ಸಾವು ಕೂಡ ನಮ್ಮಿಬ್ಬರನ್ನು ಬೇರೆ ಮಾಡಲಾಗದು... ಯುವತಿಯ ಡೆತ್​ನೋಟ್​ ನೋಡಿ ಕಣ್ಣೀರಿಟ್ಟ ಕುಟುಂಬಸ್ಥರು! Prafulla Death

Prafulla Death: ಕಾಸರಗೋಡಿನ ಕುಂಬಳೆ ಸಮೀಪದ ಕಿಡೂರು ಕುಂದಂಕೆರಡ್ಕದ ಪ್ರಫುಲ್ಲಾ (26) ಎಂಬ ಯುವತಿ, ಜನವರಿಯಲ್ಲಿ ಕಾರು ಅಪಘಾತದಲ್ಲಿ ಮೃತಪಟ್ಟ ತನ್ನ ಭಾವಿ ಪತಿ ಮಣಿಯ ಅಗಲಿಕೆಯನ್ನು ತಾಳಲಾರದೆ ಭಾನುವಾರ (ಮೇ 10) ಮನೆಯಲ್ಲಿ ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ.

ಮಣಿಯ ಸಾವಿನ ನಂತರ ತೀವ್ರ ಖಿನ್ನತೆಗೊಳಗಾಗಿದ್ದ ಪ್ರಫುಲ್ಲಾ, ತನ್ನ ಪ್ರಿಯಕರನ ನೆನಪಿನಲ್ಲೇ ಜೀವನ ಕಳೆಯುತ್ತಿದ್ದರು. ಕೊನೆಯದಾಗಿ ತನ್ನ ಭಾವಿ ಪತಿಯ ಸಮಾಧಿಯ ಪಕ್ಕದಲ್ಲೇ ತನ್ನನ್ನು ಮಣ್ಣು ಮಾಡಬೇಕೆಂಬ ಆಕೆಯ ಆಸೆಯಂತೆ, ಶವವನ್ನು ತಮಿಳುನಾಡಿನ ತಿರುನಲ್ವೇಲಿಯಲ್ಲಿರುವ ಮಣಿಯ ಮನೆಗೆ ಕೊಂಡೊಯ್ದು ಅಲ್ಲಿಯೇ ಅಂತ್ಯಸಂಸ್ಕಾರ ನೆರವೇರಿಸಲಾಯಿತು. ಈ ದುರಂತ ಘಟನೆಯು ಆಕೆಯ ಕುಟುಂಬ ಮತ್ತು ಗ್ರಾಮಸ್ಥರಲ್ಲಿ ಭಾರೀ ಶೋಕ ಮೂಡಿಸಿದೆ.

ಪಾಲಕ್ಕಾಡ್‌ನಲ್ಲಿ ಹೋಟೆಲ್ ಮ್ಯಾನೇಜ್‌ಮೆಂಟ್ ಕೋರ್ಸ್ ಮಾಡುತ್ತಿದ್ದ ಸಮಯದಲ್ಲಿ ಪ್ರಫುಲ್ಲಾ ಅವರಿಗೆ ಹಣಕಾಸು ಸಂಸ್ಥೆಯ ಉದ್ಯೋಗಿ ಮಣಿಯ ಪರಿಚಯವಾಗಿ ಅದು ಪ್ರೇಮಕ್ಕೆ ತಿರುಗಿತ್ತು. ಮಣಿ ತನ್ನ ಕೆಲಸದ ನಿಮಿತ್ತ ಪಾಲಕ್ಕಾಡ್‌ಗೆ ಆಗಾಗ್ಗೆ ಭೇಟಿ ನೀಡುತ್ತಿದ್ದರು. ಹಣಕಾಸು ಸಂಸ್ಥೆಯಲ್ಲಿ ಕಾಯಂ ಉದ್ಯೋಗ ದೊರೆತ ನಂತರ ಮದುವೆಯಾಗುವುದಾಗಿ ಮಣಿ ಭರವಸೆ ನೀಡಿದ್ದು, ಅದರಂತೆ ಒಂಬತ್ತು ತಿಂಗಳ ಹಿಂದಷ್ಟೇ ಇವರಿಬ್ಬರ ನಿಶ್ಚಿತಾರ್ಥ ನಡೆದಿತ್ತು. ಉದ್ಯೋಗವೂ ಖಚಿತವಾಗಿದ್ದರಿಂದ ಈ ವರ್ಷದ ಮಳೆಗಾಲಕ್ಕೂ ಮೊದಲೇ ಮದುವೆಯಾಗಲು ದಂಪತಿ ನಿರ್ಧರಿಸಿದ್ದರು.

