ಗಂಗಾ ನದಿಯಲ್ಲಿ ಬಿಯರ್ ಕುಡಿದು ಉದ್ಧಟತನ: ನೆಟ್ಟಿಗರ ಕೆಂಗಣ್ಣಿಗೆ ಗುರಿಯಾಗಿದ್ದ ಯುವಕನ ಹೆಡೆಮುರಿಕಟ್ಟಿದ ಖಾಕಿ! Drinking Beer in Ganga

ವಾರಣಾಸಿ: ಭಾರತೀಯರು ಕೇವಲ ದೇವಾಲಯದಲ್ಲಿ ಮಾತ್ರ ದೇವರನ್ನು ಕಾಣುವವರಲ್ಲ, ನದಿ, ಬೆಟ್ಟ ಸೇರಿದಂತೆ ಪ್ರಪಂಚದ ಅಣು-ಅಣುವಿನಲ್ಲೂ ದೇವರನ್ನು ಕಾಣುತ್ತಾರೆ. ಒಂದರ್ಥದಲ್ಲಿ ಇವರನ್ನು ಪ್ರಕೃತಿ ಆರಾಧಕರೆಂದರೂ ಅತಿಷಯೋಕ್ತಿ ಇಲ್ಲ.

ಆದರೆ ಕೆಲ ದಿನಗಳಹಿಂದೆ ಭಾರತದ ಪವಿತ್ರ ನದಿ, ಜೀವನದಿಯೆಂದೇ ಕರೆಯಲ್ಪಡುವ ಗಂಗಾನದಿಯಲ್ಲಿ ವ್ಯಕ್ತಿಯೊಬ್ಬ ಮಧ್ಯ ಸೇವಿಸುತ್ತಿರುವ (Drinking Beer in Ganga) ವಿಡಿಯೋವೊಂದು ವೈರಲ್​ ಆಗಿದ್ದು, ಈಗ ಆತನನ್ನು ಪೊಲೀಸರು ಬಂಧಿಸಿರುವುದಾಗಿ ತಿಳಿದು ಬಂದಿದೆ.

ಸೋಷಿಯಲ್​ ಮೀಡಿಯಾನಲ್ಲಿ ಹರಿದಾಡುತ್ತಿದ್ದ ವಿಡಿಯೋನಲ್ಲಿ ಮದ್ಯ ವಯಸ್ಸಿನ ಯುವಕನೊಬ್ಬ ಗಂಗಾ ನದಿಯಲ್ಲಿ ಸ್ನಾನ ಮಾಡುತ್ತಾ, ಬಿಯರ್​ ಹೀರುತ್ತಿರುವ ವಿಡಿಯೋ ನೆಟ್ಟಿಗರ ಕೆಂಗಣ್ಣಿಗೆ ಗುರಿಯಾಗಿತ್ತು.

ಗಂಗಾ ನದಿಯಲ್ಲಿ ಬಿಯರ್​ ಹೀರಿದ ಪ್ರಕರಣವನ್ನು ಬೆನ್ನತ್ತಿದ ವಾರಣಾಸಿ ಪೊಲೀಸರು, ಆ ಯುವಕನನ್ನು ಬಂಧಿಸಲು ಬಿಹಾರಕ್ಕೆ ತಮ್ಮ ತಂಡವನ್ನು ಕಳುಹಿಸಿದ್ದಾಗಿ ಎಸಿಪಿ ಅತುಲ್ ಅಂಜನ್ ತ್ರಿಪಾಠಿ ತಿಳಿಸಿದ್ದಾರೆ. ಜನರ ಧಾರ್ಮಿಕ ನಂಬಿಕೆಗೆ ಚ್ಯುತಿ ತಂದಿರುವ ಹಾಗೂ ಜೀವಜಲವನ್ನು ಮಲೀನ ಮಾಡಿರುವ ಆರೋಪದ ಮೇಲೆ ಪ್ರಕರಣ ದಾಖಲಿಸಲಾಗಿದೆ ಎಂದು ಅವರು ಹೇಳಿದ್ದಾರೆ.

ಭಾರತದ ಅತ್ಯಂತ ಪವಿತ್ರ ಮತ್ತು ಪ್ರಮುಖ ನದಿಯಾದ ಗಂಗೆಯನ್ನು ಮಾಲಿನ್ಯಮುಕ್ತಗೊಳಿಸಲು ಕೇಂದ್ರ ಸರ್ಕಾರವು ಜೂನ್ 2014 ರಲ್ಲಿ ‘ನಮಾಮಿ ಗಂಗೆ’ (Namami Gange Programme) ಎಂಬ ಮಹತ್ವಾಕಾಂಕ್ಷೆಯ ಯೋಜನೆಯನ್ನು ಪ್ರಾರಂಭಿಸಿತು. ಜಲಶಕ್ತಿ ಸಚಿವಾಲಯದ ಅಡಿಯಲ್ಲಿ ಬರುವ ರಾಷ್ಟ್ರೀಯ ಗಂಗಾ ನದಿ ಸ್ವಚ್ಛತಾ ಮಿಷನ್ (NMCG) ಈ ಯೋಜನೆಯ ಸಂಪೂರ್ಣ ಉಸ್ತುವಾರಿಯನ್ನು ನೋಡಿಕೊಳ್ಳುತ್ತಿದೆ.