ಏಷ್ಯನ್ ಯು-20 ಅಥ್ಲೆಟಿಕ್ಸ್; 14 ವರ್ಷಗಳ ಹಳೆಯ ದಾಖಲೆ ಮುರಿದು ಇತಿಹಾಸ ಸೃಷ್ಟಿಸಿದ ಪೂಜಾ ಸಿಂಗ್‌ಗೆ ಚಿನ್ನದ ಪದಕ! | Pooja Singh

ಹಾಂಗ್ ಕಾಂಗ್‌ನಲ್ಲಿ ನಡೆದ ಸ್ಪರ್ಧೆಯಲ್ಲಿ 19 ವರ್ಷದ ಪೂಜಾ ಸಿಂಗ್, 1.93 ಮೀಟರ್ ಎತ್ತರಕ್ಕೆ ಜಿಗಿಯುವ ಮೂಲಕ ಈ ಅಭೂತಪೂರ್ವ ಮೈಲಿಗಲ್ಲು ಸ್ಥಾಪಿಸಿದರು. ಇದಕ್ಕೂ ಮುನ್ನ 2011 ರಲ್ಲಿ ಸಹಾನಾ ಕುಮಾರಿ ಬರೆದಿದ್ದ 1.92 ಮೀಟರ್‌ಗಳ ದಾಖಲೆಯನ್ನು ಪೂಜಾ ಈಗ ಅಳಿಸಿಹಾಕಿದ್ದಾರೆ. ಇದರೊಂದಿಗೆ ಏಷ್ಯನ್ ಯು-20 ಚಾಂಪಿಯನ್‌ಶಿಪ್‌ನ ಮಹಿಳಾ ಹೈಜಂಪ್‌ನಲ್ಲಿ ಚಿನ್ನದ ಪದಕ ಗೆದ್ದ ಮೊದಲ ಭಾರತೀಯ ಮಹಿಳೆ ಎಂಬ ಹೆಗ್ಗಳಿಕೆಗೂ ಅವರು ಪಾತ್ರರಾಗಿದ್ದಾರೆ.

ಪೂಜಾ ಈ ಅಮೋಘ ಸಾಧನೆ ಮುಂಬರುವ ಕಾಮನ್‌ವೆಲ್ತ್ ಕ್ರೀಡಾಕೂಟದ ಅರ್ಹತಾ ಮಾನದಂಡವನ್ನು (1.92 ಮೀಟರ್) ಯಶಸ್ವಿಯಾಗಿ ದಾಟಿದ್ದು, ಫೆಡರೇಶನ್ ಕಪ್ ಅನ್ನು ಅಂತಿಮ ಅರ್ಹತಾ ಸುತ್ತು ಎಂದು ಮೊದಲೇ ನಿರ್ಧರಿಸಲಾಗಿದ್ದರೂ, ಪೂಜಾ ಅವರ ಈ ಅಸಾಧಾರಣ ಪ್ರದರ್ಶನವನ್ನು ಪರಿಗಣಿಸಿ ಅಥ್ಲೆಟಿಕ್ಸ್ ಫೆಡರೇಶನ್ ಆಫ್ ಇಂಡಿಯಾ (AFI) ಅವರಿಗೆ ಕ್ರೀಡಾಕೂಟದಲ್ಲಿ ಭಾಗವಹಿಸಲು ವಿನಾಯಿತಿ ನೀಡಲಿದೆಯೇ ಎಂಬುದನ್ನು ಕಾದು ನೋಡಬೇಕಿದೆ.

ಈ ಭರ್ಜರಿ ಯಶಸ್ಸಿನ ಮೂಲಕ ಪೂಜಾ ಸಿಂಗ್ ಭಾರತದ ಸಾರ್ವಕಾಲಿಕ ಶ್ರೇಷ್ಠ ಮಹಿಳಾ ಹೈಜಂಪರ್ ಆಗಿ ಹೊರಹೊಮ್ಮಿದ್ದು, ಅಂತರರಾಷ್ಟ್ರೀಯ ಕ್ರೀಡಾ ವೇದಿಕೆಯಲ್ಲಿ ಭಾರತದ ಭವಿಷ್ಯದ ದೊಡ್ಡ ಭರವಸೆಯಾಗಿದ್ದಾರೆ(ಏಜೆನ್ಸೀಸ್​​).