ಬಹುಕಾಲದ ಗೆಳತಿ ಜತೆ ಎಂಗೇಜ್​ ಆದ ಪ್ರಿಯಾಂಕಾ ಗಾಂಧಿ ಪುತ್ರ ರೈಹಾನ್​! ಯಾರೀ ಅವಿವಾ ಬೇಗ್? Raihan Vadra

ನವದೆಹಲಿ: ಕಾಂಗ್ರೆಸ್​ ನಾಯಕಿ ಪ್ರಿಯಾಂಕಾ ಗಾಂಧಿ ಮತ್ತು ಉದ್ಯಮಿ ರಾಬರ್ಟ್​ ವಾದ್ರಾ ಅವರ ಪುತ್ರ ರೈಹಾನ್ ವಾದ್ರಾ ( Raihan Vadra ) ತಮ್ಮ ಬಹುಕಾಲದ ಗೆಳತಿ ಅವಿವಾ ಬೇಗ್ ಜತೆ ಎಂಗೇಜ್​ಮೆಂಟ್​ ಮಾಡಿಕೊಂಡಿರುವುದಾಗಿ ಇತ್ತೀಚಿನ ವರದಿಗಳು ತಿಳಿಸಿವೆ.

25 ವರ್ಷದ ರೈಹಾನ್​ ವಾದ್ರಾ ಹಾಗೂ ಅವಿವಾ ನಡುವೆ ಏಳು ವರ್ಷಗಳ ಗೆಳತನವಿದೆ. ಇತ್ತೀಚೆಗಷ್ಟೇ ರೈಹಾನ್​, ಆಕೆಗೆ ಪ್ರೇಮ ನಿವೇದನೆ ಮಾಡಿಕೊಂಡಿದ್ದಾರೆ. ಎರಡೂ ಕುಟುಂಬಗಳು ಅವರಿಬ್ಬರ ಪ್ರೀತಿಗೆ ಗ್ರೀನ್​ ಸಿಗ್ನಲ್​ ನೀಡಿದೆ ಎಂದು ಮೂಲಗಳು ತಿಳಿಸಿರುವುದಾಗಿ ಎನ್​ಡಿಟಿವಿ ವರದಿ ಮಾಡಿದೆ.

ಅಂದಹಾಗೆ, ಅವಿವಾ ಬೇಗ್​ ಕುಟುಂಬ ದೆಹಲಿ ಮೂಲದ್ದು. ಉಭಯ ಕುಟುಂಬಗಳ ನಡುವೆ ತುಂಬಾ ವರ್ಷಗಳಿಂದಲೂ ಆತ್ಮೀಯತೆ ಇದ್ದು, ಇದೀಗ ಸಂಬಂಧಿಕರಾಗಿ ಬಡ್ತಿ ಪಡೆಯಲಿದ್ದಾರೆ. ಮದುವೆ ಯಾವಾಗ ಎಂಬ ಪ್ರಶ್ನೆಗೆ ಸದ್ಯಕ್ಕೆ ಯಾವುದೇ ಉತ್ತರ ಸಿಕ್ಕಿಲ್ಲ. ಮುಂದಿನ ದಿನಗಳಲ್ಲಿ ಮದುವೆ ವಿಚಾರವಾಗಿ ಒಂದು ಸ್ಪಷ್ಟತೆ ಸಿಗುವ ಸಾಧ್ಯತೆ ಇದೆ.

