು ಸ್ವಯಂಚಾಲಿತವಾಗಿ ಅಳವಡಿಸುವುದು ಮತ್ತು ಅನುಮಾನಾಸ್ಪದ ಸಂಪರ್ಕಗಳನ್ನು ಸ್ವಯಂಪ್ರೇರಿತವಾಗಿ ನಿರ್ಬಂಧಿಸುವುದು ಈ ವ್ಯವಸ್ಥೆಯ ಭಾಗವಾಗಿರುತ್ತದೆ.
ಆನ್ಲೈನ್ ವ್ಯಸನದ ಮೇಲೆ ನಿಗಾ
ಫೇಸ್ಬುಕ್, ಇನ್ಸ್ಟಾಗ್ರಾಂ ಅಥವಾ ಯೂಟ್ಯೂಬ್ ಮಾತ್ರವಲ್ಲದೆ, ಪ್ರಸ್ತುತ ಮಕ್ಕಳನ್ನು ಹೆಚ್ಚು ಆಕರ್ಷಿಸುತ್ತಿರುವ ಆನ್ಲೈನ್ ಗೇಮಿಂಗ್ ವೇದಿಕೆಗಳು ಮತ್ತು ಎಐ ಚಾಟ್ಬಾಟ್ಗಳ ಮೇಲೆಯೂ ಈ ಒಕ್ಕೂಟ ಕಣ್ಣಿಡಲಿದೆ. ಅನೇಕ ಆನ್ಲೈನ್ ಗೇಮ್ಳಲ್ಲಿರುವ ಲೈವ್ ಚಾಟ್ ಆಯ್ಕೆಗಳನ್ನು ಬಳಸಿಕೊಂಡು ಅಪರಿಚಿತರು ಮಕ್ಕಳನ್ನು ದುರ್ಬಳಕೆ ಮಾಡಿಕೊಳ್ಳುತ್ತಿರುವ ಪ್ರಕರಣಗಳು ವರದಿಯಾಗುತ್ತಿವೆ. ಅದಲ್ಲದೆ, ಎಐ ಚಾಟ್ಬಾಟ್ಗಳು ಸೂಕ್ತ ನಿಯಂತ್ರಣವಿಲ್ಲದೆ ಮಕ್ಕಳೊಂದಿಗೆ ನಡೆಸುವ ಸಂಭಾಷಣೆಗಳು ಅವರ ಮನಸ್ಸಿನ ಮೇಲೆ ನಕಾರಾತ್ಮಕ ಪರಿಣಾಮ ಬೀರುತ್ತಿವೆ. ಈ ಎಲ್ಲ ಡಿಜಿಟಲ್ ವೇದಿಕೆಗಳಿಗೂ ಕನಿಷ್ಠ ಸಾರ್ವತ್ರಿಕ ನಿಯಮಗಳನ್ನು ಅನ್ವಯಿಸುವ ಮೂಲಕ ಮಕ್ಕಳ ಡಿಜಿಟಲ್ ಜಗತ್ತನ್ನು ಸುರಕ್ಷಿತಗೊಳಿಸುವುದು ಈ ಜಾಗತಿಕ ಒಕ್ಕೂಟದ ಅಂತಿಮ ಗುರಿ.
ಮಕ್ಕಳು ಎದುರಿಸುತ್ತಿರುವ ಆನ್ಲೈನ್ ಆಪತ್ತುಗಳೇನು?
ಪ್ರಸ್ತುತ ಡಿಜಿಟಲ್ ಲೋಕದಲ್ಲಿ ಮಕ್ಕಳು ಕೇವಲ ಸಾಮಾಜಿಕ ಮಾಧ್ಯಮಗಳಿಂದಷ್ಟೇ ಅಲ್ಲದೆ, ವೇಗವಾಗಿ ಬೆಳೆಯುತ್ತಿರುವ ಕೃತಕ ಬುದ್ಧಿಮತ್ತೆಯ (ಎಐ) ಉಪಕರಣಗಳಿಂದಲೂ ತೀವ್ರ ಸ್ವರೂಪದ ಬೆದರಿಕೆಗಳನ್ನು ಎದುರಿಸುತ್ತಿದ್ದಾರೆ. ಈ ಒಕ್ಕೂಟವು ಮುಖ್ಯವಾಗಿ ಈ ಕೆಳಗಿನ ಆಪತ್ತುಗಳಿಂದ ಮಕ್ಕಳನ್ನು ರಕ್ಷಿಸಲು ಗಮನ ಹರಿಸಲಿದೆ.
ಸೈಬರ್ ಬುಲ್ಲಿಯಿಂಗ್ (ಆನ್ಲೈನ್ ಬೆದರಿಕೆ): ಸಾಮಾಜಿಕ ಜಾಲತಾಣಗಳಲ್ಲಿ ಮಕ್ಕಳನ್ನು ಗುರಿಯಾಗಿಸಿಕೊಂಡು ನಡೆಸುವ ನಿಂದನೆ, ಮಾನಸಿಕ ಕಿರುಕುಳ ಮತ್ತು ಟ್ರೋಲ್ ಮಾಡುವ ಕುಸಂಸ್ಕೃತಿ ಮಕ್ಕಳ ಮಾನಸಿಕ ಆರೋಗ್ಯದ ಮೇಲೆ ತೀವ್ರ ಹಾನಿ ಉಂಟುಮಾಡುತ್ತಿದೆ.
