ಬಂಗಾಳದಲ್ಲಿ ರಾಜಕೀಯ ಸಂಚಲನ; ಮಮತಾ ಬಣಕ್ಕೆ ತಳಮಳ: ಸಿಎಂ ಸುವೇಂದು ಗುಣಗಾನ ಮಾಡಿದ ಟಿಎಂಸಿ ಸಂಸದೆ! Mahua Moitra

ಮುಖ್ಯಮಂತ್ರಿ ಸುವೇಂದು ಅವರು ಬಿಜೆಪಿಗೆ ಸೇರಿರಬಹುದು, ಆದರೆ ಅವರೊಂದಿಗೆ ನನಗಿದ್ದ ವೈಯಕ್ತಿಕ ಮತ್ತು ಭಾವನಾತ್ಮಕ ಸಂಬಂಧ ಇಂದಿಗೂ ಹಾಗೇ ಇದೆ ಎಂದು ಕೃಷ್ಣನಗರ ಕ್ಷೇತ್ರದ ಲೋಕಸಭಾ ಸದಸ್ಯೆ ಮಹುವಾ ಮೋಯಿತ್ರಾ ಹೇಳಿರುವುದು ಟಿಎಂಸಿ ವಲಯದಲ್ಲಿ ದೊಡ್ಡ ಮಟ್ಟದ ಬುಸುಗುಡುವಿಕೆಗೆ ಕಾರಣವಾಗಿದೆ.

ಈ ಬಗ್ಗೆ ಸುದ್ದಿ ಸಂಸ್ಥೆಗೆ ನೀಡಿರುವ 23 ನಿಮಿಷಗಳ ಸುದೀರ್ಘ ಸಂದರ್ಶನದ ವಿಡಿಯೋವನ್ನು ಮಹುವಾ ಮೋಯಿತ್ರಾ ತಮ್ಮ ಅಧಿಕೃತ ‘X’ನಲ್ಲಿ ಹಂಚಿಕೊಂಡಿದ್ದಾರೆ. ಈ ಸಂದರ್ಶನದಲ್ಲಿ ಸಿಎಂ ಸುವೇಂದು ಅಧಿಕಾರಿ ಅವರೊಂದಿಗಿನ ತಮ್ಮ ಹಳೆಯ ದಿನಗಳನ್ನು ನೆನಪಿಸಿಕೊಂಡಿರುವ ಅವರು, ಸುವೇಂದು ಅವರೊಂದಿಗೆ ನನಗೆ ಅತ್ಯುತ್ತಮ ಒಡನಾಟವಿತ್ತು. ನಾವು ಒಟ್ಟಿಗೆ ಟಿಎಂಸಿ ಪಕ್ಷದಲ್ಲಿದ್ದಾಗ ಅವರು ನನಗೆ ಅಪಾರವಾಗಿ ಬೆಂಬಲ ನೀಡಿದ್ದರು. ನಾನು ಮೊದಲ ಬಾರಿಗೆ ಕರೀಂನಗರದಿಂದ ಚುನಾವಣೆಗೆ ಸ್ಪರ್ಧಿಸಿದಾಗ ನನ್ನ ಪರವಾಗಿ ನಿಲ್ಲಲು ಯಾರೂ ಇರಲಿಲ್ಲ, ಆದರೆ ಸುವೇಂದು ನನ್ನ ಬೆಂಬಲಕ್ಕೆ ನಿಂತರು. ಚುನಾವಣಾ ಪ್ರಚಾರದ ಬಾವುಟಗಳಿಂದ ಹಿಡಿದು ಪ್ರತಿಯೊಂದು ಅಗತ್ಯ ನೆರವನ್ನು ಅವರೇ ಒದಗಿಸಿದ್ದರು ಎಂದು ಸ್ಮರಿಸಿದ್ದಾರೆ.

ಟಿಎಂಸಿ ಪಕ್ಷವು ಸಂಸತ್ತಿನಲ್ಲಿ ಮತ್ತು ಪಶ್ಚಿಮ ಬಂಗಾಳದ ವಿಧಾನಸಭೆಯಲ್ಲಿ ಭಾರಿ ರಾಜಕೀಯ ಬಿಕ್ಕಟ್ಟನ್ನು ಎದುರಿಸುತ್ತಿರುವ ಈ ನಿರ್ಣಾಯಕ ಸಮಯದಲ್ಲಿ ಮಹುವಾ ಅವರ ಈ ಹೇಳಿಕೆ ಹೊರಬಿದ್ದಿರುವುದು ರಾಜಕೀಯ ತಜ್ಞರ ಹುಬ್ಬೇರಿಸಿದೆ. ಸದ್ಯ ಟಿಎಂಸಿಯ 20ಕ್ಕೂ ಹೆಚ್ಚು ಲೋಕಸಭಾ ಸಂಸದರು ಪಕ್ಷದ ನಾಯಕತ್ವದ ವಿರುದ್ಧ ಬಹಿರಂಗವಾಗಿ ಬಂಡಾಯ ಎದ್ದಿದ್ದು, ಬಿಜೆಪಿ ನೇತೃತ್ವದ ಎನ್‌ಡಿಎ ಮೈತ್ರಿಕೂಟಕ್ಕೆ ಬೆಂಬಲ ಘೋಷಿಸಿದ್ದಾರೆ.