ಅಂದಹಾಗೆ, ರೈಹಾನ್ ವಾದ್ರಾ ಓರ್ವ ವಿಸ್ಯುವಲ್​ ಆರ್ಟಿಸ್ಟ್​. ಕಳೆದ ಹತ್ತು ವರ್ಷದಿಂದಲೂ ತಮ್ಮ ಕ್ಯಾಮೆರಾ ಲೆನ್ಸ್ ಮೂಲಕ ಜಗತ್ತನ್ನು ಸೆರೆಹಿಡಿಯುವ ಕೆಲಸದಲ್ಲಿ ನಿರತರಾಗಿದ್ದಾರೆ. ಮುಂಬೈನ ಕೊಲಾಬಾದಲ್ಲಿರುವ ಆರ್ಟ್​ ಗ್ಯಾಲರಿ ಎಪಿಆರ್‌ಇ ಆರ್ಟ್ ಹೌಸ್‌ನಲ್ಲಿ ಲಭ್ಯವಿರುವ ಮಾಹಿತಿ ಪ್ರಕಾರ, ರೈಹಾನ್​ ಅವರು ವನ್ಯಜೀವಿಗಳನ್ನು, ಬೀದಿ ಬದಿಯಲ್ಲಿ ಕಾಣ ಸಿಗುವ ಅಪರೂಪದ ಕ್ಷಣಗಳನ್ನು ಮತ್ತು ಕಮರ್ಷಿಯಲ್​ ಫೋಟೋಗ್ರಫಿಯನ್ನು ಮಾಡುತ್ತಾರೆ.

2021ರಲ್ಲಿ ರೈಹಾನ್​, ತಮ್ಮ ಮೊದಲ ಏಕವ್ಯಕ್ತಿ ಪ್ರದರ್ಶನ 'ಡಾರ್ಕ್ ಪರ್ಸೆಪ್ಷನ್' ಅನ್ನು ನವದೆಹಲಿಯ ಬಿಕಾನೇರ್ ಹೌಸ್‌ನಲ್ಲಿ ಆರಂಭಿಸಿದರು. ಇಮ್ಯಾಜಿನೇಟಿವ್​ ಫ್ರೀಡಂ ಎಂಬ ಥೀಮ್​ ಮೂಲಕ ಪ್ರದರ್ಶನ ಪ್ರಾರಂಭಿಸಿದರು. 2017 ರಲ್ಲಿ ಶಾಲಾ ಕ್ರಿಕೆಟ್ ಪಂದ್ಯದ ಸಮಯದಲ್ಲಿ ರೈಹಾನ್​ ಅವರ ಕಣ್ಣಿಗೆ ಗಾಯವಾಗಿತ್ತು. ಇದಾದ ನಂತರ ಬೆಳಕು, ಸ್ಥಳ ಮತ್ತು ಸಮಯದೊಂದಿಗೆ ಅವರಿಗಾದ ಅನುಭವಗಳನ್ನೇ ಮುಖ್ಯವಾಗಿಟ್ಟುಕೊಂಡು ಈ ಪ್ರದರ್ಶನವನ್ನು ನಡೆಸಿದರು.

ಫೋಟೋಗ್ರಫಿ ಉತ್ಸಾಹ ರೈಹಾನ್​ ಅವರ ಬಾಲ್ಯದ ಕನಸಾಗಿತ್ತು. ಅದನ್ನು ಪ್ರೋತ್ಸಾಹಿಸಿದ್ದು, ತಾಯಿ ಪ್ರಿಯಾಂಕಾ ಗಾಂಧಿ ವಾದ್ರಾ. ರೈಹಾನ್​ ಅವರ ಅಜ್ಜ ಹಾಗೂ ಮಾಜಿ ಪ್ರಧಾನಿ ರಾಜೀವ್ ಗಾಂಧಿ ಅವರಿಗೂ ಛಾಯಾಗ್ರಹಣ ಅಂದರೆ ತುಂಬಾ ಇಷ್ಟವಿತ್ತು.

ಇನ್ನು ಅವಿವಾ ಬೇಗ್ ವಿಚಾರಕ್ಕೆ ಬಂದರೆ, ಆಕೆಯ ಇನ್ಸ್ಟಾಗ್ರಾಮ್ ಬಯೋ ಪ್ರಕಾರ, ಆಕೆ ಛಾಯಾಗ್ರಾಹಕಿ ಮತ್ತು ನಿರ್ಮಾಪಕಿಯಾಗಿದ್ದಾರೆ, (ಏಜೆನ್ಸೀಸ್​).