ನವದೆಹಲಿ: ವಿಕಸಿತ ಭಾರತ ಪರಿಕಲ್ಪನೆಯಡಿಯಲ್ಲಿ ವಿವಿಧ ಸಚಿವಾಲಯಗಳು ಮತ್ತು ಸರ್ಕಾರಿ ಇಲಾಖೆಗಳು ಕೈಗೊಂಡಿರುವ ಕೆಲಸಗಳು ಹಾಗೂ ರೂಪಿಸಿರುವ ಮಾರ್ಗಸೂಚಿಗಳನ್ನು ಪರಿಶೀಲಿಸಲು, ಪ್ರಧಾನಿ ನರೇಂದ್ರ ಮೋದಿ ಅವರು ಇಂದಿನಿಂದ ರಾಷ್ಟ್ರ ರಾಜಧಾನಿಯಲ್ಲಿ ಸಚಿವ ಸಂಪುಟದೊಂದಿಗೆ ಚಿಂತನಾ ಶಿಬಿರ (Chintan Shivir) ಎಂಬ ಎರಡು ದಿನಗಳ ಸಭೆಯನ್ನು ನಡೆಸಲಿದ್ದಾರೆ ಎಂದು ವರದಿಯಾಗಿದೆ.
2047 ರ ವೇಳೆಗೆ ಭಾರತವನ್ನು ಅಭಿವೃದ್ಧಿ ಹೊಂದಿದ ದೇಶವನ್ನಾಗಿ ಮಾಡಲು ಸರ್ಕಾರ ಕೈಗೊಂಡಿರುವ ಕಾರ್ಯಗಳ ಪರಾಮರ್ಶೆ ನಡೆಸುವುದು, ಪ್ರಸ್ತುತ ಚಾಲನೆಯಲ್ಲಿರುವ ಯೋಜನೆಗಳ ಪರಿಶೀಲನೆ ಮಾಡುವುದು ಮತ್ತು ಮುಂದಿನ ಹಂತದ ವಿಚಾರಗಳು, ಸುಧಾರಣೆಗಳು ಹಾಗೂ ಆದ್ಯತೆಗಳನ್ನು ಗುರುತಿಸುವುದರ ಮೇಲೆ ಈ ಅಧಿಕೃತ ಸಭೆಯು ಗಮನಹರಿಸಲಿದೆ ಎಂದು ತಿಳಿದುಬಂದಿದೆ.
ವಿಕಸಿತ ಭಾರತ 2047 ಯೋಜನೆಗಾಗಿ 2021 ರಿಂದಲೇ ಕೆಲಸ ಸಾಗಿದೆ. ಇದಕ್ಕಾಗಿ ಕಾರ್ಯದರ್ಶಿಗಳ 10 ತಂಡಗಳನ್ನು ರಚಿಸಿ, ಅಲ್ಪಾವಧಿ ಮತ್ತು ದೀರ್ಘಾವಧಿಯ ಯೋಜನೆಗಳನ್ನು ಸಿದ್ಧಪಡಿಸಲಾಗಿತ್ತು. ಹಲವು ತಜ್ಞರೊಂದಿಗೂ ಸಮಾಲೋಚನೆ ನಡೆಸಲಾಗಿತ್ತು. ಅಂದಿನಿಂದ ಇಲ್ಲಿಯವರೆಗೆ ಕೇಂದ್ರ ಸಚಿವ ಸಂಪುಟವು ಈ ವಿಷಯದ ಕುರಿತು 8 ಬಾರಿ ಪ್ರಮುಖ ಚರ್ಚೆಗಳನ್ನು ನಡೆಸಿದೆ.
ಇದನ್ನೂ ಓದಿ:ಮೋದಿ ಸ್ವಾಗತಕ್ಕೆ ಎದುರುನೋಡುತ್ತಿದ್ದೇವೆ!...G20 ಶೃಂಗಸಭೆಯ ವೇಳೆಗೆ ವಾಣಿಜ್ಯ ಮಾತುಕತೆ ಪೂರ್ಣಗೊಳಿಸಲು ಕೆನಡಾ ಪ್ರಧಾನಿ ನಿರ್ಧಾರ! | Canada-IndiaTrade
ಚಿಂತನಾ ಶಿಬಿರದ ಕಾರ್ಯಸೂಚಿ ಏನು..?
ಈ ಚಿಂತನಾ ಶಿಬಿರವು ಕಾರ್ಯದರ್ಶಿಗಳ ಗುಂಪುಗಳು, ಸಚಿವಾಲಯಗಳು, ಇಲಾಖೆಗಳು, ಸಂಪುಟ ಸಚಿವಾಲಯ ಮತ್ತು ನೀತಿ ಆಯೋಗ ಕೈಗೊಂಡಿರುವ ಕೆಲಸಗಳನ್ನು ಒಗ್ಗೂಡಿಸಿ ಈ ಪ್ರಕ್ರಿಯೆಯನ್ನು ಮುಂದಕ್ಕೆ ಕೊಂಡೊಯ್ಯಲಿದೆ. ಆಡಳಿತಾತ್ಮಕ ಸುಧಾರಣೆಗಳು, ಸುಲಭ ಜೀವನಶೈಲಿ, ನಿಯಮಗಳ ಪಾಲನೆಯ ಹೊರೆ ತಗ್ಗಿಸುವುದು ಹಾಗೂ ಆಡಳಿತದ ಇತರ ಆದ್ಯತೆಗಳ ಕುರಿತು ಈ ಸಭೆಯಲ್ಲಿ ಚರ್ಚೆಗಳು ನಡೆಯಲಿವೆ.
ಸೆಪ್ಟೆಂಬರ್ 23-24 ರಂದು ನಡೆಯುವ ಸಭೆ ಮಾತ್ರವಲ್ಲ, ಮುಂಬರುವ ದಿನಗಳಲ್ಲಿ ಇನ್ನಷ್ಟು ಸುತ್ತಿನ ಚರ್ಚೆಗಳು ನಡೆಯುವ ನಿರೀಕ್ಷೆಯಿದೆ ಎಂದು ಸರ್ಕಾರಿ ಮೂಲಗಳು ತಿಳಿಸಿವೆ. 2047ರ ವೇಳೆಗೆ ಭಾರತವನ್ನು ಅಭಿವೃದ್ಧಿ ಹೊಂದಿದ ದೇಶವನ್ನಾಗಿ ಮಾಡಲು ಶ್ರಮಿಸುವುದಕ್ಕೆ ಪ್ರಧಾನಿ ಮೋದಿ ಅವರು ಪದೇ ಪದೇ ಒತ್ತು ನೀಡಿದ್ದು, ಈ ಗುರಿಯನ್ನು ತಲುಪುವ ನಿಟ್ಟಿನಲ್ಲಿ ಪ್ರಯತ್ನಗಳನ್ನು ಬಲಪಡಿಸಲು ಅನೇಕ ಕೇಂದ್ರ ಸಚಿವರು ಕೂಡ ಚಿಂತನಾ ಶಿಬಿರಗಳನ್ನು ನಡೆಸಿದ್ದಾರೆ.