ಆದರೆ, ಜನವರಿಯಲ್ಲಿ ಸಂಭವಿಸಿದ ಭೀಕರ ಅಪಘಾತವೊಂದು ಈ ದಂಪತಿಯ ಎಲ್ಲಾ ಕನಸುಗಳನ್ನು ನುಚ್ಚುನೂರು ಮಾಡಿತು. ಅಪಘಾತದಲ್ಲಿ ಗಂಭೀರವಾಗಿ ಗಾಯಗೊಂಡು ವಾರಗಳ ಕಾಲ ಚಿಕಿತ್ಸೆ ಪಡೆಯುತ್ತಿದ್ದ ಮಣಿ, ಎರಡು ತಿಂಗಳ ಹಿಂದೆ ಸಾವಿಗೀಡಾದರು. ಮಣಿಯೊಂದಿಗೆ ಸುಂದರ ಜೀವನದ ಕನಸು ಕಂಡಿದ್ದ ಪ್ರಫುಲ್ಲಾ ಈ ಸಾವು ಕಂಡು ಸಂಪೂರ್ಣವಾಗಿ ಕುಗ್ಗಿ ಹೋಗಿದ್ದರು. ಕುಟುಂಬ ಸದಸ್ಯರೆಲ್ಲರೂ ಸಂಬಂಧಿಕರ ಮದುವೆ ಸಮಾರಂಭಕ್ಕೆ ತೆರಳಿದ್ದ ಸಮಯದಲ್ಲಿ, ಪ್ರಫುಲ್ಲಾ ಮನೆಯಲ್ಲಿ ಯಾರು ಇಲ್ಲದನ್ನು ನೋಡಿ ಆತ್ಮಹತ್ಯೆಗೆ ಶರಣಾಗಿದ್ದಾರೆ.

ತಮ್ಮ ಸಾವಿನ ನಂತರ ತನ್ನನ್ನು ಮಣಿಯ ಸಮಾಧಿಯ ಪಕ್ಕದಲ್ಲೇ ಹೂಳಬೇಕೆಂದು ಪ್ರಫುಲ್ಲಾ ಡೆತ್‌ನೋಟ್‌ನಲ್ಲಿ ವಿನಂತಿಸಿಕೊಂಡಿದ್ದರು. ಇದಕ್ಕೆ ಎರಡೂ ಕುಟುಂಬದ ಸದಸ್ಯರು ಒಪ್ಪಿಗೆ ಸೂಚಿಸಿದ ಹಿನ್ನೆಲೆಯಲ್ಲಿ, ಆಕೆಯ ಶವವನ್ನು ನಿನ್ನೆ ಮಧ್ಯಾಹ್ನ ತಮಿಳುನಾಡಿಗೆ ಕೊಂಡೊಯ್ಯಲಾಗಿದೆ. ಇಂದು ಬೆಳಗ್ಗೆ 9 ಗಂಟೆಯ ಸುಮಾರಿಗೆ ಶವವನ್ನು ಮಣಿಯ ಮನೆಗೆ ತಲುಪಿಸಲಾಗಿದ್ದು, ಆ ಮನೆಯ ಆವರಣದಲ್ಲಿಯೇ ಪ್ರಫುಲ್ಲಾ ಅವರ ಅಂತ್ಯಸಂಸ್ಕಾರ ನೆರವೇರಲಿದೆ. ಮೃತ ಪ್ರಫುಲ್ಲಾ ಅವರಿಗೆ ಪ್ರಮೋದಿನಿ ಮತ್ತು ಪ್ರಮೋದ್ ಕುಮಾರ್ ಎಂಬ ಇಬ್ಬರು ಸಹೋದರರಿದ್ದಾರೆ, (ಏಜೆನ್ಸೀಸ್​).