ಹಿಂಸೆ ಮತ್ತು ಅಶ್ಲೀಲ ವಿಷಯಗಳು: ನಿಯಂತ್ರಣವಿಲ್ಲದ ಆನ್ಲೈನ್ ವೇದಿಕೆಗಳ ಮೂಲಕ ವಯಸ್ಸಿಗೆ ಮೀರಿದ ಅತ್ಯಂತ ಹಿಂಸಾತ್ಮಕ ಮತ್ತು ಅಶ್ಲೀಲ ದೃಶ್ಯಗಳು ಮಕ್ಕಳಿಗೆ ಸುಲಭವಾಗಿ ಸಿಗುತ್ತಿದ್ದು, ಅವರ ಸ್ವಭಾವ ಮತ್ತು ಮಾನಸಿಕ ಬೆಳವಣಿಗೆ ಮೇಲೆ ದುಷ್ಪರಿಣಾಮ ಉಂಟು ಮಾಡುತ್ತಿವೆ.
ಡೀಪ್ಫೇಕ್ ತಂತ್ರಜ್ಞಾನದ ದುರ್ಬಳಕೆ: ಎಐ ತಂತ್ರಜ್ಞಾನದ ಸಹಾಯದಿಂದ ಮಕ್ಕಳ ಭಾವಚಿತ್ರಗಳನ್ನು ದುರ್ಬಳಕೆ ಮಾಡಿಕೊಂಡು ನಕಲಿ ವಿಡಿಯೋ ಮತ್ತು ಆಡಿಯೋಗಳನ್ನು ಸೃಷ್ಟಿಸಿ ಬ್ಲಾ್ಯಕ್ವೆುೕಲ್ ಮಾಡುವ ಅಪರಾಧಗಳು ಇತ್ತೀಚೆಗೆ ಹೆಚ್ಚುತ್ತಿವೆ.
ಆನ್ಲೈನ್ ಸೈಬರ್ ಅಪರಾಧಗಳು: ಹಣಕಾಸಿನ ವಂಚನೆ, ಆನ್ಲೈನ್ ಗೇಮಿಂಗ್ ಅಡಿಕ್ಷನ್ ಮತ್ತು ಅಪರಿಚಿತ ಸೈಬರ್ ಅಪರಾಧಿಗಳ ಜಾಲಕ್ಕೆ ಮಕ್ಕಳು ಸುಲಭವಾಗಿ ಬಲಿಯಾಗುತ್ತಿದ್ದಾರೆ.
ಟೆಕ್ ಕಂಪನಿಗಳಿಗೆ ಮೌಲ್ಯಮಾಪನ
ಈ ಜಾಗತಿಕ ಒಕ್ಕೂಟದ ನಿಯಮಾವಳಿಗಳಡಿ ಮೆಟಾ, ಗೂಗಲ್, ಟಿಕ್ಟಾಕ್ನಂತಹ ಪ್ರತಿಯೊಂದು ತಾಂತ್ರಿಕ ಸಂಸ್ಥೆಯೂ ಪ್ರತಿ ವರ್ಷ ಕಡ್ಡಾಯವಾಗಿ ಡಿಜಿಟಲ್ ಆಪತ್ತಿನ ಮೌಲ್ಯಮಾಪನ (ರಿಸ್ಕ್ ಅಸೆಸ್ವೆುಂಟ್) ವರದಿಯನ್ನು ಸಿದ್ಧಪಡಿಸಬೇಕಾಗುತ್ತದೆ. ತಮ್ಮ ವೇದಿಕೆಗಳಿಂದ ಮಕ್ಕಳಿಗೆ ಯಾವ ರೀತಿಯ ಅಪಾಯಗಳು ಎದುರಾಗುತ್ತಿವೆ ಎಂಬುದನ್ನು ಕಂಪನಿಗಳೇ ಸ್ವತಃ ಅಧ್ಯಯನ ನಡೆಸಿ, ಆ ಅಪಾಯಗಳನ್ನು ತಗ್ಗಿಸಲು ತಾವು ಕೈಗೊಂಡಿರುವ ಕ್ರಮಗಳ ವಿವರವಾದ ವರದಿಯನ್ನು ಸರ್ಕಾರಗಳಿಗೆ ಸಲ್ಲಿಸಬೇಕಾಗುತ್ತದೆ. ಒಂದು ವೇಳೆ ಅಪಾಯಗಳನ್ನು ತಡೆಯುವಲ್ಲಿ ಅಥವಾ ಸುರಕ್ಷತಾ ಕ್ರಮಗಳನ್ನು ಜಾರಿಗೆ ತರುವಲ್ಲಿ ಕಂಪನಿಗಳು ವಿಫಲವಾದರೆ, ಆಯಾ ದೇಶಗಳ ಕಾಯ್ದೆಯನ್ವಯ ಭಾರಿ ಮೊತ್ತದ ದಂಡ ತೆರಬೇಕಾಗುತ್ತದೆ ಮತ್ತು ಕಾನೂನು ಕ್ರಮಗಳನ್ನು ಎದುರಿಸಬೇಕಾಗುತ್ತದೆ.