ಇತ್ತ ಬಂಗಾಳ ವಿಧಾನಸಭೆಯಲ್ಲೂ ಟಿಎಂಸಿಯಿಂದ ಉಚ್ಚಾಟಿತಗೊಂಡಿರುವ ನಾಯಕ ರಿತಬ್ರತ ಬ್ಯಾನರ್ಜಿ ಅವರು ಬರೋಬ್ಬರಿ 64 ಶಾಸಕರ ಬೆಂಬಲದೊಂದಿಗೆ, ತಮ್ಮ ಬಣವೇ ಅಸಲಿ ಟಿಎಂಸಿ ಎಂದು 294 ಸದಸ್ಯರ ಬಲದ ಸದನದಲ್ಲಿ ಹಕ್ಕು ಮಂಡಿಸುತ್ತಿದ್ದಾರೆ. ಇಂತಹ ಆಂತರಿಕ ಕಲಹದ ಸಮಯದಲ್ಲಿ ವಿಪಕ್ಷದ ನಾಯಕನೂ ಆಗಿರುವ ಸಿಎಂ ಸುವೇಂದು ಅವರನ್ನು ಮಹುವಾ ಹೊಗಳಿರುವುದು ಪಕ್ಷದೊಳಗೆ ಸಂಶಯದ ಹುತ್ತ ಬೆಳೆಯುವಂತೆ ಮಾಡಿದೆ.

ಸಂದರ್ಶನದ ಹೇಳಿಕೆ ಭಾರಿ ವಿವಾದ ಹಾಗೂ ಚರ್ಚೆಗೆ ಕಾರಣವಾಗುತ್ತಿದ್ದಂತೆ ಎಚ್ಚೆತ್ತುಕೊಂಡ ಮಹುವಾ, Xನಲ್ಲಿ ಮತ್ತೊಂದು ಪೋಸ್ಟ್ ಮಾಡುವ ಮೂಲಕ ಪರಿಸ್ಥಿತಿಯನ್ನು ನಿಯಂತ್ರಿಸಲು ಯತ್ನಿಸಿದ್ದಾರೆ. ಸುವೇಂದು ಅವರೇನೂ ದೇವದೂತರಲ್ಲ. ಆದರೆ, ಪಕ್ಷದಲ್ಲಿದ್ದುಕೊಂಡೇ ಬೆನ್ನಿಗೆ ಇರಿಯುವ ಇತರ ದೇಶದ್ರೋಹಿಗಳಂತೆ ಮಾಡದೆ, ಧೈರ್ಯವಾಗಿ ಟಿಎಂಸಿ ತೊರೆದು ಬಿಜೆಪಿಯಿಂದ ಸ್ಪರ್ಧಿಸಿ ಗೆಲ್ಲುವ ಗಟ್ಸ್ ಅವರಿಗೆ ಇತ್ತು ಎಂದು ಬರೆದಿದ್ದಾರೆ.

ಅಲ್ಲದೆ, ತೃಣಮೂಲ ಕಾಂಗ್ರೆಸ್‌ನ ಸುಪ್ರಿಮೋ ಮಮತಾ ಬ್ಯಾನರ್ಜಿ ಅವರ ಮೃದು ಸ್ವಭಾವ ಹಾಗೂ ಮರುಕದ ಗುಣದಿಂದಾಗಿ ಪಕ್ಷದಲ್ಲಿ ಈ ಹಿಂದೆ ಆಗದಿದ್ದ ಶುದ್ಧೀಕರಣ ಪ್ರಕ್ರಿಯೆಯನ್ನು, ಸುವೇಂದು ಅಧಿಕಾರಿ ಅವರು ಪಕ್ಷ ತೊರೆಯುವ ಮೂಲಕ ಯಶಸ್ವಿಯಾಗಿ ನೆರವೇರಿಸಿಕೊಟ್ಟಿದ್ದಾರೆ ಎಂದು ಲೇವಡಿ ಮಾಡುವ ಮೂಲಕ ತಮ್ಮ ಹೇಳಿಕೆಗೆ ಮತ್ತೊಂದು ರಾಜಕೀಯ ಆಯಾಮ ನೀಡಲು ಮಹುವಾ ಕಸರತ್ತು ನಡೆಸಿದ್ದಾರೆ,(ಏಜೆನ್ಸೀಸ್​).